湖畔大廈

湖畔大廈
澳門公共房屋
所屬堂區						嘉模堂區
房屋類型						經濟房屋
房屋用途						住宅
總塔樓座數						6
			第1座
			入伙日子			2012年11月23號
			樓齡			11年
			第2座
			入伙日子			2012年11月23號
			樓齡			11年
			第3座
			入伙日子			2012年11月23號
			樓齡			11年
			第4座
			入伙日子			2012年11月23號
			樓齡			11年
			第5座
			入伙日子			2013年11月23號
			樓齡			10年
			第6座
			入伙日子			2012年11月23號
			樓齡			11年
停車場
			湖畔大廈停車場
			詳細資訊一覽 出入口位置：和諧大馬路

湖畔大廈響氹仔嘉模堂區氹仔美副將馬路、雞頸馬路、馬德拉街同湛江街，係屬於房屋局嘅經濟房屋。

背景

湖畔大廈係澳門首個由政府全資興建，附設有完備社區功能嘅公共房屋項目。湖畔大廈由六座塔樓組成，提供二千七百零三個經濟房屋單位，一到五座高四十八層，第六座高四十六層，一房單位有二百九十六個，兩房單位有一千八百八十三個，三房單位有五百二十四個。重設有公共停車場、巴士轉乘站，社會服務設施包括衛生中心，重有托兒所、家庭同社區綜合服務中心同教育範疇嘅綜合服務中心，重設有食肆、士多同乾貨市場等。

2011年12月28號，澳門政府響政府公報入面刊登第449/2011號行政長官批示，公佈湖畔大廈二千七百零三個經濟房屋單位售價同補貼比率。29號開始向獲甄選家團寄出揀樓通知信，分批安排響2012年1月12號開始參觀湖畔大廈地盤入面嘅交樓標準示範單位；1月19號開始按次序安排家團代表往房屋局選購單位。湖畔經屋平均呎價係一千一百八十四蚊。房屋局主要根據經濟房屋家團嘅購買力，單位座落地點、起好年份，單位嘅方向同位置、面積同類型等相關計價因素而訂定經濟房屋各個單位售價。

2017年6月26號，為咗持續優化綠化休閒空間，民政總署陸續翻新氹仔市政公園同湖畔大廈三樓平台花園嘅兒童遊戲設施，工程期係三十日左右，工程期間部份區域會暫停開放。

事件

壓縮垃圾站事件

2015年9月7號，有住響湖畔大廈第四座嘅住戶反映，佢已經入住咗差唔多兩年，響當初第一年嘅環境非常之好，但係政府自從突然響第四座大門出邊整咗個大型壓縮垃圾站之後，惡夢就開始。由於湖畔二樓有幾間食店，每日佢哋都會將大量垃圾或者廚餘抌入垃圾站，但係有時竟然只會放響垃圾桶隔離，一啲垃圾袋係爛嘅，入面嘅汁會流出嚟引來大批烏蠅同發出臭味。住戶話佢哋一直響到忍受，但係最近半年衛生情況差到接受唔到，大量大型垃圾同建築廢料響垃圾桶隔離嘅行人路到。住戶話佢曾經睇過有貨車將大型裝修廢料倒響空地到，另外再加埋唔同垃圾，而呢啲垃圾放響地下很多時成日又或者兩日都冇人搞，每日都係。周圍有大量烏蠅同蚊蟲響到飛，夏天重充斥住惡臭，住響四十層都有烏蠅飛入屋。有住戶為咗噉響民署嘅網站同電話熱線投訴，但係得到嘅回覆只係已經跟進同檢控咗幾單個案。而住戶每日重係見到同一樣嘅情況。

𨋢質量差事件

2016年5月21號，湖畔大廈接連有𨋢壞咗同停用，房屋局話湖畔大廈第二座其中一部𨋢因為鋼纜有問題停用，政府已經委託第三方機構檢測，判斷係屬於工程質量又或者係自然損耗，方便釐定維修責任。同一座另一部𨋢嘅保險門20號亦壞咗，經搶修已經恢復使作。另外，湖畔大廈第六座亦有𨋢因為電子板壞咗停用，政府已經責成管理公司盡快做維修報價，由於𨋢係屬於樓宇共同部分，維修費用會由第六座住戶攤分。

停車場地面龜裂

2016年5月23號，湖畔大廈停車場出現龜裂同裂痕，地下到有明顯修補過嘅痕跡，而且面積唔細，睇上去就同龜裂大地一樣，成個停車場就好似受咗重傷一樣。

甩磚事件

湖畔大廈自入伙以嚟，公共走廊發生多宗大規模「甩磚」事件，尤其係入冬之後情況更嚴重。

2016年9月18號，湖畔大廈居民響社交群組到投訴連日來不停裝修更換走廊甩出嚟嘅牆磚，重有住戶話灰塵飄入屋到，影響細路仔健康。

2020年12月中開始，6座有半數高層公共走廊瓷磚「甩磚」。湖畔大廈業主聯誼會更加表示，走廊瓷磚「日日爆日日冧」。

將經屋畀其他人住嘅事件

2017年3月30號晚黑，進行經濟房屋巡查時，發現湖畔大廈第四座一個單位，涉嫌將單位無償畀他人住嘅情況，正響到開展調查工作。根據第10/2011號法律《經濟房屋法》第五條第一款嘅規定，經濟房屋單位只能用響預約買受人又或者所有人同家團自住。法律重規定，如果經屋預約買受人又或者所有人將經屋單位做非居住用途又或者以有償又或者無償方式將成個單位畀其他人住，科處相當於單位最初售價嘅十至四十個百分比罰款，如果作出部分出租，科處相當於單位最初售價嘅五到十個百分比嘅罰款。上邊講嘅違法者必須響房屋局指定嘅期限入面終止有關違法行嘅情況，如果唔遵守，除咗每逾期一日，加罰到原來嘅罰款嘅百分之一，房屋局可以解除買賣預約合同。

意外

2017年8月23號，颱風天鴿襲澳，三十歲嘅湖畔大廈男姓管理員，懷疑響當值期間，被強風吹到撞擊附近嘅牆之後受傷，送院之後搶救無效死亡。司警話，死者姓阮，係外勞，死者係由同事響23號發現瞓響湖畔大廈第五同第六座附近地下而且頭部受傷，報警求助，經初步對屍體檢查，死者除咗頭頂骨有裂痕，並冇發現可疑又或者可能由刑事引致嘅傷痕。事件已經通報勞工局。事件初步冇可疑。死因等法醫檢驗確定。案件交畀調查科跟進。