獅子山下 (歌)

《獅子山下》係香港一首經典流行曲，本身係1970年代香港電台實況電視劇《獅子山下》嘅主題曲，由顧嘉煇作曲同編曲，黃霑填詞，羅文主唱。首次收錄嘅專輯係羅文1979年發行嘅《好歌獻給您》。1996年，經羅文重新灌唱，編曲冇變，收錄喺佢出道25週年嘅精選輯《羅文 25》，並拍攝MV，後嚟成為兩台嘅冠軍歌。2006年，容祖兒發表同羅文隔空對唱嘅版本，收錄於專輯《Ten Most Wanted》（第二版），編曲監製杜自持。

《獅子山下》推出初期反響一般，直至八十年代中後期，香港人先至逐漸產生共鳴。2002年，香港陷入政經低潮，財政司司長梁錦松引用呢首歌嘅歌詞勉勵香港人，成為一時熱話。歌曲後嚟廣泛喺民間同政府嘅活動之中，所以被譽為非官方嘅香港之歌。

音樂特色

作曲：

• 曲式結構：前奏A1段－A2段－B段－A3段－間奏－B－A3－尾聲
• 節奏、速度：4/4拍子，平穩速度。
• 調：主歌為F大調，副歌有短暫轉調。
• 音域：純十二度。

編曲：

• 運用咗鋼琴、小提琴、雙簧管、圓號、大提琴、套鼓、結他、低音結他。副歌擊鼓力度加強，匯集弦樂同銅管樂器，提高氣勢形成高潮。

歌詞：

• 主要一字一音，隔句押韻：「eoi」。
• 以三及第文體（文言、白話、俗語嘅結合）寫成，典雅嘅有「同處海角天邊，攜手踏平崎嶇」，俗嘅有「我哋」。

獎項

• 1999年：世紀中文歌曲選舉（香港電台舉辦）－ 入圍前廿名
• 2010年：國際華語音樂聯盟 － 華語金曲獎：30年30歌