信達廣場

信達廣場
澳門公共房屋
所屬堂區						花地瑪堂區
房屋類型						經濟房屋
房屋用途						住宅
總塔樓座數						3
塔樓
			第1座
			入伙日子			1998年10月23號
			樓齡			26年
			第2座
			入伙日子			2002年8月8號
			樓齡			22年
			第3座
			入伙日子			2006年2月13號
			樓齡			18年
停車場
			信達廣場停車場
			詳細資訊一覽 出入口位置：馬場大馬路

信達廣場響澳門半島花地瑪堂區馬場大馬路、永安街、菜園路、關閘廣場、永定街同長壽大馬路，係屬於房屋局嘅經濟房屋。

背景

2012年5月26號經濟房屋信達廣場第三座辦理買賣公證書、買賣同抵揭按揭公證書同相關物業登記服務，房屋局已判畀律師樓按序跟進，預計6月中旬可以安排第一批單位簽契。截至2012年5月25號，上述律師樓按序聯絡，已經聯絡咗七十七個單位預約買受人，當中聯絡到五十八個單位，另外十九個單位預約買受人因為冇開電話、冇人聽電話又或者改咗聯絡電話號碼之類情況而聯絡唔到，稍後將會以其他方式同唔同時段聯絡，預計可以響6月份之內搞掂所有聯絡工作。基於部分已經聯絡到嘅單位，預約買受人可配合隨時簽契。

犯罪

2016年1月25號，珠海同澳門警方持續掃蕩亂發垃圾短訊宣傳網上賭博嘅偽基站，派出廿五個偵查員採取突擊行動，響關閘同台山三個屋苑加埋四個單位，檢獲十一套已經安裝偽基站儀器，包括天線、射頻模擬器、手提電腦同埋手機等。調查發現，集團運作至少2個月，相信搗破由同一集團操控、正響到運作嘅偽基站，響信達廣場拉咗一個廿四歲姓李做廚師嘅澳門本地青年，案件入面至少兩個大陸人逃走。司警發現犯罪集團所設嘅偽基站已經轉由澳門人承租，希望逃避警方視線。被拉嘅李姓青年涉及不當獲取、使用同提供電腦數據資料；干擾電腦系統等罪被移交檢察院。涉案李某主要負責偽基站日常操作同維護工作，其中三個單位都係由佢承租。

2016年9月7號凌晨四點幾，信達廣場一間便利店一個女店員話被人用刀指嚇，劫走萬五蚊之後就逃去無蹤，警方全力追緝。之後發現自稱被刀降住打劫嘅女店員口供疑點重重，經過再三追問，女店員最終承認係自己同爛賭男友合謀，自導自演咗一單假劫案。之後，警方響男嫌犯做嘢嘅地址火船頭街拉人，重響兩個人住緊嘅十六浦住所到搵到剩底嘅一萬蚊，相信另外五千蚊已經使咗。被捕嘅兩名嫌犯同為印尼籍，男四十三歲，姓Sutikno，女三十七歲，姓Darto，兩人都承認控罪，同樣被控加重盜竊罪，男子就加控禁用武器罪。

2017年10月26號，司警接獲情報話有人響關閘附近利用民居做窩點，發送垃圾短信同博彩短信。司警調查之後鎖定目標，清晨五點採取行動，偵破關閘信達廣場一個出租單位操作偽基站，響行動入面搵到三套儀器、四部手提電腦、十四個電腦硬件、 兩部干擾器同天線嘅作案工具，拉咗一個廿八歲報稱農民姓羅嘅大陸男人，涉嫌利用干擾器，等關閘附近居民同遊客嘅手機連接唔到3G同4G網絡，令手機轉成GSM網絡嗰陣，再趁機入侵手機，發送垃圾短信同博彩短信，被控「觸犯干擾電腦系統用響實施犯罪嘅電腦數據或數據資料」、「侵犯通信工具」等罪名，移送檢察院偵辦。被捕男子話23號來澳門，受朋友拜託響單位負責管理電腦開關，又話冇收過報酬。司警調查之後認為，羅係偽基站犯罪集團下線成員，主要負責控制現場電腦運作。司警繼續追查偽基站犯罪集團上線同其他涉案人員。另外，司警調查又發現，呢個單位租約係由一個澳門居民登記，但係身份證影印係假，警方將會對案件繼續追查。

意外

2017年5月13號晚黑九點左右，信達廣場第一座九樓火燭，懷疑戶主響廚房煮食期間搶火，燒着抽油煙機，火勢迅速蔓延同冒出大量濃煙，住戶及時逃生報警。消防到場見到起火單位大門虛掩，拖喉入去將火救熄，冇人受傷，重救出七個困響九樓同十樓樓梯嘅住客，經救護員檢查之後無需送院，有大約十個住客自行疏散到街到，事件入面冇人受傷。起火廚房嚴重燒爛，客廳亦被燻黑同成屋水漬。