博雅山莊
博雅山莊又叫渭濱城（英文：Wai Bun Castle），位於香港沙田區大圍城門河河畔，鄰近美城苑，係一座休憩遊樂公園場地。
起源
[編輯]「博雅山莊」嘅前身係梅苑別墅同合興隆魚翅廠，原本佔地41,909平方呎。1971年，總探長呂樂用渭濱置業有限公司（Wai Bun Land Investment Company Limited）嘅名義買咗，當做佢嘅度假別墅。有傳聞話呢座別墅其實係間地下賭場。
嗰陣時，成座博雅山莊俾被幅十幾呎高嘅大麻石城牆包圍住，所以附近啲村民叫佢做萬里長城。博雅山莊出入口同盡頭都有大閘：正閘同後閘，頂上刻住「博雅山莊」嘅橫匾，仲有「癸丑春立」四個字，即係話1973年春天起好嘅。仲有一個刻住「渭濱城」橫匾嘅車道。入到正閘，有另一個拱門，上面寫住「晚清」，仲有呂姓嘅對聯：「莆田世澤，渭水家聲。」後面係大廳、工人房、廚房同埋儲物室，經過鑲咗大理石嘅長廊，上到2樓有9間房，其中2間有盥洗室。主樓外面有個池塘同個超大假山，假山入面有個漢白玉石蓮座嘅觀音像。池塘西邊係「龍津閣」中式樓閣；東邊係「博苑」涼亭。
渭濱置業有限公司攞博雅山莊做抵押，向香港國際酒樓集團借咗6百萬港紙，1973年，呂樂經加拿大移民去咗台灣。1977年到1987年間，酒樓喺博雅山莊度開咗間叫國際城嘅園林式中國餐廳。不過1987年2月政府為咗起城門隧道公路，收返咗部分地，嗰陣時大部分博雅山莊嘅建築都拆咗，搞到博雅山莊一分為二。剩低未拆嘅私人花園（包括池塘同龍津閣）之後被新鴻基地產買咗（本來諗住起曉翠山莊嘅後續期數），2004年補咗地價，喺2005-06年拆咗重建，變成而家嘅壹號雲頂第一同第三期。