百子里公園

百子里公園

特色涼亭

公園遊樂場

百子里公園，香港公園之一，遊樂場之一，喺中環山上，英文叫Pak Tsz Lane Park。公園喺百子里，百子里好隱閉，與三家里相連。公園實情畀唐樓包圍，喺結志街、卑利街、荷李活道，同鴨巴甸街中間。公園係孫中山史蹟徑一部分，面積一萬七千呎，呂元祥建築師事務所畫則，康樂及文化事務署管。

沿革

公園由市區重建局起嘅，二〇一〇年動工，耗資四千萬港元，二〇一一年十月中完工，同年年底開幕。

建築

公園依山而建，有兩層設計。仿二十世紀初中環舊民居。公園右方，有段四五十米長嘅革命歷史展覽，展示一八九五年到一九〇三年革命史，尤其有講輔仁文社興衰四段，講及楊衢雲同謝纘泰等人，一八九二年成立文社。其後文社各人，加入香港興中會，同孫文喺一八九五年末部署廣州起義，不幸敗露。一九〇〇年，策動惠州起義失敗，楊衢雲身分暴露，翌年為大清暗殺、孫文撰寫悼念書信石雕、謝纘泰欲報仇，於一九〇三年廣州策劃第三次起義失敗後，輔仁文社漸漸地淡出革命史及資料。公園亦展示輔仁文社創立時社員合照，以及設立發光二極管觸控式螢幕展示革命資料。

「輔仁文社序」亭架背面

公園分三區，結志街入口可通往「革命起源展示區」，展示區內，有座四米闊、五米高嘅亭架，刻有反清《輔仁文社序》。上面有創會會員所寫「人欲明道達理，必先內修心性，外盡倫常」等的字句，地上亦刻有以英文所寫成社綱原文。亭架內設古人銅像，顯示當年剪辮情景。

百子里史

楊衢雲、謝纘泰等創輔仁文社，原址就喺百子里一號，今日百子里大廈，亦即公園邊。

獎項

二〇一一三年，公園得香港建築師學會頒授境內優異獎──社區建築、美國建築師學會（香港分會）頒發都市設計優異獎，以及香港設計中心頒發亞洲最具影響力設計銅獎，以表揚其卓越建築設計。