永添新邨

永添新邨
澳門公共房屋
所屬堂區						花地瑪堂區
房屋類型						經濟房屋
房屋用途						住宅
總塔樓座數						2
			第1座
			入伙日子			1989年12月14號
			樓齡			35年
			第2座
			入伙日子			1989年12月14號
			樓齡			35年
停車場
			永添新邨停車場
			詳細資訊一覽 出入口位置：永添街

永添新邨響澳門半島花地瑪堂區永添街、菜園路、馬場大馬路、中心街同市場街，係屬於房屋局嘅經濟房屋。

背景

2008年5月5號，永添新邨第二座十二樓一個住宅單位嘅去水渠漏水，令到下面幾個單位都出現唔同程度嘅滲漏，土地工務運輸局響5月5吮晏晝聯同房屋局到相關單位巡查，經土地工務運輸局人員到場了解後，認為漏水源頭係來自十二樓一個單位，對下面幾個單位嘅住戶日常生活造成影響，受影響嘅單位牆身同天花多嗰地方出現滲水，所以政府人員勒令有關業主要即刻展開維修工程，同時要同其他受影響嘅住戶解釋有關進度。漏水單位業主承諾維修，並響今日展開維修，為確保有關單位業主切實改善漏水情況，會響工程完成之後，土地工務運輸局並會派員到現場進行測試。

2013年1月，原來管理公司話唔願意繼續管理，房局屋已經隨即按照職能協助管委會，召開分層所有人大會，重搞公開招標請新嘅管理公司，期間局方積極協調雙方舉行會議商討交接，重響交接當日派員協調，但係原來管理公司因為同管委會存在債務償還問題冇搞掂，拒絕撤走，搞到雙方簽唔到交接協議。鑑於永添新邨原管理公司嘅管理合約響2013年6月30號屆滿之後，冇履行承諾撤出，導致管理委員會招聘嘅新管理公司冇法如期進場執行樓宇管理服務，而永添新邨嘅管理委員會亦冇法履行職責維修公共設施，房屋局嚴正敦促原管理公司，必須盡快撤離，同時，亦已經通知永添新邨全體業主自7月1號起應該將管理費交畀管理委員會，先可以盡快跟進啲𨋢嘅維修問題，確保公共設施嘅安全使用。否則，如果出現嚴重樓管事故，將會由原管理公司承擔一切法律責任。同時，局方亦已經依據第41/95/M號法令規定，對原管理公司開展行政處罸程序，落實行政監管職責。至於呢間公司曾經提到嘅債務償還問題，局方仍然會繼續協調，但唔妨礙原管理公司透過法律途徑解決。永添新邨管理權糾紛響房屋局、民眾建澳聯盟同管理委員會經過個幾月時間嘅多次協調之下攞到成果，原管理公司已經響8月4號晚黑九點自行撤離，而新管理公司亦響同日晚黑正式進場，重立即開展日常管理工作。新管理公司亦張貼入場通告通知全體業主正式接管永添新邨，嗰晚大廈運作正常。對於永添新邨管理權移交之後，需要跟進樓宇管理嘅工作，尤其係共同設施嘅維修保養，房屋局會依職權繼續協助管理委員會，督促新管理公司做好樓宇管理服務，重呼籲永添新邨全體業主共同關心同支持大廈共同部分嘅管理工作，履行業主應有嘅義務。

2016年1月1號，清潔及保安最低工資正式實施。有六百幾伙嘅永添新邨否決加價方案，呢日起由業主會自管，意味大小事務都要由小業主一腳踢。容姐話準備時間十分倉促，響自管方案通過之後，隨即響大廈入面貼出告示，優先請大廈住戶做看更同清潔，看更請到人，但重未請到清潔，變咗要自己落手落腳掃地、倒垃圾。雖然辛苦但業主會成員容姐話，總好過舊管理公司服務質素差重要加價兩成幾，接管之後重發現條數烏厘單刀，永添新邨幾年前幾年出現過管理權糾紛，新公司承諾管理費入面撥十七個百分比出來做維修基金同會務費。但係公司響2012年進場之後，一直冇將款項轉帳到管委會，到而家重拖管委會成廿萬，重話無論點追都追唔返，小業主唔交管理費，公司就要脅小業主入稟法院追數，但公司拖落嘅數到而家都未收得返。容姐話，以佢嘅單位做例子，原來兩百四十蚊管理費加到三百蚊，加幅唔算高，但係業主都唔滿意管理公司長年服務差，看更一係不見蹤影，一係瞓覺，以往個看更晚黑十點幾就已經瞓咗，瞓到朝頭早住戶返工都未醒。好嘅看更又調走晒，慢慢換晒外勞。大廈門口好似無掩雞籠一樣門長開，陌生人自出自入。大廈衛生環境惡劣，大堂、梯間好污髒，垃圾房、水錶房重成日有老鼠出沒，但係都冇人去清理，直到前兩日同管理公司交接，容姐去檢查啲設施嗰陣先發現大廈問題多多，係水錶房見到死老鼠，又多又臭，同管理公司投訴之後先掃清晒；垃圾槽又出現塞渠，要請人來整，但由於部分管委已經離職，唔夠人簽名用維修基金，變相要先自己墊住三千蚊出來做維修費。唔少大廈自管之後都好容易出現帳目糾紛，因為錢而冇咗互相，容姐坦言唔擔心，管委會將會定期公開管理條數，等小業主監察財政運用，重以管委會名義開銀行戶口，需要攞到所有成員簽名之後先可以郁，相信小業主對管委會有信心。

意外

2010年4月2號晚黑八點，永添新邨第一座有住戶聞到燒燶味，擔心火燭，報警求助。消防員接報到場，而救護車就到場戒備，證實曾經有住戶之前唔記得熄火煲燶嘢，已經自行處理，消防員冇開喉灌救，冇人受傷，之後消防員證實冇危險，收隊走人。。

2015年11月22號晏晝兩點，永添新邨第一座十樓有垃圾房垃圾桶火燭，現場有煙冒出。樓層梯間有煙，有住戶向垃圾槽倒水救火，消防員證實係垃圾房入面嘅垃圾桶着火，濃煙沿垃圾槽散到部分樓層。消防煙帽隊駁消防喉到垃圾房，向着火嘅垃圾桶射水，迅速將火救熄，重協助抽走垃圾房入面嘅濃煙。火警入面，消防員冇疏散住客，亦冇人唔舒服又或者受傷。之後消防員調查，初步懷疑有人唔小心留底火種引起，起火原因冇可疑。