粵語流行曲史

出自維基百科,自由嘅百科全書
Jump to navigation Jump to search

粵語流行曲並無一個確實起源,都係由好多人一路喺唔同方向試吓試吓咁演變出嚟,多數認為係五十年代開始。最初廣東歌根本就無人聽,所以唔講得上流行,後來喺電影電視都會用廣東歌做主題曲,一路到七、八十年代開始成熟,而且成為音樂市場主流,但係踏入21世紀廣東歌慢慢式微,聽廣東歌嘅人越嚟越少。

華語流行曲最初都係得國語歌,好似三十年代紅到爆嘅周璇李香蘭白光等等無人唔識。到五六十年代,又興起英文歌,好似貓王法籣仙納杜拉成為流行曲主流,根本就無人聽廣東歌。

粵曲文化[編輯]

廣東歌最初都係以粵曲開始,由1930年開始就有好多人作歌,外省人叫呢啲歌做廣東音樂,不過廣東人就唔叫呢啲做廣東音樂,而叫做「小曲」,呢啲小曲都係喺啲粵曲入面抽一細段出嚟改篇,所以粵劇粵曲界對呢類「小曲」唔會當係正宗。到四五十年代,開始有人將「小曲」放入粵劇粵曲入面,但始終只係用嚟點綴,唔會當堅嘢。但亦令「小曲」開始有人識,於是又有啲人將啲英文歌變成小曲,好似披頭四嘅Can't buy my love、I saw her standing there,又有將粵曲改編,好似《帝女花》入面嘅《妝台秋思》,畀鄭君綿改編咗做《買面包》(即係「落街無錢買面包,靠賒我又怕被人鬧.....」),好多歌都畀人變咗做「廣東小曲」。

五十年代初,開始有正式廣東歌出現,不過都只係「電影插曲」,之後又出現「跳舞粵曲」,但呢啲所謂廣東歌,其實都係用粵曲嘅方法唱,其實都係屬於「廣東小曲」,而且全部都係改篇粵曲、國語歌或者英文歌而嚟,唱嘅人都幾乎係粵曲界嘅人,好似芳艷芬周聰呂紅鄭君綿何大傻廖志偉咁。

60年代[編輯]

由50年代到60年代,廣東歌都係以「小曲」主流,即係用粵曲方式唱嘅流行曲,不過廣東歌唱片市場係喺而唔係香港。而呢啲廣東歌都幾乎係電影插曲,不過都有例外就係鄭君綿,佢可以出一啲電影插曲之外嘅廣東歌而又有人買,不過廣東歌始終以改編英文歌或者粵曲,幾乎無原創。另外新加坡歌手上官流雲披頭四Can't buy my love、I saw her standing分別改編做《行快啲啦》同《一心想玉人》亦大受歡迎,不過啲披頭四迷就頂佢唔順。當時呢啲廣東歌特式係歌詞好粗俗。

雖然廣東歌以粵曲味為主,不過亦有人希望廣東歌擺脫粵曲味,其中以周聰喺以方面貢獻最多,當時佢慫恿商台廣播劇用廣東歌做主題曲,呢批廣東歌風格都以「摩登」為主,完全無粵曲味,而且重好受歡迎,代表作有《勁草嬌花》、《痴情淚》、《曲終殘夜》等,但唱片公司始終對廣東歌無信心,所以呢啲廣播劇主題曲都無出過碟。

另一個例外係電影《一水隔天涯》同名主題曲《一水隔天涯》用咗國語歌唱法唱廣東歌亦大受歡迎,呢隻歌亦成為廣東歌經典,原唱韋秀蘭,之後畀好多人翻唱過,好似崔妙芝、森森鄧麗君

60年代興起歌舞片,歌舞片要唱歌跳舞,亦因為咁而多咗好多廣東歌,其中最紅係陳寶珠蕭芳芳,佢哋都唱咗好多電影插曲,蕭芳芳唱得比較西洋味,而陳寶珠就唱得有粵曲味,啲人反而係鍾意陳寶珠嘅粵曲味廣東歌多過蕭芳芳嘅西洋味廣東歌,同而家啲人覺得粵曲味老土啱啱相反,不過都有例外,就係蕭芳芳唱改編英文歌 Shakin' All Over 嘅《郁親手就聽打》以壓倒性銷量贏咗陳寶珠,不過當年最紅都係佢兩個鬥來鬥去,唔係你就係佢。

70年代[編輯]

70年代初仍然係以英文歌為主,當時香港嘅歌星或者樂隊都係唱英文歌,好似許冠傑首 time of the season,陳美齡首 Circle Game都喺當時好受歡迎,重有啲台灣歌星唱嘅國語歌,好似姚蘇蓉鄧麗君青山尤雅,都係香港樂壇主流。但同時喺馬來西亞嚟咗個唱廣東歌嘅鄭錦昌,出咗首《蟬院鐘聲》,受歡迎程度同陳美齡首 Circle Game 差唔多,以當時計真係算勁。之後因為李小龍電影《唐山大兄》大賣又唱咗首《唐山大兄》,鄭錦昌嘅歌即時紅到爆燈,但廣東歌畀人印象始終係粗俗,唔值得欣賞,玩玩吓就得。

之後新加坡歌手麗沙又嚟香港發展,唱咗首廣東歌《相思淚》又紅到爆燈。不過當時廣東歌有一個現象,就係紅歌唔紅人,有一隻歌叫《分飛燕》紅到爆,但就無人噏得出邊個唱,而翻唱過嘅人又好多,但無一個有人識。

廣東歌紅歌唔紅人,呢種現象一直到許冠傑出現就開始唔同,60年代後期,許冠傑喺 TVB 主持一個音樂節目叫《Star Show》,而許冠傑亦因為個節目受歡迎而紅,但嗰陣許冠傑都係一直唱開英文歌。後來佢主持《雙星報喜》,有日佢無啦啦唱咗隻廣東歌叫《鐵塔凌雲》,由於隻歌反應唔錯,於是佢又創作多幾隻廣東歌,由於佢已經係好受歡迎嘅大明星,加上又係大學生,所以真係唔得了,佢唱廣東歌立即令廣東歌形象提升,改變咗原本廣東歌畀人覺得粗俗嘅印象,結果令好多睇唔起廣東歌嘅人都開始鍾意聽廣東歌。

除咗許冠傑,另一個突破係顧嘉輝,一路以來廣東歌都係粗俗,制作粗糙,只係用嚟搞笑,唔會有人欣賞,而且全部都係改編英文歌或者粵曲,不過顧嘉輝幫 TVB 創作電視劇主題曲,幾乎都係原創,出咗隻《啼笑姻緣》,由仙杜拉唱,開始咗廣東歌以嚴謹同認真方式制作,《啼笑姻緣》亦爆紅。

許冠傑同顧嘉輝提升咗廣東歌形象,令好多原本抗拒唱廣東歌,只肯唱英文歌嘅歌星,都開始改唱廣東歌,例如關正傑林子祥羅文甄妮譚詠麟等等,都由原本唱開英文歌,改晒唱廣東歌做主力,而且重紅到爆燈。

1977年黃霑發起成立作曲家及作詞家協會。1979年香港電台舉辦咗第一屆十大中文金曲選舉,亦係對粵語流行曲嘅肯定。

80年代[編輯]

廣東歌形象提升咗之後,好多填詞人都開始寫一啲嚴肅同比較藝術性嘅歌,唔再只係得啲搞笑嘢,其中幾個代表人物有黃霑鄭國江盧國沾黎彼得

台灣民歌熱[編輯]

70年代尾喺台灣興起一股民歌熱,好多後生仔以自己作歌去表達自己諗法,呢個風吹到嚟香港,興咗兩年。

偶像熱[編輯]

廣東歌成為香港樂壇主流,歌星亦開始要求包裝,於是出現好多偶像歌星,幾個代表人物有譚詠麟張國榮梅艷芳,都以形象同包裝突圍,紅到爆燈。呢個時期亦係香港樂壇嘅全盛時期,中國大陸同埋台灣嘅人就算唔識廣東話,亦會聽廣東話歌,甚至識唱。其他歌星好似林子祥羅文甄妮徐小鳳陳百強鍾鎮濤都唱到幾乎所有中文地區度度有歌迷。

第二次樂隊熱[編輯]

內文: 香港樂隊熱潮

1986到89年期間興起一股樂隊熱,唱片公司簽咗好多樂隊出碟,呢個時期亦出好多新人,幾乎每兩日半就有一隻新碟出,不過最後留低都唔多。樂隊之中代表有 Beyond太極達明一派,另外好多歌星好似有葉蒨文彭羚林憶蓮關淑怡陳慧嫻。呢個時期粵語流行曲無論喺作曲作詞同唱歌方面,都多咗好多新血,例如林振強林夕陳少琪小美等等。

紅館演唱會[編輯]

1983年開始,香港歌星興起去紅館開演唱會,1989年譚詠麟創一口氣連續開38場演唱會記錄。不過同時亦有好多當紅歌星宣佈退休,好似張國榮梅艷芳陳慧嫻,不過好多後來都復出。

1990年代[編輯]

「四大天王」時期[編輯]

1992年香港傳媒封張學友劉德華黎明郭富城為「四大天王」。四個人響男歌手嚟講可以話玩晒粵語歌壇,個個都能夠打入台灣同大陸市場。好似張學友咁,一首「吻別」就贏晒國語歌曲好多大獎。

但呢個時候歌手開始青黃不接。尤其係「四大天王」刺激咗偶像文化嘅興起。歌手唔需要歌藝就可以出碟做歌手,特別當2000年四大天王影響力開始減退嗰陣,情況重越演越烈。例如1999年出道嘅陳冠希,就係一個例子。

其他主要歌手有李克勤許志安蘇永康鄭伊健等等。

「K歌」文化[編輯]

「K歌」意思係指專門為卡拉OK而設嘅歌曲。早響九十年代卡拉OK喺香港流行嗰陣,已經開始有歌曲專登留喺卡拉OK播放,好似張學友、劉德華啲歌,好多都係咁樣。

不過由於歌藝唔係人人都識,為咗方便啲人唱卡拉OK,唱片公司開始專登降低歌曲嘅水準,去迎合卡拉OK迷嘅喜好。正因為咁,廣東歌嘅水準就每況愈下。歌曲質素差,趕走咗唔少真正嘅樂迷,而反映唱片銷路嘅IFPI指數,亦都年年一直下滑,到今日都冇反彈。黃霑就寫咗一篇博士論文,就指出咗卡拉OK文化,係粵語流行曲衰落嘅七大要素之一。

2000年代[編輯]

自2000年起,香港樂壇已經係清一色偶像派嘅天下,楊千嬅、陳冠希、Twins之類嘅偶像派大行其道,唔但只出碟重拍廣告、拍電影搵銀。不過整體上對比之前一代歌手,佢哋嘅影響力都只限於香港。以楊千嬅為例,2002年響台灣推出嘅大碟就出現災難性嘅滯銷。而緊隨其後出道嘅歌手,佢哋嘅歌曲甚至連香港都反應慘淡,例如Boy'z

多數評論都認為,香港歌曲已經冇咗以前嘅優勢。黃霑嘅博士論文就指出,唱片只定位喺青少年,係粵語流行曲發展史一大敗筆,因為咁使到廿五歲以上嘅人都唔再聽廣東歌。而此同時大陸同台灣都開始有自己嘅樂壇,而且重反攻香港,每年IFPI銷量排行榜更年年以周杰倫為榜首。著名樂壇經紀人黃柏高慨嘆,而家咁嘅形勢,香港新一代歌手經已好難出頭。

2004年起,香港樂壇有所起色。行出低潮嘅實力派男歌手陳奕迅推出咗唱片《U87》,成為咗粵語流行曲發展史嘅一大高潮,四首主打歌《夕陽無限好》、《阿牛》、《浮誇》及《葡萄成熟時》都攞到香港各大傳媒流行榜週冠軍。陳奕迅憑《U87》喺2005年橫掃香港樂壇,呢張專輯成為2005年香港最高銷售量嘅粵語非精選專輯,攞咗包含《叱咤樂壇流行榜頒獎典禮》嘅「叱咤樂壇男歌手金獎」及「叱咤樂壇我最喜愛的男歌手」等六項大獎。更係香港四大電子傳媒音樂頒獎典禮中,攞咗「四台聯頒音樂大獎-傳媒大獎」。而《U87》更被《時代周刊亞洲版》評選為「2005年最值得購買的五大亞洲唱片」,認為陳奕迅帶領咗香港嘅音樂潮流。2000年代後期陳奕迅繼續統治香港樂壇,多首名曲好似《富士山下》、《最佳損友》、《七百年後》、《沙龍》等都成為經典。佢重跳出香港。2010年5月,陳奕迅舉行咗個人首次歐洲巡迴演唱會,5月間分別係英國倫敦皇家阿爾伯特音樂廳、曼徹斯特阿波羅劇院同荷蘭鹿特丹阿侯伊體育館舉行。倫敦同埋曼徹斯特站嘅演唱會門票都係開售幾個鐘就賣嗮。陳奕迅係繼已故歌手羅文後,第二位進駐皇家阿爾伯特音樂廳嘅香港歌手。

2000年代其他主要歌手重有實力派男歌手古巨基李克勤,古巨基憑《愛與誠》、《愛得太遲》等名曲成為香港樂壇唯一一個可以同陳奕迅鬥嘅歌手,呢個現象嗚2004年至2008年個陣最明顯。李克勤就憑同譚詠麟合作嘅左麟右李喺香港樂壇起死回生,更牽起左麟右李嘅狂熱,同陳奕迅、古巨基、著名唱作人張敬軒等人鼎立,四人更曾被封為新四大天王。

女歌手方面就有容祖兒陳慧琳何韻詩梁詠琪謝安琪等等。容祖兒更曾被封為天后。

其他主要歌手重有許志安梁漢文鄭中基麥浚龍黃耀明方大同薛凱琪王菀之吳雨霏側田衛蘭Mr.RubberBand等等。

2010年代[編輯]

2010年代初,好多位上個年代嘅歌手都開始走出香港,被封為歌神嘅陳奕迅開始走向世界。2010年,《DUO 陳奕迅2011演唱會》台北及高雄站同時開賣,門票三個鐘就賣嗮;由於反應過於熱烈,主辦單位宣布台北站再加場。另外,陳奕迅成為首位企上高雄巨蛋嘅香港歌手。2012年,陳奕迅成為首位企上O2 Arena嘅華人歌手。2015年,陳奕迅更第二次攞到台灣今曲獎國語金曲歌王,成為兩岸灸手可熱嘅歌手。古巨基李克勤等人都開始走向大陸,但三人仍然定時有出廣東歌,例如陳奕迅嘅《陀飛輪》、《重口味》、《任我行》同《無條件》、李克勤嘅《紙牌屋》同《無朋友》、古巨基嘅《地球很危險》、《情歌王》、《告別我的戀人們》、《戀無可戀》等等。其他活躍樂壇嘅中生代歌手或樂隊重有張敬軒許志安蘇永康麥浚龍容祖兒謝安琪Mr.等,佢哋嘅《青春常駐》、《找對的人》、《流淚行勝利道》、《那誰》、《羅生門》、《如果我是陳奕迅》等歌曲都成為名曲。

但反觀香港本地,香港樂壇再次進入低潮,其中2011年林峯憑零民意嘅《Chok》攞到TVB《十大勁歌金曲頒獎典禮》嘅「金曲金獎」更令好多人認為香港樂壇已死,呢個現象喺2011年至2012年個陣最明顯。

2014年開始,香港樂壇開始有好多新人靜靜掘起,例如林奕匡周柏豪吳業坤許廷鏗胡鴻鈞洪卓立陳柏宇鄭俊弘馮允謙鄧紫棋連詩雅王灝兒吳若希泳兒等等,更有多個組合及樂隊,包括Supper MomentC All StarDear Jane等等,都以唱作方式呈現人前。其中鄧紫棋參加完大陸歌唱節目我是歌手之後喺大陸爆紅,而林奕匡嘅《高山地谷》、《安徒生的錯》、《有人共鳴》同《一雙手》、周柏豪嘅《我的宣言》、吳業坤嘅《原來他不夠愛我》、《陽光點的歌》同《百姓》、許廷鏗嘅《螞蟻》同《青春頌》、胡鴻鈞翻唱何韻詩嘅《化蝶》、鄭俊弘嘅《投降吧》、吳若希嘅《越難越愛》、連詩雅嘅《只要和你在一起》、王灝兒嘅《矛盾一生》、Supper Moment嘅《小伙子》、《無盡》同《幸福之歌》、C All Star嘅《天梯》、Dear Jane嘅《不許你注定一人》等都係香港膾炙人口嘅名曲,佢哋都被視為香港樂壇嘅明日之星。

參考[編輯]

[編輯]