跳去內容

武漢肺炎澳門疫情

出自維基百科，自由嘅百科全書
武漢肺炎澳門疫情
  有確診個案
疾病武漢肺炎（Wuhan Pneumonia）
病毒株嚴重急性呼吸系統綜合癥冠狀病毒2型（SARS-CoV-2）
頭單確診日2020年1月22號
病毒嘅來源暫未明確
原發疫源地暫未明確[註 1]
頭個爆發地 中國大陸湖北省武漢市[註 1]
持續嘅時間第一波同第二波疫情：2020年1月22號至2020年7月17號
（5個月3個禮拜又4日）
第三波疫情：2021年1月22號至2021年3月25號（第一階段）
2021年4月7號至4月26號（第二階段）
2021年5月16號至9月13號（第三階段）
2021年9月23號至今（第四階段）
資料匯總
確診個案3,377
死亡個案95
好返個案3,079
網站澳門特別行政區政府抗疫專頁
Wikipedia is not a medical office 醫學聲明 

武漢肺炎澳門疫情（粵拼：mou5 hon3 fai3 yim4 ou3 mun2 yik6 ching4）係講武漢肺炎喺澳門爆發嘅情況。嚴重急性呼吸系統綜合症冠狀病毒2型喺2019年12月首次喺中國湖北省武漢市大規模爆發傳染後，澳門頭一單確診個案喺2020年1月21號出現，到2月4號累計10單個案。之後澳門有一排無新個案，3月15號開始陸續有新個案由外國傳入，6月26號已經有46單個案，之後接近七個月冇出現新個案。踏入2021年，耐唔耐就有一啲個案出現。

截至2023年1月11號有3,377單，目前有3,079人好返，95人病死。[4]

2023年1月8號開始，澳門政府將武漢肺炎列成「風土病」。[5]

2021年個案

[編輯]

1月

[編輯]

2021年1月21號，澳門新增一宗境外輸入個案，個案總數47宗。

2月

[編輯]

2月5號新增多一宗個案，一名30歲葡籍男子經東京返澳確診，曾經三次核酸檢測都係陰性。

3月

[編輯]

新型冠狀病毒感染應變協調中心喺3月15號公佈，3月14號30名澳門居民由歐美出發經台北桃園國際機場轉機返澳門，入境時接受武漢病毒核酸檢測，全部係陰性，送去酒店作進一步醫學觀察。3月15號喺酒店再接受武漢病毒抗體檢測，驗出其中4人武漢病毒抗體檢測結果出現異常，衛生局安排4人到山頂醫院作進一步檢查，以確認佢哋感染狀況。

4月

[編輯]

去到4月7號，再新增多一宗個案。第49例係23歲男性，澳門居民，留學葡萄牙學生。4月4號約12時15分從葡萄牙里斯本乘搭法國航空公司AF1025號航班飛往法國巴黎戴高樂機場；4月6號約11時20分轉乘長榮航空BR088號航班飛往台灣桃園國際機場；4月7號約10點再轉乘長榮航空BR801號航班到澳門，座號52C。入境時立即接受武漢病毒核酸同抗體檢測，核酸檢測呈弱陽性。患者已被安排到山頂醫院隔離病房住院治療[6]。

5月

[編輯]

5月15號，應變恊調中心因應台灣疫情轉趨嚴重，由原先嘅14日醫學觀察加7日自我健康管理，宣佈由5月16號零晨0時開始改為21日醫學觀察。

5月16號，澳門新增第50例確診病例，患者喺4月16號搭包機由尼泊爾嚟到，喺核酸檢測呈陰性，抗體檢測IgM呈陽性，被送去路環高頂公共衛生臨床中心接受28日醫學觀察。佢喺4月28號、5月2號同5月9號嘅核酸結果都係陰性，5月16號嘅核酸結果為弱陽性，考慮為無症狀復陽病例。由於佢喺外地無確診，所以被列為澳門境內輸入病例個案[7]。

5月24號，再多一宗確診個案，患者係39歲澳門男子。曾經喺2月11號同3月11號完成接種兩劑國藥武漢肺炎滅活疫苗。3月15號離開澳門去香港，3月底由香港前往尼泊爾，5月16號喺尼泊爾接受病毒檢測呈陰性，5月17號搭飛機由尼泊爾去土耳其，再由土耳其前往法國巴黎，5月18號再坐飛機由法國巴黎前往台北桃園國際機場，5月19號搭長榮航空BR801航班由台北返澳門，入境後隨即被安排去山頂醫院接受病毒檢測，核酸檢測呈陰性，血清IgM抗體同IgG抗體陽性，之後被安排到金皇冠中國大酒店接受醫學觀察。5月24號接受常規病毒核酸檢測結果呈弱陽性，患者嗰時無任何症狀，又聲稱自己無喺外國感染武漢肺炎。個案被列為澳門境外輸入個案[8]。

6月

[編輯]

6月9號，出現第52例確診病例，患者係台灣地區中國文化大學就讀學生。5月28號武漢病毒核酸檢測結果為陰性，患者同一名朋友一齊喺5月30號搭星宇航空JX205號航班到澳門，座號為16H，入境後按衛生局當時檢疫措施被安排到金皇冠中國大酒店單獨接受醫學觀察，入境後首次嘅鼻咽拭子檢測樣本結果對武漢病毒檢測呈陰性，6月9號核酸檢測結果呈陽性，血清結果IgM為陽性，IgG為陰性，確診為武漢肺炎。佢否認曾經確診武漢病毒肺炎或者打過武漢肺炎疫苗。佢無發熱、咳嗽或者呼吸困難等症狀，被安排送去山頂醫院進一步檢查。患者有一名喺台灣地區同住室友較早前已經喺台灣地區確診。[9]

6月18號午夜，新增第53例確診病例。患者係台灣旅客，6月15號喺台灣進行核酸採樣結果呈陰性，6月17號搭星宇航空JX203航班去澳門，座位號5H，入境後喺山頂醫院採集首次嘅鼻咽拭子檢測樣本，對武漢病毒檢測呈陽性，血清結果IgM為陰性，IgG為陽性，證實確診。患者無發熱、咳或者呼吸困難等症狀，嗰時情況一般。佢否認喺台灣接觸過有病徵人士，或者喺人多擠迫地方逗留，亦否認曾經確診武漢肺炎或者打過武漢病毒疫苗。佢喺台灣同住嘅屋企人都冇確診。[10]

6月27號，應變協調中心公佈1名於6月26號由英國抵澳嘅澳門居民核酸檢測呈陽性，被列為本澳第54例武漢冠狀病毒肺炎輸入性確診病例。

應變協調中心表示，第54例患者為20歲女性，澳門居民，喺英國就讀，否認曾確診武漢冠狀病毒肺炎或者曾經接種武漢冠狀病毒疫苗。患者喺6月23號喺英國接受嘅核酸檢測結果為陰性，喺6月25號由英國出發，昨（26）日喺新加坡轉機乘搭酷航TR904航班來澳，座位編號為26A，入境後隨即接受鼻咽拭子檢測，結果對武漢冠狀病毒檢測呈弱陽性，血清學檢測結果IgM抗體為弱陽性，IgG抗體為陰性，確診為武漢冠狀病毒肺炎。患者否認有武漢肺炎病人接觸史，無發熱、咳嗽或呼吸困難等症狀，依家情況一般，已經安排患者到公共衛生臨床中心進一步診治。

7月

[編輯]

7月3號深夜，新增第55例確診病例。患者為22歲女性，澳門居民，喺英國就讀高校學生。7月1號喺當地進行嘅核酸採樣呈陰性，7月2日號由英國前往新加坡，7月3號經新加坡轉機乘搭酷航TR904航班返澳門，座位編號為26D。喺當日入境後接受病毒檢測為呈陽性，呢名患者已經被安排到公共衛生臨床中心進一步診治。同日公佈1名22歲男性喺瑞士就讀嘅澳門居民留學生喺當年1月曾經確診2，7月1號喺當地接受病毒檢測為陰性，7月2號由瑞士出發前往新加坡轉機，7月3號喺新加坡轉機乘搭酷航TR904航班來澳門，座位編號爲8D。同日病毒檢測為陽性，暫列為復陽個案[11]。

7月21號，應變協調中心公布佈1名當日由英國抵澳嘅澳門居民核酸檢測呈陽性，患者係21歲女性，澳門居民，喺英國讀書，曾經喺6月24號接種一劑莫德納藥廠生產嘅mRNA疫苗，否認曾經確診武漢肺炎。呢名女士曾經喺7月18號英國當地接受核酸檢測結果爲陰性，7月19號乘搭新加坡航空由英國出發航班，航班係SQ319，座位編號係42A，之後再喺21號經新加坡轉機乘搭酷航TR904航班返澳，座位編號係23F。

7月24號，澳門新增第57同58例確診病例。第57例患者係28歲女性，澳門居民，第58例患者係8歲男性，澳門居民，兩人係母子關係，佢哋喺7月24號由菲律賓乘坐菲律賓航空PR8532航班去澳門，座位編號係47A同47C[12]。復陽病例係27歲同1歲女性，係一菲律賓駐澳門總領事館工作人員同另一名工作人員家屬，兩人都喺今年5月喺菲律賓確診武漢肺炎。當中，27歲患者曾經喺6月14號同7月12號接種兩劑武漢肺炎疫苗。兩人喺7月17、18同21號喺菲律賓接受嘅核酸檢測結果爲陰性，1歲患者喺7月21號喺菲律賓接受的血清IgM抗體爲陰性。

7月25號，新增第59例確診病例。患者係31歲男性，澳門居民，佢喺德國就讀，7月21號喺德國接受嘅武漢肺炎核酸檢測結果係陰性，佢喺7月23號由德國坐火車到法國，乘搭新加坡航空SQ335到新加坡，座位編號係48A，7月24號晚喺新加坡轉機乘搭酷航TR904航班去澳門，座位編號係20A[13]。同日晚上，應變恊調中心公佈第59例確診病例男患者經病毒基因檢測證實感染嘅病毒係首先喺印度發現嘅Delta變種病毒。另外，第57同第58例確診患者同1名1歲大由菲律賓抵澳嘅復陽病例，經病毒基因檢測證實感染嘅病毒係首先喺英國發現嘅Alpha變異病毒。另1名由菲律賓抵澳嘅復陽病例則係帶有N501Y嘅變種病毒，但係未確定係邊一種變異病毒，將會安排作進一步測試[14]。

8月

[編輯]

應變協調中心表示，根據珠海衛生部門2021年8月3號通報，兩名澳門居民夫妻喺8月2號喺珠海某檢測中心採樣嘅檢測結果為陽性，其中男性居民經衛生局病毒核酸快速檢測顯示仍然係陽性，佢哋已經喺山頂醫院進一步診治[15]。男性居民近期曾經有珠海同中山旅行史，女性居民就除咗珠海以外無其他旅行史，但係佢哋嗰女曾經喺7月19至24號期間到西安參加活動，8月3號酸檢測結果亦為陽性。佢哋住喺連勝街美連大廈48-52號8樓D室；其中 51歲丈夫係石排環衛生局司機；43歲妻子係義字街2- CA榮發大廈地下水果檔職員。同時，當局將同夫妻2人同住大廈嘅居民健康碼轉做紅碼；石排灣衛生中心同路環衛生站將會暫停營業，全面環境清潔消毒；而涉事水果檔將被強制停業，全面環境清潔消毒。應變協調中心亦宣佈，8月3號下晝3點半開始離境需持有24小時內核酸檢測陰性報告，同日再宣佈下晝3點半開始進入即時預防狀態[16]。確診患者都感染咗武漢肺炎印度Delta變種病毒[17]。8月3號夜晚應變協調中心再宣佈，8月4號朝早9點開始將啟動全核酸檢，一共提供41個24小時運嘅檢測站，預計3日內可以完成[18]。

9月到10月

[編輯]
内文：保安群組、裝修群組

9月27號，新增第67例確診個案，患者係一名37歲女性香港居民。患者喺2021年3月11號同4月8號先後接種咗兩劑科興疫苗。2021年4月9號至7月10號曾經去過杜拜、埃及、克羅地亞、黑山等，做服裝生意。患者喺9月19號由香港抵達澳門，喺金寶來酒店接受醫學觀察，首次病毒檢測呈陰性，9月26號同27號兩日採樣病毒檢測呈陽性，但係病毒量好低，抗體上無近期感染嘅表現（IgM陰性，IgG 陽性），當局結合患者有中東、歐洲旅遊史，考慮係既往感染復陽病例。因不曾喺其他國家或者地區被確診，被列為澳門第67例確診個案。依家患者無任何症狀，已經轉去公共衛生臨床中心進一步診治[19]。呢宗個案唔計入保安群組同裝修群組疫情當中。

12月

[編輯]

12月26號，新增一宗輸入武漢肺炎無症狀感染，患者係一名喺美國留學嘅23歲澳門居民，呢位男學生喺12月27號因出現症狀由無症狀轉為確診，係澳門第78例確診個案，屬境外輸入個案，經病毒基因排序證實感染Omicron變種病毒，係澳門首宗Omicron變種病毒個案[20]。

12月27號，新增一名輸入性無症狀感染者，患者係一位62歲男性澳門居民。佢喺12月25號由美國出發經新加坡抵澳，入境時接受即時病毒檢測為陽性，12月29號經病毒基因測序證實感染Omicron變種病毒，係澳門第二例Omicron變異株感染個案，患者喺30號出現相關症狀轉為確診，改列作澳門第79例確診個案[21]。

截至2024年10月24號，澳門累計79宗個案，77名患者已經康復出院，無人死亡，其中62例係境外輸入病例，只有17例為輸入相關病例，其中包括輕症78例、重症1例，無任何醫務人員受到感染，無本地社區傳播現象[22]。


改名

[編輯]

疫情影響澳門之前，傳媒、大專院校同澳門特區政府叫呢個病做「武漢不明原因肺炎」。依家，《澳門日報》、《華僑報》、《力報》、《正報》、《濠江日報》、《市民日報》、《星報》、《新華澳報》、《現代澳門日報》、《論盡媒體》、《澳門觀察報》、《澳廣視》、《澳亞衛視》同《澳門有線電視》等傳媒同澳門特區政府部門稱武漢肺炎做「新型冠狀病毒感染」或「新型冠狀病毒肺炎」，簡稱為「新型冠狀病毒」、「新冠肺炎」或「新肺炎」。

疫情同反應

[編輯]

澳門衛生局喺2020年元旦開始，喺澳門國際機場就要求嚟自武漢嘅航班乘客，都要進行體温篩查[23]。喺1月5號就提升埋肺炎預警級別至第3級，中度風險。同日成立咗「應對不明原因肺炎跨部門工作小組」[24]。1月10號開始，澳門居民擔憂疫情而開始掃貨口罩，部分藥舖嘅口罩賣晒，澳門日報根據衛生局嘅資料話當時市面口罩存貨仲夠[25]。至21號，澳門共接獲醫療機構通報16例發病前14日到訪過武漢、而又有發熱同呼吸道症狀嘅病例，而全部排除咗武漢肺炎嘅可能性[26]。

1月21號，行政長官賀一誠批示設立24小時運作嘅「新型冠狀病毒感染應變協調中心」，取代「應對不明原因肺炎跨部門工作小組」，直屬行政長官運作，社會文化司司長擔任副主席[27]。喺22日朝早嘅記招度，社會文化司司長歐陽瑜宣佈喺澳門山頂醫院確診咗首宗病例，患者係1月19號由武漢搭高鐵到珠海嘅52歲女商人，當晚十點半左近由關閘入境，已有一啲咳嗽病症，喺21號傍晚去山頂醫院求醫前，有乘坐穿梭巴去過置地廣場嘅娛樂場，重入住埋入邊嘅酒店。澳門消防局於宣佈當日朝早經去咗酒店住房度消毒，女商人原先同行嘅三人都隔離觀察咗[28]。另政府同日公佈咗兩宗疑似個案[29]。

澳門各部門跟著採取一系列措施包括咗：所有出入境口岸（包括港珠澳大橋）實施健康申報[30]、行政公職局要求進入公共部門需進行探熱、通知所有娛樂場嘅僱員需要戴口罩、確保市面口罩供應充足、唔鼓勵澳門居民去武漢、暫停往返武漢同澳門嘅旅行團等[31]。

首宗確診病例發布後下晝，衛生局宣佈：由23號傍晚開始，澳門居民可憑身份證，到指定嘅藥房度買每人最多十個嘅局方儲備口罩，十日後先至可以再買過；衛生局局長李展潤重話澳門294間藥房中，有160間藥房經冇口罩，另8個口罩供應商得一個重有15萬個存貨[32]。

1月23號澳門確診第二例病例[33]。呢個確診病例直接導致澳門旅遊局取消咗所有農曆新年慶祝活動，包括澳門農曆新年花車巡遊匯演[34]。同日賀一誠宣布，任何人有發燒癥狀嘅，都唔可以離開澳門[35]，賀一誠仲話澳門訂購咗2000萬個口罩，供澳門居民以成本價購買[36]。到2月3號累計8宗確診個案，澳門交通事務局即日宣布，由當日中午12點開始，搭巴士嘅人都要戴口罩，唔係嘅話巴士司機有權拒絕上車[37]。2月4號澳門再宣布由午夜開始，關閉管轄嘅41間娛樂場15日，包括咗賭場、戲院、酒吧、夜總會等。經濟財政司司長李偉農話，啲賭場嘅代表同澳門特首開會嗰陣，應承咗會繼續出糧畀啲僱員，返唔到工嘅人都有糧出[38]。

入境澳門限制

[編輯]

外國旅客

[編輯]
  • 禁止入境，申請咗豁免條件同手續除外。

中國內地、香港、台灣旅客

[編輯]
  • 入境前21日內去過外國，禁止入境，申請咗豁免條件同手續除外。
  • 入境前21日內去過香港，需持有24小時內嘅武漢肺炎病毒核酸檢測陰性證明，入境後要接受14日指定地方隔離。
  • 入境前14日內去過台灣，需持有7日內武漢肺炎病毒核酸檢測陰性證明，入境後嘅武漢肺炎病毒核酸檢測陰性證明，入境後要接受14日指定地方隔離。
  • 入境前14日內曾經去過中國內地，需持有7日內嘅武漢肺炎病毒核酸檢測陰性證明，而曾經去過高風險地區嘅人士，入境後要接受14日指定地方隔離。
  • 注意：接受14日或者21日隔離人士，需分別再接受最少14日或者7日自我健康管理。

澳門新冠病毒感染應變協調中心宣佈，因應武漢肺炎疫情變化，由4月19號零時開始，所有入境前28日曾經去過印度、巴基斯坦同菲律賓嘅入境人士，4月26日增加所有入境前28日曾經去過尼泊爾同巴西嘅入境人士，需要喺指定地點接受28日醫學觀察，完成後唔使再進行7日自我健康管理[39]。

口罩實名制

[編輯]

衛生局喺2020年1月22號澳門出現第一宗武漢病毒當日晝宣佈由1月23號傍晚開始實施保障口罩供應計劃（口罩實名制措施），澳門居民同外地僱員分別憑澳門居民身份證同外地僱員身份認別證喺指定50幾間藥房協議每人購買最多10個口罩，10天後先可以再買，每十日一輪。現時澳門保障口罩供應計劃已經到咗第25輪，重繼續緊。

澳門健康碼

[編輯]

澳門健康碼係一個針對武漢肺炎嘅應用程式，由澳門衛生局推出，喺2020年5月3號朝早9點開始用。入政府場所、大專學院、賭場、酒店同其他指定地方需要使用。餐廳、商場、搭車唔使出示健康碼。

2020年5月10日10點開始，澳門健康碼同粵康碼（廣東省級健康碼）互認系統啟用。

澳門健康碼app要你答三條問題，關於徵狀、接觸史同外遊史，系統會自動查核你嘅個人專屬健康碼，用嚟判斷你允許定拒絶進入某啲場所。

澳門健康碼分三種顏色：

  • 綠色表示申報人同武漢肺炎個案無關 可進入場所。
  • 黃色提示你可能有發燒、急性咳嗽等徵狀、或者你有接觸武漢肺炎患者等，當局建議你採取自我健康管理，包括每日測溫、注意個人衛生等。可以入大部分場所。
  • 紅色提示為申報人係武漢肺炎相關人士，包括確診個案、懷疑個案或者密切接觸者等。唔可以入場所。

疫苗接種

[編輯]

截至2021年2月9號，有大約1300名前線人員已預約接種武漢肺炎疫苗，據了解約近半前線醫護人員有接種意願。目前疫苗只係由澳門衛生局提供，接種地點包括山頂醫院、鏡湖醫院同全澳各個衛生中心。

疫苗種類

[編輯]
  • 滅活疫苗
  • mRNA 疫苗
  • 非複製性腺病毒載體疫苗

收費

[編輯]

澳門居民、證明到自己喺澳門做緊嘢外國人、留學生、坐緊監人士免費接種。其他喺澳門外國人每劑疫苗MOP$250。

第一階段

[編輯]
  • 對象：前線醫護、高風險人士、需要去武漢肺炎高風險地區人士
  • 預約日期：2021年2月8號下晝5點開始
  • 接種日期：2021年2月9號朝早9點開始

第二階段

[編輯]
  • 對象：全澳居民
  • 預約日期：2021年2月9號中午12點開始
  • 接種日期：2021年2月22號之後

第三階段

[編輯]

視乎第一、第二階段接種情況同疫苗數量決定。

  • 對象：所有非澳門居民、外地僱員

2021年6月15號，山頂醫院醫務主任戴華浩表示，澳門國藥疫苗仲有約27萬劑，估計約1至2個月用完，已經預訂咗新一批約20萬劑疫苗，會視乎疫苗庫存量同使用量要求送貨，強調國藥疫苗存量充足。

而mRNA疫苗仲有約1.5萬劑，一般每日使用嘅疫苗大約1,000劑，估計仲有十幾日會用完。當局已經同mRNA疫苗供應商協調，呢個周末有接近一萬劑嘅mRNA疫苗會由德國運嚟澳門，鑒於呢種疫苗保質期較短，當局原則係希望少量多次入貨，以減少疫苗過期情況同確保供應。

相關爭議

[編輯]

中國患者免費醫療待遇爭議

[編輯]

特首賀一誠喺疫情初期記者會中高調歡迎中國大陸人享用澳門嘅免費醫療服務，引起澳門網民不滿，唔少網民擔心會有更多染病嘅中國大陸人到澳門散播病毒。之後，行政法務司司長張永春表示，所有外地人若果感染武漢肺炎，要自己畀醫療費，病人亦可按《第2/2004號法律〈傳染病防治法〉》[40]規定申請豁免收費，政府可按其經濟狀況同公共利益嘅影響考量作審批[41]。而澳門首名出院嘅痊癒者[42]，係一名武漢女商人。衛生局指出，外地人嘅收費係本地人兩倍，但係女商人已經申請咗豁免34,000蚊澳門幣嘅治療費。之後，網上有人指出佢出院攞住價值約兩萬蚊嘅手袋，又去入住一晚約一千蚊嘅置地酒店。當局表示會依法審批，如果最終唔獲批，會追返佢全部收費。

首名確診患者喺住院期間要求食武漢特色早點「熱乾麵」，院方為此特別安排湖北廚師煮食，出院時又有花收，惹來唔少市民眼紅，形容係「五星級服務」，本地居民都享受唔到，引起港澳兩地網友熱議。山頂醫院醫務主任李偉成表示，山頂醫院唔會專為特別病人供應特別膳食，而係考慮到病人嘅營養狀況對治療非常重要，如果營養唔好會不利康復，又強調對任何病人膳食都一視同仁，病人嘅膳食費會計入住院費。

學生升班爭議

[編輯]

由於2020年下學期重未復到課，教育暨青年局認為唔適宜進行總結性評核，要求學校唔計算作業分數，建議全部學生集體升班。有校長認為呢個政策只會令學生懶散。

關閉公園爭議

[編輯]

2020年2月，政府宣佈為咗防止人羣聚集導致疫情擴散，宣布封閉澳門所有郊野公園同市政公園。有市民不滿，表示郊外感染風險唔大。又有人話如果唔做運動，長期留喺屋企，會更容易誘發其他疾病。疾病預防控制中心回應表示，公共休憩設施內嘅欄杆等設施可成為傳播病毒途徑，做運動時比較難佩戴口罩，遇到朋友時又會傾談，會帶來病毒傳播嘅風險，因此決定關閉公共休憩設施。

2月17號，政府宣佈賭場會喺三日後開始重開，同時又以疫情嚴峻為由，呼籲市民留喺屋企，減少外出。但係公園同其他公共設施仲未開，有市民質疑政府採取嘅措施同佢哋呼籲有矛盾，諷刺政府禁止市民去公園活動，但係可以去賭場賭錢。政府回應話賭場重開有經過評估，係為咗平衡防疫需要同穏住本地員工嘅就業先決定重開。喺賭場重開時，會要求實施防疫措施，保護員工同客人健康。另外，澳門政府會喺2月19號宣佈重開部份公園。

凌晨廣播防疫資訊爭議

[編輯]

政府喺2月6號開始利用宣傳廣播車同街上廣播裝置定時向市民宣傳防疫訊息。應變協調中心熱線同司警都收到唔少市民投訴，批評廣播擾民，影響市民休息。應變協調中心話廣播系統出現問題，導致誤鳴，向市民表達歉意，並承諾將加強管理廣播系統。

消費卡爭議

[編輯]

為推動本地消費，澳門政府推出消費補貼卡鼓勵市民消費。但係有唔少商户「發疫財」，多項商品大幅抬價，引起市民不滿。

64集會被禁

[編輯]

64燭光晚會30年嚟第一次禁止，有民眾質疑政府係以防疫為由打壓言論自由。有葡文記者提出喺户外舉行嘅六四集會被禁，但係餐廳、體育活動仍然如常進行係存在矛盾。

巴士班次大減

[編輯]

因應武漢肺炎，澳門多條巴士班次大幅減班。有市民質疑措施同政府防疫政策背道而馳。

隨後2020年6月起，珠海市逐步放寬入境限制，部分澳門居民入境珠海可以免隔離名額。但係101X巴士仍然係一個鐘一班車，巴士站不時出現迫爆人情況。同時，另一條往返港珠澳大橋澳門邊檢大樓嘅102X線仍然暫停服務，俾唔少澳門居民批評。

隨住前往珠海乘客需求增加，依家101X路線班次已經加密至全日大部分時間每30分鐘一班車。另外，102X路線已重開，並延長到橫琴澳方口岸。

澳門境內水貨客問題

[編輯]

自香港由2020年2月開始對大陸實施出入境限制，3月開始大陸對港澳地區實施更嚴格出入境限制，導致水貨客大減或滅絕。雖然由2020年6月中旬開始，珠海對澳門居民推出通關名額，但到7月15號廣東省對珠海同澳門兩地通關政策再度放寬，令澳門境內水貨客問題重燃，而且疫情爆發前同廣東省喺3月27號宣佈對澳門「封關」前極其嚴重，從而引起關閘到北區一帶嘅包括治安、衛生同防疫等問題。原因係受香港出入境內地限制影響，有香港水貨商店睇中廣東同澳門出入境限制措施放寬，並透過非法方法例如海上貨運方式將香港水貨物品偷運去澳門。同時，有大批香港水貨商店或集團睇中澳門出入境管制防寬措施嘅實行想分一杯羹，將水貨活動嘅核心從香港轉移到澳門，從而引起澳門境內水貨客嘅問題出現猖狂情況。[43]

2021年3月，澳門海關公佈2020年全年主動打撃共39次水貨活動，貨物總值7200萬元，當中27次跨部門並聯同拱北海關合作，破獲共137宗水貨案件。大部份水貨集團大規模操控水客，喺入境時受到控制從抵達收貨點再到倉庫過程後，再聯同珠海公安共同從源頭打撃。同時，拱北海關全年偵辦9,078宗水貨或水客案件，案值85.96億元，刑事立案共187宗。同時，受武漢肺炎香港疫情影響，多香港水貨集團轉移到澳門進行活動。隨著跨部門加強執法，水貨集團轉趨隱蔽同時轉移到工業大廈、住宅或使用私人車輛快閃形式等進行非法水貨活動，並招募部分人士進行「睇水」，增加海關同跨部門執法打撃難度。[44]

2021年3月12號逾百失業人士衝出馬路事件

[編輯]

3月12號朝早，時任澳門立法會立法議員高天賜陪同過百名失業人士代表到勞工事務局對失業情況作出求助同跟進情況。喺會面期間，超過百名勞工人士喺勞工局門外同對面馬路聚集，警方一度拉起封鎖線同派出警員維持秩序。有部分失業人士更表示外地僱員搶走澳門本地人嘅「飯碗」(工作職位)，希望當局保障本地人工作優先，並有人表示喺就業面試中唔理想，因為帶有津貼培訓名額限制導致無法就讀。喺會面接近尾聲之際，有部分失業人士唔滿意會面情況鼓譟，喺馬路兩邊行人路等候會面結果人士衝出封鎖線並佔領勞工局前嘅馬揸度博士大馬路，之後治安警警員增援將衝出馬路人士推返上行人路，並帶走3人[45]。

勞工事務局局長黃志雄對失業人士堵路抗議作出回應，指出冀失業人士以理性表達訴求，但唔好影響市民日常出入，並安排工人有更多安排面試機會，但係仲有好多工人唔接受，佢強調呢個係供求關係。之後當局喺中午發新聞稿，表示工作職位一律以本地人優先就業為原則，並持續監察外地僱員退場情況，達到本地居民保就業嘅成果[46]。

衛生部門以防疫為由打壓遊行

[編輯]

2021年3月15號，政府公佈咗新一輪經濟援助計劃，其中「電子消費優惠計劃」對市民非常不便，引起坊間對呢個計劃「劣評如潮」。經濟財政司司長李偉農喺記者會中表示形容「今年唔係政府要做啲咩，而係大家要做啲咩嘢。」，並認為呢個措施對CPI（消費物價指數）保持穩定，市民「可以用腳決定自己嘅消費選擇」，計劃中同時採用實名登記使用手機支付方式參與呢個計劃，喺記者會上官員大多數對記者嘅回應都問非所答，引起市民普羅大眾嘅不滿。[47]

3月20號，新澳門博彩員工權益會喺關閘收集公眾簽名要求改派「電子消費卡」，同時澳門社區發展新動力成員、立法會議員區錦新到場支持同呼籲市民簽名，並接受傳媒訪問中已向治安警察局預告喺3月28號當日舉辦遊行，並表示舉辦遊行唔係「攞威」，而係希望普通市民大眾能夠喺計劃中受惠。[48]

3月21號同22號，澳門社區發展新動力喺北區同高士德設街站供市民簽名反對該計劃。

3月24號，治安警察局對呢個遊行不反對。隨後澳門社區發展新動力喺3月26號下午舉行記者會，希望政府對嗰個計劃作出更周詳，順應市民民意，同時表示收集3萬幾個市民簽名改派消費卡。[49]

3月25號，澳門工會聯合總會多個代表同經濟財政司司長李偉農見面，並表示三方面調整消費計劃。[50]

3月27號黃昏，經濟財政司司長辦公室發出新聞稿，對呢個經濟援助計劃作出優化方案，已聽取不同團體同立法議員意見，並循消費卡模式作優化。[51]

同日，時任澳門衛生局局長李展潤、山頂醫院高級醫務主任羅奕龍、治安警察局人員同3月28號遊行發起人兼立法會議員區錦新見面。當局喺夜晚8點發出新聞稿指衛生局指出喺遊行舉辦前向澳門社區發展新動力提出多點防疫要求，無法控制遊行人數等以無法確保防疫要求命令為由要求發起人暫停舉辦呢次遊行活動。並引用第2/2004號法律《傳染病防治法》同第8199M號法令有關規定暫停呢個活動[52]。

遊行被禁後，區錦新喺個人社交平台專頁同埋澳門社會發展新動力社交專頁發出新聞稿，指經濟財政司司長李偉農喺3月27號，即遊行前一日約見佢本人同另外一名立法議員吳國昌對呢個計劃爭議聽取意見，並表示當局順應民意，保證市民希望使用消費卡能夠選擇使用消費卡，並同時保證老人家或12歲以下嘅澳門居民都同時參與呢個計劃。區錦新認為政府已經順從民意並向市民作出正面回應，並認為政府禁該制遊行方法「好精」，由衛生部門出手禁遊行嘅目的係減少政治敏感度，但同時對公民權利受到或多或少嘅傷害[53]。

國內爆疫情 學校仲辦交流團

[編輯]

2021年6月份，中國大陸部分地區疫情升溫，多間學校或者青年團體都停止舉辦前往中國大陸嘅交流團，但係濠江中學仲喺7月份舉辦交流團前往陝西省交流，當中其中一位12歲女學生更加喺交流期間染疫，期間出現武漢肺炎症狀仲唔去求醫，之後喺澳門確診武漢肺炎，其後同住3名家人亦證實被傳染同確診。呢則事件導致政府宣佈啟動全民核酸檢測計劃、增加通關限制由持24小時陰性證明方可離境到8月4號朝早6點開始往返珠澳口岸人士更改為需要持12個鐘嘅核酸陰性證明先可以出入境、部分行業暫時停止營運、旅遊業大受打擊等，部分居民再次面臨失業同無薪假，大量外僱因通關限制而被迫瞓喺街邊。網民批評濠江中學防疫意識低下，疫情期間仲帶學生周圍去[54]。8月3號下晝，澳門特別行政區立法會召開全體會議，而立法會議員兼濠江中學副校長陳虹當日稍早時曾經現身立法會會議上，當確診消息傳出後已經離開咗立法會，喺大會結束前亦唔見佢踪影[55]。事後，濠江中學發出聲明，就有關對社會帶嚟不便致歉[56]。

睇埋

[編輯]

註

[編輯]
  1. ↑ 1.0 1.1 中新網報導中國科學院西雙版納熱帶植物園發佈嘅消息聲稱，外界一度認定武漢市江漢區華南海鮮市場係疫情發源地，武漢華南海鮮市場非法銷售嘅野生動物係傳染來源[1]。隨後發現首宗同初期個案並非全部來源於華南海鮮市場[2]。較古老嘅單倍型H13同H38並未喺武漢市患者樣本中檢測到（H13同H38單倍型喺中國大陸廣東省深圳市嘅廣東首例患者同美國華盛頓州嘅美國首例患者樣本上檢測到），但係佢哋嘅旅行記錄表明都係2019年12月底至2020年1月初喺武漢被感染[3]。

參考

[編輯]
  1. ↑ 〈我國發現首起武漢肺炎疑似病例〉 (中文)。聯合早報。原先內容歸檔喺2020-01-05。喺2020-01-05搵到。
  2. ↑ 〈【武漢肺炎】首名病人不曾到華南海鮮市場 《刺針》揭患者死亡率15%如同沙士〉。《Apple Daily 蘋果日報》 (中文)。原先內容歸檔喺2020-01-26。喺2020-01-26搵到。
  3. ↑ 中新社昆明。〈最新研究：新冠病毒發源地並非華南海鮮市場 可能11月就已人傳人〉。《鳳凰網資訊》 (中國中文)。北京。原先內容歸檔喺2020-02-27。喺2020-02-27搵到。
  4. ↑ 〈抗疫專頁〉。《新型冠狀病毒感染應變協調中心》。原著喺2021年1月20號歸檔。喺2022年7月24號搵到。
  5. ↑ 〈本澳週日結束疫情過渡期 政府推算感染人口6至7成〉。《澳門廣播電視股份有限公司》。
  6. ↑ 澳門昨錄1宗輸入性新冠確診病例 為留學葡萄牙學生
  7. ↑ 〈一名尼泊爾返澳人士醫學觀察期間核酸檢測呈弱陽性 被列為本澳第50例確診病例〉。論盡媒體。2021-05-16。喺2021-05-16搵到。
  8. ↑ 〈本澳新增第51宗染疫病例 已打兩劑國藥疫苗 男子海外返澳後確診〉。論盡媒體。2021-05-24。喺2021-05-24搵到。
  9. ↑ 〈本澳新增第52例新冠病毒肺炎輸入性確診病例〉。澳門特別行政區新聞局。2021-06-09。喺2021-06-09搵到。
  10. ↑ 〈本澳新增第53例新冠病毒肺炎輸入性確診病例〉。澳門特別行政區新聞局。喺2021-06-17搵到。
  11. ↑ 〈NEWS GOV-MO: 本澳新增第55例新冠病毒肺炎輸入性確診病例〉。NEWS GOV-MO。
  12. ↑ 〈本澳新增第57和58例新冠病毒肺炎輸入性確診病例〉。澳門特別行政區新聞局。2021-07-24。喺2021-07-24搵到。
  13. ↑ 〈本澳新增第59例新冠病毒肺炎輸入性確診病例〉。澳門特別行政區新聞局。2021-07-25。喺2021-07-25搵到。
  14. ↑ 〈本澳第59例新冠病毒肺炎輸入性確診病例所感染的病毒為Delta變異病毒〉。澳門特別行政區新聞局。喺2021-07-25搵到。
  15. ↑ 〈－記者會快訊（確診女兒為輸入性個案，其家人為輸入相關個案）－〉 (HTML) (繁體中文)。喺2020-08-03搵到。{{cite news}}: CS1 maint: url-status (link)
  16. ↑ 〈宣佈進入即時預防狀態〉 (HTML) (繁體中文)。喺2020-08-03搵到。{{cite news}}: CS1 maint: url-status (link)
  17. ↑ 〈今(3)日新增的四例確診病例證實感染Delta變種病毒〉。澳門特別行政區新聞局。2021-08-03。喺2021-08-03搵到。
  18. ↑ 〈明（4）日上午9時起41個站點為全澳市民作核酸檢測〉 (HTML) (繁體中文)。喺2020-08-03搵到。{{cite news}}: CS1 maint: url-status (link)
  19. ↑ 〈本澳新增第67例新冠輸入個案 旅居中東歐洲港人在澳隔離期間確診〉。《力報》。喺2021-09-27搵到。
  20. ↑ 〈昨無症狀感染者轉確診 為本澳第78例輸入性確診病例及首例Omicron變異株感染〉。新型冠狀病毒感染應變協調中心。澳門特別行政區新聞局。2021-12-27。喺2021-12-27搵到。
  21. ↑ 〈本澳第二例Omicron變異株感染個案改列為本澳第79例輸入性確診病例〉。新型冠狀病毒感染應變協調中心。澳門特別行政區新聞局。2021-12-30。喺2021-12-30搵到。
  22. ↑ 〈－記者會快訊（本澳最新疫情）－〉 (HTML) (繁體中文)。喺2020-07-20搵到。{{cite news}}: CS1 maint: url-status (link)
  23. ↑ 〈今天起對來自武漢航班乘客進行體温篩查 衛生局與國家衛生健康委員保持密切聯繫〉。《澳門衛生局》 (臺灣中文)。原先內容歸檔喺2020-01-02。喺2020-01-02搵到。
  24. ↑ 〈特區政府提昇對"武漢不明原因肺炎"的預警級別至第III級(較重) 衛生局呼籲市民提高防範意識〉。《澳門衛生局》。2020-01-05。原先內容歸檔喺2020-01-11。喺2020-01-11搵到。
  25. ↑ 〈口罩充足毋恐慌 應對肺炎及早防〉。《澳门日报》。2020-01-10。原著喺2020-02-07歸檔。喺2020-03-21搵到。
  26. ↑ 〈本澳未有武漢新型冠狀病毒肺炎個案〉。《新型冠狀病毒感染應變協調中心》。2020-01-16。
  27. ↑ 〈特區政府提昇對"武漢不明原因肺炎"的預警級別至第III級(較重) 衛生局呼籲市民提高防範意識〉。《澳門衛生局》。2020-01-21。原先內容歸檔喺2020-01-21。喺2020-01-11搵到。
  28. ↑ 〈政府全力應對加強防控疫情〉。《新型冠狀病毒感染應變協調中心》。2020-01-22。
  29. ↑ 〈六旬漢經珠海入境現武漢肺炎徵狀　與4友人被送院隔離〉。《东网》。2020-01-22。
  30. ↑ 〈【武漢肺炎】澳門所有口岸實施健康申報 乘金巴入境須填表〉。《星島日報》。2020-01-22。喺2020-01-23搵到。
  31. ↑ 新型冠狀病毒感染應變協調中心 (2020-01-22)。〈政府全力應對加強防控疫情〉。《澳門特別行政區政府入口網站》 (繁體中文)。喺2020-01-23搵到。
  32. ↑ 〈衛生局將推出保障口罩供應澳門居民計劃 確保居民可購買到所需口罩〉。《新型冠狀病毒感染應變協調中心》。2020-01-22。
  33. ↑ 〈澳门确诊第2例新型肺炎病例〉。《凤凰网》。2020-01-23。
  34. ↑ 〈旅遊局宣布取消所有農曆新年慶祝活動〉。澳廣視。2020-01-23。
  35. ↑ 〈澳門特首賀一誠宣布 任何人有發燒癥狀不得離境〉。
  36. ↑ 〈【武漢肺炎】澳門賀一誠：珠海出入境要測體溫 已訂二千萬口罩〉。香港01。2020-01-23。
  37. ↑ 【武漢肺炎】澳門今午起所有人必須佩戴口罩才可乘搭巴士 HK01
  38. ↑ 澳門41間娛樂場所凌晨起關閉15日　博企向員工支薪 RTHK 2020-02-04
  39. ↑ https://topick.hket.com/article/2934863/%E6%9B%BE%E8%A8%AA%E5%8D%B0%E5%BA%A6%E5%B7%B4%E5%9F%BA%E6%96%AF%E5%9D%A6%E5%8F%8A%E8%8F%B2%E5%BE%8B%E8%B3%93%E6%8A%B5%E6%BE%B3%E9%96%80%E8%80%85%E3%80%80%E6%98%8E%E6%97%A5%E8%B5%B7%E6%AA%A2%E7%96%AB%E6%9C%9F%E5%BB%B6%E9%95%B7%E8%87%B328%E5%A4%A9曾訪印度巴基斯坦及菲律賓抵澳門者　明日起檢疫期延長至28天
  40. ↑ 〈印務局 -第2/2004號法律〉。《澳門政府》。原著喺2020-02-26歸檔。喺2021-02-15搵到。
  41. ↑ 〈衛局：不獲批追收鄂婦治療費〉。《澳門日報》。2020-02-07。原先內容歸檔喺2020-02-07。喺2020-04-17搵到。
  42. ↑ 衞生局 (2020-03-03)。〈澳門首例確診病人今日康復出院 無新增新型冠狀病毒肺炎確診病例〉 (HTML)。《澳門特別行政區政府入口網站》 (繁體中文)。原先內容歸檔喺2020-03-03。喺2020-03-03搵到。
  43. ↑ 〈走私死灰復燃 水客捲土重來〉。《蓮花時報》。2020-09-10。原著喺2021-04-17歸檔。喺2021-04-08搵到。
  44. ↑ 〈有片！兩地政府協力源頭打擊 罰款五萬難阻嚇 水貨活動如何根治？〉。《力報》。2021-03-12。
  45. ↑ 〈有片！過百失業人士到勞工局求助 部分聚集至馬路 突破警方封鎖線〉。《力報》。2021-03-12。
  46. ↑ 〈工友疑強闖勞工局及衝馬路 勞工局冀理性表達訴求〉。《力報》。2021-03-12。
  47. ↑ 〈新一輪消費計劃 坊間劣評如潮 財爺︰今年不是政府要做什麼 而是大家要做什麼〉。論盡媒體。2021-03-27。
  48. ↑ 〈團體議員齊收集簽名要求派消費卡 區錦新：已預告警方遊行 逼政府改善計劃〉。論盡媒體。2021-03-20。
  49. ↑ 〈週日遊行要求消費卡取代優惠券 區錦新︰政府應廣泛聽取公眾意見〉。論盡媒體。2021-03-26。
  50. ↑ 〈全民受惠 消費立減 擬設啟動金 工聯引述經財司︰三方面調整消費優惠計劃〉。論盡媒體。2021-03-25。
  51. ↑ 〈經財司︰消費優惠計劃將循消費卡模式優化〉。論盡媒體。2021-03-27。
  52. ↑ 〈因無法確保防疫要求 衛生局通知發起人暫停明日遊行〉。澳門特別行政區新聞局。2021-03-27。
  53. ↑ 〈防疫寶劍立斬遊行 區錦新︰衛生局出手 政府今次「好精」〉。論盡媒體。2021-03-27。喺2021-03-27搵到。
  54. ↑ 〈【愛瞞報道】一家四口核檢均陽性 應變協調中心：感染源涉濠江學校西安交流活動〉。《愛瞞日報》 (英文)。喺2021-08-04搵到。
  55. ↑ 力報。〈澳門濠江中學出通告向政府及市民道歉 副校長陳虹立會短暫現身後不見影〉。《力報》。喺2021-08-04搵到。
  56. ↑ 〈濠江中學就對社會造成不安和困擾致歉〉。《TDM 澳廣視新聞》。澳門。2021-08-03。喺2021-08-03搵到。
由「https://zh-yue.wikipedia.org/w/index.php?title=武漢肺炎澳門疫情&oldid=2189094#疫苗接種」收