舊體詩

舊體詩（粵拼：gau6 tai2 si1），中國以外又叫漢詩，係用傳統格律創作嘅中文詩，同近代興起嘅新詩相對。舊體詩講求平仄對仗公整。除咗中國，漢字文化圈各地古時都有唔少舊體詩嘅文學創作。

重要概念

平仄

内文：平仄

平仄呢個諗頭據講係源於南齊（479 - 502 年）嘅。當時啲學者喺度研究語言嘅聲調，指出中古漢語分平、上、去、入四聲，當中平聲出現頻率明顯高啲，所以啲人就將上去入三種聲調統稱做仄聲；平聲顧名思義係指「平直和諧」嘅聲調，而仄聲就「有高低變化」。

傳統上都認為，一首詩歌要聽落順耳，一定要喺聲調上跟從某啲規律先得：例如平聲被認為係和諧嘅，但如一句句子入邊一律都係平聲，句嘢聽落就會「疲軟」；而仄聲就被認為係唔和諧，如果一句句子裡邊太多仄聲，聽落就會好似「咬牙切齒」噉；傳統上，一首舊體詩每一句嘅平仄比例都要相約，五言詩一句五隻漢字，要三平二仄或者二平三仄；舉例說明，而家用廿一世紀初嘅粵語嚟讀出杜甫《春望》頭嗰兩句—

國(仄) 破(仄) 山(平) 河(平) 在(仄)
城(平) 春(平) 草(仄) 木(仄) 深(平)

押韻

内文：押韻

無論古今中外，詩歌不溜都出晒名重視押韻。近代粵詩嘅例子：

廖恩燾（清末）《劉阮入天台》
行條山路做姑爺，點仲溪窿仲好花faa1。
碰到兩單都靚嘢，食完個碗係胡麻maa4。
有緣酒既陪人飲，冇話鋪唔共佢孖maa1。
番過見啱孫七代，打開族譜不妨查caa4。

睇埋

• 唐詩
• 粵詩