伊拉克

伊拉克共和國 الجمهورية العراقية‎（阿拉伯文）
通稱：伊拉克
旗 徽
格言：الله أكبر  (阿拉伯文) “真主至大”
國歌：《我的家鄉》（موطني）
屬地（實轄）
幅員 國土：437,072平方公里（世界第57名） 水域：0%
首都	巴格達
中央政府 所在地	巴格達
最大行政區	伊拉克庫爾德斯坦
最大城市	巴格達
時區	UTC+3至UTC+4
國民
人數	以下係2013年嘅估計數字 人數：31,858,481（世界第39名） 人口密度：70/km2（世界第108名）
官方語言	阿拉伯話、庫爾德話、亞拉姆話、伊拉克土庫曼話
官方文字	阿拉伯字母、庫爾德文字母、敘利亞字母、伊拉克土庫曼文拉丁字母
民族	阿拉伯人、阿塞拜疆人、亞述人、庫爾德人
主要宗教	伊斯蘭教、基督教
政制
國家結構形式	聯邦制
政制	議會民主制
主要領袖 國家元首（總統）：阿卜杜勒·拉蒂夫·拉希德 政府首腦（總理）：穆罕默德·希亞·蘇丹尼
經濟
GDP（購買力平價） 以下係2016年嘅估計數字 總計：5,887.37億美元（第36名） 人均：16,323美元（第78名）
GDP（國際匯率） 以下係2016年嘅估計數字 總計：1,484.11億美元（第56名） 人均：4,114美元（第97名）
HDI 以下係2013年嘅估計數字 0.590（第131名）－中
中央銀行	伊拉克中央銀行
貨幣	伊拉克第納爾
資訊
國家代碼	IRQ
國際域名縮寫	.iq
國際電話區號	+964
現役軍人數	170,000（第25名）－2014

伊拉克（粵拼：ji1 laai1 hak1），國名伊拉克共和國（阿拉伯話：الجمهورية العراقية 或 العراق，庫爾德話：كۆماری عێراق），係一個響亞洲西南部嘅中東國家，南面接沙地阿拉伯同科威特，北接土耳其，西北有敘利亞，而東面係伊朗，約旦就喺佢西面。伊拉克所處嘅兩河流域，喺歷史上係人類文明發源地之一。

伊拉克盛產石油，係僅次於沙地阿拉伯嘅第二大石油輸出國。2003年英美聯軍入侵伊拉克，又將當時嘅總統薩達姆侯賽因處死，令伊拉克政局混亂，伊拉克和平問題亦成為國際關注焦點。

國名

伊拉克喺西亞底格里斯河同幼發拉底河下游地區，古希臘人叫呢笪地方做美索不達米亞，意思係兩河之間。而伊拉克呢個名，係嚟自阿拉伯話，呢句阿拉伯話又係由中古波斯話嚟，意思係海岸、陡崖、低地。另外亦有一個講法話伊拉克係解「血管」，比喻兩河流域。

最初無一個明確地域話邊忽係伊拉克，伊拉克多數係講而家伊拉克中南部地區，而北部去到伊斯蘭時代就叫做「傑濟拉¹」，意思係「島嶼」，呢個稱呼到而家重叫緊。

環境

伊拉克喺美索不達米亞低地海拔45.7米，東北部係扎格羅斯山脈，西南部係阿拉伯高原，屬於沙漠地帶，東南部係波斯灣，屬於沖積平原．湖泊同沼澤為主。

伊拉克北部以亞熱帶地中海式氣候為主，其餘大部份地區屬於熱沙漠氣候，雨量小兼炎熱，一年分兩季，11月至3月係寒季，4月底到10月係暑季，唔濕不過最熱去到攝氏38度以上。而春季時間就好短。

伊拉克中部同南部平均降雨量都係得250毫米，但北部山區就去到1000毫米以上，相差好大。

伊拉克係東西方交通要點，水陸兩路都可以去到南歐、高加索、阿拉伯半島、南亞地區。近年又加上生產石油，所以由古到今都係兵家必爭之地。

簡史

内文：伊拉克史

伊拉克所處嘅兩河流域，亦即係史學家所講嘅美索不達米亞文明。喺歷史上係人類文明發源地之一，公元前4700年就已經出現城邦國家。公元前2000年出現巴比倫王國，之後又有亞述帝國同後巴比倫王國。公元前500年畀波斯吞併之後，就成為波斯帝國屬地。一直到673年，阿拉伯穆斯林軍征服咗成個伊拉克地區，之後穆斯林軍用咗嚟做征服波斯同印度信德同中東地區嘅基地，大批阿拉伯移民搬咗去住，伊拉克因為咁而開始慢慢伊斯蘭化，開始倭馬亞王朝時期。

後來因為伊斯蘭教分裂，先後出現哈里哲派同什葉派，伊拉克係喺呢啲教派分裂嘅衝突入面成為磨心，680年第四任哈里發個仔侯賽因就因為呢啲教派衝突而畀人殺死咗，侯賽因因為死得太轟烈，結果成為什葉派精神支柱，佢死嗰日，即係伊斯蘭教曆元月十日，成為什葉派一個重要節日，而佢死嘅地方卡爾巴拉亦成為伊拉克嘅什葉派聖地。

750年阿巴斯革命，結束咗倭馬亞王朝時期，開始咗阿巴斯王朝，將首都由大馬士革搬咗去巴格達，巴格達成為呢個地區宗教、經濟同好多嘢嘅活動中心。

13世紀蒙古入侵，巴格達淪陷，伊拉克成為蒙古伊兒汗王朝領地。到16世紀又畀奧斯曼帝國佔領。1920年英國喺印度做總部入侵伊拉克，奧斯曼帝國淪陷，伊拉克成為英國委任統治區。不過伊拉克人都唔服英國，經過各種鬥爭之後喺1921年8月伊拉克宣佈獨立，成立伊拉克王國。

1963年2月復興黨政變推翻親蘇政府，無幾耐復興黨就畀人推翻。1968年又發動多次政變，成為伊拉克政權，立憲將伊拉克成為人民民主國家，伊斯蘭教列為國教，實行社會主義，推行世俗化同現代化政策。1979年薩達姆·侯賽因接管政權。

薩達姆執政之後，喺宗教、經濟、政治等各方面大力改革，例如喺宗教上落實世俗化同現代化政策，加強對宗教事務控制。喺經濟上又發展伊拉克天然資源，例如石油，改善咗伊拉克經濟情況。不過，薩達姆·侯賽因為咗要令伊拉克成為中東地區最大嘅強國，加上要實現統一阿拉伯願望，於是對鄰近地區進行侵略，其中以兩伊戰爭同海灣戰爭最受國際社會關注，影響亦最大。兩伊戰爭因為打咗成八年，對伊拉克經濟造成損耗，而海灣戰爭就導致聯合國對伊拉克實施經濟制裁，兩場仗都令伊拉克好傷。

2003年英美聯軍入侵伊拉克，2006年將總統薩達姆·侯賽因處死，令伊拉克境內各種政治同宗教派系鬥爭又轉趨惡劣，目前伊拉克和平問題係國際社會關注焦點。

人口

根據2006年7月統計，伊拉克境內總人口 26,783,383 人。阿拉伯人佔75%、庫爾德人佔20%、其他重有5%土耳其人、亞美尼亞人、亞述人、猶太人、伊朗人。

伊拉克人口最密係南部美索不達米亞平原同水源豐富嘅北部丘陵地，其他地方都係人蹟罕至。

宗教

喺伊斯蘭教傳入伊拉克之前，由於曾經係波斯帝國屬地，所以瑣羅亞斯德教同摩尼教都係主要宗教。另外亦有基督教同猶太教喺度傳播。重有啲游牧部族嘅神靈崇拜。

637年阿拉伯穆斯林軍征服咗成個伊拉克地區之後，伊斯蘭教就慢慢成為伊拉克主要宗教。

而家伊拉克境內有96%人係信伊斯蘭教，其中什葉派佔60%、遜尼派佔40%。根據伊拉克共和國憲法，伊斯蘭教係國教。

政區

内文：伊拉克嘅省

伊拉克有19個省：

安巴省 巴比倫省 巴格達省 巴斯拉省 地加省 卡迪西亞省 地亞拉省

杜酷省 艾比爾省 哈勒渣省 卡巴拉省 基卻省 美山省

穆薩拿省 拿謝夫省 尼尼微省 薩拉甸省 蘇利曼尼亞省 華薛省

政治

伊拉克嘅宗教傳統深厚，宗教同政治之間關係微妙，伊拉克以伊斯蘭教為主，一直以來以什葉派為主流，而伊朗又係以什葉派為主，所以兩國歷史上嘅民族仇恨因為咁而緩和，而且重有好多交流。

但自從伊拉克成為英國委任統治區之後，英國搵咗啲遜尼派嘅人做領導，喺反英浪潮之下形成民族主義思想。1947年黎巴嫩阿拉伯社會復興黨喺伊拉克開咗個分派，除此之外，重先後有人成立咗共產黨、獨立黨同國家民主黨。

雖然伊拉克以什葉派為大多數，但伊拉克共和國立國之後，政治上主導政府永遠係遜尼派話事。復興黨以遜尼派為主，1968年發動政變成為執政政權，實施世俗化同政教分離，其實係想壓抑什葉派現代伊斯蘭主義對政權嘅威脅。走強硬路線嘅薩達姆執政之後，對宗教干預程度更大，於是出現反對派同復興黨作對。反對派中以什葉派為主嘅號召黨最活躍，另外伊拉克北部山區嘅庫爾德人亦係反對力量之一。由於什葉派同伊朗關係密切，亦導致執政嘅復興黨將伊朗當成威脅。

但係由於復興黨經濟改革政策改善咗人民生活，社會上對政府都好少不滿，加上政府對反對派打壓，所以反對派始終唔成氣候。政府對什葉派嘅壓迫亦令號召黨將總部搬咗去伊朗，同時喺英國、黎巴嫩、敘利亞、阿富汗設立分部，曾經發動過好多次針對復興黨政府嘅武裝活動。

海灣戰爭之後，庫爾德人曾經發動大規模起義，伊拉克政府出動直昇機、大炮向以庫爾德人為主嘅伊拉克北部山區進行轟炸，殺咗30萬人。之後好多人要走難去伊朗、敘利亞、巴林、英國、美國同好多歐洲國家。

2003年英美聯軍入侵伊拉克，推翻薩達姆政權。

2005年5月3號，伊拉克過渡政府正式宣誓就職。

經濟

喺魯邁拉油田嘅油火

石油業一直為伊拉克提供達95%外匯收入，原油儲量世界第五名。

1980年代，兩伊戰爭造成巨大戰爭開銷，石油生產線被破壞，伊拉克政府只能依賴緊縮開支同借款，並且拖延還款期。戰爭造成超過1000億美元經濟損失。1988年打完仗就重建返採油同管道設施，石油出口逐步恢復。

但1990年8月時，伊拉克入侵科威特，隨即被國際強權經濟制裁。1991年1月開始波斯灣戰爭再次打擊伊拉克經濟。伊拉克將開支傾斜到軍隊、保安部隊同維穩方面，並無恢復經濟嘅良政。雖然自1996年12月聯合國有個石油換食品計劃，但有限度改善伊拉克平民生活條件。該計劃依賴伊拉克政權以石油交換食物、藥品同基礎設施備件。

1999年12月開始，聯合國安理會准許伊拉克盡能力出口石油以滿足人道救濟需要。石油出口回到戰前75%之水平。不過當中28%被用作聯合國賠償基金同支付聯合國相關管理開支。2001年，全球經濟疲軟令油價下跌，打擊伊拉克國民生產總值。經濟問題直到2003年美軍推翻伊拉克政權後，伊拉克透過同國際石油巨頭合作，拍賣國內油田開採權，從而成功打救呢個石油國家嘅經濟。

註

• 註 1: 傑濟拉(Al-Jazirah或Al-Jazira)，阿拉伯話 جزيرة ，亦有人譯做「賈茲拉」

出面網頁

• 伊拉克嘅官方網站
• 〈国家概况 — 中华人民共和国外交部〉 (簡體中文)。中華人民共和國外交部。
• 〈伊拉克共和國 Republic of Iraq - 亞西地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
• "Iraq - United States Department of State" (英文). 美國國務院.
• 伊拉克喺中央情報局《世界概況》嘅資料 （英文）
• 〈イラク共和国 ｜ 外務省〉 (日文)。日本外務省。
• "Iraq - Department of Foreign Affairs and Trade" (英文). 澳洲外交貿易部.