Creepypasta

出自維基百科,自由嘅百科全書
跳去導覽 跳去搵嘢
瘦削男係 creepypasta 一個有代表性嘅虛構角色

Creepypasta(讀音似粵拼crip1 pi1 paa1s taa4)-直譯可以叫恐怖意式麪粵拼hung2 bou3 ji3 sik1 min6)-廣義上泛指响英文圈互聯網度流動嘅恐怖故仔,狹義上淨係指响英文圈互聯網流傳、專登寫到好似都市傳說噉嘅恐怖短篇故仔。一般嚟講,恐怖意式麪作品喺題材同內容方面唔多限制,會包含靈異故仔,但又可以包埋啲完全冇超自然成份嘅恐怖故仔,例如係講連環殺人狂嘅故仔[1][2]

舉個例說明,瘦削男(The Slender Man)成日俾人攞嚟做廿一世紀初恐怖意式麪嘅代表:英文圈嘅互聯網上面流傳好多講瘦削男嘅散文式故仔,啲故仔好多時得嗰 1,000 至 2,000 字長背景設喺現代社會,個個故仔作者都唔同,呢啲人又多數唔係專業作家(呢點更加顯得啲故仔似都市傳說);瘦削男俾人覺得佢恐怖,似人但唔係人,會跟蹤人,俾佢跟蹤嘅人往往會失蹤,同時佢又唔似得吸血鬼或者狼人噉係家傳戶曉嘅傳說生物-更加突顯咗「對未知嘅恐懼」(恐怖意式麪另一樣重要特徵)呢點[3]

到咗 2020 年,恐怖意式麪經已成為咗英文圈互聯網好出名嘅一部份。有唔少人都會開網站,專門寫同交流恐怖意式麪,吸引到一定數量嘅讀者;甚至仲有人嘗試將出名嘅恐怖意式麪作品攞去改編做電影[4]

定位[編輯]

內文:恐怖故仔都市傳說
睇埋:愛卡夫式恐怖

原則上,「恐怖意式麪」可以純粹係指响互聯網度流傳嘅恐怖故仔。不過喺實際應用上,恐怖意式麪有某啲固有嘅特徵,而專門玩恐怖意式麪寫作嘅人通常都會為自己嘅作品設下一啲限制。一般認為,恐怖意式麪故仔最重點嘅特徵係會特登寫到好似都市傳說噉嘅樣,即係話呢啲作品通常都會[5]

-有人指,呢啲特徵令到讀者有種「呢件事有可能發生喺我身上」噉嘅感覺,更加加強咗呢啲故仔喺互聯網流傳嘅能力。除此之外,恐怖意式麪故仔亦都被指係深受 H. P. 愛卡夫作品影響,成日都會用「對未知嘅恐懼」嚟令讀者覺得驚[3]

名作[編輯]

內文:Creepypasta 一覽

瘦削男[編輯]

一幅 gif 展示想像中「瘦削男由背脊度伸出啲觸手,準備向佢目標落手」嘅景象。
內文:瘦削男

瘦削男(The Slender Man)係恐怖意式麪嘅一部出名作品:瘦削男,又叫瘦長人,係起源自 2009 年嘅一系列恐怖意式麪故仔;廿一世紀初嘅互聯網流傳住好多講瘦削男嘅短篇故仔,喺呢啲故仔入面,瘦削男著住黑色西裝,生得異常咁高咁瘦,好多時俾人以為佢係樖樹,而且塊面一片空白-佢個樣有少少似人但近睇明顯唔係人;喺行為上,根據多數故仔嘅描述,瘦削男會喺樹林等嘅多種地方出現,會跟蹤佢嘅目標人物,跟蹤到咁上下,佢就會突然出現喺目標人物身後,事後俾瘦長人跟蹤嗰個人就會失蹤[1]

瘦削男有齊嗮恐怖意式麪嘅重要特徵,例如係佢從來唔講嘢又冇人知失咗蹤嘅人嘅下場,就引起讀者對未知嘅恐懼;而且因為描繪瘦削男嘅故仔通常個個作者都唔同,所以呢啲故仔對瘦削男嘅描述唔完全一致-更加顯得呢啲故仔似都市傳說。因為瘦削男咁有恐怖意式麫嘅特徵又咁俾人廣傳,所以佢成日俾人攞嚟做恐怖意式麪嘅代表角色[3][6]

第啲作品[編輯]

睇埋:括吐露神話

除咗瘦削男之外,恐怖意式麪仲有多部出名嘅作品:

  • 紫苑鎮綜合症(Lavender Town Syndrome)[7][8]紫苑鎮係著名電子遊戲《寵物小精靈紅・綠》入面嘅一笪虛構地方,出嗮名鬧鬼而且有令人不安嘅配樂;因為噉,電子遊戲玩家之間就出咗有關紫苑鎮綜合症嘅都市傳說-根據呢啲傳說,紫苑鎮嘅配樂包含一啲特殊頻率聲波,輕則會令人頭痛,而且又有傳說講啲聲波係大人聽唔到嘅,細路先聽到,而且有好多細路喺玩過隻遊戲聽到紫苑鎮之後,仲精神失常自殺。上述呢啲傳說都係流嘅,但初頭有唔少人喺度為紫苑鎮綜合症作故仔,仲老作咗啲假嘅個案出嚟,令到「紫苑鎮綜合症」呢個諗頭喺電子遊戲玩家之間廣傳,仲引起咗人同佢作恐怖意式麪風格嘅短篇小說。
  • Ben Drowned(意思係「阿賓浸死咗」噉解)[9]:源自 2010 年代初,故仔主角係個啱啱入大學嘅後生仔,有日佢喺度搵啲舊嘅 N64 遊戲玩,玩玩吓《薩爾達傳說:穆修拉嘅面具》嗰陣,發現隻遊戲出現啲古怪同令人不安嘅 bug,而且隨住情節發展,佢仲發現隻遊戲餅咭匣同一個叫阿賓(Ben)嘅男仔有關;呢份作品俾人認為係早期恐怖意式麪嘅代表之一,確立咗好多恐怖意式麪成日用嘅橋段(例如係「有嘅遊戲咭匣」);Ben Drowned 好受歡迎,原作者到咗 2020 年代都仲有喺度寫相關作品。
  • The Backrooms(意思係「後房」噉解)[10][11]:源自 2019 年嘅 4chan 論壇;相關嘅故仔講到,人有陣時會突然俾神秘力量傳送去一笪叫「後房」嘅地方;後房係一笪奇異嘅空間,外形似各種現代建築物(例如辦公室工廠)嘅內部,共通點係呢啲空間入面空寥寥乜人都冇,但又有跡象顯示有人喺度(例如啲燈著嗮),主角無論喺後房入面點等點搵都搵唔到出口,亦唔會搵到任何嘅人類;除此之外,啲人寫同貼有關後房嘅故仔嗰陣,仲好興附加埋一啲描繪「空寥寥、但有跡象顯示有人喺裏面」嘅現代建築物嘅相,唔少人都話呢啲影像令佢哋不安。《The Backrooms》嘅相關故仔相當受歡迎,甚至仲吸引咗人為佢哋製作電子遊戲

...呀噉。

The Backrooms》入面嘅一間典型後房-現代化、空寥寥、但又有跡象顯示有人喺裏面(啲燈開嗮)。

簡史[編輯]

2014 年嘅瘦削男 cosplay;瘦削男係恐怖意式麪嘅代表角色之一。

起源[編輯]

睇埋:網絡 Meme同埋4chan

恐怖意式麪起源自互聯網普及初期嘅 1990 年代尾至 2000 年代初,具體日期不明[1][5]:恐怖意式麪包含好多喺用家之間流傳嘅寫作品,而且啲人貼呢啲故仔上網嗰陣又好興(為咗增強神秘感等嘅原因)匿名噉貼,所以有好多出名作品都係源頭不明;但可以確定嘅係,早喺 1990 年代,一般人經已有喺度用電郵等嘅互聯網技術通訊,途中有可能會互傳恐怖故仔或者都市傳說,而喺 2001 年嘅英文圈,經已有搵得到「貼喺網上論壇、用第一人身寫」嘅恐怖故仔作品。尤其可以睇吓 4chan 呢個成日有人匿名貼圖嘅英文網站[12]

跟住喺廿一世紀初頭嗰兩個十年,恐怖意式麪自成一種文學體裁:到咗 2008 年,已經有人建立網站,專門寫同交流恐怖意式麪作品[13];而 2010 年代初嘅恐怖意式麪仲搞到愈嚟愈旺-恐怖意式麪嘅愛好者建立咗更多有關恐怖意式麪嘅網站,而且喺 2010 年代中仲有人嘗試將恐怖意式麪作品改編做[註 1][4]。值得一提嘅係喺呢個時期,因為啲人多咗(例如)專寫恐怖意式麪或者搞恐怖意式麪寫作比賽,令到恐怖意式麪演變到有咗「份作品掕住作者嘅名」呢家嘢[14][15]

詞源[編輯]

睇埋:令人毛骨悚然

恐怖意式麪响英文入面個名係個混成詞,被指源自 2006 年嘅 4chan [1]

呢兩隻英文字結合咗成為 creepypasta-就係指「喺網上流傳、令人毛骨悚然嘅嘢」。粵文直譯可以譯做恐怖意式麪,噉係因為英文字 pasta 可以係指「意式麪」噉嘅意思。

註釋[編輯]

  1. 不過單嘢衰收尾。

睇埋[編輯]

[編輯]

  1. 1.0 1.1 1.2 1.3 Roy, Jessica (3 June 2014). "Behind Creepypasta, the Internet Community That Allegedly Spread a Killer Meme". Time.
  2. Considine, Austin (12 November 2010). "Bored at Work? Try Creepypasta, or Web Scares". The New York Times. Retrieved 14 September 2015.
  3. 3.0 3.1 3.2 Blank, T. J., & McNeill, L. S. (2018). Slender man is coming: Creepypasta and contemporary legends on the internet. University Press of Colorado.
  4. 4.0 4.1 Rife, Katie (5 May 2015). "Machinima announces web series from Clive Barker, Bruce Timm, RoboCop, and more". The A.V. Club. Retrieved 14 September 2015.
  5. 5.0 5.1 Romano, Aja (31 October 2012). "The definitive guide to creepypasta - the Internet's urban legends". The Daily Dot. Retrieved 1 September 2015.
  6. Chess, S., & Newsom, E. (2014). Folklore, Horror Stories, and the Slender Man: The Development of an Internet Mythology. Springer.
  7. Coello, Jessie (2019-10-30). "Lavender Town: How Pokémon's Notorious Urban Legend Shaped The Entire Franchise". TheGamer. Archived from the original on 2020-09-19. Retrieved 2020-09-19.
  8. Oxford, Nadia (November 18, 2019). "What's Lavender Town Syndrome in 'Pokemon'?". Lifewire. Archived from the original on 2019-11-02. Retrieved 2020-09-19.
  9. Dennison, Kara (2020-03-24). "Revisiting BEN Drowned on the 20th Anniversary of Majora's Mask". Fanbyte. Retrieved 2020-03-24.
  10. Patston, Manning (3 August 2021). "The Backrooms: an eerie phenomenon lies behind these familiar hallways". Happy Mag. Archived from the original on 1 February 2022. Retrieved 31 January 2022.
  11. Kubrick, Kaitlyn (17 April 2020). "What is The Backrooms? The terrifying creepypasta of cursed dreams". Somag News. Archived from the original on 26 February 2022. Retrieved 1 February 2022.
  12. Shira Chess (14 October 2016). Sinister Clown Sightings Are a Manifestation of Fear. New York Times. Retrieved 24 June 2017.
  13. A Brief History of Creepypasta. TurboFuture.
  14. Bojalad, Alec (22 January 2017). "Beware the Creepypasta: Scary Storytelling in the Internet Age". Den of Geek. Retrieved 24 June 2017.
  15. Peters, Lucia (25 December 2015). "What Is Creepypasta? Here's Everything You Need To Know About The Internet's Spookiest Stories". Bustle. Retrieved 24 June 2017.

[編輯]