香港中央圖書館

香港中央圖書館

香港中央圖書館hoeng1 gong2 zung1 joeng1 tou4 syu1 gun2（英文：Hong Kong Central Library）係香港公共圖書館嘅總館，亦係香港最大嘅公共圖書館，喺香港島銅鑼灣高士威道66號、維多利亞公園嘅南面，港鐵天后站同銅鑼灣站之間。中央圖書館喺2001年5月17號開張，由康樂及文化事務署管理。

香港中央圖書館樓高12層，佔地9400平方米，樓面面積總共有33800平方米，目前嘅藏書量已去到230萬幾冊（香港公共圖書館體系總共有至少1,211萬本書），係全港最大嘅公共圖書館。呢間圖書館取代咗大會堂公共圖書館（City Hall Public Library）嘅總館地位，並成為全香港公共圖書館嘅中樞系統同資訊中心，係香港公共圖書館體系中面積最大、服務範疇最廣同館藏數量最多嘅公共圖書館。

發展史同特色

1962年，市政局設立香港大會堂圖書館，係香港戰後開嘅第一間公共圖書館，亦都順理成章成為香港公共圖書館嘅總館。到咗1990年代，市政局決定起一座全新嘅中央圖書館，作為香港嘅旗艦圖書館，以進一步提升圖書館嘅服務質素；香港中央圖書館嘅籌建計劃就係咁出現咗。香港中央圖書館未落成之前，全港有五間「中央圖書館」，分別係香港大會堂圖書館、九龍中央圖書館、沙田中央圖書館、荃灣中央圖書館同屯門中央圖書館。

香港中央圖書館嘅所在地—銅鑼灣摩頓台嘅前身，係港島區唯一嘅露天排球場。事關禮拜日銅鑼灣一帶聚集嘅印尼傭工愈嚟愈多，呢度成為咗佢哋聚集同玩嘅地方。後來政府決定喺呢度起中央圖書館，曾經搞到地區人士嗌交，擔心外傭會冇咗聚會場所。

大樓設計亦都引發過爭議，當時嘅市政局主席梁定邦喺1997年同市政總署署長鍾麗幗就中央圖書館嘅設計互相爭論，鍾氏所提出嘅高科技感設計以展開咗工程而否決咗，但係仿古典風格嘅建築設計，亦俾市政局議員話好似中國大陸嘅洋房別墅。中央圖書館大樓嘅建築費耗資高達6億9千萬港元，但係就俾立法會財務委員會嘅議員批評，籌建部門改變咗大樓頂部嘅原來設計，加設羅馬式裝飾柱嘅設計被指係浪費公帑。

香港中央圖書館內外隨處可見嘅由圓形、正方形同三角形結合而成嘅幾何圖案，有「天圓地方」同「知識累積成塔」嘅喻意。而由於中央圖書館係市政局籌劃興建佢原來嘅設計，市政局嘅徽號亦有出現喺大樓嘅𨋢門同大門扶手，香港市政局如今已經解散，不過政府就反而因為市政局嘅徽號同香港市花洋紫荊似模似樣而保留咗。中央圖書館原訂喺2000年12月啟用，但就因為電腦資訊中心嘅系統問題而一再延遲。2001年5月17號，香港中央圖書館由當時做行政長官嘅董建華主持開幕儀式，第二日（5月18號）正式開放。

• 
  香港中央圖書館中庭噴水池，噴水池上有旋轉嘅地球儀
• 
  正門前有噴水池，佢亦係呢間圖書館嘅標誌
• 
  通往大堂入口嘅梯級（刻有中英文名言雋語）
• 
  羅旭龢爵士頭像

館內設施

館內設有觀景𨋢同多條扶手電梯去地面至9樓，全部樓層亦有洗手間畀讀者用。除此之外，7樓以外嘅圖書館範圍都有Wi-Fi無線上網設施，合共63個熱點畀市民免費連線。

• 
  地面嘅Délifrance及禮品店
• 
  圖書館三至五樓
• 
  館內扶手電梯
• 
  觀景𨋢

設施樓層

7樓中央書庫（淨係畀圖書館職員入）

11樓	香港公共圖書館總辦事處
10樓	藝術資源中心、音樂練習室、研討室、香港中央圖書館辦事處
9樓	中央參考圖書館、研討室
8樓	中央參考圖書館、香港文學資料室
7樓	中央書庫
6樓	語言學習室、青少年圖書館、視聽資料圖書館、研討室
5樓	地圖圖書館、電腦資訊中心、最新報刊閱覽區、縮微資料閱覽區
4樓	逾期報刊閱覽區、逾期報刊儲存庫
3樓	成人借閱圖書館
2樓	兒童圖書館、兒童多媒體資料室、玩具圖書館、兒童活動室
1樓	借還書處、Délifrance、中華書局「慢讀時光」、衣物間
地面	展覽館、演講廳、讀者服務簡介廳、活動室

重要設施

地下

展覽廳

面積有1,500平方米以上，係現時最大型可提供租借嘅其中一個文化設施，重可以分隔成五間較細嘅展覽廳作為租借。呢度設有放映、音響同環迴天線系統。

演講廳

有多層式座位合共290個，設有音響系統、電影同錄像放映設備同即時傳譯設施，方便舉行講座、研討會同公開論壇。

圖書館服務簡介廳

配備互動電腦、錄像放映同音響系統、以至有展品簡介圖書館服務同使用方法。讀者可以從中知道中央圖書館同系統入面其他公共圖書館嘅各種設施同運作。

推廣活動室

兩個活動室配備放映同音響系統設施，可以舉辦不同類型嘅活動。

二樓

兒童借閱及參考圖書館

配備合共128,000冊可供外借同參考嘅書，另有圖畫書部畀幼兒閱讀，同配備兒童雜誌；館內不時為小讀者舉辦各類型嘅推廣活動。

兒童活動室

備有多層式座位、音響同錄像放映系統，方便進行推廣活動、故事時間同表演。

玩具圖書館

作為全港首間喺公共圖書館設立嘅社區玩具圖書館，配備大約有1,000件富教育意義同可啟發智能嘅玩具同多媒體套材，畀0-8歲兒童同家長一齊用；圖書館不時舉辦嘅遊戲活動同工作坊，係為咗倡導遊戲嘅意義同價值，同培養親子關係。玩具圖書館重設有一個資源中心，畀家長同兒童工作人士，提供玩具同埋同遊戲有關嘅理論、概念、實踐方法同技巧方面嘅參考資料。

兒童多媒體資料室

配備20部專為兒童而設嘅微型電腦，藉住集互動、教育同資訊並重嘅兒童唯讀記憶光碟同多媒體資料，培養兒童對電腦嘅興趣，同令佢哋掌握基本嘅電腦知識，亦幫助佢哋提高使用電腦方面嘅興趣同技巧。

三樓

成人借閱圖書館

供外借嘅館藏包括咗27萬冊書籍、12,000盒卡式錄音帶同鐳射唱片。館內設有大約180個座位、閱讀枱裝有電插座同數據線路嘅輸出插座，方便接駁讀者嘅手提電腦。

四樓

書籍復修室

設有修補、重新釘裝同修復珍本書籍嘅適當器材。

報刊閱覽室

報刊閱覽室分別由最新報刊（喺五樓）、逾期報刊同縮微本報刊三個獨立嘅專部組成，設有座位約270個。重有，亦裝設咗唯讀記憶光碟網絡同聯機電腦終端機；縮微本報刊專部亦提供舊報刊資料嘅翻查。

縮微資料製作室

設置所需嘅器材，供內部製作圖書館使用嘅微型資料同唯讀記憶光碟使用。

多媒體製作室

用作配音同複製視聽資料，同將印刷資料轉換成機讀格式/數碼數據庫。

媒體製作室

兩間媒體製作室備有錄像同電腦設備，用作將錄像資料轉換至VCD或DVD格式同印製文件高映片。

五樓

電腦資訊中心

約有微型電腦35部，畀讀者學習使用電腦、聯機公眾檢索目錄、唯讀記憶光碟及聯機數據庫，除作為電腦教育工具外，亦有助讀者瞭解及認識點樣用電腦嘅資料。

地圖圖書館

存量約有一萬幅，重點收集香港同中國國內嘅地圖，館內亦有電子地圖，包括將全港基礎地圖數碼化嘅香港數碼式地圖。除此之外，館藏亦包括世界各國嘅地圖集、旅遊圖同埋同地圖學有關嘅參考書，方便讀者查閱。呢個閱覽室亦設有影印機畀讀者影印，重安裝咗多媒體電腦工作站，方便讀者檢索唯讀記憶光碟同聯機數據庫。

六樓

青少年借閱及參考圖書館

作為公共圖書館系統內首間專為12至17歲年青人而設嘅圖書館，呢度為青少年提供多類型嘅優質館藏；藏書量約為36,000冊，館藏書種、雜誌同多媒體資料專為年青人挑選，以滿足佢哋嘅廣泛興趣同需求；同培養佢哋嘅責任心同適應力，協助佢哋健康成長。

視聽資料室

數碼圖書館嘅心臟地帶，視聽資料嘅藏量約10萬項，配備錄像放映間、開放式觀賞同收聽區；以及設置適用於數碼錄像嘅放映器材、耳筒輸出插座、電視熒幕同電腦終端機。

小組研討/觀賞室

三間小組研討/觀賞室將設有錄像同電腦設備畀讀者借用。

語言學習室

提供35個座位方便語言自學；每個座位設有聯網電腦終端機，亦包括播放語言學習聲帶嘅錄音機、鐳射唱機同耳筒等設備，內含語言學習程式，使用者可以按自己嘅速度學習語言。

七樓

中央書庫

配備電動組合書架系統方便集中存放書籍。呢個書庫所設置嘅聯機電腦終端機，可供互通信息或作書籍檢索，並接駁至自動書籍輸送系統。

珍本館藏室

用嚟存放珍本書籍，室內配備恒溫及濕度控制設備，同獨立操作嘅氣體滅火系統。為咗保存館內珍藏嘅書籍同文獻，書籍復修室配備修補同防蟲嘅先進器材，復修文獻嘅專業工作由具豐富經驗嘅館長負責。

展覽間

專為展覽珍貴嘅舊有館藏。

八至九樓

中央參考圖書館

分作6個專部，包括一般參考部、香港資料部、社會科學部、科技部、商業及金融部同人文科學部，總館藏量大約600,000項，方便市民查閱有關嘅資料。

香港文學資料室

收藏咗《香港文學特藏》，提供關於本地中文文學嘅全面資料畀市民參考。

研討室

多間設有4至8個座位嘅研討室，開放畀市民預訂使用。

電話資料查詢中心

設喺圖書館八樓，裝設一套先進嘅電話系統同備有電腦設備，方便翻查聯機網絡同海外數據庫。中心由專業圖書館職員當值，為讀者解答有關圖書館服務同其他參考資料嘅來電查詢。

十樓

藝術資源中心

前身係以前設喺香港文化中心行政大樓平台嘅藝術圖書館，並收藏咗大量有關世界各地同本港嘅藝術資訊、資料同埋書（例如樂譜）。該中心重有兩間音樂練習室，所設嘅電腦同電子琴，更方便讀者作曲同練習樂器。

服務

作為香港最大型嘅圖書館，香港中央圖書館除咗提供超過200萬件館藏畀人借同參考，重提供以下多種服務：

• 自助借還書籍終端機：設喺圖書館各層，方便讀者以自助形式借還書。
• 24小時還書箱服務：設喺圖書館外，方便讀者喺圖書館開放時間以外歸還資料。
• 資訊終端機及熒幕屏：設喺圖書館各層嘅資訊終端機，同設喺大堂嘅熒幕屏，都介紹咗圖書館同康文署嘅其他文化資訊。
• 電腦輸送系統：圖書館各部門由一個電腦控制嘅輸送系統聯繫，運送書籍到各層。
• 多媒體資訊系統：喺電腦資訊中心提供，附設數碼圖書館功能。
• 聯機公眾檢索目錄：方便讀者查閱資料喺各館嘅借還狀況。
• 電動組合書架系統：閉架部份安裝密集書架系統，部份放置珍貴資料嘅書架更備有淨化系統，用作過濾空氣同消滅可破壞圖書館資料嘅微生物。
• 國際組織收藏圖書館：喺中央參考圖書館提供，包括亞洲開發銀行、歐洲聯盟、國際海事組織、聯合國、聯合國教科文組織、世界銀行、世界貿易組織同世界糧食計劃署嘅參考文獻。

重大事件

跳樓案

2009年7月8號下晝五點到，一個着藍衫約50歲嘅中年男人由圖書館六樓攀過圍欄飛身跳落街，倒臥一樓大堂，後嚟圖書館女職員同救護員分別為傷者進行心外壓，但送院治療後證實不治，其後警方喺男子身上淨係搜出一包香煙，並冇任何身份證明文件，係香港中央圖書館自啟用以來第一次有人喺館內跳樓死亡。

2014年10月22號下晝1時幾，一名約60歲嘅中年男子喺六樓扶手電梯旁攀過圍欄躍下並倒臥1樓大堂自動借書處對開地上前，多人目擊。其後圖書館女職員為傷者進行心肺復蘇，送院後證實不治。警察喺圖書館上疑檢獲遺書，嗰名男子身上冇任身份證明文件。

2015年7月11號下晝五點到，一名約74歲老翁疑因病同家事困擾，喺館內高處墮下，跌落兩條扶手電梯之間嘅隙縫，當場陷入昏迷，其後由到場消防員救出，但係救唔返。

2016年12月11號，館內再發生有人墮樓事件，一名26歲男子從5樓躍下，倒臥1樓大堂地上並陷入昏迷，滿地鮮血，職員見狀報警，並以展板圍起傷者。傷者被送去律敦治醫院搶救後終告不治。現場有小童目睹事發經過被嚇到大喊。

武漢肺炎疫情期間開放安排

2020年1月，政府為咗防範武漢肺炎同避免市民聚集，圖書館喺2020年1月29號起全面暫停開放。到同年3月11號至恢復有限服務，自修室、電腦同其他多媒體設施繼續關閉。開放式嘅櫃位以紙板同膠紙加設臨時屏風。進入圖書館嘅人士要排隊攞籌，戴口罩同量度體溫，每個鐘只准最多250人入內。有排隊者批評館方排隊嘅安排造成人群聚集，而只准逗留一個鐘嘅時間不足，寧願繼續閉館，各圖書館喺同年3月23號再度全面暫停開放。其後喺同年5月6號再度全面恢復有限服務。各圖書館喺同年7月7號恢復開放時間，到15號再度全面暫停開放。其後喺同年9月17號再度全面恢復有限服務，各圖書館喺同年9月29號恢復開放時間。各圖書館喺同年12月2號再度全面恢復有限服務，各圖書館喺同年12月10號再度全面暫停開放。其後喺2021年2月18號再度全面恢復有限服務，各圖書館喺同年4月7號恢復開放時間。

交通

交通：行人天橋及斑馬線通往維園正門

鐵路

• 港鐵：
  • 港島綫銅鑼灣站F出口、天后站B出口

• 電車

巴士

• 新巴：
  • 2、2A、2X、8、8H、8P、15B、18、18P、19、19P、23、23B、25、26、38、42、42C、63、65、81
• 城巴：
  • 5B、5X、8X、10、11、25C、72、72A、77、96、592、A11、E11、E11A
• 過海隧道巴士：
  • 102、103、106、108、112、116、170、307、601、601P、603、603A、619、619X、621、671、673、678、680、681、681P、690、914、914P、914X、930X、948、948A、948B、948P、948X、962、962B、962P、962X、967X、968、968A、969、969P

小型巴士

• 港島專線小巴：
  • 25、39M、56
• 公共小巴：
  • 銅鑼灣 ↔ 筲箕灣

出面網頁

• 香港中央圖書館嘅官方網頁