奧德修記

一件公元前嘅陶器；件陶器上面嘅圖案描繪《奧德修記》「奧德修斯聽海妖唱歌」嘅情境。

《奧德修記》（粵拼：ou3 dak1 sau1 gei3）—又有譯做《奧德修飄流記》或者《奧德賽》 —係古希臘著名史詩之一，總共有成 12,109 行咁長。首詩相傳係由盲詩人荷馬作嘅。

喺劇情上，《奧德修記》主要係連接住《伊利亞德》：話說經過特洛伊戰爭之後，英雄奧德修斯同佢旗下嘅軍隊坐船返屋企，但佢得罪咗海神普西頓，普西頓降災令佢哋遇到海難，全軍覆沒；奧德修斯靠住機智同勇敢避過一劫，但普西頓未嬲完，就施法令到奧德修斯搵唔到航線返屋企而喺個海度周圍漂流；另一邊廂，奧德修斯嘅老婆潘妮洛普唔知奧德修斯係生定死；面對一班喺度蠻橫噉向佢求婚嘅人，潘妮洛普就只能夠苦等老公返嚟；去到最後，諸神卒之出手幫奧德修斯，而經過十年漂流生活嘅奧德修斯返到屋企同老婆團聚，仲同佢個仔同啲僕人聯手殺晒啲求婚嘅人。大團圓結局。

《奧德修記》有龐大嘅影響力：到咗依家，《奧德修記》已經畀人翻譯咗做好多種語言，畀人公認係世界嘅經典文學著作；首史詩嘅故仔有多次畀人攞去改編做電影等嘅創作品，而且仲有漫畫同視像遊戲雖然冇直接用首詩嘅故仔，但就採用咗個故仔當中嘅某啲橋kiu2。

《奧德修記》喺古希臘文入便個名係 Ὀδύσσεια（羅馬字轉寫：Odýsseia ）。

邊個作嘅

呢個胸像描繪作者想像中嘅古希臘盲詩人荷馬。

内文：荷馬

傳統上，《奧德修記》嘅作者係古希臘嘅盲眼詩人荷馬。荷馬估計係喺公元前 8 至 9 世紀出世嘅，而根據紀錄，《奧德修記》同《伊利亞德》呢兩首舉世聞名、影響深遠嘅古希臘史詩都係佢嘅作品。

不過到咗廿一世紀初，仲有唔少人質疑呢兩首史詩係咪真係荷馬作嘅：事實表明，當代（指同荷馬同期）嘅文獻好少可提到荷馬呢個人；對於荷馬喺邊度出世或者一世人做過啲乜，學界所知甚少；有唔少人懷疑《奧德修記》各部份查實係由唔同人作嘅，每部份都喺古希臘人之間口耳相傳，流傳期間變過樣，傳咗排之後先畀人攞文字紀錄低—而荷馬做嘅只不過係集結前人嘅創作，編成文獻；除此之外，有啲人甚至懷疑荷馬呢個人根本只係一段創設神話—創設神話係指一個群體對於某種自然或者社會現象「點樣嚟」嘅神話，根據呢種睇法，古希臘人之所以會話首史詩嘅作者係荷馬，唔係因為荷馬真有其人，而係因為佢哋好想搵返個個體嚟做「英雄」，當正zeng3佢係呢兩首偉大史詩嘅作者。

主要角色

呢座雕像描繪創作者想像中嘅英雄皇帝奧德修斯。

睇埋：奧德修斯

以下係《奧德修記》嘅重要角色一覽：

• 奧德修斯一家：
  • 奧德修斯：《奧德修記》故事嘅主角，善戰、勇敢、又有智謀嘅英雄，亦係伊法基島嘅皇帝；佢出征打完特洛伊戰爭之後心身俱疲，淨係想有咁快得咁快返屋企見老婆同埋個仔，但係佢受到海神普西頓詛咒，被迫喺海上漂流咗成十年咁耐，期間遇到各種嘅危險。
  • 潘妮洛普：伊法基島嘅皇后，奧德修斯嘅太太；佢唔淨只生得靚仲好聰明，對老公一條心，一路等奧德修斯返屋企。
  • 鐵利馬庫斯：奧德修斯同潘妮洛普嘅獨生子，伊法基島嘅王子，好想搵返佢阿爸同埋趕走係噉搔擾佢阿媽嗰班追求者。
  • 尤麗卡莉亞：奧德修斯兩仔爺嘅奶媽，對奧德修斯一家忠心耿耿。
• 奧德修斯嘅朋友：
  • 雅典娜：奧林匹斯十二神（希臘神話最大粒嗰十二位天神）之一，掌管打仗同智慧等嘅好多樣嘢；雅典娜同奧德修斯關係友好，多次出手幫助奧德修斯一家。
  • 斯加利亞島嘅一眾居民：奧德修斯漂流途中去到佢哋個島；佢哋同情奧德修斯嘅遭遇，喺故仔途中幫手送奧德修斯返伊法基島。
  • 色琦：識得用巫術嘅女神，曾經施法將奧德修斯啲手下變做豬，但後嚟同奧德修斯化敵為友，仲教奧德修斯點樣搵泰里西亞斯。
  • 泰里西亞斯：盲眼先知，幫手指導奧德修斯點樣返屋企。
• 宙斯：眾神之王，奧林匹斯十二神之首，亦係雅典娜嘅阿爸；雅典娜為咗想幫奧德修斯返屋企而懇求自己阿爸出面；宙斯亦順應個女嘅懇求，派出奧林匹斯十二神當中嘅傳信之神赫密士去放奧德修斯。
• 卡聶蘇：一位寧芙，鍾意咗奧德修斯，仲用法力將奧德修斯囚禁住；喺呢段期間，卡聶蘇殷勤服侍奧德修斯，想奧德修斯做佢老公。
• 波利菲莫斯：獨眼巨人，想食奧德修斯同埋佢啲手下，奧德修斯還手嗰陣插盲咗佢隻眼。
• 普西頓：奧林匹斯十二神當中嘅海神，波利菲莫斯嘅阿爸；佢得知個仔隻眼畀奧德修斯插盲咗，就為咗報復而向奧德修斯落咒，搞到奧德修斯漂流十年。
• 眾海妖：奧德修斯漂流途中遇到嘅海上妖怪；海妖唱起歌上嚟把聲甜美無比，佢哋嘅歌聲能夠擾亂水手嘅心智，令佢哋喪失理智跳落海然後浸zam6死。
• 潘妮洛普嘅追求者：伊法基島嘅 108 個男人；呢班男人見到奧德修斯咁耐都未返屋企，諗住奧德修斯死咗，於是就個個都想乘機娶潘妮洛普做老婆，想搶走奧德修斯個王位；佢哋仲嘗試謀殺王子鐵利馬庫斯。

情節內容

睇埋：伊利亞德

《奧德修記》嘅情節如下。要留意嘅係，首史詩用咗攔腰法，首詩一開始嗰段，係講故仔發生到半路嗰時嘅事件。

第一部分

呢幅畫描繪特洛伊戰爭當中嘅經典片段—木馬屠城記。

首詩開場，長達十年咁耐嘅特洛伊戰爭卒之打完。出咗征嘅伊法基島國王奧德修斯仲未返得到屋企。噉係因為佢得罪咗海神普西頓，受到普西頓嘅詛咒。

同奧德修斯友好嘅女神雅典娜出場，佢想幫奧德修斯平安返屋企，所以佢求眾神之王宙斯幫手，然後佢自己就扮成一個凡人去伊法基島。扮成凡人嘅雅典娜一到咗奧德修斯座宮殿門口，就見到有 108 個男人喺度聚集—呢班男人知國王奧德修斯好耐都未返，就係噉向皇后潘妮洛普求婚。班追求者係諗住想乘機娶咗潘妮洛普，然後自己就會變成國王。班追求者行為非常惡劣—佢哋當咗宮殿係自己屋企噉，喺度又開 paa1 ti4 又黐飲黐食，佢哋當中有人仲撩宮殿嘅女僕，想借啲咦同啲女僕做愛。

雅典娜更加覺得有必要快啲搵返奧德修斯。佢去搵奧德修斯個仔—王子鐵利馬庫斯。佢話畀鐵利馬庫斯知佢阿爸仲在生。鐵利馬庫斯覺得好振奮，打算出發去打探阿爸嘅下落。而到咗第二朝，鐵利馬庫斯召開公民大會，商討應該點樣處罰嗰班無禮嘅追求者，但係冇人睬佢—佢遠遠冇佢阿爸咁受伊法基島嘅父老尊敬。於是乎，鐵利馬庫斯唯有死死哋氣噉同雅典娜一齊坐船出發，去打聽佢父王嘅下落。

鐵利馬庫斯同雅典娜第一站係去見涅nip6斯托—涅斯托係希臘其中一個國王，都有份打特洛伊戰爭嘅。涅斯托話佢打完仗就即刻返咗屋企，而佢對上一次見到奧德修斯，係打完仗後奧德修斯選擇要留低喺特洛伊一陣，不過之後佢就冇再見過奧德修斯。涅斯托講完，就建議鐵利馬庫斯去搵斯巴達嘅國王墨涅里俄斯（墨涅里俄斯都有份打場仗）。多謝咗涅斯托之後，鐵利馬庫斯同雅典娜一齊去斯巴達，面見國王墨涅里俄斯同埋佢嘅皇后海倫。墨涅里俄斯諗咗陣，就講：

「我記得喇。當時我同海倫坐船返斯巴達，中途撞到河海神普羅提斯。河海神好似提起，話奧德修斯畀卡聶蘇呢位寧芙捉住咗。」

下一刻，敘述焦點返咗去奧德修斯嘅宮殿：原來正喺呢個時候，潘妮洛普嘅追求者啱啱發現鐵利馬庫斯離開咗伊法基島，就密謀要喺鐵利馬庫斯返嚟嗰陣埋伏佢架船，想攞鐵利馬庫斯條命；而潘妮洛普暗中偷聽到佢哋講嘢，開始擔心自己個仔嘅安危。

第二部份

首詩第二部開場，敘述焦點去咗奧德修斯嗰邊。

喺奧德修斯身邊嘅，係寧芙卡聶蘇。原來卡聶蘇鍾意咗奧德修斯，因為噉而施法幽禁住佢，仲韞wan3足佢七年咁耐。卡聶蘇想奧德修斯做佢老公，對奧德修斯一直都服侍周到，佢仲提出咗個好吸引人嘅建議：

「如果你肯做我老公，我可以畀你得到好似天神噉嘅不死之身。正zeng3唔正呀？」

但係奧德修斯由此至終都對老婆死心塌地，一路都拒絕卡聶蘇嘅求婚。

等咗七年，奧德修斯嘅救星終於出現：傳信之神赫密士嚟咗。赫密士命令卡聶蘇放咗奧德修斯，並且解釋佢點解會嚟—原來宙斯聽咗雅典娜嘅請求（第一部份提咗），派赫密士嚟解放奧德修斯。卡聶蘇無可奈何噉放奧德修斯走，不過送咗啲衫、嘢食同埋嘢飲畀佢。奧德修斯一心想返屋企見老婆同仔，所以就即刻郁手整咗隻筏，然後啟航返屋企。喺呢個時候，同奧德修斯有仇口嘅海神普西頓見到奧德修斯重獲自由就發爛渣，施法製造大浪打沉奧德修斯隻筏。奧德修斯死唔去，仲一路游水游到去斯加利亞島嗰度，一上岸就攰到暈低咗。

第二朝，奧德修斯一醒就見到斯加利亞島嘅公主瑙西卡。瑙西卡話自己之前嗰晚夢見雅典娜叫佢去海邊，嚟到海邊就搵到不醒人事嘅奧德修斯。奧德修斯哀ai1瑙西卡幫手，瑙西卡就帶奧德修斯去見佢嘅父皇同母后。國王唔知奧德修斯係邊個，但得知奧德修斯嘅處境就肯派艘船送佢返屋企。滿心感激嘅奧德修斯喺斯加利亞島留咗幾日，期間遇到一位盲眼歌手。盲歌手喺度唱歌，歌頌特洛伊木馬（奧德修斯帶頭諗嘅一條計）嘅故事。盲歌手唱唱吓，奧德修斯悲憤交集到喊咗出嚟，仲當場公開埋自己嘅真正身份。

呢幅畫描繪奧德修斯聽盲眼歌手唱故仔，聽聽吓悲憤交集到喺眾人面前喊咗出嚟。 呢幅畫描繪奧德修斯聽盲眼歌手唱故仔，聽聽吓悲憤交集到喺眾人面前喊咗出嚟。

第三部份

呢段一開始，奧德修斯講返佢打完場仗之後有乜經歷：奧德修斯同佢嗰十二架船畀風暴吹到偏離航道，偏到去咗食蓮者嘅島。座島上面有啲怪生果，奧德修斯嘅手下食咗啲怪生果就唔記得要返屋企，仲要奧德修斯強行拉佢哋返上船。然後佢哋繼續航行，去到獨眼巨人嘅島。佢哋喺座島嘅大山窿裏面搵到大量嘅肉同芝士，點知獨眼巨人喺呢個時候返山窿，仲即場捉咗奧德修斯嘅兩個手下嚟食；為咗脫險，奧德修斯出計扮請獨眼巨人飲酒，而等到獨眼巨人飲醉之後，奧德修斯同佢啲手下就郁手攞一碌好尖嘅木樁插盲獨眼巨人隻眼，並且趁住此舉引起嘅混亂逃走。

奧德修斯一路走一路大聲噉笑獨眼巨人，途中提到自己個真名係乜。出乎所有人意料嘅係，原來獨眼巨人係海神普西頓個仔，佢知道咗奧德修斯係邊個，就向佢阿爸祈禱。普西頓聽到個仔嘅祈禱，知道自己個仔盲咗，就勃然大怒，施法咒奧德修斯，咒佢要十年都冇得返屋企。

呢幅油畫描繪畫家想像中嘅巫術女神色琦。 呢幅油畫描繪畫家想像中嘅巫術女神色琦。

及後，奧德修斯同佢淨低嘅手下航行去到巫術女神色琦嘅島。色琦起初扮友好請佢哋食芝士同飲酒。不過原來啲芝士同酒落咗藥，奧德修斯嘅手下有一半中咗咒語變成豬。不過奧德修斯就好彩，得到赫密士嘅幫助—赫密士送咗啲神草畀奧德修斯，令佢對色琦嘅巫術有抵抗力。奧德修斯唔怕色琦嘅巫術，就攞住劍迫色琦解除佢手下中咗嘅咒。色琦唯有幫佢哋解咒。後嚟色琦色誘奧德修斯同佢啲手下，仲令佢哋喺色琦島留低咗一年咁耐，期間兩方化敵為友。而到咗最後，色琦點條航線畀奧德修斯行，教佢哋去搵先知泰里西亞斯。

奧德修斯同佢啲手下渡洋去到世界最西邊嘅港口。佢哋喺嗰度行召魂禮，見到先知泰里西亞斯嘅靈魂。泰里西亞斯開口，話奧德修斯可以返屋企，但係就警告佢哋，叫佢哋要忍口唔好捉太陽神希路斯嘅聖牛嚟食，如果佢哋忍唔住口，奧德修斯嘅船同手下都會消失。除此之外，奧德修斯仲見返佢過咗身嘅阿媽雅提卡莉亞嘅靈魂。奧德修斯由阿媽口中得知老婆潘妮洛普喺度畀成大班追求者騷擾，於是佢就更加下定決心要快啲起航返屋企。

奧德修斯帶住班手下返到色琦島。色琦教佢哋跟住落嚟要行咩航線。奧德修斯即刻出發，途中佢哋經過海妖嘅島：海妖係一種女人頭雀身嘅怪獸，能夠以極之甜美嘅歌聲唱歌，佢哋嘅歌聲會迷惑人嘅心智，令船沉沒。奧德修斯同眾手下一知道有海妖喺附近，個個都即刻用蜂蠟塞sak1住自己耳仔，以防自己畀海妖迷魂。不過奧德修斯好想聽吓海妖嘅歌聲係咪真係咁甜美，就叫啲手下綁實佢唔畀佢郁，等佢可以聽海妖唱歌之餘又唔會做傻事跳落海。

呢幅油畫描繪奧德修斯班手下將佢綁到實一實，等奧德修斯可以聽啲海妖（女人頭雀身嗰啲怪獸）唱歌，同時又唔會受到歌聲迷惑而跳海。 呢幅油畫描繪奧德修斯班手下將佢綁到實一實，等奧德修斯可以聽啲海妖（女人頭雀身嗰啲怪獸）唱歌，同時又唔會受到歌聲迷惑而跳海。

奧德修斯跟住通過六頭怪獸斯臼拿同大旋渦庫獵狄斯之間嘅海域，死咗六個船員。

奧德修斯最後一站係一座神島。神島上面有一群牛—太陽神希路斯嘅聖牛。奧德修斯本來決意要同呢座島保持距離，但係佢班手下反對，同時宙斯施法引起咗場風暴，搞到奧德修斯同眾手下焗住要留喺島上面。留留吓，奧德修斯同眾手下開始唔夠糧食。奧德修斯心知神牛唔食得，就走咗去祈禱。佢估唔到嘅係，佢啲手下竟然唔聽先知嘅警告，走咗去捉神牛嚟食。希路斯大發雷霆，要求宙斯好好噉懲罰佢哋，宙斯一發威，奧德修斯同佢班手下就遇到船難，架船沉咗，除咗奧德修斯之外所有人都浸死晒。

到咗最後，奧德修斯漂流咗去寧芙卡聶蘇嘅屋企—如是者。奧德修斯就畀卡聶蘇捉住咗，七年都走唔到。

第四部份

首詩嘅敘述返到去現在。

斯加利亞島嘅人聽到奧德修斯喊住噉講佢嘅遭遇，就心生同情。班島民送咗啲財寶畀奧德修斯，仲連夜將佢送咗返去伊法基島嘅隱藏港口嗰度。奧德修斯一醒就見返佢嘅好朋友雅典娜，由雅典娜口中得知自己的確係返咗伊法基島。雅典娜跟住就郁手施法，將奧德修斯得到嘅財寶收埋，又將奧德修斯變咗做一個年老乞衣噉嘅樣。奧德修斯跟雅典娜返去宮殿，見到潘妮洛普嗰班追求者點樣連日喺宮殿度開 paa1 ti4 噉款搞到宮殿立立亂，又得知班追求者點樣連番搔擾佢老婆。

呢幅畫描繪奧德修斯卒之返到去伊法基島，見到雅典娜。 呢幅畫描繪奧德修斯卒之返到去伊法基島，見到雅典娜。

就喺呢個時候，王子鐵利馬庫斯由斯巴達坐船返到伊法基島。班追求者嘗試埋伏鐵利馬庫斯，但鐵利馬庫斯成功避開咗佢哋嘅埋伏。然後鐵利馬庫斯就撞返佢父王同雅典娜，兩父子重逢，而且兩人亦同意班追求者做咗咁多惡行，一定要重罰。兩父子於是就開始佢哋嘅計劃：鐵利馬庫斯首先返咗宮殿；然後奧德修斯繼續扮老乞衣去宮殿見潘妮洛普，到咗宮殿班追求者一見到老乞衣就個個都喺度大笑，當中安天努斯笑得最大聲。淡定嘅奧德修斯唔理佢哋上前同潘妮洛普講嘢，「老乞衣」話自己見過奧德修斯，仲話打探到奧德修斯最近嘅行蹤。潘妮洛普喺呢個時候已經意識到將會發生咩事。

期間，奧德修斯個奶媽尤麗卡莉亞幫「老乞衣」洗腳，留意到「老乞衣」腳上面嗰笪奧德修斯先有嘅疤痕，認得佢係邊個，不過雅典娜唔畀佢出聲。

第五部份

到咗第二日，喺雅典娜嘅建議下，潘妮洛普提出要舉行一場比賽畀佢選夫。

場比賽係要鬥射箭：潘妮洛普派人立起咗十二把斧頭，啲斧頭嘅頭中空；參加者要鬥用奧德修斯把神弓射箭；如果有個男人能夠用把弓令一支箭通過十二把斧頭嘅窿，嗰個人就算贏，可以娶潘妮洛普做老婆。奧德修斯自然係暗中參加比賽。班追求者冇一個贏得到—奧德修斯把神弓要好大力先至可以拉得郁，班追求者連把弓都拉唔郁，更加唔好講話要贏。而到咗最後，仲扮緊老乞衣嘅奧德修斯攞起把神弓，輕而易舉噉一拉，然後就令一支箭通過十二把斧頭嘅窿。贏咗。

奧德修斯一贏就除咗佢嘅偽裝。

「呀！係奧德修斯！」

喺下一刻，班追求者就得到應有嘅懲罰—佢哋連番騷擾潘妮洛普，搞到奧德修斯座宮殿烏煙瘴氣，仲嘗試謀殺貴為王子嘅鐵利馬庫斯。奧德修斯兩仔爺攞起劍、矛同弓，郁手殺晒在場嘅追求者。殺完之後，尤麗卡莉亞仲指證咗宮殿嘅十二個女僕，話佢哋背叛潘妮洛普又同班追求者做愛，而奧德修斯兩仔爺亦即場將佢哋處決咗。

到咗最後，奧德修斯上前見潘妮洛普。終於見返老公嘅潘妮洛普好高興，兩公婆攬埋一齊，然後就去咗睏覺。

呢幅畫描繪潘妮洛普班追求者受到懲罰。 呢幅畫描繪潘妮洛普班追求者受到懲罰。

首詩仲有些少下文：到咗第二日，奧德修斯走去探佢阿爸利亞提斯；行吓行吓，佢發現有一班伊法基島嘅島民跟蹤緊佢—原來呢班人係嚟尋仇嘅，想同奧德修斯殺咗嘅嗰班追求者報仇；話咁快雙方就開埋揙pin2，不過打打吓雅典娜同宙斯出面阻止咗佢哋。

就係噉，奧德修斯卒之返到屋企同屋企人團聚，而班追求者亦都得到應有嘅報應。大團圓結局。

影響

廿世紀初長篇小說《尤利西斯》嘅封面

睇埋：尤利西斯

《奧德修記》有龐大嘅文化影響力：呢首史詩係古希臘其中一件最出名最有影響力嘅文化產物，而古希臘嘅文化對成個西洋世界影響深遠。自從文藝復興後，西洋人嘅創作品成日都會由希臘神話度取材，而《奧德修記》自然多次噉畀人改編做歌劇同電影等媒體嘅作品；仲有唔少作品唔係講《奧德修記》嘅故仔，但就攞咗《奧德修記》當中嘅一啲橋段嚟用。例如：

• 《尤利西斯》：愛爾蘭作家詹姆斯·喬伊斯嘅長篇小說；本小說好多部份都對應《奧德修記》當中嘅某啲角色或者情節。
• 《2001 太空漫遊》：1968 年科幻片，取材自《奧德修記》，講主角喺太空漂流。
• 《超級瑪利奧奧德修記》：2017 年嘅任天堂平台遊戲，屬《瑪利奧系列》；隻遊戲個名已經有提到《奧德修記》，而且個故仔同首史詩有唔少相似之處—隻遊戲個故仔講到
  • 馬利奧一度畀龍王打低（啲人一度以為奧德修斯死咗），
  • 同馬利奧相愛嘅碧姬公主畀龍王迫婚（好似潘妮洛普畀追求者騷擾噉），
  • 馬利奧滯留喺離屋企好遠嘅地方，坐住架飛船途經無數咁多個王國，遇上各種危險，最後打低龍王得以同碧姬公主團聚—《奧德修記》段情節都係講男主角喺遠離家鄉嘅地方漂流，坐船去勻好多地方，克服重重危難，最後同女主角團聚並且返到屋企。

等等。

順帶一提，喺廿一世紀英文裏面，odyssey 呢隻字可以係指《奧德修記》呢件作品，而且又可以攞嚟做漫長又艱辛嘅旅程嘅同義詞，可以有好似以下噉嘅字句：

This	book	details	his	odyssey	from	poverty	to	affluence
名詞短語		動詞	名詞短語		介詞	名詞	介詞	名詞
呢（本）	書	詳細噉講	佢（男性）嘅	odyssey	由	貧窮	去到	富裕

—成段嘢嘅意思係「呢本書詳細噉講佢由貧窮至富裕嘅漫長旅程」。呢一點反映咗《奧德修記》喺英文圈以至成個西洋世界係幾咁深入民心。

睇下

• 希臘神話
• 奇幻故仔
• 英雄旅程
• 遠行與回歸情節
• 《格列佛遊記》

詞彙

古希臘文：

現代英文：

外拎

• 希臘神話故事- #15 奧德修斯迷航記 （香港繁體），RTHK Podcast
• 荷馬史詩，奧德修記 （英文），不列顛百科全書
• 文學 / 奧德修記 （英文），電視橋段網呢頁講《奧德修記》用咗邊啲橋段。
• 18 齣最好嘅希臘神話電影 （英文），當中有提到幾套講《奧德修記》嘅電影。
• 經典總結晒：奧德修記 （英文），YouTube