能源

2001年世界各國能量用量

喺比利時，古時候同現代兩種能源採集機器：17世紀嘅風車Scheldemolen同20世紀嘅朵核電廠（Kerncentrale Doel）

能源（粵拼：nang4 jyun4）係指人類用嘅能量嘅來源，主要分做「可再生能源」同「不可再生能源」兩大類，前者包括水力、風力、太陽能等，而後者就包括石油、天然氣、煤，重有核能都係。

可再生

水力

睇埋：水力發電同水車

自然環境當中嘅水同風會流動，而水同風會郁動 $v\neq 0$，就表示佢哋帶有動能（$E_{\text{k}}>0$），而當水流或者氣流沖向一件物體嗰陣，會或多或少噉令件物體跟住郁－想像一股水流，股水流帶有 $E_{1}$ 咁多動能，佢跟住撞到阻住佢流動嘅障礙物，件障礙物原本係唔郁嘅（$E_{\text{k}}=0$），但跟住股水流撞到佢嗰陣將一部份嘅動能傳俾件障礙物－

• 撞前：水流 $E_{\text{k}}=E_{1}$，障礙物 $E_{\text{k}}=0$；
• 撞後：水流 $E_{\text{k}}=E_{2}$，障礙物 $E_{\text{k}}=E_{3}$，當中 $E_{2}<E_{1}$，而如果冇能量流失，$E_{2}+E_{3}=E_{1}$。

即係話自然環境當中嘅水流同氣流係一個可能嘅功率來源。

想像以下呢個設計：個設計用咗一個輪軸原理，由一條打橫嘅軸，條軸其中一端駁落去一個能夠旋轉嘅水車嗰度，而假設條軸嘅另一端固定咗，除咗旋轉之外唔會郁，當有一股力量夠勁嘅水流流過個水車嗰時，就會俾動能個水車，令到個水車轉動。個工程師跟住可以將呢條曉旋轉嘅輪軸駁落去第部機械嗰度，用由水流嗰度嚟嘅動能帶動第部機械。喺古代，啲小村落好多時會用小型嘅水車帶動屋企入面嘅細機械，好似係磨坊噉，而現代嘅水力發電都係運用咗類似嘅原理，用水流嘅能量帶動機械。

一個水車嘅圖解 一個水車嘅圖解  烏克蘭一條山旮旯古村嘅一個小型水車 烏克蘭一條山旮旯古村嘅一個小型水車  一個運作緊嘅水車嘅短片 一個運作緊嘅水車嘅短片

風力

睇埋：風力發電同風車

風車嘅原理同水車大同小異，都係運用自然環境當中嘅某啲嘢嘅流動嚟帶動一個曉旋轉嘅輪軸結構，主要分別在於風車所使用嘅係風嘅動能：風車往往有住同水車好相似嘅設計，喺受到有返咁上下勁嘅風吹嗰時會轉動，而呢股轉動表示股風俾咗動能架風車，而如果將架風車駁落去第啲機械嗰度，就能夠帶動第啲機械跟住郁。風力發電都係用咗噉嘅原理。

遼寧大連市嘅一個風車 遼寧大連市嘅一個風車  現代風力發電用嘅風車 現代風力發電用嘅風車  一個運作緊嘅風車嘅短片 一個運作緊嘅風車嘅短片

睇埋

• 動能
• 機械
• 工程