展望理論

二〇〇九年影到嘅丹尼·加利曼

展望理論（粵音：zin2 mong6 lei5 leon6；英文：prospect theory），又或者叫前景理論，係一個行為經濟學嘅理論模型，用嚟模擬人類點樣喺有風險嘅情況下做決策。呢套理論有別於廿世紀初嘅經濟學理論，唔會好似舊時嘅理論噉將人想像成完美理性嘅決策者。

展望理論提到，現實決策會受到各種心理因素影響，會出現損失規避等嘅幾種偏向：損失規避意思係話人類怕失去某啲嘢，多過期待獲得同等份量嘅利益，即係會（例如）討厭蝕二百文多過鍾意賺二百文；呢啲噉嘅傾向令到人類對效益嘅判斷出現偏差，做唔到舊時經濟學理論講嘅完美決策。

展望理論仲有將決策分為兩個階段：

• 喺編輯階段，個人會按佢腦內嘅思考捷徑嚟大約估計每個選項嘅效益，再喺腦內將啲選項按效益幾高嚟排好，佢仲會揀其中一個選項做對照點，並且將好過嗰個選項嘅當做得益，差過嗰個選項嘅當做損失。
• 喺評估階段，個人會好似計咗個效益值出嚟噉作出決策，揀效益最大嗰個選項。

展望理論提到好幾個重要概念，詳述人類嘅決策係點樣受主觀認知因素影響嘅。喺金融同營銷等嘅領域當中，展望理論相關嘅概念都可以用嚟左右人嘅行為。

原版諗頭

呢條曲線反映損失規避：
Value ——主觀價值
Gain ——得益
Loss ——損失
由幅圖睇得出，喺決策者心目中（例如）賺 .05 文造成嘅 value 變動冇蝕 .05 文造成嘅咁大。

内文：丹尼·加利曼同阿摩司·特沃斯基

睇埋：效益同預期效用理論

喺一九一七年，以色列心理學家，丹尼·加利曼同阿摩司·特沃斯基發表咗一篇題為《展望理論：分析風險之下嘅決策》嘅論文，喺篇文入便總括咗一系列嘅證據，批評當時經濟學家成日用嘅預期效用理論，並且提出咗一套新理論（展望理論），主張佢哋呢套新諗法更加能夠解釋人類嘅決策。

首先，想像有個人喺度賭錢，場賭局係

$(x_{-m},p_{-m};x_{-m+1},p_{-m+1};...x_{0},p_{0};...x_{n-1},p_{n-1};x_{n},p_{n})$

當中每對數值表示「有 $p$ 咁高嘅機率贏到 $x$ 咁多錢」。如果信預期效用理論講嗰套，決策者心目中場賭局嘅價值會係

$\sum _{i=-m}^{n}p_{i}U(C+x_{i})$

當中 $C$ 係佢現有嘅財富量，而 $U()$ 係一個效益函數，數值隨 $x$ 而上升而且係個凹函數（升得越嚟越慢）。相比之下，喺累積展望理論之下，決策者心目中場賭局嘅價值就會係

$\sum _{i=-m}^{n}\pi _{i}v(x_{i})$

當中 $v()$ 係價值函數，而 $\pi _{i}$ 反映緊選項加權。呢個模型包含咗展望理論嘅四個要素：

1. 參考依賴：根據展望理論，人類諗一件事有幾著數嗰陣，會攞某一點做對照點（又叫參考點），再從而計得益同損失，得益或者損失會反映响效益值之上；响呢個模型下，對照點並非係個人已有幾多財富——新嗰條式並唔包括 $C$ 。
2. 損失規避：$v()$ 會捕捉到損失規避嘅現象——損失規避講緊人類有種傾向，想避免損失多過想得到同等數值嘅得益，即係話佢哋硬係會（例如）覺得蝕 20 文慘嘅程度大過賺 20 文開心嘅程度。
3. 敏感度消退：損失或者得益嘅數值愈大，得失數值變化嘅影響就愈細，例如賺 100 文同賺 200 文之間喺主觀得失可以有明顯差異，但係賺 2,100 文同賺 2,200 文之間嘅主觀得失可能冇咁大差異；即係話隨住得失數值變大，決策者對得失數值嘅變化開始唔多敏感。
4. 機會率加權：根據呢個諗法，人類判斷得失嗰陣靠嘅唔係客觀嘅機會率，而係一個扭曲咗嘅主觀機會率 $\pi _{i}$。有關主觀機率可以點樣扭曲法，可以睇吓賭徒謬論等嘅概念。

就算到咗廿一世紀初，經濟學家仲有繼續嘗試改進呢個理論模型。

及後經濟學家做咗一連串實驗：佢哋用咗好多實驗室以外嘅地方做研究場所（實地實驗），例如係睇人類喺遊戲節目當中嘅決策噉；而且佢哋唔單只有攞歐美地區嘅人做研究對象，有分析（例如）嚟自中國嘅人嘅決策；而且仲有證據指出，就算係經驗老到嘅決策者——例如係投資老手做投資方面嘅決策 ——佢哋嘅行為都可以用展望理論描述。

應用例子

睇埋：輕推理論同行為經濟學

加利曼同特沃斯基用咗彩券同保險做例子：一個人買彩券，反映佢中意有 0.0001% 機會賺 5,000 文，多過中意包保賺 5 文，而一個人買保險，反映佢中意包保蝕 5 文，多過中意有 0.0001% 機會蝕 5,000 文；根據兩位心理學家嘅睇法，人類對事件嘅發生機率有誤判（$\pi _{i}$ 講緊嘅嘢）。

展望理論嘗試做嘅係解釋人類點樣做決策。因此，假如有人嘗試影響其他人做決策，佢可以靠呢套理論嚟預測對方會對佢嘅行動有咩反應。假想有一個理財顧問阿明，佢想引佢個客買某隻互惠基金，阿明要做嘅嘢係要令到個互惠基金睇落好有著數，而且喺個客心目中著數程度唔合比例咁大。假設阿明唔會講大話，只會講出真確嘅資訊，佢有以下兩種方法可以 sell 個基金：

1. 「喺過去兩年，個基金平均回報有 11% 咁多。」
2. 「喺過去十年，個基金嘅回報高過平均，但係喺過去嗰年，佢喺度跌緊。」

展望理論預測，講法 1 會比較有效，原因簡化講係佢唔會提可能損失，而講法 2 會提到得益又會提到損失（睇返損失規避）。

理論問題

到咗廿一世紀初，展望理論依然有唔少問題。

加利曼同特沃斯基原先嗰篇論文受批評，話佢哋冇講明對照點要點樣決定。例如要分析一位投資者嘅決策，可能嘅對照點有：佢總體財富嘅升跌、佢手上所有證券嘅總體價值嘅升跌、或者某隻股票嘅升跌。有關對照點係點決定嘅，有一種見解認為，人類選擇對照點嗰陣靠嘅係實質得失同預期得期得失之間嘅差距——「基於近排嘅得失而形成嘅信念」。

損失規避亦都受到實驗證據挑戰：損失規避呢個假說可以分強同弱兩種，前者主張「人類做親決策，都一定有損失規避傾向」而後者就淨係主張「人喺好多時候都有損失規避傾向，經濟學家要諗吓人類喺乜嘢時候會有損失規避傾向」。响廿一世紀初，強嘅損失規避假說已經受嚴峻挑戰，噉係因為好多經濟實驗發現，人响好多情況下都唔會有損失規避嘅傾向，但係弱嘅損失規避假說依然受唔少學者採用。

可以睇吓

• 決策理論
• 框架效應
• Minimax
• 最後通牒博弈
• 滿足同最大式決策

詞彙

文中用咗嘅重要詞彙英文版：

引述

文中引用咗嘅來源：

外拎

• （中文） 心理學話你聽點解我哋驚「揀錯」，Medium
• （英文） 展望理論，The Decision Lab（直譯係決策實驗室）