諸藝

藝，原本係指才能、技術；英文講嘅 art 本來亦同樣係指才能、技術。｢藝術｣ 嘅概念係後來先有；英文喺17世紀先開始用呢個字嚟指藝術，中文更遲，所以就算係而今gaa1，無論係粵語定英文，｢藝｣ 都係有時指前者，有時指後者，前者粵語會叫 ｢工藝｣、｢手藝｣、｢技藝｣，而後者就會叫 ｢藝術｣。

六藝

中華文化講六藝，分別係禮、樂、射、御、書、數。

自由七藝

喺西方仲係封建社會嘅中世紀初期，按照當時嘅意識形態，｢藝｣ 被分成兩大類，分別係自由技藝（拉丁文：artes liberales，即係唔使做體力勞動，適合特權階層嘅藝）同機械技藝（artes mechanicæ，即係要做體力勞動，唔適合特權階層嘅藝）。自由技藝分為七種（即係七藝），再按加洛林王朝嘅教育制度細分做 ｢三藝｣（trivium，分別係文法、修辭同辯證法）同 ｢四藝｣（quadrivium，分別係算術、幾何、天文學同音樂）。機械技藝都係分七種，分別係紡織、農業、石工、軍事、貿易、烹飪同冶金。

西方六藝

到咗文藝復興時期，受到人文主義嘅影響，西方開始重視藝術家同佢哋嘅工作，就出現咗啲新概念；1746年，Charles Batteux 提出 ｢主要藝術｣ 同雅藝術嘅概念，將兩者重疊就得出六藝，分別係繪畫、雕塑、建築、音樂、舞蹈同文學。不過西方嘅六藝點排並冇一個公認嘅次序，冇得話邊個係 ｢第一藝｣、｢第二藝｣ 等等。

呢六藝同中華文化講嘅六藝數字上一樣，但係除咗音樂（或者可以計埋文學）之外冇嘢一樣。

第七藝

Ricciotto Canudo 喺1911年出版嘅《七藝宣言》（西班牙文：Manifesto de las Siete Artes）中將電影稱為第七藝，將原先嘅六藝變返做七藝（注意，頭六藝並冇特定次序），分別係建築、文學、舞蹈、音樂、繪畫、雕塑、電影。

第八、第九、同其他嘅藝

後來有啲人就話要將新嘅表達形式都計埋，目前有啲共識嘅係第八藝定為攝影，第九藝就係漫畫，不過，呢兩樣喺電影出現之前其實都已經出現。

由呢度開始，個數字就唔係咁統一。有人認為將某啲嘢列為藝術，就可以將佢哋提升到同其他藝術同文化表現一樣嘅地位，呢啲包括電視、廣告、電子遊戲、紋身、摺紙等等。

藝術分類

構成其他藝術嘅基本藝術有：建築、雕塑、繪畫、音樂、舞蹈、文學同最後出現嘅電影；呢啲主要嘅藝術係構成其他藝術嘅基礎，不過有啲人會計攝影唔計電影，因為攝影出現得更早。

所有較少人認可嘅藝術都係主要藝術嘅混合或者細微變化，例如攝影、烹飪等等，又或者其他已經有或者將來可能出現嘅藝術。

最近，有啲人開始將電子遊戲都當係藝術，但係另外有其他人認為佢只係主要藝術嘅次要結合，話整電子遊戲可以讀電影、美術同電腦工程。

視覺藝術

内文：視覺藝術同造型藝術

建築

内文：建築學

雅典衛城頂上嘅巴特農神廟，希臘雅典

建築係設計建築物同結構嘅藝術同科學。廣義上包括設計建築環境，由宏觀層面嘅城市規劃、城市設計同景觀設計到微觀層面嘅傢俬設計。建築設計通常要兼顧建造者嘅可行性同成本，以及用家嘅功能同美學需求。

1728年嘅Cyclopaedia建築表

喺現代用法中，建築係創造或推斷一個複雜對象或系統嘅隱含或明顯計劃嘅藝術同學科。呢個詞可以用嚟表示抽象事物嘅「隱含建築」，好似音樂或者數學；自然事物嘅「明顯建築」，好似地質構造或者生物細胞結構；或者人造事物嘅「計劃建築」，好似軟件、電腦、企業同數據庫，當然仲有建築物。喺所有用法中，建築可以被睇成係從人類角度（喺抽象或實體人造物嘅情況下係「用家」嘅角度）到某種結構或系統嘅元素或組件嘅「主觀映射」，保留元素或組件之間嘅關係。計劃建築會操縱空間、體積、質地、光、影或抽象元素嚟達到令人愉悅嘅美學效果。呢一點將建築同應用科學或工程區分開嚟，後者通常更加注重建築或結構設計嘅功能同可行性方面。

喺建築物嘅範疇入面，對建築師嘅要求由最複雜嘅，好似醫院或者體育場，到表面上最簡單嘅，好似規劃住宅。好多建築作品都可以被視為文化同政治符號，或者藝術品。雖然建築師嘅角色一直都喺變，但喺成功（有時候係失敗）設計同實現令人愉快嘅建築環境方面，佢哋一直都扮演緊關鍵角色。

陶瓷

内文：陶藝

陶瓷藝係用陶瓷材料（包括黏土）整嘢嘅藝術，可以有唔同形式，例如陶器、瓷磚、小雕像、雕塑同餐具。雖然有啲陶瓷製品被視為美術，但其他嘅就可能被視為裝飾、工業品或應用藝術品。喺考古學，陶瓷都可以被視為文物。陶瓷藝術可以由一個人或者一班人整。喺陶瓷工廠或者瓷器廠，一班人會設計、製造同裝飾陶瓷。一間陶瓷工廠嘅產品有時候會叫做「藝術陶瓷」。喺一個獨立嘅陶藝工作室，陶藝家或者陶工會生產工作室陶瓷。喺現代陶瓷工程嘅用法中，「陶瓷」係指通過加熱作用將無機同非金屬材料製成物品嘅藝術同科學。呢個定義唔包括玻璃同用玻璃整嘅馬賽克。

概念藝術

内文：概念藝術

喺概念藝術，作品所涉及嘅概念或者意念比傳統嘅美學同物質關注更加重要。 呢個詞喺1960年代開始使用嘅時候，指嘅係一種嚴格同集中嘅以意念為基礎嘅藝術實踐，呢種藝術喺以文字形式展示嘅時候，經常挑戰同視覺藝術相關嘅傳統視覺標準 。通過喺1990年代同年輕英國藝術家同特納獎嘅聯繫 ，佢喺流行用法中，特別係喺英國，發展成為所有唔練習傳統繪畫同雕塑技巧嘅當代藝術嘅代名詞。

畫畫

内文：畫畫

畫畫，書面語又叫繪畫，係製作圖像嘅方法，主要分素描同唔係素描兩大類，喺歐洲語言有分（例如，喺英文，前者叫 drawing，後者叫 painting），但係粵語同中文基本上都唔分。

素描指透過工具同技巧，喺一個表面上做標記，技巧可以包括用工具加壓，或者將工具喺表面上旭動，或者用數碼工具模擬呢啲效果等等。常見嘅工具有石墨、鉛筆、原子筆、鋼筆、、蠟筆、炭筆、粉彩同水筆等等。素描嘅主要元素係點同線，技法包括打陰影等等。

達文西嘅《蒙娜麗莎》

唔係素描嘅畫亦係一種創意表達嘅方式；除咗一般嘅繪畫之外，亦有姿勢繪畫同抽象畫等等，畫畫講構圖，亦會講敘述，畫作可以係寫實嘅具象藝術（係如寫生或者風景畫，包括攝影寫實主義），亦可以係抽象、敘事、象徵，情感（例如表現主義），或者政治性質（好似行動主義藝術）等等。

現代畫家大大擴展咗呢種做法，包括例如拼貼。拼貼嚴格嚟講唔係畫畫，因為佢包含其他材料。有啲現代畫家會將唔同嘅材料加入佢哋嘅作品中，好似沙、水泥、稻草、木頭或者頭髮，嚟增加作品嘅質感。呢啲例子包括 Jean Dubuffet 或者 Anselm Kiefer 嘅作品。

畫畫可以應用嚟做第啲創作，例如插畫、漫畫、圖則同動畫等等。（喺法文，漫畫經常被稱為「第九藝術」(le neuvième art)，係西方傳統「七藝」嘅補充。）

攝影

内文：攝影

作為一種藝術形式，攝影係指根據攝影師嘅創作意念而創作嘅相。藝術相同一般嘅新聞相唔同，新聞相嘅目的係記錄新聞事件；同商業攝影都唔同，商業攝影嘅主要目的係宣傳產品或者服務。

雕塑

内文：雕塑

雕塑係視覺藝術嘅一個分支，喺三維空間中進行創作。佢係造型藝術嘅一種。耐用嘅雕塑工藝最初用嘅係雕刻（移除材料）同塑造（加添材料，例如黏土），用石、金屬、陶瓷、木同其他材料；但自從現代主義之後，雕塑工藝嘅變化導致幾乎可以用任何材料同工藝。好多種材料都可以用雕刻嘅方式加工，用焊接或塑造嘅方式組裝，或者用模具或鑄造嘅方式製作。

表演藝術

内文：表演藝術

一場交際舞表演。

表演藝術包括舞蹈、音樂、戲劇、歌劇、啞劇同其他以表演為主嘅藝術形式。表演藝術同視覺藝術同文學藝術嘅分別在於佢需要演繹先至可以欣賞同體驗，亦都係暫時性嘅，即係話演繹出嚟嘅作品只係表演期間先至存在。表演藝術可以粗略分為可以重複嘅作品（例如有劇本或者樂譜跟）或者每次表演都即興嘅創作。喺觀眾面前參與呢啲藝術嘅藝術家或者藝人叫做「表演者」，包括演員、魔術師、喜劇演員、舞蹈員、音樂家同歌手等等；除咗呢啲之外，仲需要其他藝術家或者幕後工作人員嘅支持，例如作曲同舞台設計等等。表演者通常會用服裝同舞台化妝等工具去改變自己嘅外表。

舞蹈

内文：舞蹈

舞蹈通常指人類嘅一啲可以用嚟表達情感嘅動作，或者喺社交、宗教或表演場合做嘅類似動作。「舞蹈」亦可以形容人與人或者動物與動物之間嘅非語言溝通方式（例如蜜蜂舞、求偶舞），無生命物體嘅動作（例如「樹葉隨風起舞」），以及某啲音樂形式或流派。編舞係創作舞蹈嘅藝術，而做呢樣嘢嘅人就叫做編舞家。舞蹈嘅定義取決於社會、文化、美學、藝術同道德嘅限制，由功能性動作（好似民間舞蹈）到高度規範同技巧性嘅舞蹈（好似芭蕾舞）都有。喺體育方面，體操、花式溜冰同韻律泳都係舞蹈項目，而武術嘅「型」經常都會同舞蹈相提並論。

一份莫札特嘅樂譜。  播放 

音樂

内文：音樂

音樂係一種以時間中嘅聲音同靜默作為媒介嘅藝術形式，常見元素包括音調（決定旋律同和聲）、節奏（同佢相關嘅概念包括速度、拍子同演奏技巧）、力度，以及音色同紋理嘅音響特質。音樂嘅創作、表演、意義，甚至定義都會因應文化同社會背景而有唔同。音樂涵蓋嘅範圍由嚴格組織嘅作品（同佢哋嘅表演重現），到即興音樂，再到隨機音樂。音樂可以分為唔同嘅流派同子流派，不過流派之間嘅界限同關係通常都好微妙，有時仲要靠個人詮釋，有陣時仲會引起爭議。喺「藝術」範疇入面，音樂可以歸類為表演藝術、美術同聽覺藝術。

戲劇

内文：戲劇

「戲劇」係表演藝術嘅一個分支，佢主要係喺觀眾面前表演故事，運用說話、手勢、音樂、舞蹈、聲音同視覺效果嘅組合——其實就係用晒其他表演藝術嘅所有元素。除咗標準嘅對話敘事風格之外，戲劇仲包括歌劇、芭蕾舞、啞劇、歌舞伎、印度古典舞蹈、中國戲曲同默劇等形式。

文學藝術

内文：語言同文學

「文學」字面上嘅意思似係解「對文字嘅認識」，但係喺中文其實係指透過文字表達思想，可以指唔同嘅寫作作品，呢啲作品喺西方文化主要包括散文（包括小說同非小說）、戲劇同詩歌。喺世界大部分地區（甚至可能係全世界），語言藝術表達都可以係口頭嘅，包括史詩、傳說、神話、民謠、其他形式嘅口頭詩歌，仲有民間故事等文學體裁。漫畫將繪畫或其他視覺藝術同敘事文學結合，喺法語學術界通常被稱為「第九藝術」（le neuvième art）。

書目

• 藝術教育組 (2007)。〈視覺藝術科學與教常用英漢辭彙〉 (PDF) (香港中文)。教育局課程發展處。喺2024年9月1號搵到。
• Fraleigh, Sondra Horton (1987). Dance and the Lived Body: A Descriptive Aesthetics (美國英文). Pittsburgh: University of Pittsburgh Press. ISBN 978-0-8229-7170-2.
• García Fernández, Emilio C.; Sánchez González, Santiago (2002). Guía histórica del cine (西班牙文). Madrid: Complutense. ISBN 8474916739.
• Honderich, Ted, 編 (2006). "Performing Arts". The Oxford Companion to Philosophy (英國英文). Oxford University Press. doi:10.1093/acref/9780199264797.001.0001. ISBN 978-0-19-926479-7.
• Huntsman, Penny (2015). Thinking About Art: A Thematic Guide to Art History (英國英文). Chichester, West Sussex, UK: Wiley. ISBN 978-1-118-90517-3.
• LeWitt, Solomon (June 1967). "Paragraphs on Conceptual Art". Artforum (美國英文).第5卷第10號. 原先內容歸檔喺26 July 2020. 喺12 May 2020搵到.
• Liu, Brian (2019年7月10日)。〈通識教育為何叫 Liberal Arts？〉 (香港中文)。CUP 媒體。喺2024年9月15號搵到。
• Miller, Ann (2007). Reading bande dessinée : critical approaches to French-language comic strip (英文). Intellect Books. ISBN 978-1-84150-177-2.
• Perry, Lincoln (Summer 2014). "The Music of Painting". The American Scholar (英文). 83 (3).