筷子基社屋

筷子基社屋
澳門公共房屋
所屬堂區						花地瑪堂區
房屋類型						社會房屋
房屋用途						住宅
總塔樓座數						3
塔樓
			第1座 快意樓
			入伙日子			2009年12月14號
			樓齡			15年
			第2座 快富樓
			入伙日子			2009年12月14號
			樓齡			15年
			第3座 快達樓
			入伙日子			2015年8月1號
			樓齡			9年

筷子基社屋響澳門半島花地瑪堂區筷子基北街、筷子基街、飛喇士街同俾若翰街，係屬於房屋局嘅社會房屋。

背景

筷子基社屋第二期，由普通社屋同長者社屋兩棟大樓組成，佔地三千一百七十四平方米，建築費用係三億五千幾萬。落成後將會提供八百八十四個單位，重有三百六十六個輕型汽車同電單車位嘅公眾停車場。兩棟社屋大樓響五樓平台花園各自獨立，群樓部分三樓係托兒所、青少年同家庭綜合服務中心，四樓係殘疾人士展能同職訓復康中心，五樓面積有二千一百平方米嘅花園平台。一般社屋大樓樓高三十一層，六到三十樓係社屋單位，提供四百個單位，包括開放式、一房廳、兩房廳同三房廳單位各一百個，其中兩房廳單位面積五十平方米左右。長者社屋大樓樓高三十層，六樓係智障人士、精神病康復者輔助宿舍，七樓係長者日間中心，八到廿九樓係長者社屋單位，加埋提供四百八十四個單位，其中開放式單位有四百四十個、一房廳單位有四十四個。另外為咗方便行動唔方便嘅長者出入，各個單位大門口相對較寬，大門口設有高低兩個防盜眼，所有電掣都整響低啲嘅位，重用大掣嚟開關。譚光民話，筷子基社屋第二期落成之後，房屋局會盡快安排合資格嘅家團上樓，協助低收入家庭解決住屋困難。等候上樓嘅社屋輪候家團有五千八百八十七個。

2009年5月11號，筷子基社屋第二期響9月落成，分社屋大樓同長者大樓兩幢，加埋提供八百八十四個單位。長者大樓設有無障礙設施，包括方便輪椅人士嘅逃生斜坡，而四百八十四個長者單位都設有平安鐘同煙霧感應器，幫獨居長者提供廿四小時冇間斷嘅緊急支持。房屋局10號安排傳媒參觀筷子基社屋第二期地盤，由副局長譚光民、公共房屋事務廳長鄭錫林、技術支持處長陳華強介紹興建進度，同埋社屋單位間隔同設施。

2010年11月，筷子基社屋單位不銹鋼門工程展開，預計2011年1月完工。

2015年1月30號，筷子基重建社屋本來要響2012年底完工，不過目前工程重未搞掂，延遲足足兩年幾，七百三十七個社屋單位到而家重未落成。建設辦曾經解釋延期嘅主因係因為隔離嘅建築物殘舊，要謹慎重整地基，由於位置正正響人口密集嘅筷子基民居，重要兼顧噪音等問題，避免騷擾到居民。澳門建設辦建築職務主管馬文俊話，至於工程延遲預算要再追加幾多，建設辦都冇做回應。

意外

2017年5月19號晏晝四點幾，治安警同消防局接報筷子基北街快富樓十六樓一個單位發生一單懷疑自殺事件。警員同消防員接報到場，發現一個男人懷疑吊頸自殺，消防救護員立即將佢送去山頂醫院搶救，最終都係死咗。治安警察局通知司警局接手調查案件。死者屋企人話，死者2017年3月發生交通意外之後，成日失眠。19號晏晝，佢家姐出去幫佢買醫失眠嘅藥，大約四點幾返翻屋企，發現佢以一條尼龍繩綁住條頸掛響單位騎樓一條鐵通到，於是立即解佢落嚟同打電話報警。司警話死者姓李，廿五歲，澳門居民，對屍體表面進行檢查，冇發現可疑又或者可能由刑事行為引致嘅傷痕。響案發單位嗰廳到發現遺書。事件初步列做自殺個案，屍體等法醫檢驗，案件交畀調查科跟進。

2018年9月14號，朝早五點半，筷子基北街快富樓十七樓一個單位火燭，消防到場嗰陣發現火燭單位嘅窗戶已經有煙同火出來，爆門入屋發現一個七十四歲男住戶瞓左鐵閘隔離，個頭同四肢都有燒過嘅痕跡，證實當場死亡；之後火警波及到十八樓一個單位。三男兩女五個住戶響逃生期間吸入濃煙唔舒服，要送去山頂醫院。消防話，救火期間出動咗兩架雲梯車同十幾架救援車，大約廿分鐘將火救熄。消防之後繼續處理現場同淋水降溫，同時調查火燭原因，司警亦接報到場調查。火警期間快富樓社屋有大概一百八十個住戶要疏散。有住戶話，事發大廈警鐘成日誤鳴，導致大部分住戶冇第一時間反應，直到聽到疑似爆炸聲先緊急疏散。而筷子基北灣有關路段亦曾經一度封閉。