Wikipedia:是日正文/2023年9月
認知科學，又有叫心靈科學，係研究心靈嘅科學領域。「研究心靈」包括咗研究人同第啲動物嘅認知功能同智能，剖析神經系統（尤其係腦部）點樣透過各式各樣嘅過程表示、處理以及轉化資訊，並且透過參考呢啲大自然所創造嘅心靈，嘗試造出模擬心靈嘅數學模型以及人工智能。
喺認知科學上，心靈可以想像成一個資訊處理系統，會做以下嘅功能，包括咗感知、注意力、記憶、知識表示、語言、學習同埋想像等等。神經科學家同認知心理學家會用實驗等嘅方法研究呢啲現象，而對呢啲事物嘅研究會啟發人工智能上嘅創新，例如機械學習上嘅方法，就有好多都係源自認知科學上對學習現象嘅探究嘅。
認知科學好大程度上係一門跨學科領域。認知科學家會借用哲學（尤其係心靈哲學）、語言學、人類學、神經科學、人工智能同心理學等領域嘅知識嚟做研究，而一份典型嘅認知科學研究會考慮好多層嘅問題：神經細胞之間會互傳訊號，呢啲訊號代表嘅資訊可以包括咗「對眼睇到啲乜」同埋「由記憶嗰度抽取嘅片段」呀噉（神經科學同認知心理學嘅範疇）；跟住個個體可能會運用把口講嘢嘅聲或者手寫嘅文字表達呢啲資訊俾第個個體知（語言學嘅範疇）；而如果班研究者用電腦程式模擬呢個過程，就可能會幫到手創造曉好似人噉諗嘢同講嘢嘅機械人（人工智能嘅範疇）－呢啲咁多唔同層次嘅考量冚唪唥都屬於認知科學嘅範圍之內。 (成篇文章……)