放射性定年法

出自維基百科,自由嘅百科全書
Jump to navigation Jump to search
暴龍嘅頭骨;用放射性定年法可以測定呢棚骨個主人大概喺幾耐之前生存過。

放射性定年法粵拼:fong3 se6 sing3 ding6 nin4 faat3英文radioactive dating / radiometric dating)係一種用嚟同某啲物料-好似係或者岩石-測定佢哋嘅年代嘅方法。呢種方法運用咗放射性同位素(radioactive isotopes)嘅原理:一,同一種化學元素好多時會有多種嘅同位素,而呢啲同位素當中有啲會具有放射性(即係曉放幅射)有啲冇,有放射性嗰啲同位素會以恆定嘅率衰變,變做第啲同位素;二,當生物嘅身體或者岩石喺形成嗰陣,佢內部會有某啲特定比例嘅同位素;而呢兩點加埋就表示,科學家可以透過測定一件生物或者岩石樣本入面唔同同位素嘅含量比例,嚟到斷定件嘢係喺幾耐之前形成嘅,常見嘅放射性定年法會用等嘅元素嚟做年代測定[1]

放射性定年法源自化學嘅研究,但係對好多化學以外嘅科學領域都好有用:透過運用放射性定年法,研究地層學嘅科學家確立咗地質時代(geological time scale)[2]嘅學說,畫出咗地球同埋佢各嘅部份分別有幾耐歷史嘅時間線,而地質時代呢門學說為對生命同地球嘅研究作出咗好大嘅貢獻,令到科學家能夠推斷化石嘅年代同進化嘅發生時間;除咗噉,放射性定年法對考古學都好有用,幫到手測定由考古挖掘掘到出嚟嘅物件嘅年代。

呢種年代測定方法係喺 1907 年由美國化學家 Bertram Boltwood 發明嘅[3],而到咗廿一世紀,放射性定年法經已做咗科學界鑑定岩石同第啲地質物體嘅年代嘅主要方法,化石同地球嘅年代測定都係用放射性定年法做嘅。

理論基礎[編輯]

核衰變嘅圖例;鉛-212(212Pb)係唔穩定嘅鉛同位素,佢會射出一啲粒子,並且衰變做穩定啲嘅鉛-208(208Pb)。
一部熱電離質譜器;呢種架生成日俾科學家攞嚟做放射性定年。

核衰變[編輯]

內文: 核衰變指數衰減

核衰變(radioactive decay)係指元素由唔穩定嘅原子核嗰度自主噉放啲幅射出嚟,直到穩定為止嘅過程[4][5]:一般嘅物質冚唪唥都係由某啲化學元素組成嘅,例如,就係(H)同(O)呢兩種元素嘅化合物;每一隻元素都有專屬於佢嘅原子數(atomic number;指呢隻元素嗰啲原子粒原子核有幾多粒質子),有陣時,一隻元素又會有幾款唔同樣嘅原子,呢啲唔同嘅款嘅原子會有同樣嘅原子數,但係當中某啲款嘅原子核會多咗啲中子喺度-呢啲同一個元素嘅唔同款就係所謂嘅同位素(isotope)。好多時,同位素之中有啲係唔穩定嘅,呢啲唔穩定嘅同位素會進行核衰變;喺呢個過程當中,粒原子會射啲幅射(包括咗 Alpha 衰變Beta 衰變多種)出嚟或者直接分裂做細粒啲嘅原子,跟手就會再變成比較穩定嘅原子。

是但俾一粒個別嘅原子核,「佢會喺乜嘢時間衰變」係冇可能預測嘅,但係「一大柞(指幾十億粒)原子當中有幾多衰變咗」呢樣嘢就好易預測[4]:研究一再證實咗,喺是但一個時間點,「一舊物件入面嘅原子當中有幾多衰變咗」實會跟從一個指數函數(exponential function)。即係話以下呢條算式會成立:

當中

係指時間,
係「喺時間點 放射性同位素嘅量」,
係指「開頭嗰陣舊物件裏面有幾多放射性同位素」,
嘅數值視乎同位素而定,
自然底數

呢條式嘅暗示咗,舊物件當中嘅放射性同位素原子嘅數量會每隔一段固定嘅時間減少一半,而呢段固定嘅時間就係所謂嘅半衰期(half-life)。假設有舊岩石啱啱形成,佢當中有某啲固定量嘅放射性同位素原子,喺一個半衰期之後,佢裏面放射性同位素原子嘅數量會少噉咗一半,而如果「舊岩石一開始嗰陣嘅放射性同位素含量」係已知嘅話(每款同位素嘅半衰期有幾長可以用實驗估計),後人就有得靠檢測舊岩石當中嘅放射性同位素含量嚟推斷舊岩石有幾耐歷史[4]。會俾人攞嚟做放射性定年嘅同位素半衰期由 10 年(例如係)去到 1,000 億年(例如係)不等[6]

多數嘅放射性同位素嘅半衰期都係純粹由粒原子特性話事嘅,所以基本上係常數(constant)。實驗顯示咗,放射性同位素衰變得有幾快唔受温度壓力、四圍環境嘅化學成份、或者磁場電場呢啲外在因素影響[7][8][9],唯獨是有少數嘅例外,好似係鈹-7鍶-85、同鋯-89-呢三種放射性同位素嘅衰變率會受原子周圍嘅電子密度影響。

同位素封閉温度[編輯]

內文: 同位素封閉温度

如果有舊曉拒斥核衰變產生嘅核素嘅物料受熱,噉隻核數就會隨時間滲透走,令個放射性定年「鐘」返去零點,而呢樣嘢開始發生嘅嗰個温度點就係所謂嘅同位素封閉温度(closure temperature)[10][11]-以下簡稱「封閉温度」。每種物料同埋同位素系統都有住佢獨有嘅封閉温度,而呢啲温度可以用實驗揾出嚟:科學家可以人工噉(例如揾個熔爐)將一件樣本物粒料攞去加熱,跟手當個科學家熄咗個爐之後,舊嘢會開始冷卻,隨住舊嘢變凍,結晶結構會開始產生,令到同位素滲透嘅速度減慢;當温度跌到去某一個特定嘅水平嗰陣時,啲結晶會足夠去完全阻止同位素嘅滲透-而呢個温度就係要揾嘅封閉温度,衹要舊物料低過呢個温度,舊嘢對於個同位素嚟講就會係一個封閉系統,唔會有同位素走甩。所以當一舊岩石(由熔岩嘅狀態)冷卻嗰時,佢個放射性定年「鐘」都會一路處於零嘅位(核衰變產生嗰啲核素會滲透走嗮),而等到佢冷卻到噉上下,温度低過封閉温度嗰陣時,核衰變產生嗰啲核素先會開始喺舊岩石內部累積起上嚟。因為噉,當同一舊岩石做放射性定年嗰陣,科學家能夠知道嘅嘢係「舊岩石係幾時冷卻到去封閉温度嘅」[10]。於是乎,同一舊岩石嘅唔同部位(而呢啲部位嘅物料可能唔同,所以有唔同嘅封閉温度)分別做放射性定年令到科學家能夠檢測舊岩石嘅温度史。

地質年代方程式[編輯]

以下呢條式將一個樣本嘅核衰變同佢嘅地質時間連繫埋一齊[10][12][13]

當中

係個樣本嘅年齡,
係核衰變所產生嗰種核素而家嘅量(以原子數量計),
係核衰變所產生嗰種核素初頭嗰陣嘅量(以原子數量計),
係做核衰變嗰種核素而家嘅量,有得由 嗰度計出,而
係做核衰變嗰種核素嘅衰變常數(decay constant),等如 1 除以嗰種核數嘅半衰期,再將個數乘以 2 嘅自然對數[14]

上面呢條式令到啲科學家能夠由 呢啲量度得到嘅數值嗰度計個 出嚟,而 就係個樣本由「冷卻到跌落封閉温度以下嗰一刻」至「量度嗰一刻」所過咗嘅時間-喺多個同位素系統當中都係噉[11][15]

準確性[編輯]

「用放射性定年法幫啲物件定年有幾準」係一個相當大嘅議題。放射性定年法係建基於上面嗰條算式嘅,所以佢假設咗好幾樣嘢:

  • 放射性定年法成個方法都係建基於一個假設-做緊核衰變嗰種核素同埋佢衰變產生嘅核素喺成個過程當中都唔會離開舊物件,所以喺做放射性定年嗰陣時,啲科學家要考慮埋舊物件喺佢產生嗰陣同埋存在嘅歷程當中會唔會多咗或者少噉咗啲核素。科學家會盡力攞多啲數據,睇清楚有冇乜嘢跡象顯示舊物件有呢啲變動[16]
  • 做放射性定年要準,噉通常隻做核衰變嘅核素嘅半衰期實要有返噉上下長至得,因為如果做核衰變嗰隻核素嘅半衰期短得滯,佢話噉快就會衰變嗮,個含量會低到啲架生量度唔到-噉自然計唔到數。
  • 放射性定年法亦都要求核衰變所產生嘅核素嘅含量要有返噉上下大,而且有方法將佢哋同本嚟經已喺度嘅同款核素分開,呢個過程通常會涉及同位素比例質譜法(isotope-ratio mass spectrometry)[17]
  • 放射性定年嘅精確性視乎渉及嘅核素嘅半衰期而定。舉個例說明,碳-14(具有放射性嘅一種碳同位素)嘅半衰期有大約 5,730 年,如果有一隻生物死咗 60,000 年嘅話,佢身上嘅碳-14 當中會有超過 99.9% 嘅都經已衰變咗,噉微量嘅碳-14 好難精確噉量度到,自然好難計到準確嘅數。另一方面,喺初頭嗰 5,730 年,隻生物嘅遺體當中嘅碳-14 含量會跌得好快,所以好多時做放射性定年都會做到好精確嘅結果-精確到定佢嘅年代嗰時誤差可以細過 10 年[18]
  • 因為上述嘅考量,科學家喺做放射性定年嗰陣時好多時會攞多幾個樣本:可能嘅做法包括咗由一舊岩石嘅唔同部份抽多幾個樣本做測定,或者喺測定一舊岩石嗰陣時用多種唔同嘅元素嘅樣本隻隻都做一次分析,並且比較呢啲唔同樣本同元素所俾出嚟嘅結果。舉個例子說明,喺格陵蘭西部 Amitsoq 所發現嘅片麻岩(gneisses)當中含有多種嘅放射性同位素,科學家用鉛定年法判定佢有 360(± 5)萬年歷史,而用鉛鉛定年就判定佢有 356(± 10)萬年歷史-兩個方法俾嘅結果互相吻合,所以科學界普遍受落呢個結果[19]

現代測年方法[編輯]

古埃及第十三皇朝法老王圖坦卡門嘅面具;考古學家喺同圖坦卡門個墓啲嘢定年嗰陣有用到碳-14 定年[20]

自從喺廿世紀初開始,放射性定年法就一路都俾人用嚟同地球上嘅各種物質定年,而且技術仲一路係噉進步[14]。到咗廿一世紀,放射性定年法經已先進到能夠用嚟同細到以納克計嘅物件定年。

放射性碳定年法[編輯]

內文: 放射性碳定年法

放射性碳定年法(radiocarbon dating)係運用碳-14(Carbon-14)做定年嘅一種放射性定年法。碳-14 係(carbon)嘅一種放射性同位素,半衰期大約係 5,730 年噉長(同多數嘅放射性同位素比起上嚟算係比較短)[21][22][23],會射幅射衰變做(nitrogen)[24]。同第啲放射性定年法零舍唔同嘅係,碳定年嘅可用範圍廣得好交關:碳喺地球上含量豐富,喺碳定年當中負責做衰變嗰種核素(碳-14)係持續噉喺地球上產生嘅-宇宙射線產生嘅中子喺大氣層上層嗰度同氮氣碰撞會產生碳-14,令到地球上碳-14 嘅總體水平大致上維持穩定,連空氣入面嗰啲二氧化碳都有些少碳-14 喺入面。相比之下,第啲放射性同位素(尤其係重嗰啲)好多時都淨係會喺超新星核合成(nucleosynthesis)嗰度產生,所以半衰期短啲嗰啲經已差唔多喺地球上消失嗮。因為碳喺地球上噉常見,碳定年係最廣受採用嘅放射性定年法之一。

碳定年法喺對生物殘骸嘅定年上好有幫助:一隻以碳為生命基礎嘅生物(即係所謂嘅「carbon-based lifeform」;地球已知嘅生物冚唪唥都係 carbon-based 嘅)會由佢四圍嘅環境嗰度係噉吸收碳同釋放碳-植物會做光合作用嚟整碳水化合物(carbohydrates)俾自己食用,而動物就一係食植物一係食其他動物;當一隻生物死亡嗰陣,佢嘅各種生命過程-包括食嘢-會終止,唔會再做吸收碳同釋放碳嘅過程,而佢遺體入面嘅碳-14 含量會慢慢噉隨碳-14 嘅衰變而下跌。所以如果同一隻生物嘅遺體(包括咗骨頭同埋木乃伊等等)做碳-14 含量檢測,就可以透過定年法知道佢死咗大約幾耐。用碳-14 定年最多可以定到 58,000 至 62,000 年前嘅遺體嘅年-如果條遺體古老過 62,000 年,碳-14 嘅含量就會低到量度唔到[25]

碳-14 定年係放射性定年法當中比較可靠嘅一種:同第啲定年法嘅比較顯示,碳-14 定年俾嘅結果好前後一致;噉係因為碳-14 喺地球上產生嘅率大致上係恆定嘅,就算自從工業革命打後人類大規模噉排放二氧化碳(再外加地磁嘅轉變同太陽風活動對大氣層上層嘅干擾),地球上嘅碳-14 比例就衹係郁咗幾個百分比,而且後嚟 1960 年代嘅核彈測試又令到地球嘅碳-14 含量提升返。一般嚟講,淨係喺某啲極端情況之下-例如火山爆發噉-環境當中先至會突然間多咗或者少咗大批嘅碳-14,令到碳-14 定年變得唔準。

鈾鉛定年法[編輯]

一舊喺方解石上面嘅鋯石
內文: 鈾鉛定年法

鈾鉛定年法(Uranium-lead radiometric dating)涉及咗運用鈾-235 同鈾-238 呢兩種(Uranium)嘅同位素做放射性定年。呢種定年法經已俾科學家調較到喺同後生過 250 億年嘅岩石定年嗰時,誤差會細過 200 萬年[26],而喺用佢同中生代嘅岩石定年嗰時,誤差幅度得嗰 2 至 5% [27]

鈾鉛定年法有兩個「鐘」;一方面,鈾-235 會衰變做鉛-207,而呢種衰變嘅半衰期大約係 7 億年;另一方面,鈾-238 會衰變做鉛-206,而呢種衰變嘅半衰期大約係 45 億年。科學家有得用同一舊岩石當中嘅呢兩個「鐘」做交叉檢查,睇吓兩者俾嘅結果一唔一致,睇吓喺舊石嘅存在歷程當中有冇鉛嘅流失。

鈾鉛定年法好多時會用鋯石(zircon;ZrSiO4)呢種礦物嚟做,亦都會有用獨居石(monazite)嚟做嘅[28]。鋯石喺佢嘅結晶結構當中有鈾原子喺入面,而且佢極之拒鉛,封閉温度又高,對風化耐力強,兼且化學上偏惰性。鋯石會喺改變性嘅事件發生嗰陣產生多層嘅結晶層,每層結晶層都紀錄咗某啲發生喺舊石上嘅大事。

核飛跡定年法[編輯]

內文: 核飛跡定年法

核飛跡定年法(fission track dating)呢種定年法涉及檢驗一塊塊拋光咗嘅物料,科學家會睇呢啲物料上面鈾-238 自發裂變留低嘅痕跡嚟做定年。科學家首先要知道舊物料上面有幾多鈾,例如係擺一塊塑膠片喺塊物料上面,再用慢嘅中子轟擊佢,令到鈾-235 出現引發性嘅裂變(相對於鈾-238 嘅自發性裂變),呢種裂變會喺舊物料上面留低一啲痕跡(所謂嘅 fission track),而呢啲痕跡跟住就會紀錄喺塊塑膠片上面。舊物料嘅鈾含量可以由痕跡嘅數量同中子束嗰度計出嚟。除咗噉,裂變留低嘅痕跡會喺温度高過攝氏 200 度嗰陣自行消失,所以檢驗呢啲痕跡仲幫到手了解一舊岩石嘅温度史。

呢種定年法可以用嚟對好多唔同嘅時間尺度做定年。如果要定嘅年係以百萬年計嘅話,雲母(mica)、玻璃隕石(tektite)、同埋隕石都可以攞嚟用,而再古老啲嘅物料(以千萬年或者億年計嘅)可以用鈾含量唔一樣嘅鋯石、磷灰石(apatite)、榍石(titanite)、綠簾石(epidote)、或者石榴石(garnet)[29]

第啲定年法[編輯]

睇埋[編輯]

參考書[編輯]

  • Gunten, Hans R. von (1995). "Radioactivity: A Tool to Explore the Past". Radiochimica Acta. 70-71 (s1). doi:10.1524/ract.1995.7071.special-issue.305.
  • Magill, Joseph; Galy, Jean (2005). "Archaeology and Dating". Radioactivity Radionuclides Radiation. Springer Berlin Heidelberg. pp. 105–115. doi:10.1007/3-540-26881-2_6.
  • Allègre, Claude J (2008-12-04). Isotope Geology.
  • McSween, Harry Y; Richardson, Steven Mcafee; Uhle, Maria E; Uhle, Professor Maria (2003). Geochemistry: Pathways and Processes (2 ed.).
  • Harry y. Mcsween, Jr; Huss, Gary R (2010-04-29). Cosmochemistry.

[編輯]

  1. IUPAC, Compendium of Chemical Terminology, 2nd ed. (the "Gold Book") (1997). Online corrected version: (2006–) "radioactive dating".
  2. McRae, A. 1998. Radiometric Dating and the Geological Time Scale: Circular Reasoning or Reliable Tools? Radiometric Dating and the Geological Time Scale Talk, Origins Archive.
  3. Boltwood, Bertram (1907). "The Ultimate Disintegration Products of the Radio-active Elements. Part II. The disintegration products of uranium". American Journal of Science. 4. 23 (134): 77–88.
  4. 4.0 4.1 4.2 Best, Lara; Rodrigues, George; Velker, Vikram (2013). "1.3". Radiation Oncology Primer and Review. Demos Medical Publishing.
  5. Nuclear Chemistry: Half-Lives and Radioactive Dating.
  6. Bernard-Griffiths, J.; Groan, G. (1989). "The samarium–neodymium method". In Roth, Etienne; Poty, Bernard. Nuclear Methods of Dating. Springer Netherlands. pp. 53–72.
  7. Emery, G T (1972). "Perturbation of Nuclear Decay Rates". Annual Review of Nuclear Science. 22 (1): 165–202.
  8. Shlyakhter, A. I. (1976). "Direct test of the constancy of fundamental nuclear constants". Nature. 264 (5584): 340.
  9. Johnson, B. 1993. How to Change Nuclear Decay Rates Usenet Physics FAQ.
  10. 10.0 10.1 10.2 Faure, G. (1998). Principles and applications of geochemistry: a comprehensive textbook for geology students. Prentice Hall.
  11. 11.0 11.1 Rollinson, H. R. (2014). Using geochemical data: evaluation, presentation, interpretation. Routledge.
  12. White, W. M. (2003). "Basics of Radioactive Isotope Geochemistry" (PDF). Cornell University.
  13. Oberthür, T, Davis, DW, Blenkinsop, TG, Hoehndorf, A (2002). "Precise U–Pb mineral ages, Rb–Sr and Sm–Nd systematics for the Great Dyke, Zimbabwe—constraints on late Archean events in the Zimbabwe craton and Limpopo belt". Precambrian Research. 113 (3–4): 293–306.
  14. 14.0 14.1 "Geologic Time: Radiometric Time Scale". United States Geological Survey. 16 June 2001.
  15. Stacey, J. S.; J. D. Kramers (June 1975). "Approximation of terrestrial lead isotope evolution by a two-stage model". Earth and Planetary Science Letters. 26 (2): 207–221.
  16. Stewart, K,, Turner, S, Kelley, S, Hawkesworh, C Kristein, L and Manotvani, M (1996). "3-D, 40Ar---39Ar geochronology in the Paraná continental flood basalt province". Earth and Planetary Science Letters. 143 (1–4): 95–109.
  17. Dickin, Alan P. (2008). Radiogenic isotope geology (2nd ed.). Cambridge: Cambridge Univ. Press. pp. 15&ndash, 49.
  18. Reimer Paula J, et al. (2004). "INTCAL04 Terrestrial Radiocarbon Age Calibration, 0–26 Cal Kyr BP". Radiocarbon. 46 (3): 1029–1058.
  19. Dalrymple, G. Brent (1994). The age of the earth. Stanford, Calif.: Stanford Univ. Press. p. 142-143.
  20. Radiocarbon dating verifies ancient Egypt's history. BBC News.
  21. Clark, R. M. (1975). "A calibration curve for radiocarbon dates". Antiquity. 49: 251–266.
  22. Vasiliev, S. S.; V. A. Dergachev (2002). "The ~2400-year cycle in atmospheric radiocarbon concentration: Bispectrum of 14C data over the last 8000 years" (PDF). Annales Geophysicae. 20 (1): 115–120.
  23. "Ales stenar". The Swedish National Heritage Board. 11 October 2006.
  24. "Carbon-14 Dating". www.chem.uwec.edu. Retrieved 2018-11-15.
  25. Plastino, Wolfango; Lauri Kaihola; Paolo Bartolomei; Francesco Bella (2001). "Cosmic background reduction in the radiocarbon measurement by scintillation spectrometry at the underground laboratory of Gran Sasso". Radiocarbon. 43 (2A): 157–161.
  26. Manyeruke, Tawanda D.; Thomas G. Blenkinsop; Peter Buchholz; David Love; Thomas Oberthür; Ulrich K. Vetter; Donald W. Davis (2004). "The age and petrology of the Chimbadzi Hill Intrusion, NW Zimbabwe: first evidence for early Paleoproterozoic magmatism in Zimbabwe". Journal of African Earth Sciences. 40 (5): 281–292.
  27. Li, Xian-hua; Liang, Xi-rong; Sun, Min; Guan, Hong; Malpas, J. G. (2001). "Precise 206Pb/238U age determination on zircons by laser ablation microprobe-inductively coupled plasma-mass spectrometry using continuous linear ablation". Chemical Geology. 175 (3–4): 209–219.
  28. Wingate, M.T.D. (2001). "SHRIMP baddeleyite and zircon ages for an Umkondo dolerite sill, Nyanga Mountains, Eastern Zimbabwe". South African Journal of Geology. 104 (1): 13–22.
  29. Jacobs, J.; R. J. Thomas (August 2001). "A titanite fission track profile across the southeastern Archæan Kaapvaal Craton and the Mesoproterozoic Natal Metamorphic Province, South Africa: evidence for differential cryptic Meso- to Neoproterozoic tectonism". Journal of African Earth Sciences. 33 (2): 323–333.