泛泰民族
 |
呢一篇文有老撾文字母。當冇適當嘅展示支援，你可能會見到問號、盒或者係其它符號而唔係老撾文字母（英文幫手）。 |
| 泛泰民族 | |
|---|---|
 壯侗語系語言嘅分佈圖 圖中橙色嘅領域就係呢版講嘅泛泰民族嘅居住地域。 | |
| 分佈地區 | |
| 中國（主要係傣族）、緬甸（撣族）、老撾、泰國、越南、印度（坎底傣） | |
| 語言 | |
| 西南壯泰語 | |
| 宗教信仰 | |
| 南傳佛教、泛靈論或印度教 |
泛泰民族（粵拼：faan6 taai3 man4 zuk6）係以壯侗語系西南泰語支（泰文、老撾文等）爲母語嘅人群。泰國人唔等同於泰族，老撾人唔等同於寮族，呢樣嘢請注意。呢版講嘅泛泰民族若果冇特別指明嘅話，係包含埋寮族等族嘅。
語源
[編輯]泰/傣嘅語源
[編輯]一般來講，泰/傣（Thai、ไทย）呢個詞語係「自由」嘅意思。但呢個係俗說，現今有力嘅講法係中文古音嘅「大」係語源，由[dai]訛變成[tʰaj]（ไท）。
呢個講法認爲，「大」呢隻漢字有「大人」呢個詞嘅用法，有「偉大高尚」嘅意味，然後佢轉化成「（唔係奴隸，而係偉大高尚嘅）自由人」嘅意味，就噉從「自由人」嘅意味度，喺泰國嘅語言度生出「人」、「自由」等意味。實際上，喺昔日嘅泰國有「你係邊度嘅泰（ไท）？」嘅用法，呢個用法使用喺非奴隸嘅人民之間。「泰」（ไท；自由人）係明確區別於稱呼做「撻」（ทาส）嘅奴隸。之後呢個用語普及喺而家嘅泰國，成爲代表普遍泰國人嘅詞。
喺而家嘅泰國，「泰（Thai、ไทย）」呢個詞語喺書面上有曖昧嘅重合意味，合埋咗「自由」同「泰國人」呢兩種意味。順便講聲，泰文ไทย呢個詞語嘅字母ย係個冇發音嘅文字，寫來係做裝飾，顯得個詞有梵文風格。呢個詞語喺梵文冇相應嘅詞。
老/寮嘅語源
[編輯]老/寮（Lao、ລາວ）係昔日用來冠以王族嘅名。呢個用法可見於《清邁王統史》（Chiang Mai Chronicle）同《難府王統史》（Nan Chronicle）。之後老/寮作爲貴族稱號嘅地位慢慢噉丟失，變成只係單純噉表示「人」嘅詞。當初亦都用「泰/傣」（thai、ໄທ）噉樣嘅詞做「人」嘅意味，後來老族立國，因爲對泰族抱有反感，對於「泰/傣」嘅意味，變爲用「老/寮」嘅講法，老/寮固定做民族名。
之後，法國人來咗後，將老/寮表記爲Lao，接上複數詞尾做Laos（啲老撾人噉解）作爲國名。
歷史
[編輯]有關泰系諸族起源嘅講法
[編輯]講到泰系諸族嘅起源，有以下講法[1]。
- 阿爾泰山脈起源說
呢個講法話漢族侵入以前佢哋居住喺中國，6世紀時從阿爾泰山脈移動去印度支那半島。如威廉·C.·多德（William C. Dodd）《泰民族，中國人嘅兄弟》（The Tai Race, Elder Brother of the Chinese；1923年）。
- 泰國起源說
呢個講法由解剖學者S.生韋展（S. Sangvichien）等主張，攞北碧府嘅班教（บ้านเก่า）遺蹟出土嘅先史時代人骨做比較，認爲泰人係起源喺而家嘅泰國。
- 東南亞島嶼起源說
由語言學者白保羅同E.西典化典（E. Seidenfaden）主張，呢個講法嘅根據係基於古壯侗語同印尼、爪哇呢啲南島語系有好近嘅關係。
- 南詔起源說
呢個講法話泰人起源自中國西南部嘅南詔。譬喻提希昂·第·拉古普希（Terrien de Lacouperie）《撣族搖籃》（Cradle of the Shan Race，1885年）《漢語以前嘅中國語言》（The Languages of China before the Chinese，1887年）。
- 中國南部起源說
呢個講法以新石器時代嘅考古資料爲根據，話泰人起源於長江南部到雲南一帶嘅地方。A.R.歌倫（A. R. Colhoun）、威廉·哲尼（William J. Gedney）、W.吉里德拿（W. Credner）等人提倡。
- 中國東南沿岸、臺灣起源說
呢個講法嘅根據係中國嘅福建、廣東、臺灣嘅原始南島語同古壯侗語有類似性。沙加爾、R.布蘭池（R. Blench）提倡。
當中最有力嘅係中國南部起源說[1]。認爲佢哋起源喺廣西到越南一帶，6～7世紀時由於漢族進出當地，趕咗出去，移動去西南[2]。另外，中國東南沿岸、臺灣起源說亦值得關注。據三谷恭之嘅語言年代學，古侗泰語存在喺4000～5000年前，從臺灣分化，移動去中國內陸、北越南，受孟高棉語族、漢藏語系影響，約1000年前成立而家嘅壯泰語[1]。
哀牢
[編輯]前215年，因爲而家長沙地區嘅越人（泰系越人）受秦朝攻擊，越人於是南下，到而家雲南省保山市邊近新形成咗個城市國家。當時住喺華北嘅中國人（漢民族），受中華思想影響，將泰人以及其他南方諸民族稱呼做「南蠻」，泰族特別稱呼做「哀牢」。住喺華北嘅中國人就將呢個城市國家稱呼做哀牢國。古代嘅哀牢之地，就係而家中國西南部雲南嘅南部，至今嗰度仲居住住哀牢人嘅後裔，而家中文將泰國嘅寫做泰（taai3）族，雲南嘅加多人字邊，寫做傣（daai2）族，噉樣來區別。住響泰國嘅泰族將雲南傣族稱呼做傣仂族。甲良族亦被認爲係哀牢嘅後裔之一。傣族主要存在喺西雙版納同德宏呢兩個自治州。
前110年，西漢武帝派遣佛教經典調查團去印度，但哀牢國嘅國王唔準呢個使節團通過哀牢國，哀牢國同西漢嘅對立爆發。呢場對立持續咗約7年，前87年哀牢國滅亡。9年，哀牢嘅子孫趁住中國內亂，重新宣佈獨立，但佢持續得唔長，76年，東漢再次滅亡佢，喺佢國土度設置永昌郡。
六詔國
[編輯]之後嘅數世紀間，有關泰族嘅資料唔存在，對於呢段歷史係不明嘅，到7世紀時有六個勐（maang5）喺雲南嘅大理盆地建國。呢六個勐總稱六詔，稱呼做六詔國。六詔中最大嘅勐係蒙舍詔，彝族嘅先祖烏蠻族領導住佢，對唐朝構築咗友好關係，喺建國當初就入贈貢品。580年，氐族（而家緬族）最後嘅王朝仇池畀隋朝開國皇帝楊堅攻打滅亡。而家認爲四散嘅氐族有部分入咗六詔嘅保護傘下。
南詔王國
[編輯]蒙舍詔喺729年得到強大嘅唐朝嘅援助，喺皮羅閣王嘅時代統一咗六詔，南詔王國建國。皮羅閣王死後，因爲佢嘅功績，唐朝贈佢王位「雲南王」。不過，南詔王國後來同吐蕃同盟，變得強大，同唐朝嘅友好關係開始逐漸崩壞，唐玄宗時代，楊國忠喺751年出兵6萬、754年出兵7萬分兩回同南詔王國交戰，但都以南詔王國嘅勝利終結。南詔王國嘅勢力慢慢增加，趁住安史之亂嘅混亂，吐蕃同南詔喺762年一時佔領唐朝首都長安。之後佢逐步攻掠呢啲地方：832年打驃人嘅驃國、858年打東京、863年打安南，將安南都護府收爲佢嘅領土。不過喺902年漢人權臣鄭買嗣搞政變，南詔王國滅亡。
大理國
[編輯]937年白蠻（而家嘅白族）嘅段思平建立咗大理國，係南詔嘅後繼國家，期間泰族收入佢嘅保護傘下。之後，泰族開始大移動，散去印度支那半島、緬甸、阿參（Assam）各地，開始形成勐。1044年，佢支配下嘅緬族侵入伊洛華迪（Irrawaddy）平原，建立蒲甘王朝。
泰族南下
[編輯]- 傣那族、黑腹老族
最早南下嘅係傣那族，定居喺湄公河北部上游，638年希蘭王國（而家清盛）畀高棉人（而家柬埔寨人）嘅羅渦王國統治，羅渦王卡拉華那迭（Kalavarnadit）命令希蘭王榮·普叻沙（Vieng Prueksa）接受佢任命嘅王。1259年，因爲蒙古帝國嘅雲南大理遠征，希蘭王子孟萊建立咗蘭納王朝，建設新首都清邁。
黑腹老族講嘅話係種類似老撾文嘅泰語方言，有獨自嘅文字，因爲舊日風習係喺肚度用墨紋身，所以稱呼做黑腹老族。佢哋係西北泰人，或者稱呼做傣那。蘭納王國持續咗數百年，後來做咗曼谷王朝（而家嘅泰王國）嘅屬國，之後完全變做泰國嘅領土。黑腹老族幾乎畀曼谷王朝嘅小泰族完全同化，而家稱呼做西北泰人，無咩特別嘅區別。
- 撣族、阿洪族、坎底傣
以稻作爲生計嘅泰人必須沿住條河生活，有一群人進出緬甸嘅撣邦，形成喺薩爾溫江流域、稱呼做撣族（ไทใหญ่）嘅民族。撣族喺中國併入傣族，作爲分支稱呼做大傣。
撣族群體嘅一部分越過巴坎山，開始生活喺印度東北部阿參邦嘅布拉馬普特拉河流域。佢哋就稱爲阿洪族或者坎底傣，係印度嘅泰系民族。而家佢哋印度化咗，冇保留作爲泰族嘅原形。
- 老族
定居喺湄公河流域嘅居民有支向東移居，呢支民族即係老族，佢哋立嘅國即係而家嘅老撾。呢群人相對下文講到嘅小泰族，冇表現出同化傾向，固執頑強噉守住老族啲嘢，形成同泛泰民族相似而獨特嘅特徵。呢個亦係之後作爲相同民族但仲係形成老撾國嘅要因。自入咗近代以來，老撾政府好驚泰系、非泰系嘅少數民族會成爲老族嘅反抗勢力，於是定義保有老撾國籍者就係老撾人，喺政治上否定少數民族，作爲老撾人究竟係老族定其他少數民族呢件事佢唔做分類。
- 齊族
- 依善人
老族亦居住喺湄公河嘅西南部，但由於泰國嘅曼谷王朝同老撾嘅戰爭，呢個地方（依善）變咗做泰國領土。之後，呢個地方嘅老族區別於老撾人，嗌做依善人。依善人因爲惡劣嘅氣候而貧窮，加上講啲話唔同，受到咗來自泰王國小泰族嘅差別對待，傳統上佢哋嘅老族意識好強，近來由於中央政府嘅開發，加埋全球化影響下行進嘅一體化，後生嗰趟同都市嘅人佢哋嘅泰國人意識高咗。
- 暹羅人、小泰族
小泰族，外國人稱暹羅人。佢哋係由於蒙古帝國嘅雲南大理遠征而南下，將湄南河下游原先住落嘅高棉人（而家柬埔寨人）趕走，1238年（泰國佛曆1781年）建立素可泰王國。呢群泰人畀非泰系民族稱呼做暹羅（Siam，暹，粵音cim3）。呢個素可泰王國係現今泰國嘅基礎。之後一個稱呼做泛泰民族主義嘅同化政策喺泰國行進，將泰國領土內嘅泰國國籍保有者定義爲泰國人，喺政治上否定泰系、非泰系少數民族。
泛泰民族主義同歷史認識
[編輯]上述歷史喺泰國教嘅歷史教育內容中基本一致，但喺而家嘅研究中，泰族南下以前嘅歷史有好多問題。
19世紀末，拉瑪五世時代嘅內務相丹龍親王搞曼谷改革，歷史教育作爲民族教育嘅一環策定咗落來，入到20世紀，二戰之前嘅披汶政權搞嘅愛國民族主義教育固定出而家嘅形態。喺泛泰民族主義嘅歷史觀中，諸如阿爾泰山脈學說等19世紀當時歐洲研究者提倡嘅假說都引入咗。
古蜀嘅民族系統不明，哀牢相比係壯侗系，更可能係藏緬系。喺19世紀開始嘅泰國歷史教育中，南詔講成係泰民族第一個獨立國家，但南詔嘅統治層係藏緬系嘅彝族，佢嘅後繼國家大理亦係藏緬系嘅白族。泰人早就居住喺嗰度，更可能係作爲佢哋保護傘下嘅一個民族。
中國傣族
[編輯]以下顯示嘅係自1953年開始使用嘅中國泰語民族（傣族）分類，分類爲7個主要族羣。緬甸同泰國將傣那（Tai Nüa）分類爲撣族。
| 中文 | 粵拼 普通話拼音 |
傣仂話 | 傣那話 | 泰文 | 中國之外嘅稱呼 | 居住地域 |
|---|---|---|---|---|---|---|
| 傣仂 （西雙版納傣） |
daai2 lak6 Dǎiliè |
tai˥˩ lɯː˩ | ไทลื้อ tʰai33 lɯː45 |
Tai Lü, Tai Lue | 西雙版納傣族自治州（中國） | |
| 傣那 （德宏傣） |
daai2 naa5 Dǎinà |
tai˥˩ nəː˥ | tai le6 |
ไทเหนือ, ไทใต้คง tʰai33 nɯaː33, tʰai33 tai41 kʰoŋ33 |
Tai Nüa, Northern Tai, Upper Tai, Chinese Shan | 德宏傣族景頗族自治州（中國）；緬甸 |
| 傣擔 | daai2 daam1 Dǎidān |
tai˥˩ dam˥ | ไทดำ, ลาวโซ่ง, ผู้ไท tʰai33 tam33, laːw33 soːŋ41, pʰuː41 tʰai33 |
Tai Dam, Black Tai, Tai Lam, Lao Song Dam*, Tai Muan, Tai Tan, Black Do, Jinping Dai, Tai Den, Tai Do, Tai Noir, Thai Den | 金平苗族瑤族傣族自治縣（中國），老撾，泰國 | |
| 傣繃 | daai2 bang1 Dǎibēng |
tai˥˩pɔːŋ˥ | ไทเบง tʰai33 ɓeːŋ33 |
Tay Pong | 瑞麗市，耿馬傣族佤族自治縣（中國）， 湄公河流域 | |
| 傣端 | daai2 dyun1 Dǎiduān |
tai˥˩doːn˥ | ไทขาว tʰai33 kʰaːw114 |
White Tai, Tày Dón, Tai Khao, Tai Kao, Tai Don, Dai Kao, White Dai, Red Tai, Tai Blanc, Tai Kaw, Tày Lai, Thai Trang | 金平苗族瑤族傣族自治縣（中國） | |
| 傣雅 | daai2 ngaa5 Dǎiyǎ |
tai˥˩jaː˧˥ | ไทหย่า tʰai33 jaː41 |
Tai Ya, Tai Cung, Cung, Ya | 新平彝族傣族自治縣，元江哈尼族彝族傣族自治縣（中國） | |
| 傣友 | daai2 jau5 Dǎiyǒu |
tai˥˩jiu˩ | ไทยโยว tʰai33 joːw33 |
元陽縣（中國）， 紅河流域 | ||
| *意思：着黑褲嘅老族人 | ||||||
攷
[編輯]睇埋
[編輯]