朱凱廸

朱凱迪（Eddie Chu Hoi-dick，1977年 9月29號—），人稱阿朱、「廸廸」、「廸仔」、「朱隊友」、「自決派教父」，係第六屆香港立法會議員，香港本土行動成員同土地正義聯盟執委，活躍社會運動，喺2006年參加過反清拆中環天星碼頭嘅示威，2007年又爭取保留皇后碼頭。佢亦係菜園村關注組成員，參加反高鐵運動。

底細

朱凱廸喺香港中文大學英文系畢業，畢業之後喺《明報》國際版做編緝，2004年唔做，自己畀錢去咗伊朗讀書，學波斯話^[1]。希望有一日去報導阿富汗戰爭。喺伊朗、阿富汗、巴基斯坦留咗三四年之後，返到香港^[2]。

2016年，朱凱廸參選第6屆香港立法會選舉嘅新界西直選，以84121票高票當選，成為當屆立會直選票王，當時啲人形容佢嘅當選係「輸喺起跑線，贏喺終點線」^[3]^[4]。當選之後，佢同佢屋企人收到死亡恐嚇，搞到佢哋唔敢返屋企，重要搵差人提供人身保護，懷疑係喺鄉郊土地發展議題上得罪某啲勢力而畀人報復。

2020年9月尾，因為抗議政府剝奪公民黨多名議員資格，佢同其他民主派議員先後劈炮唔撈，唔再延任立法會議員，2021年1月6號，佢因為參加2020年立會泛民初選而犯咗香港國家安全法被捕，2月尾還柙到而家。