海防道兒童遊樂場

右林為兒本場，左林為九龍公園，中間馬路，九龍公園徑分開兩者

海防道兒童遊樂場，香港公園之一，遊樂場之一，喺尖沙嘴九龍公園徑，英文叫Haiphong Road Children's Playground。行政上歸油尖旺區。設有兒童遊樂場，後設為寵物共享公園，以及狗糞收集箱。公園全日開放。歸康樂及文化事務署管。場內禁煙。

史

舊名

笪地原本為威菲路兵房，二十世紀七十年代，轉做九龍公園。同時開條大馬路，由梳利士巴利道近青年會，斜插入官涌廣東道。故此有段三角地淨低，就開咗個兒童遊樂場。

個場原本叫九龍公園徑兒童遊樂場，英文則名Kowloon Park Drive Children's Playground。原名只以佢貼住馬路，九龍公園徑而名。之不過，佢同九龍公園名好似，地方好近，然而又唔相通，怕人誤以為去到九龍公園。二〇一五年十二月四號刊憲改成現名。

地理

場畧呈直角三角形，窄身，設喺山上，為九龍公園坐山餘邊。南高北低。東邊全為廣東道一排商業大廈後欄。北邊就係海防道。而西邊為馬路九龍公園徑。

園外九龍公園徑，齋做大馬路，無設行人路，無預人行，無預人上落車，故此無門入。要入只能南面海防道，拾級而上。又或者，北面由廣東道，行去大廈後欄入園。

布局

兒童遊樂場

園中種得多大樹，鬱鬱成林。南面高地，有兒童遊樂設備，好似韆鞦、滑梯咁。北面低地，北端有座瞭望塔。