奧德修記

出自維基百科,自由嘅百科全書
一件公元前陶器;件陶器上面嘅圖案描繪《奧德修記》「奧德修斯海妖唱歌」嘅情境。

奧德修記ou3 dak1 sau1 gei3》(古希臘文Ὀδύσσεια羅馬字轉寫:Odýsseia [英 1])—又有譯做《奧德修飄流記》或者《奧德賽[註 1] —係古希臘著名史詩之一,總共有成 12,109 行咁長。首詩相傳係由盲詩人荷馬作嘅。

劇情上,《奧德修記》主要係連接住《伊利亞德[希 1]:話說經過特洛伊戰爭之後,英雄奧德修斯同佢旗下嘅軍隊坐船返屋企,但佢得罪咗海神普西頓,普西頓降災令佢哋遇到海難,全軍覆沒;奧德修斯靠住機智同勇敢避過一劫,但普西頓未嬲完,就施法令到奧德修斯搵唔到航線返屋企而喺個海度周圍漂流;另一邊廂,奧德修斯嘅老婆潘妮洛普唔知奧德修斯係生定死;面對一班喺度蠻橫噉向佢求婚嘅人,潘妮洛普就只能夠苦等老公返嚟;去到最後,諸神卒之出手幫奧德修斯,而經過十年漂流生活嘅奧德修斯返到屋企同老婆團聚,仲同佢個仔同啲僕人聯手殺晒啲求婚嘅人。大團圓結局

《奧德修記》有龐大嘅影響力:到咗依家,《奧德修記》已經畀人翻譯咗做好多種語言,畀人公認係世界嘅經典文學著作;首史詩嘅故仔有多次畀人攞去改編做電影等嘅創作品,而且仲有漫畫視像遊戲雖然冇直接用首詩嘅故仔,但就採用咗個故仔當中嘅某啲kiu2

邊個作嘅[編輯]

呢個胸像描繪作者想像中嘅古希臘盲詩人荷馬
內文:荷馬

傳統上,《奧德修記》嘅作者古希臘嘅盲眼詩人荷馬[希 2]。荷馬估計係喺公元前 8 至 9 世紀出世嘅,而根據紀錄,《奧德修記》同《伊利亞德》呢兩首舉世聞名、影響深遠嘅古希臘史詩都係佢嘅作品[1]

不過到咗廿一世紀初,仲有唔少人質疑呢兩首史詩係咪真係荷馬作嘅[1][2]:事實表明,當代(指同荷馬同期)嘅文獻好少可提到荷馬呢個人;對於荷馬喺邊度出世或者一世人做過啲乜,學界所知甚少;有唔少人懷疑《奧德修記》各部份查實係由唔同人作嘅,每部份都喺古希臘人之間口耳相傳,流傳期間變過樣[註 2],傳咗排之後先畀人攞文字紀錄低—而荷馬做嘅只不過係集結前人嘅創作,編成文獻;除此之外,有啲人甚至懷疑荷馬呢個人根本只係一段創設神話—創設神話係指一個群體對於某種自然或者社會現象「點樣嚟」嘅神話,根據呢種睇法,古希臘人之所以會話首史詩嘅作者係荷馬,唔係因為荷馬真有其人,而係因為佢哋好想搵返個個體嚟做「英雄」,當zeng3佢係呢兩首偉大史詩嘅作者[註 3][3]

主要角色[編輯]

呢座雕像描繪創作者想像中嘅英雄皇帝奧德修斯
睇埋:奧德修斯

以下係《奧德修記》嘅重要角色一覽:

  • 奧德修斯一家:
    • 奧德修斯[希 3]:《奧德修記》故事主角,善戰、勇敢、又有智謀嘅英雄,亦係伊法基島[希 4]嘅皇帝;佢出征打完特洛伊戰爭之後心身俱疲,淨係想有咁快得咁快返屋企見老婆同埋個仔,但係佢受到海神普西頓詛咒,被迫喺海上漂流咗成十年咁耐,期間遇到各種嘅危險。
    • 潘妮洛普[希 5]:伊法基島嘅皇后,奧德修斯嘅太太;佢唔淨只生得靚仲好聰明,對老公一條心,一路等奧德修斯返屋企。
    • 鐵利馬庫斯[希 6]:奧德修斯同潘妮洛普嘅獨生子,伊法基島嘅王子,好想搵返佢阿爸同埋趕走係噉搔擾佢阿媽嗰班追求者。
    • 尤麗卡莉亞[希 7]:奧德修斯兩仔爺嘅奶媽,對奧德修斯一家忠心耿耿。
  • 奧德修斯嘅朋友:
    • 雅典娜[希 8]奧林匹斯十二神希臘神話最大粒嗰十二位天神)之一,掌管打仗同智慧等嘅好多樣嘢;雅典娜同奧德修斯關係友好,多次出手幫助奧德修斯一家。
    • 斯加利亞島[希 9]嘅一眾居民:奧德修斯漂流途中去到佢哋個島;佢哋同情奧德修斯嘅遭遇,喺故仔途中幫手送奧德修斯返伊法基島。
    • 色琦[希 10]:識得用巫術嘅女神,曾經施法將奧德修斯啲手下變做豬,但後嚟同奧德修斯化敵為友,仲教奧德修斯點樣搵泰里西亞斯
    • 泰里西亞斯[希 11]:盲眼先知,幫手指導奧德修斯點樣返屋企。
  • 宙斯[希 12]:眾神之王,奧林匹斯十二神之首,亦係雅典娜嘅阿爸;雅典娜為咗想幫奧德修斯返屋企而懇求自己阿爸出面;宙斯亦順應個女嘅懇求,派出奧林匹斯十二神當中嘅傳信之神赫密士去放奧德修斯。
  • 卡聶蘇[希 13]:一位寧芙,鍾意咗奧德修斯,仲用法力將奧德修斯囚禁住;喺呢段期間,卡聶蘇殷勤服侍奧德修斯,想奧德修斯做佢老公。
  • 波利菲莫斯[希 14]獨眼巨人,想食奧德修斯同埋佢啲手下,奧德修斯還手嗰陣插盲咗佢隻眼。
  • 普西頓[希 15]:奧林匹斯十二神當中嘅海神,波利菲莫斯嘅阿爸;佢得知個仔隻眼畀奧德修斯插盲咗,就為咗報復而向奧德修斯落咒,搞到奧德修斯漂流十年。
  • 海妖[希 16]:奧德修斯漂流途中遇到嘅海上妖怪;海妖唱起歌上嚟把聲甜美無比,佢哋嘅歌聲能夠擾亂水手嘅心智,令佢哋喪失理智跳落海然後zam6死。
  • 潘妮洛普嘅追求者[英 2]:伊法基島嘅 108 個男人;呢班男人見到奧德修斯咁耐都未返屋企,諗住奧德修斯死咗,於是就個個都想乘機娶潘妮洛普做老婆,想搶走奧德修斯個王位;佢哋仲嘗試謀殺王子鐵利馬庫斯。

情節內容[編輯]

睇埋:伊利亞德

《奧德修記》嘅情節如下[1][4][5]。要留意嘅係,首史詩用咗攔腰法,首詩一開始嗰段,係講故仔發生到半路嗰時嘅事件。

第一部分[編輯]

呢幅畫描繪特洛伊戰爭當中嘅經典片段—木馬屠城記

首詩開場,長達十年咁耐嘅特洛伊戰爭卒之打完[註 4]。出咗征嘅伊法基島國王奧德修斯仲未返得到屋企。噉係因為佢得罪咗海神普西頓,受到普西頓嘅詛咒

同奧德修斯友好嘅女神雅典娜出場,佢想幫奧德修斯平安返屋企,所以佢求眾神之王宙斯幫手,然後佢自己就扮成一個凡人去伊法基島。扮成凡人嘅雅典娜一到咗奧德修斯座宮殿門口,就見到有 108 個男人喺度聚集—呢班男人知國王奧德修斯好耐都未返,就係噉向皇后潘妮洛普求婚。班追求者係諗住想乘機娶咗潘妮洛普,然後自己就會變成國王。班追求者行為非常惡劣—佢哋當咗宮殿係自己屋企噉,喺度又開 paa1 ti4 又黐飲黐食,佢哋當中有人仲撩宮殿嘅女僕,想借啲咦同啲女僕做愛。

雅典娜更加覺得有必要快啲搵返奧德修斯。佢去搵奧德修斯個仔—王子鐵利馬庫斯。佢話畀鐵利馬庫斯知佢阿爸仲在生。鐵利馬庫斯覺得好振奮,打算出發去打探阿爸嘅下落。而到咗第二朝,鐵利馬庫斯召開公民大會,商討應該點樣處罰嗰班無禮嘅追求者,但係冇人睬佢—佢遠遠冇佢阿爸咁受伊法基島嘅父老尊敬。於是乎,鐵利馬庫斯唯有死死哋氣噉同雅典娜一齊坐船出發,去打聽佢父王嘅下落。

鐵利馬庫斯同雅典娜第一站係去見nip6斯托—涅斯托係希臘其中一個國王,都有份打特洛伊戰爭嘅。涅斯托話佢打完仗就即刻返咗屋企,而佢對上一次見到奧德修斯,係打完仗後奧德修斯選擇要留低喺特洛伊一陣,不過之後佢就冇再見過奧德修斯。涅斯托講完,就建議鐵利馬庫斯去搵斯巴達嘅國王墨涅里俄斯(墨涅里俄斯都有份打場仗)。多謝咗涅斯托之後,鐵利馬庫斯同雅典娜一齊去斯巴達,面見國王墨涅里俄斯同埋佢嘅皇后海倫。墨涅里俄斯諗咗陣,就講:

「我記得喇。當時我同海倫坐船返斯巴達,中途撞到河海神普羅提斯。河海神好似提起,話奧德修斯畀卡聶蘇呢位寧芙捉住咗。」

下一刻,敘述焦點返咗去奧德修斯嘅宮殿:原來正喺呢個時候,潘妮洛普嘅追求者啱啱發現鐵利馬庫斯離開咗伊法基島,就密謀要喺鐵利馬庫斯返嚟嗰陣埋伏佢架船,想攞鐵利馬庫斯條命;而潘妮洛普暗中偷聽到佢哋講嘢,開始擔心自己個仔嘅安危。

第二部份[編輯]

首詩第二部開場,敘述焦點去咗奧德修斯嗰邊。

喺奧德修斯身邊嘅,係寧芙卡聶蘇。原來卡聶蘇鍾意咗奧德修斯,因為噉而施法幽禁住佢,仲wan3足佢七年咁耐。卡聶蘇想奧德修斯做佢老公,對奧德修斯一直都服侍周到,佢仲提出咗個好吸引人嘅建議:

「如果你肯做我老公,我可以畀你得到好似天神噉嘅不死之身。zeng3唔正呀?」

但係奧德修斯由此至終都對老婆死心塌地,一路都拒絕卡聶蘇嘅求婚。

等咗七年,奧德修斯嘅救星終於出現:傳信之神赫密士嚟咗。赫密士命令卡聶蘇放咗奧德修斯,並且解釋佢點解會嚟—原來宙斯聽咗雅典娜嘅請求(第一部份提咗),派赫密士嚟解放奧德修斯。卡聶蘇無可奈何噉放奧德修斯走,不過送咗啲衫、嘢食同埋嘢飲畀佢。奧德修斯一心想返屋企見老婆同仔,所以就即刻郁手整咗隻,然後啟航返屋企。喺呢個時候,同奧德修斯有仇口嘅海神普西頓[註 5]見到奧德修斯重獲自由就發爛渣,施法製造大浪打沉奧德修斯隻筏。奧德修斯死唔去,仲一路游水游到去斯加利亞島嗰度[註 6],一上岸就攰到暈低咗。

第二朝,奧德修斯一醒就見到斯加利亞島嘅公主瑙西卡。瑙西卡話自己之前嗰晚夢見雅典娜叫佢去海邊,嚟到海邊就搵到不醒人事嘅奧德修斯。奧德修斯ai1瑙西卡幫手,瑙西卡就帶奧德修斯去見佢嘅父皇同母后。國王唔知奧德修斯係邊個,但得知奧德修斯嘅處境就肯派艘船送佢返屋企。滿心感激嘅奧德修斯喺斯加利亞島留咗幾日,期間遇到一位盲眼歌手。盲歌手喺度唱歌,歌頌特洛伊木馬(奧德修斯帶頭諗嘅一條計)嘅故事。盲歌手唱唱吓,奧德修斯悲憤交集到喊咗出嚟,仲當場公開埋自己嘅真正身份。

第三部份[編輯]

呢段一開始,奧德修斯講返佢打完場仗之後有乜經歷:奧德修斯同佢嗰十二架船畀風暴吹到偏離航道,偏到去咗食蓮者嘅島。座島上面有啲怪生果,奧德修斯嘅手下食咗啲怪生果就唔記得要返屋企,仲要奧德修斯強行拉佢哋返上船。然後佢哋繼續航行,去到獨眼巨人嘅島。佢哋喺座島嘅大山窿裏面搵到大量嘅芝士,點知獨眼巨人喺呢個時候返山窿,仲即場捉咗奧德修斯嘅兩個手下嚟食;為咗脫險,奧德修斯出計扮請獨眼巨人飲酒,而等到獨眼巨人飲醉之後,奧德修斯同佢啲手下就郁手攞一碌好尖嘅木樁插盲獨眼巨人隻眼,並且趁住此舉引起嘅混亂逃走。

奧德修斯一路走一路大聲噉笑獨眼巨人,途中提到自己個真名係乜。出乎所有人意料嘅係,原來獨眼巨人係海神普西頓個仔,佢知道咗奧德修斯係邊個,就向佢阿爸祈禱。普西頓聽到個仔嘅祈禱,知道自己個仔盲咗,就勃然大怒,施法咒奧德修斯,咒佢要十年都冇得返屋企。

及後,奧德修斯同佢淨低嘅手下航行去到巫術女神色琦嘅島。色琦起初扮友好請佢哋食芝士同飲酒。不過原來啲芝士同酒落咗藥,奧德修斯嘅手下有一半中咗咒語變成豬。不過奧德修斯就好彩,得到赫密士嘅幫助—赫密士送咗啲神草畀奧德修斯,令佢對色琦嘅巫術有抵抗力。奧德修斯唔怕色琦嘅巫術,就攞住劍迫色琦解除佢手下中咗嘅咒。色琦唯有幫佢哋解咒。後嚟色琦色誘奧德修斯同佢啲手下,仲令佢哋喺色琦島留低咗一年咁耐,期間兩方化敵為友。而到咗最後,色琦點條航線畀奧德修斯行,教佢哋去搵先知泰里西亞斯

奧德修斯同佢啲手下渡洋去到世界最西邊嘅港口。佢哋喺嗰度行召魂禮,見到先知泰里西亞斯嘅靈魂。泰里西亞斯開口,話奧德修斯可以返屋企,但係就警告佢哋,叫佢哋要忍口唔好捉太陽神希路斯嘅聖牛嚟食,如果佢哋忍唔住口,奧德修斯嘅船同手下都會消失。除此之外,奧德修斯仲見返佢過咗身嘅阿媽雅提卡莉亞嘅靈魂。奧德修斯由阿媽口中得知老婆潘妮洛普喺度畀成大班追求者騷擾,於是佢就更加下定決心要快啲起航返屋企。

奧德修斯帶住班手下返到色琦島。色琦教佢哋跟住落嚟要行咩航線。奧德修斯即刻出發,途中佢哋經過海妖嘅島:海妖係一種女人頭雀身嘅怪獸,能夠以極之甜美嘅歌聲唱歌,佢哋嘅歌聲會迷惑人嘅心智,令船沉沒。奧德修斯同眾手下一知道有海妖喺附近,個個都即刻用蜂蠟sak1住自己耳仔,以防自己畀海妖迷魂。不過奧德修斯好想聽吓海妖嘅歌聲係咪真係咁甜美,就叫啲手下綁實佢唔畀佢郁,等佢可以聽海妖唱歌之餘又唔會做傻事跳落海。

奧德修斯跟住通過六頭怪獸斯臼拿同大旋渦庫獵狄斯之間嘅海域,死咗六個船員。

奧德修斯最後一站係一座神島。神島上面有一群牛—太陽神希路斯嘅聖牛。奧德修斯本來決意要同呢座島保持距離,但係佢班手下反對,同時宙斯施法引起咗場風暴,搞到奧德修斯同眾手下焗住要留喺島上面。留留吓,奧德修斯同眾手下開始唔夠糧食。奧德修斯心知神牛唔食得,就走咗去祈禱。佢估唔到嘅係,佢啲手下竟然唔聽先知嘅警告,走咗去捉神牛嚟食。希路斯大發雷霆,要求宙斯好好噉懲罰佢哋,宙斯一發威,奧德修斯同佢班手下就遇到船難,架船沉咗,除咗奧德修斯之外所有人都浸死晒。

到咗最後,奧德修斯漂流咗去寧芙卡聶蘇嘅屋企—如是者。奧德修斯就畀卡聶蘇捉住咗,七年都走唔到。

第四部份[編輯]

首詩嘅敘述返到去現在。

斯加利亞島嘅人聽到奧德修斯喊住噉講佢嘅遭遇,就心生同情。班島民送咗啲財寶畀奧德修斯,仲連夜將佢送咗返去伊法基島嘅隱藏港口嗰度。奧德修斯一醒就見返佢嘅好朋友雅典娜,由雅典娜口中得知自己的確係返咗伊法基島。雅典娜跟住就郁手施法,將奧德修斯得到嘅財寶收埋,又將奧德修斯變咗做一個年老乞衣噉嘅樣。奧德修斯跟雅典娜返去宮殿,見到潘妮洛普嗰班追求者點樣連日喺宮殿度開 paa1 ti4 噉款搞到宮殿立立亂,又得知班追求者點樣連番搔擾佢老婆。

就喺呢個時候,王子鐵利馬庫斯由斯巴達坐船返到伊法基島。班追求者嘗試埋伏鐵利馬庫斯,但鐵利馬庫斯成功避開咗佢哋嘅埋伏。然後鐵利馬庫斯就撞返佢父王同雅典娜,兩父子重逢,而且兩人亦同意班追求者做咗咁多惡行,一定要重罰。兩父子於是就開始佢哋嘅計劃:鐵利馬庫斯首先返咗宮殿;然後奧德修斯繼續扮老乞衣去宮殿見潘妮洛普,到咗宮殿班追求者一見到老乞衣就個個都喺度大笑,當中安天努斯笑得最大聲。淡定嘅奧德修斯唔理佢哋上前同潘妮洛普講嘢,「老乞衣」話自己見過奧德修斯,仲話打探到奧德修斯最近嘅行蹤。潘妮洛普喺呢個時候已經意識到將會發生咩事。

期間,奧德修斯個奶媽尤麗卡莉亞幫「老乞衣」洗腳,留意到「老乞衣」腳上面嗰笪奧德修斯先有嘅疤痕,認得佢係邊個,不過雅典娜唔畀佢出聲。

第五部份[編輯]

到咗第二日,喺雅典娜嘅建議下,潘妮洛普提出要舉行一場比賽畀佢選夫。

場比賽係要鬥射箭:潘妮洛普派人立起咗十二把斧頭,啲斧頭嘅頭中空;參加者要鬥用奧德修斯把神弓射箭;如果有個男人能夠用把弓令一支箭通過十二把斧頭嘅窿,嗰個人就算贏,可以娶潘妮洛普做老婆。奧德修斯自然係暗中參加比賽。班追求者冇一個贏得到—奧德修斯把神弓要好大力先至可以拉得郁,班追求者連把弓都拉唔郁,更加唔好講話要贏。而到咗最後,仲扮緊老乞衣嘅奧德修斯攞起把神弓,輕而易舉噉一拉,然後就令一支箭通過十二把斧頭嘅窿。贏咗。

奧德修斯一贏就除咗佢嘅偽裝。

「呀!係奧德修斯!」

喺下一刻,班追求者就得到應有嘅懲罰—佢哋連番騷擾潘妮洛普,搞到奧德修斯座宮殿烏煙瘴氣,仲嘗試謀殺貴為王子嘅鐵利馬庫斯。奧德修斯兩仔爺攞起劍、矛同弓,郁手殺晒在場嘅追求者。殺完之後,尤麗卡莉亞仲指證咗宮殿嘅十二個女僕,話佢哋背叛潘妮洛普又同班追求者做愛,而奧德修斯兩仔爺亦即場將佢哋處決咗。

到咗最後,奧德修斯上前見潘妮洛普。終於見返老公嘅潘妮洛普好高興,兩公婆攬埋一齊,然後就去咗睏覺。

首詩仲有些少下文:到咗第二日,奧德修斯走去探佢阿爸利亞提斯;行吓行吓,佢發現有一班伊法基島嘅島民跟蹤緊佢—原來呢班人係嚟尋仇嘅,想同奧德修斯殺咗嘅嗰班追求者報仇;話咁快雙方就開埋pin2,不過打打吓雅典娜同宙斯出面阻止咗佢哋。

就係噉,奧德修斯卒之返到屋企同屋企人團聚,而班追求者亦都得到應有嘅報應。大團圓結局

影響[編輯]

廿世紀初長篇小說尤利西斯》嘅封面
睇埋:尤利西斯

《奧德修記》有龐大嘅文化影響力:呢首史詩古希臘其中一件最出名最有影響力嘅文化產物,而古希臘嘅文化對成個西洋世界影響深遠。自從文藝復興後,西洋人嘅創作品成日都會由希臘神話度取材,而《奧德修記》自然多次噉畀人改編做歌劇電影等媒體嘅作品;仲有唔少作品唔係講《奧德修記》嘅故仔,但就攞咗《奧德修記》當中嘅一啲橋段嚟用。例如:

等等。

順帶一提,喺廿一世紀英文裏面,odyssey 呢隻字可以係指《奧德修記》呢件作品,而且又可以攞嚟做漫長又艱辛嘅旅程同義詞,可以有好似以下噉嘅字句:

This book details his odyssey from poverty to affluence
名詞短語 動詞 名詞短語 介詞 名詞 介詞 名詞
呢(本) 詳細噉講 佢(男性)嘅 odyssey 貧窮 去到 富裕

—成段嘢嘅意思係「呢本書詳細噉講佢由貧窮至富裕嘅漫長旅程」[8]。呢一點反映咗《奧德修記》喺英文圈以至成個西洋世界係幾咁深入民心。

睇下[編輯]

註釋[編輯]

  1. 呢隻漢字標準官話裏面係 sài 嘅音,但喺粵語裏面係 coi3 嘅音,所以按粵語基準睇,呢隻漢字對應唔到 s-(原文最後一段音節 [si] 開頭個)。
  2. 可以睇睇迷因平民過程嘅概念。
  3. 事實係,希臘神話不溜出晒名熱愛英雄相關嘅主題
  4. 有關特洛伊戰爭嘅詳情,可以睇睇《伊利亞德》—《伊利亞德》個故仔就係講呢場仗嘅。
  5. 下面嘅情節會解釋點解佢同奧德修斯有仇。
  6. 佢之所以會咁夠力游水,係靠住自己之前由海寧芙手上得到嘅法力面紗。

[編輯]

  1. Ιλιάς / Iliás
  2. Ὅμηρος / Hómēros
  3. Ὀδυσσεύς / Odysseús
  4. Ιθάκη / Ithakē
  5. Πηνελόπεια / Pēnelópeia
  6. Τηλέμαχος / Tēlemakhos
  7. Εὐρύκλεια / Eurýkleia
  8. Ἀθηνᾶ / Athēnâ
  9. Σχερία / Skhería
  10. Κίρκη / Kírki
  11. Τειρεσίας / Teiresías
  12. Ζεύς, Zeus
  13. Καλυψώ, Kalypsō
  14. Πολύφημος / Polyphēmos
  15. Ποσειδῶν / Poseidon
  16. Σειρῆνες / Seirênes

[編輯]

  1. Odyssey
  2. Suitors of Penelope
  3. Ulysses
  4. 2001: A Space Odyssey
  5. Super Mario Odyssey

參考[編輯]

  1. 1.0 1.1 1.2 Fowler, Harold North (1903). A History of Ancient Greek Literature. Museum Tusculanum Press.
  2. More reasons why the Greek poet Homer may never have existed. The Washington Post.
  3. Types of myths in Greek culture, Myth of heroes不列顛百科全書
  4. Monro, D. B. (1886). Homer's Odyssey (Vol. 1). Clarendon Press.
  5. Heubeck, A., West, S., Hainsworth, J. B., & Hoekstra, A. (1990). A Commentary on Homer's Odyssey: Introduction and Books I-VIII (Vol. 1). OUP Oxford.
  6. START/SELECT: 'Super Mario Odyssey': A Modern Epic. The Hoya.
  7. GAME REVIEW | A "Mario Odyssey" Worthy Of Any Greek Epic.
  8. odyssey (n.). Merriam-Webster.

外拎[編輯]