讓愛與和平佔領中環

出自維基百科,自由嘅百科全書
(由佔領中環 (2014年)跳轉過來)
跳去: 定向搵嘢
9月29號中環東面嘅集會情況

讓愛與和平佔領中環(英文:Occupy Central with Love and Peace,解做「畀和平霸住中環」,通稱和平佔中),亦叫佔領中環佔中,係香港大學法律學者戴耀廷教授計劃響2014年搞嘅活動,主題係爭取2017年香港可以落實真普選。呢場活動經已響2014年9月28號正式開波,初頭集中響添馬艦政府總部金鐘一帶,隨住警方用武力鎮壓,令活動由嗰晚開始蔓延到香港其他地方,變成「遮打革命」。

人物[編輯]

佔領中環記者會

積極推動佔領中環嘅戴耀廷、陳健民朱耀明被人叫做「佔中三子」。

經過[編輯]

警方施放催淚彈,嘗試驅散參加集會嘅市民

2014年7月2號凌晨,學聯學民思潮已經喺中環遮打道搞咗場預演佔中,警方用咗5個幾鐘清場,拉咗511人。

8月31號,全國人民代表大會常務委員會宣佈香港政改框架,為特首提名加入好多限制,戴耀廷就決定會啟動佔領中環。9月中,佢哋申請10月1號中華人民共和國國慶嗰日由維園遊行到中環遮打道,再響遮打道集會,但康文署唔畀維園個場佢哋出發,所以惟有取消遊行,只申請遮打道集會,但警方一直都拖住未批。

9月22號開始,學聯帶頭搞罷課,一大班學生亦響添馬艦政府總部出面集會。26號晚,百幾個學生突破防線入咗政總東翼前地(「公民廣場」),到27號警方一度清場,重拉咗幾個核心人物,搞到越嚟越多人走去政府總部聲援。28號凌晨1點幾,戴耀廷見既然有好多人集會,就索性宣佈佔領中環行動正式開始。有佔中支持者贊成提早佔中,但亦有參加集會嘅學生覺得畀人騎劫咗。

活動有過萬人參加,逼滿晒政府總部附近嘅車路,到挨晚警方開始施放胡椒噴霧催淚彈[1]。嗰晚開始,活動蔓延到中環東面、銅鑼灣,同對面海旺角,30號晚更加蔓延到尖沙嘴

到呢個地步,活動已經發展到同佔領中環原定計劃好唔同,加上活動已經唔係由「佔中三子」做領導,所以之後嘅發展,畀好多人叫做雨遮革命。至於原定嘅遮打道集會,最後都搞唔成。

反對聲音[編輯]

社會評論[編輯]

陳志豪喺親建制派網站大公網發表評論,指佔領中環唔符合「公民抗命」嘅基本道德準則。佢認為公民抗命應該係:有可能會增加執政者嘅管治成本,但係唔會損害無關人士嘅利益。而佔領中環會損害香港人利益[2]。評論人陳雲就喺facebook寫話,佔領中環唔係投向中央嘅「外爆」,而係投向香港自己嘅「內爆」,並且認為民主黨蘋果日報立場「怪異」「神奇」[3]

約翰·羅斯,前倫敦市長肎·利文斯通嘅經濟顧問,批評一啲西方媒體嘅報導太虛偽。佢講:「我唔方便評論香港2017年特首普選問題,事關我始終唔係中國人。但西方媒體就香港問題嘅報導太虛偽。喺英國殖民統治香港嘅150年間,英國從未允許香港人選舉香港總督,美國亦冇因此抗議英國。現時中國為香港設計嘅體系遠比英國民主得多,但美國就強烈抗議中國政府。」[4]

民眾支持度[編輯]

2014年,民調顯示佔中支持率38%,反對率54%。

參考[編輯]