李國英 (香港)

李國英
出生日	1949年11月18號  （74歲）
母校	王肇枝中學
職業	太平紳士
政黨	民主建港協進聯盟
[改維基數據]

 李國英（粵拼：lei5 gwok3 jing1） ，BBS，MH，JP（英文：Li Kwok-ying，1949年11月18號—，一說1950年）係香港執業律師、香港立法會前議員、大埔區議會（大埔墟選區）前議員、民主建港協進聯盟（民建聯）成員、新界鄉議局委員。李國英喺新界大埔林村出世，係新界原居民，籍貫爲廣東寶安，人稱「煲呔英」。

李國英喺1972年遠赴英國修讀法律課程，又喺當地娶妻生子。佢老婆係民主黨立法會議員鄭家富嘅表妹。佢喺1992年返香港發展，並返回大埔林村鄉間開設律師事務所，服務新界原居民。冇耐，佢就喺沙田參與社區工作，重認識喺沙田從事地區工作嘅民建聯黨員彭長緯（沙田區議會副主席），後來彭長緯推薦佢加入民建聯。第1屆香港區議會選舉中，李國英喺大埔區議會嘅大埔墟選區順利當選區議員，重喺2003年連任。2000年，佢選為新界鄉議局增選委員。2004年，劉江華夥拍李國英，代表民建聯參選立法會新界東選區直接選舉，「爆冷」贏得立法會議席，同黨友兼同鄉張學明雙雙成為首次響立法會直接選舉當選嘅新界原居民。佢同劉皇發、林偉強、張學明合稱「立法會鄉事四子」。2008年7月，只做咗立法會議員四年，李國英宣佈唔會再選。

李國英曾經係民建聯裏面唯一有專業律師資格嘅立法會議員。

個人榮譽

• 榮譽勳章 (香港)（2004年）
• 太平紳士（2006年）
• 銀紫荊星章（2009年）

出面網頁

• 李國英喺Freebase嘅資料
• 〈香港特別行政區立法會 - 議員資料庫〉 (繁體中文)。香港特別行政區立法會。