春秋

  想搵第二個意思嘅話，請睇春秋 (搞清楚)。

春秋諸侯

春秋諸侯分佈圖

春秋諸侯大國簡圖

春秋（粵拼：ceon1 cau1；前770年—前476年/前453年/前403年），又叫春秋時代（ceon¹ cau¹ si⁴ doi⁶），係中國史中嘅東周前期，響西周同戰國之間。春秋經常同戰國合埋做春秋戰國，而春秋戰國就介乎於周室東遷同秦朝統一中國之間，而春秋就相當係春秋戰國嘅前半期。

「春秋」嘅名出自孔子修訂嘅《春秋》，呢本書所記嘅時間係魯隱公元年（前722年）到魯哀公十四年（前481年），而而家一般講嘅春秋時代，係從周平王元年（前770年）周室東遷，到周敬王四十四年（前476年）爲止，呢個係《史記》嘅分法。亦有人將三家分晉（前403年）當做春秋同戰國嘅界限（《資治通鑒》嘅分法），同時又有人話三家滅智（前453年）時春秋就已經過咗喇。

成個東周都係春秋戰國，意味住周天子失共主約束之力。而啲諸侯無視共主，各自爲政，互相攻伐，取而代之。

當時有啲國實力比較強，恃強凌弱大食細。當中有五君主，圖爲共主而會諸侯，成爲會盟盟主，史稱春秋五霸。呢五霸有講係齊桓公、宋襄公、晉文公、秦穆公、楚莊王。亦有話係吳闔閭、越句踐、吳王夫差。

春秋戰事，尚守禮節。到後尾戰國，就無所不用其極。

春秋戰國，以三家分晉爲介，晉國當中三家士大夫，韓、趙、魏瓜分晉國，而同期，齊國由姜姓，落入大臣田氏之手。周天子容許士大夫取而代之。春秋自此結束。亦有人話韓、魏、趙三家圍剿晉國正卿知伯時，晉國就已經係事實上滅亡，而三家成功分立。

史略

自周室東遷雒邑（lok⁶ jap¹）（又叫成周，即洛邑），到秦一統中國期間，係各路諸侯對立紛爭嘅時代，呢個時代嘅前半就係春秋時代。就係從東遷雒邑開始，周朝嘅分封制開始崩潰。周平王之所以要搬趄，係因爲原先嘅都城宗周（鎬京）畀反叛諸侯聯合犬戎嘅軍隊攻破，想避開侵擾而遷都。因爲成周喺宗周東邊，所以遷都後嘅周朝嗌「東周」，而之前嘅嗌「西周」。而啲諸侯之所以反叛，係因爲周幽王嘅統治唔得人心，佢曾經爲咗搏褒姒一笑而「烽火戲諸侯」，激嬲曬啲諸侯、令佢哋反骨。喺殺咗周幽王之後，新立嘅周平王有咗「弒父」之嫌，威望大降，而東遷時平王係得鄭武公護駕，因此鄭國權勢大振，逐漸都睇輕咗周室，周平王都唔忿鄭國咁囂張，想將朝政大權轉畀遞個，鄭公知咗嬲嬲哋，而周天子又唔敢得罪佢，結果周室王子同鄭國王子相互交換押做人質，史稱「周鄭交質」。連周室王子都可以變成人質，周天子嘅地位就一落千丈。前713年，鄭公話宋國無來朝見天子，聯合齊、魯攻宋，大敗宋軍，之後又話戴國、許國唔出兵幫手，滅戴分許，呢件事史稱「以王命討不庭」，自此，諸侯開始攞天子嘅名來爭鬥。周桓王十三年（前707年）因爲邊境糾紛，周桓王帶住班諸侯討伐鄭國，呢場仗史稱「繻葛之戰」，鄭莊公打敗王師不但只，重一箭標正周天子嘅膊頭，史稱「射王中肩」，連傷天子都夠膽，可見周天子已經得番個虛名喇，諸侯就此爭霸。

喺西周時，各諸侯國按禮制分封，分封幾多地、領主屬邊階都有規矩照做，當時有好多諸侯國都係啲小國，屬於封邑，亦即係啲城邦，不過入咗春秋後，啲強國都吞併隔籬嘅小國、弱國，強國嘅面積加大，唔再係城邦，而係變成「領土國」。喺周朝初期，有1800個國，到咗春秋之初，得番124國，喺春秋242年嘅亂世當中，43個君主畀臣下或敵國弒殺，亡國嘅有52個，記喺《春秋》度嘅諸侯國有170國。好似晉、楚呢啲強國征服咗啲邦邑後，就喺呢啲地方設縣，直接派自己啲官去治理，而唔係好似之前分封制噉分曬出去，即係話當時中國地方政制由分封制逐步轉變爲郡縣制。

春秋五霸

除咗由城邦林立演變爲幾個領土國外，政治氣候亦由天下共主演變爲諸侯爭霸。分封制已經敗壞咗，傳統秩序破亂，各國在內篡弒迭生，在外攻伐兼併，夷蠻戎狄亦週不時侵擾中原，局勢好亂。其中一啲諸侯強到直程想去篡奪周室嘅宗主權，不過列國競爭，一時君臨唔到天下，就攞霸主嘅名挾令諸侯。雖然係噉，呢啲霸主重係維持返表面上對周王室嘅尊重、崇拜，以「尊王攘夷」嘅名目來統制中原，所謂「尊王攘夷」，即係攞護衛天子、防範異族入侵嘅名義來會盟。其中有5位霸主最有名，稱為春秋五霸。

春秋五霸之首係齊桓公，「尊王攘夷」就係佢倡導嘅，當時佢治下嘅齊國係華夏最強，佢多次會盟，而聯合其他諸侯防範楚國進侵中原。首先前660年，狄人侵邢國，齊桓公聯合宋、曹救邢，擊退咗狄人，不過邢國都城已經燒燬，於是齊國幫佢遷都；無耐狄人又犯，衞國陷落，得七百遺民甩難黃河，齊桓公出兵保存咗衞國，重幫佢起新都，呢兩件事史稱「遷邢存衞」。前656年齊國帶住八國聯軍攻冧楚國盟友蔡國，陳兵楚境，質詢楚國點解唔朝貢天子，最後齊楚講和，喺召陵立盟約，史稱「召陵之盟」。前651年，齊桓公喺葵丘會諸侯，約定「凡我同盟之人，既盟之後，言歸於好」，周天子重派人參加，重賜桓公祭祖時啲肉，講明連周王都認佢做霸主，齊國嘅霸業達到頂峰，呢件事史稱「葵丘之會」。

齊桓公死咗之後，啲仔唔爭氣，齊國內亂而衰弱，楚國呢時稱王，想入中原，宋襄公想學齊桓公噉以反對楚國來會諸侯，不過宋國嘅實力、威望都唔夠。後來宋楚開打泓水之戰，楚國打贏宋國，而宋襄公亦中箭遞年重傷而死，楚成王稱雄一時。呢時就輪到晉國發達，喺前636年，周室內亂，王子帶勾結狄人打周襄王，王師大敗，襄王走難搵秦、晉求救，時任嘅晉文公聽取「求諸侯莫如勤王」嘅建議，飛甩秦國，自己一支公擊退狄人，生擒王子帶交畀襄王，安定咗周室，晉文公獲得「尊王」美譽而聲威大振。前633年，楚國伐宋，宋國向晉國求救，晉文公亦有心稱霸，於是喺被廬練兵，將兩軍擴充爲三軍，史稱「被廬之蒐」，之後喺前632年爲救宋國去打楚國盟友曹、衞，因爲晉國有齊、秦撐佢，楚王都想收兵，不過將領子玉係都想決戰，最後晉文公喺城濮之戰打贏咗，確立佢嘅霸主地位，之後喺踐土會盟，史稱「踐土之盟」。晉文公同齊桓公都係五霸代表，合稱爲「齊桓晉文」。

晉文公死咗後，秦晉之好就係噉先，秦穆公亦都想稱霸中原，不過東有強晉、南有勁楚，於是秦國向西擴張，最後「益國十二，開地千里，遂霸西戎」，連周天子都賜金鼓賀佢。而楚國亦未心死，到楚莊王在位時，改革政治、誅平百蠻，開始用兵中原，再同晉國爭過。前606年，楚莊王討伐陸渾之戎，閱兵周疆，周定王派佢王孫滿去慰問楚軍，呢時楚莊王問王孫滿「九鼎有幾重？」，九鼎係禮器，係傳國之寶，象徵住周王室嘅天子之位，楚莊王去問九鼎嘅輕重，就有想廢周天子而自立嘅意味，係好無視周王室兼極具野心嘅舉動。呢個就係「問鼎」呢個詞嘅來頭，呢件史事有叫「楚莊王問鼎中原」。

之後晉楚相爭。鄭國夾喺晉楚，成為焦點，前597年，楚國話鄭國黐埋晉國得緊要，打佢，最後鄭國都城陷落，屈服於楚，史稱「楚許鄭平」，而場仗嗌做「邲之戰」，自此楚莊王嘅霸主地位確定咗。

社會變遷

春秋時期係從分封制到郡縣制、分封邦邑到郡縣邦國、地方分權到中央集權嘅過渡期。喺春秋中期（前600年前後）中國開始普及鐵製農具，噉一來深耕除草就易過舊時，生產效率高過以往，可以擴大咗農業地域，同時鐵器出現有助於水利工程建設。生產率高咗，於是乎促進咗貿易、手工，最後大部份經濟商品化，貨幣原本就有，到咗呢個時代就出現銅錢。因爲商品化、錢銀流通，土地變成可以自由買賣嘅財產，有錢嘅人可以買入大筆地產。西周時嘅經濟係井田制、奴隸制，當時因爲生產力差，耕田就咁多，所以啲田都係公田，然後再將田地分封畀各級貴族；而家因爲生產率高咗，耕完公田可以自己去開私田，噉樣新開嘅田地就唔屬傳統分封嘅土地，而係個人私有，於是慢慢噉出現地主階層。到咗戰國時，鐵器更加普及，於是舊時嘅氏族秩序崩解，促進階級分化。喺土地所有方面，井田制時代田地係公有嘅，係由當地領主安排集體耕作，而春秋時就逐步演變爲土地私有、個體經營；而喺稅制上，原本土地係屬於領主嘅，耕耘所得直接歸領主，而當土地變成個人所有時，稅收對象轉為自耕農。

經濟變革帶來政治變革，即係由原本嘅分封制逐漸中央集權。之所以噉，係因爲經濟發展、經濟商品化爲統治者提供建立中央集權所必須嘅財政資源。因爲新開嘅私田唔屬分封關係內，所以地租直接交入諸侯嘅府庫，而毋須分出啲貢畀上面。此外諸侯爲咗牟利，重壟斷對鹽鐵嘅經營。爲咗可以直接控制更多地方來獲取收入，啲諸侯唔再分封，而係委任官員、設縣、設下級政府來收稅，演變出中央集權嘅政府系統。於是啲諸侯就有足夠嘅財力、勢力去兼併弱國，同時亦有足夠財力來維持呢個中央集權系統。呢個過程其實係慢慢來嘅，從春秋到戰國都係過渡期，而秦國後來可以一統中國，亦係得益於佢哋率先採用呢種中央集權嘅行政系統。