香港大學
 |
| 香港大學 | |
|---|---|
 香港大學校徽 | |
| 英文名 | The University of Hong Kong (HKU) |
| 校訓 | 明德格物a Sapientia et Virtusb（拉丁文） |
| 開辦 | 1911年3月30號 |
| 類型 | 法定大學 研究型綜合大學 |
| 校監 | 李家超[1]c |
| 校長 | 張翔[1] |
| 副校長 | 王于漸 首席副校長（暫任） 田之楠 行政及財務副校長（暫任） 宮 鵬 副校長（學術發展） 何立仁 副校長（教學） 劉澤星 副校長（健康）（暫任） 申作軍 副校長（研究） 任詠華 副校長（國際創新中心）（暫任） 顔慶雲 副校長（環球事務）（暫任） [1] |
| 教務長 | 何立仁（署理）[1] |
| 教師 | 9,288[2] |
| 員工 | 4,427[2] |
| 本科生 | 18,491[3] |
| 研究生 | 20,675[3] |
| 畢業生 | 294,200[4] |
| 代表色 | 深綠色 |
| 網站 | hku |
 | |
| 以上數字更新到2023 / 2024年度 | |
香港大學（粵拼：hoeng1 gong2 daai6 hok6，簡稱港大，英文：The University of Hong Kong，HKU）係香港一間研究型大學，校舍主要分佈嚮香港島薄扶林一帶。1911年成立，1912年開校，係香港第一間大學，喺好長一段時間內亦係香港唯一一間大學。大學依家有十個學院，學科繁多，包括法律、心理學、生物醫學等等。學校喺世界前列，係全世界第一支可以認到沙士病毒嘅研究隊伍，亦都培養咗好多法律、政治、商學、科學同醫學界等等嘅社會名人。
史
[編輯]1910年3月16號，當時嘅港督盧吉主持港大本部大樓嘅動工儀式。1911年3月30號，港大正式成立。1912年3月11號舉行開幕禮，同年，第一屆學生入學。大學最初淨係得三個學院：醫學院、工程學院同埋文學院。醫學院嘅前身係喺1887年創立嘅香港西醫書院，孫中山都喺呢間書院讀過醫。1916年12月舉行第一屆畢業禮，有23個畢業生同5個榮譽畢業生。1941年因香港淪陷而停辦，到1945年復辦。1961年學生人數係2000，係1941年嘅四倍。1989年後因政府增加大學學位令到學生人數倍增。2002至2003學年有學生19000人。2012年起好咗百週年紀念校園，並且跟從香港教育改革，本科教育轉成四年制。
校園同建築
[編輯]本部校園
[編輯]香港大學本部校園坐落喺港島般咸道同薄扶林嗰頭[註 1]，佔地約莫14[7]到16公頃[8]。港大嘅十間學院入面有五間都喺呢度，佢哋係：建築學院、港大經管學院、教育學院、工程學院、同埋理學院[7]。除咗圖書館總館同美術博物館之外，本部校園仲設有一條叫做大學街嘅雙層行人通道，駁去西面嘅百周年校園[8]。
本部校園嘅主要特色係嗰度建築風格嘅多樣性，由新古典主義嘅本部大樓到七十年代嗰時起嘅現代建築都有[7]。經過咁多年嘅保育同發展，有人讚呢度係「中西合璧、新舊共融」嘅校園[8]。計埋本部大樓，港大嘅七棟法定古蹟入面，有六棟都喺本部校園，包括孔慶熒樓外部、馮平山樓外部等等[9]。
百周年校園
[編輯]
為咗應付三三四新學制同增收非本地生帶嚟嘅額外四成學生[10][11]，港大喺2005年開始規劃向本部校園以西擴建。工程喺百周年校慶之後冇耐搞掂，2012年啟用[12]。百周年校園主要有三棟樓，俾文學院、社會科學學院、同法律學院使用。另外仲有間6000平方米大嘅「智華館」研習坊，近乎全日開放俾學生自主學習[7][10]。
百周年校園選址「唯一一幅」本部校園隔籬嘅可發展用地，原先係西區抽水站及濾水廠[10]。校方畀咗水務署五億去重置配水庫[11]，包括將鹹水水塘搬入龍虎山岩洞，做法全港首創[10][13]。原本嘅食水配水庫攞咗嚟做容納成千人嘅音樂廳兼講堂，而三座歷史建築就活化保留[10][13]。百周年校園嘅另一個特色係大量嘅綠化元素，除咗屋頂綠化之外，仲有百周年花園同三個學術庭園[8][10]。
沙宣道校園
[編輯]
沙宣道校園又叫醫學院校園，主要係港大李嘉誠醫學院用緊，設有各式各樣嘅實驗室同先進設備[14]。校園位於港島西沙宣道，同本部校園相距三公里左右[7]，平時有校巴往來[14]。馬路對面嘅瑪麗醫院由落成開始就已經係醫學院嘅教學醫院，大部分臨床學系都會喺呢度上堂，並且有行人天橋連接其他教學樓[7][14]。
余振強醫學圖書館設喺沙宣道21號蒙民偉樓[7]，係世界衞生組織嘅托存圖書館之一。館内收藏咗大量生物醫學同衛生科學刊物，有啲仲可以追溯到醫學院嘅前身華人西醫書院[14]。為咗應付空間需求，醫學院制定咗全面發展計劃[14]。長遠嚟講除咗會起新嘅教學大樓，亦會擴展學生宿舍，同起一條「大學行人走廊」連接成個沙宣道校園[15]。
其他設施
[編輯]- 菲臘牙科醫院
位於西營盤嘅菲臘牙科醫院係港大牙醫學院嘅教學醫院，佢同本部校園只有一段仔距離[7]。醫院由政府資助，專門提供訓練牙醫同牙科輔助專業人員嘅設施[16]。除咗臨床教學設施之外，港大嘅牙科圖書館亦喺呢度[7]。
- 嘉道理中心
香港大學嘉道理中心喺一九八零年代，由賀理士．嘉道理爵士同羅蘭士．嘉道理勳爵捐錢起成。中心位於香港石崗，佔地十公頃，遠離煩囂、環境寧靜。呢度唔只係研究農林園藝同環境科學嘅地方，亦有唔少住宿設施，方便校内外團體搞迎新營、研討會等等活動[17]。
- 太古海洋科學硏究所
太古海洋實驗室喺1990年開幕，1994年擴建之後改用依家呢個名。研究所位於鶴咀，喺正香港唯一一個海岸保護區隔籬，主要俾理學院嘅研究生做海洋科學方面嘅研究[18]。1955年喺香港海域發現、被稱之為「港鯨」嘅長鬚鯨嗰副骸骨標本就係喺呢度收藏展示[19]。
排名
[編輯]| 大學排名 | |
|---|---|
| 香港大學 | |
| 世界排名 | |
| 《QS》世界排名（2025）[20] | 17 |
| 《泰晤士》世界排名（2025）[21] | 35 |
| 《泰晤士》國際化排名（2024）[22] | 6 |
| 區域排名 | |
| 《QS》亞洲排名（2024）[23] | 2 |
| 《泰晤士》亞洲排名（2024）[24] | 6 |
| 資料更新到2024年10月 | |
爭議同大事
[編輯]張祺忠殺妻案
[編輯]港大宿舍偉倫堂喺2018年8月17號發生咗一單倫常命案——時任舍監兼機械工程系副教授張祺忠用電綫箍死咗佢老婆[25]。佢製造咗死者離家出走嘅假象之後報警話老婆失蹤，並且喺黃克競樓辦公室藏屍[26]。差佬8月28號上門調查嗰陣發現屍體，拉咗張祺忠[25][27]。時任校長張翔喺第二日開學禮致辭嘅時候主動提起單嘢，形容係令人驚訝嘅校園悲劇[27]。
案件2020年喺高等法院開審。張祺忠否認謀殺、承認誤殺，但控方唔接納[28]。辯方呈上三百幾人嘅求情信，又有專家證人證明被告成日俾死者心理虐待搞到抑鬱，先會失控殺人[28]。但控方話張祺忠犯案冷靜，殺人係出於金錢糾紛[29]。張祺忠最後被判處終身監禁，謀殺同阻止合法埋葬屍體罪嘅刑期同時執行[28]。佢不服刑期上訴得直，案件被發還重審[30]。
唔承認學生會
[編輯]
2021年7月1號，有差佬喺銅鑼灣俾人用刀拮傷，疑犯梁健輝其後自戕。香港大學學生會評議會7月7號開會，通過動議「感激」梁健輝為港犧牲[32]。呢單嘢引嚟各方評擊，連評議會撤回議案、學生會幹事會全體請辭都平息唔到[33]。校方亦發聲明譴責佢哋美化暴力、損害校譽，並喺7月13號表示唔再承認學生會喺校内嘅角色[34]，被質疑違反咗《香港大學規程》[35]。
港大繼四月宣佈唔再代收會費並收返民主牆等等設施[36]，今次更係要求學生會搬走[37]。新設立嘅課外活動支援處取締咗學生會接手屬會，但有學生組織因為後來用咗提及學生會嘅舊名而被除名[38]。到八月，校委會再禁止涉事學生進入校園，唔俾佢哋上堂或者返宿舍[32]。有傳媒形容港大嘅做法係「封殺」學生會[32]。
法律地位
[編輯]香港大學屬於香港法定院校，由香港法例第1053章規管。
交通
[編輯]睇埋
[編輯]註
[編輯]參考
[編輯]- ↑ 1.0 1.1 1.2 1.3 〈大學主管人員〉。《香港大學》。2024年。喺2024-10-11搵到。
- ↑ 2.0 2.1 〈教職員數據〉。《數據一覽》。香港大學。2024年10月。喺2024-10-11搵到。
- ↑ 3.0 3.1 〈學生人數總覽〉。《數據一覽》。香港大學。2024年10月。喺2024-10-11搵到。
- ↑ 〈畢業生數據〉。《數據一覽》。香港大學。2024年10月。喺2024-10-11搵到。
- ↑ 5.0 5.1 Wilmshurst, David (2007年1月24號)。〈背景〉。《香港大學》 (英文)。喺2024-02-04搵到。
- ↑ 〈第1053章 《香港大學條例》〉。《電子版香港法例》。2023年10月20號。喺2024-02-04搵到。
- ↑ 7.00 7.01 7.02 7.03 7.04 7.05 7.06 7.07 7.08 7.09 "Our Campuses". HKU Estates Office (英文). 喺2023-12-31搵到.
- ↑ 8.0 8.1 8.2 8.3 〈香港大學薄扶林本部校園〉。《電影服務統籌科創意香港》。原著喺2023-12-31歸檔。喺2023-12-31搵到。
- ↑ 〈香港大學法定古蹟〉 (pdf)。古物古蹟辦事處。2022。喺2023-12-31搵到。
- ↑ 10.0 10.1 10.2 10.3 10.4 10.5 〈齊來締造歷史: 香港大學百周年校園啟動典禮〉 (pdf)。香港大學外務處。2008年2月27號。喺2024-01-07搵到。
- ↑ 11.0 11.1 麥培思 (2009年1月12號)。〈香港大學百周年校園〉 (pdf)。喺2024-01-07搵到。
- ↑ 〈首頁〉。《百周年校園》。喺2024-01-07搵到。
- ↑ 13.0 13.1 Wong & Ouyang。〈香港大學 百周年校園〉 (PDF)。2017 UABBHK。原著 (pdf)喺2024-01-07歸檔。喺2024-01-07搵到。
- ↑ 14.0 14.1 14.2 14.3 14.4 〈校園簡介〉。《香港大學李嘉誠醫學院》。2020年1月23號。喺2024-01-21搵到。
- ↑ 〈香港大學發展項目（南區）〉 (pdf)。Estates Office, HKU。喺2024-01-21搵到。
- ↑ 〈關於我們〉。《菲臘牙科醫院》。喺2024-02-03搵到。
- ↑ 〈嘉道理中心〉。《香港大學 - 嘉道理中心》。2022年5月25號。喺2024-02-04搵到。
- ↑ "About". 《香港大學 太古海洋科學研究所》 (英文). 喺2024-02-04搵到.
- ↑ 〈時事通識：長鬚鯨骨骼標本〉。《無綫新聞》。2023年8月11號。喺2024-02-04搵到。
- ↑ 〈QS世界大學排名 2025〉。QSChina (中國中文)。喺2024-06-16搵到。
- ↑ "World University Rankings 2025". Times Higher Education (英文). 喺2024-10-11搵到.
- ↑ "Most international universities in the world 2024". THE Student (英文). Times Higher Education. 2024年1月24號. 喺2024-02-27搵到.
- ↑ 〈QS亞洲大學排名 2024〉。QSChina (中國中文)。喺2024-06-16搵到。
- ↑ "Asia University Rankings 2024". Times Higher Education (英文). 喺2024-10-11搵到.
- ↑ 25.0 25.1 朱棨新 (2020年11月26號)。〈張祺忠涉殺妻｜啞忍妻語言暴力多年終殺妻 張被裁定謀殺罪成〉。《香港01》。喺2024-01-28搵到。
- ↑ 朱棨新 (2020年11月16號)。〈張祺忠涉殺妻｜不想揼妻落海移屍辦公室 張扮搵妻卻裝不出焦慮〉。《香港01》。原先內容歸檔喺2021-01-10。喺2024-01-28搵到。
- ↑ 27.0 27.1 〈警方落案起訴張祺忠謀殺罪〉。《信報網站》。2018年8月29號。喺2024-01-28搵到。
- ↑ 28.0 28.1 28.2 〈張祺忠殺妻罪成囚終身 阻止屍體合法埋葬監禁28月〉。《明報新聞網》。2020年12月3號。原先內容歸檔喺2020-12-03。喺2024-01-28搵到。
- ↑ 〈張祺忠涉殺妻｜控方：張祺忠自尊心不會因「靠你揸兜」說話受損 殺妻因金錢爭拗〉。《明報新聞網》。2020年11月24號。喺2024-01-28搵到。
- ↑ 〈港大前副教授張祺忠殺妻案上訴得直 發還重審〉。《香港電台網站》。2024年2月2號。喺2024-02-05搵到。
- ↑ 學苑編輯委員會 (2021年7月11號)。〈學生會大樓、民主牆、告示板等學生會設施上的文宣全被拆除〉。《學苑》。原著喺2024年2月3號歸檔。喺2024-02-03搵到。
- ↑ 32.0 32.1 32.2 〈【封殺學生會】學生評議會曾「感激」梁健輝犧牲 港大校委會禁涉事學生進入校園〉。《立場新聞》。2021年8月4號。原著喺2021-12-24歸檔。
- ↑ 〈港大學生會撤評議會感激刺警案疑兇議案 幹事會辭職〉。《明報新聞網》。2021年7月9號。喺2024-01-14搵到。
- ↑ 〈港大：不再承認港大學生會作為獨立註冊社團在校內角色〉。《香港電台網站》。2021年7月13號。原著喺2021-07-16歸檔。
- ↑ 胡家欣 (2021年7月13號)。〈港大不承認學生會 多個委員會將無學生代表 被質疑違規程〉。《香港01》。原先內容歸檔喺2021-12-08。喺2024-01-14搵到。
- ↑ 胡家欣 (2021年4月30號)。〈港大每年代學生會收約140萬會費 前幹事：停收對財政有災難影響〉。《香港01》。喺2024-01-14搵到。
- ↑ 〈港大學生會成員「執包袱」〉。《星島網》。2021年7月16號。原先內容歸檔喺2021-12-24。喺2024-01-14搵到。
- ↑ 學苑編輯委員會 (2023年10月28號)。〈文學院學生會於內部活動使用含「香港大學學生會」字眼材料 被CCSO除名〉。《學苑》。原著喺2024年1月13號歸檔。喺2024-01-14搵到。
出面網頁
[編輯]