跳去內容

粵語聲調

出自維基百科，自由嘅百科全書
(由九聲六調跳轉過嚟)

粵語聲調指粵語入面可以分析出嘅聲調。用唔同定義計出來嘅聲調數目未必一樣。以標準粵語（即粵海片廣州話）而言，一般有「九聲六調」嘅講法。

粵語方言

[編輯]
内文：粵語方言分片

粵語以珠江三角洲爲中心，流行於廣東、廣西、香港、澳門、越南東北部（山由族聚居地）同埋海外華人社區，依據唔同地域嘅語音同埋用詞，可以劃分做多個方言片，包括粵海片（廣府片）、莞寶片、羅廣片、四邑片、高陽片、邕潯片、勾漏片、欽廉片、吳化片，唔同學者之間嘅分片多寡可能略有差異。而每個方言片之下，都有三幾種至十幾、廿幾種方言。此外，仲有海南西部人士講嘅儋州話、邁話等等嘅未分片粵語方言。由於唔同粵語方言間嘅實際語音皆有差異，因此佢哋嘅聲調數量同埋具體調值會唔一樣。

下文都係以標準粵語爲例。

聲調計法

[編輯]

聲調嘅定義亦影響到聲調數量嘅計法。

喺語言學分析上，聲調嘅常用定義係一種附着於音節嘅高低抑揚，又稱「音高」或「調值」。只要調值一樣，就視爲同一聲調，唔使考慮其他因素。

喺漢語音韻學上，聲調嘅意義就包涵咗抑揚同埋頓挫，抑揚就係前述嘅「音高」或「調值」，頓挫就關係到佢係舒聲定係促聲，具體操作上，取決於佢有冇入聲嘅輔音韻尾。

九聲調

[編輯]

如果依據傳統漢語音韻學嘅定義，即使兩個音節調值一樣，都要再睇佢係咪帶入聲韻尾，即係佢嘅頓挫性質係咪一樣，而決定佢哋係咪唔同聲調。按照呢個標準，標準粵語嘅聲調有9個，分別係：1. 陰平、2. 陰上、3. 陰去、4. 陽平、5. 陽上、6. 陽去、7. 上陰入（陰入）、8. 下陰入（中入）、9. 陽入。1940年代開發嘅黃錫凌羅馬拼音，同埋1970年代開發嘅教育學院拼音方案，都採用呢種定義，以數字1至9嚟標示9個聲調。喺呢種情況下，要判別一個字係咪屬於入聲，可以淨係睇標調嘅代表數字係咪7、8、9，亦可以睇埋佢拼音嘅韻尾字母係咪-p、-t、-k。

六聲調

[編輯]

如果依據語言學分析上嘅定義，只要兩個音節嘅調值一樣，就視爲同一聲調。按此，標準粵語嘅聲調有6個，分別爲：1. 陰平＋上陰入、2. 陰上、3. 陰去＋下陰入、4. 陽平、5. 陽上、6. 陽去+陽入。1993年開發嘅香港語言學學會粵語拼音方案，就採用呢種定義，以數字1至6嚟標示6個聲調。喺呢種情況下，要判別一個字係咪屬於入聲，必須睇佢拼音嘅韻尾字母係咪 -p、-t、-k ，唔能夠淨係睇標調嘅代表數字。

九聲六調

[編輯]

綜合上述兩種情況，平時粵語人士會講粵語有「九聲六調」。「九聲」嘅「聲」代表傳統漢語音韻學上嘅完整聲調。「六調」嘅「調」代表唔理會頓挫性質嘅單純調值，即係現代語言學嘅計法，當中陰平同上陰入嘅分別、陰去同下陰入嘅分別、陽去同陽入嘅分別，都係喺頓挫性質度，唔係喺調值度。

超出九聲調

[編輯]
内文：變調

上述嘅聲調計法，只係包括咗平常嘅發音，唔包括好似小稱變調、口語嘅下陽入等等少數字嘅變調或者口頭讀音。所以連同變調，粵語嘅聲調可以視爲有十一聲，甚至十三聲[1]。但係如果唔計頓挫性質，就仍然唔超出六調嘅六種高低調值。

陰平係各聲調中調值最高嘅，一啲文獻[2][3]將陰平高平同埋高降兩種變體分開記錄，其中呢種作為小稱變調同埋名詞性變調嘅高平又叫「超平」[4][5]或者「中平」[2]，例如「月光」嘅「光」、「曹操」嘅「操」。另一種變調（見「變入」）就係將陽入或者下陰入聲提到同陰上聲一樣嘅音高（入聲本無嗰個音高），有人稱之為「上soeng5入」[5]或者「新入」[6]，例如「蝴蝶」嘅「蝶」。同一句末語氣助詞變調會影響原句語氣[7]。

除咗音高變化之外，句末音節亦都有時長變化，會影響語句口吻[8]。

歷史源流

[編輯]

對於形成粵語唔同聲調嘅計法，有硏究者追溯歷史上對「聲調」嘅睇法。目前比較新嘅成果，傾向認爲上古漢語冇分音高，但係有唔同輔音結尾。後來，唔同嘅輔音結尾漸漸演變成某啲聲調特徵。喺上古漢語後期，可能已出現咗多種唔同調值，但輔音結尾仲係保留住嘅[1]。

嚟到中古漢語，「平、上、去、入」四聲肯定已經獲當時嘅人確立。呢個時候，四聲嘅唔同調值，反而成爲咗區分嘅重點，並導致原來嘅輔音結尾變成非必要嘅區分元素，而慢慢脫落，噉就係聲調起源（Tonogenesis）嘅過程。再進一步，聲母嘅嘅濁音也慢慢消失，改爲以調值來區分，清音同埋濁音分別演化成「陰」、「陽」嘅唔同聲調，「四聲」因變成「八聲」[9]。

唔同漢語方言演變出來嘅具體調值未必一致。然而「平、上、去、入」四聲中嘅「入聲」，即使到中古漢語嘅後期，仍保留着塞音韻尾，令佢未必需要跟前三者嘅調值唔相同，有可能仍然維持依靠韻尾來區分。以粵語嘅情況，入聲嘅調值可能長期與去聲一樣。即使清濁聲母演變成「陰」同埋「陽」兩套唔同調值後，陰入嘅調值仍可能跟陰去一樣，陽入嘅調值仍可能跟陽去一樣[1]。

最後，陰入聲因應元音長短唔同，逐漸分裂成上陰入（又叫「陰入」，另外亦都叫「上soeng6入」，不過為免令讀者同「上soeng5入」混淆，呢篇文唔用呢個叫法[2]）同下陰入（又叫「中入」[2]）兩種調值，粵語喺傳統音韻學嘅「九聲」因而形成。然而，下陰入嘅調值仍然同陰去一樣，而分化出來嘅上陰入就同陰平有一樣調值。結果粵語喺語言學度，只計調值，唔計頓挫性質，就係「六調」，好似下表噉[9]：

粵語可行嘅調值
調序 調1 調2 調3 調4 調5 調6
調字 尖 陡 亢 沉 仰 下
調值 55；53 35 33 11；21 13；23 22
調形
（國際音標） 		˥；˥˧ ˧˥ ˧ ˩；˨˩ ˩˧；˨˧ ˨
舒聲類 陰平 陰上 陰去 陽平 陽上 陽去
入聲類 上陰入
（陰入）		 註1 下陰入
（中入）		 註2 陽入
  • 註1：入聲字喺小稱變調時（「變入」），例如「請帖」嘅「帖」字、「麻雀」嘅「雀」字、「手鈪」嘅「鈪」字、人名「小玉、美玉、寶玉」嘅「玉」字，聲調如此。
  • 註2：口語會有相當於陽平調調值嘅入聲調，例如呢幾個帶擬聲性質嘅例子：「一啖嗗落喉嚨」嘅「嗗（gut4）」字、「瞓到goet4 goet2聲」嘅「goet4」字、「咪再gok4道門啦」嘅「gok4」字等等。

標準粵語聲調系統

[編輯]
標準粵語嘅聲調
聲調名稱 陰平 陰上 陰去 陽平 陽上 陽去 上陰入 下陰入 陽入
調值 55；53 35 33 11；21 13；23 22 5 3 2
國際音標 ˥；˥˧ ˧˥ ˧ ˩；˨˩ ˩˧；˨˧ ˨ ˥ ˧ ˨
漢字舉例 分 粉 訓 焚 憤 份 忽 發 佛
代表數字 1 2 3 4 5 6 1；7 3；8 6；9
粵拼 fan1 fan2 fan3 fan4 fan5 fan6 fat1 faat3 fat6
教院拼音 fan1 fan2 fan3 fan4 fan5 fan6 fat7 faat8 fat9

九聲口訣

[編輯]
粵語九聲口訣[10]
陰平 陰上 陰去 陽平 陽上 陽去 上陰入 下陰入 陽入
三 九 四 零 五 二 七 八 六
三 碗 細 牛 腩 麵 餿 夾 辣
番 茄 醬 牛 肚 飯 一 百 碟
周 口 店 河 姆 渡 骨 甲 集
輕 走 過 田 野 路 不 吃 力
他 只 愛 羊 肚 但 不 吃 辣
踎 喺 汕 頭 有 近 一 百 日
千 幾 個 肥 女 士 即 節 食
纖 體 過 龍 會 累 積 惡 疾
黐 咗 線 流 馬 尿 即 嚇 窒
衰 鬼 正 男 老 豆 不 吃 藥
斟 酒 當 賠 禮 係 必 殺 着
終 審 判 刑 也 未 得 發 落
張 仔 要 同 我 哋 織 隻 襪
開 採 噴 泉 會 用 叻 策 略
它 減 四 除 以 二 得 八 十
山 火 再 燃 企 望 給 撲 滅
香 港 靠 誰 領 導 出 惡 局
差 佬 去 元 朗 度 捉 惡 賊
囂 警 到 元 朗 站 即 嚇 窒
君 可 見 娥 吮 共 的 雀 肉
中 遣 送 無 允 訟 積 惡 獄
香 港 眾 贏 老 共 克 惡 敵
加 反 眾 嫖 買 罪 畜 設 局

其他粵語聲調現象

[編輯]

聲調混同／未分化

[編輯]

有啲方言嘅有啲調類喺發展過程中並冇分化，或者係混同咗。聲調混同可以分為兩種形式，即係發音混同同埋感知混同。對於後生嘅香港粵語人，女性喺保持聲調對立呢方面要好過啲男性[11]。學術上一般用T（Tone）加數字表示第幾聲，噉樣T3、T6就同時表達廣州話嘅去聲同入聲。表列如下：

T序與一般稱呼對應表
T序 T1 T2 T3 T4 T5 T6
調字 尖 陡 亢 沉 仰 下
調值 55；53 35 33 11；21 13；23 22
調形
（國際音標） 		˥；˥˧ ˧˥ ˧ ˩；˨˩ ˩˧；˨˧ ˨
舒聲類 陰平 陰上 陰去 陽平 陽上 陽去
入聲類 上陰入
（陰入）		 「變入A」 下陰入
（中入）		 「變入B」 陽入

由於舒聲、入聲嘅對應關係，有時舒聲混埋咗、對應嘅入聲都會混埋。

T2、T5混

[編輯]

亦即係陰上同陽上混同。常見於後生嘅香港[11]、廣州[12]、特別係澳門[13]粵語人，同埋某啲方言（中山石岐話，降升調214[14]）。

T3、T6混

[編輯]

亦即係陰去同陽去、下陰入同陽入混同，常見於後生嘅香港[11]、廣州[12][15]、特別係澳門[13]粵語人，同埋某啲方言（中山石岐話，中平調33[14]）。對於廣州後生人嚟講，女仔混得要嚴重過男仔[15]。

T3、T5混

[編輯]

亦即係陰去同陽上混同，見於某啲方言（中山三角鎮話，陰去歸陽上213[14]）。香港都有混同嘅傾向，體現為某啲字音永久改唨個調（「愧kwai3>5」「藴wan3>5」「臼kau5>3」）、存有兩調（「宿舍se3~5」「快faai3~5啲啦」「似ci5~3乎」「佢keoy5~3」）抑或按義分化成兩調（「測試si3」戥「考試si5」、「大舅kau5」戥「舅kau3父」）[16]。

有人認為喺《粵音韻彙》之中已出現唨一字兼讀兩音嘅端倪，體現為記一個聲調為標準音之外、仲記有第個聲調嘅音；而香港啲混淆現象嘅背後原因可能係出於強調、意義分化、用字混淆抑或係低升調發音相對困難或者難以同陰去中平調區分。[16]

喺某啲方言都有類似香港嘅個別字混同或者改調現象，譬如欽州白話（「似ci3」「佢ki3」「會wui3」）[17] 、茂名白話（「以ji3」）。

T4、T6混

[編輯]

亦即係陽平同陽去混同，常見於某啲方言，同埋少部分後生香港[11]、廣州[12]粵語人。無論係出於方言內部陽平、陽去調值相近，抑或係出於陽平、陽去啲唔同來源層次嘅互相影響（譬如陽平降調、陽去平調層次同陽平平調、陽去降調層次撈埋），都好易造成陽平去混同嘅現象。

T1、T3混

[編輯]

亦即係陰平同陰去混同，常見於四邑話（台山話混同為中平調33，新會話混同為中升調23），亦見於其他方言（中山古鎮話，中平調33[14]）。但四邑話入聲調值對應平聲、上聲，所以入聲並冇混同（見第啲舒入對應關係）。某啲後生嘅廣州粵語人發音上都有混同[12]。

陰入唔分上下

[編輯]

某啲方言淨係得一個陰入，譬如貴港話、蒙山話、靈山話、小江話等等。

聲調分立

[編輯]

陽入分上下

[編輯]

喺某啲勾漏片粵語，譬如鬱林話等等，陽入都會分埋上下，類似陰入按元音長短分上下噉。與此相對，變調對應嘅「下陽入」一般就歸入「變入」，而唔屬於音韻體系呢層嘅陽入分上下。

送氣分調

[編輯]

喺某啲勾漏片粵語（例如博白、桂平尋旺），陰聲會因應送氣聲母（好多係次清）而分化出送氣調。

獨立入聲

[編輯]

有啲粵語方言有獨立入聲，獨立於中古聲調演變嚟嘅四聲八調體系之外，多數喺口語詞度用，轄字比較少，譬如廉州話嘅高入[18]。

廉州話聲調
舒聲 陰平 陰去＋陽平 上聲 陽去
調值 45 33 13 21
入聲 高入 上陰入 下陰入 陽入
調值 5 33 13 21

獨立變調

[編輯]

十位數喺二十以上口語變降調，如廿（二十）、卅（三十）。例句：有二百卅幾個人嚟咗參賽。

有啲粵語方言，變調（譬如小稱變調）好難歸入四聲八調體系入面嘅某一類，就歸入獨立變調。譬如東莞塘角話嘅獨立變調[19]，同埋鬱林話嘅三個獨立小稱變調（*44、*24、*45）。

變入

[編輯]

某啲情況下無論陰陽、無論元音音韻地位，入聲都會因變調（譬如小稱變調）而唔同於音韻體系原有嘅入聲，呢啲即係「變入聲」（廣州話入邊個變入，有啲人又叫「新入」[6]）。譬如廣府粵語入邊對應陰上（35）嘅小稱變入（「變入A」），四邑話入邊仲有對應陽上（21/11）調值嘅小稱變入（「變入B」）等等。

第啲舒入對應關係

[編輯]

有啲舒聲、入聲喺調形上邊雖然有少少差別，之但係都可以睇作係「平去－入」對應嘅，譬如語言變體個陰平係高升（45等）（高明、北海、欽州等）抑或高降（53等）（梧州、茂名等）抑或兩者兼有（肇慶、浦北福旺等），而個上陰入就係相對短促嘅高音（5），平聲同入聲大體上仲係互相對應。

有啲粵語方言，舒聲戥入聲會有唔同於「平去入」對應嘅對應關係，譬如四邑話嘅「上平－入」對應關係，以台山話為例：

台山話聲調（上平－入對應）
舒聲 陰平去 陰上 陽平 陽上 陽去
調值 33 55 22 21/11 31
入聲 下陰入 上陰入 陽入 變入
調值 3 5 2 1

又譬如鬱林話嘅「平上去－入」嘅對應關係：

鬱林話聲調（平上去－入對應）
舒聲 陰平 陰上 陰去 陽平 陽上 陽去
調值 454 33 52 232 13 21
入聲 上陰入 下陰入 上陽入 下陽入
調值 5 3 12 1

睇埋

[編輯]

註釋

[編輯]
  1. ↑ 1.0 1.1 1.2 阿擇 （Chaaak） (2018-09-16)。〈粵語聲調 6 個 定係 9 個？〉。Medium (中文)。喺2020-01-20搵到。
  2. ↑ 2.0 2.1 2.2 2.3 Dyer Ball, James (1888). Cantonese Made Easy 《簡明粵語》. 香港.
  3. ↑ 白宛如 (1998)。《廣州方言詞典》。南京：江蘇教育出版社。ISBN 7-5343-3434-9。
  4. ↑ 黃錫凌 (1941)。《粵音韻彙》。中華書局。
  5. ↑ 5.0 5.1 杜氏昆仲 吳建成 編著。〈引子〉. 《《粵音尋正讀－－音解淺談篇》》 (香港中文)。交流出版社。ISBN 978-9-6289409-9-8。
  6. ↑ 6.0 6.1 李新魁; 黃家教; 施其生; 麥耘、陳定方 (1995)。《廣州方言研究》。廣州：廣東人民出版社。
  7. ↑ 〈丁思志（香港大學語言學系）：從語調到聲調——以粵語句末語氣助詞"呀"、"喎"爲例（From Intonation to Tone — The Case of Utterance-Final Particles "aa" and "wo" in Cantonese）〉。原著喺2018-07-05歸檔。喺2018-07-04搵到。
  8. ↑ 麥耘（中國社會科學院）：廣州話嘅句末促語調同埋長語調（The Quick Intonation and the Protracted Intonation in the Sentence-final Position in Cantonese），2018年1月。
  9. ↑ 9.0 9.1 張群顯（香港理工大學） (2016-11-01)。〈從中古四聲到現代粵語六調〉 (PDF) (中文)。喺2020-01-20搵到。
  10. ↑ 頭18句來自：〈聲調篇：粵語聲調〉。《中文字元資料頁：粵語拼盤》。原先內容歸檔喺2019-06-03。喺2019-06-03搵到。。
  11. ↑ 11.0 11.1 11.2 11.3 梁源 (2017)。〈聲調變異中的發音與感知機制：以香港粵語為例〉。《中國語文》 (2017:6): 723–732。
  12. ↑ 12.0 12.1 12.2 12.3 梁源 (Aug 2015)。〈粵語聲調演變機制初探——香港話與廣州話聲調混同的比較〉。《南方語言學》。
  13. ↑ 13.0 13.1 貝先明、向檸。〈穗、港、澳三地粵語單字調的聲學比較分析〉。《第十一屆中國語音學學術會議論文集》: 80–84。
  14. ↑ 14.0 14.1 14.2 14.3 蔡燕華 (2006)。《中山粵方言的地理語言學研究》 [Geographical Linguistic Studies of the Cantonese used in Zhongshan] (論文)。暨南大學。
  15. ↑ 15.0 15.1 李書嫻 (Feb 2008)。〈關於廣州話陰去調和陽去調的聽辨實驗〉。《《方言》》 (2008:1): 34–39。
  16. ↑ 16.0 16.1 黃得森 (Jan 2008)。"The Beginning of Merging of the Tonal Categories B2 and C1 in Hong Kong Cantonese" 〈香港粵語陽上陰去相混之始〉。《中國語言學報》。36 (1): 155–174。
  17. ↑ 《欽州白話》。欽州市地方誌辦公室。2019。
  18. ↑ 王宗孟 (1990)。〈廉州話的聲韻調〉。《廣西民族學院學報》 (2): 154–157。
  19. ↑ 陳賀周 (2015)。《莞語探源：東莞方言語言研究及詞語考釋》。廣州：世界圖書出版廣東有限公司。頁 6。ISBN 978-7-5192-0279-8。

出面網頁

[編輯]
由「https://zh-yue.wikipedia.org/w/index.php?title=粵語聲調&oldid=2061962」收