浪漫芭蕾舞
浪漫芭蕾舞（粵拼：long6 maan6 baa1 leoi4 mou5；英文：romantic ballet）係 19 世紀早期（浪漫時期）嘅法國起源嘅一套芭蕾舞，到咗今日都仲有發展緊。喺技巧上，呢個時期嘅芭蕾舞最大嘅特徵係開始咗使用腳尖企（en pointe），腳尖企指個舞蹈員腳踭離地，淨係用腳尖支撐全身，腳尖企主要係女舞蹈員做嘅，用意係造出輕盈嘅美感。腳尖企嘅出現大大噉影響咗浪漫芭蕾舞嘅發展：腳尖企引起人注意女舞蹈員嘅輕盈性，所以浪漫芭蕾舞好多時以女舞蹈員做主導，會加埋長嘅芭蕾舞裙，突顯舞蹈員柔軟同柔弱嘅氣質。同時，當時嘅科技演進發明咗煤氣燈，能夠用呢種燈比較柔軟嘅光造出一種神秘感。總體上，呢啲發展令浪漫芭蕾舞同古典芭蕾舞風格上有差異－浪漫芭蕾舞零舍陰柔、輕盈、同具有神秘氣氛[1][2]。
除此，浪漫芭蕾舞受到當代盛行嘅浪漫主義（Romanticism）影響，鍾意用帶強烈情感嘅主題做佢嘅美學基礎，啲故仔好多時都圍繞住女性靈異生物點整蠱人類嘅男人[2]。例如係成日俾人攞嚟代表浪漫芭蕾舞嘅《芝莎》（Giselle）噉，就有一幕係男主角意外害死咗女主角之後，俾一班生前俾男人呃過嘅女鬼纏繞[3]。
劇目
[編輯]一般嚟講都認為，1832 年演嘅《風仙女》（La Sylphide）係史上第一齣浪漫芭蕾舞劇，而 1870 年嘅《歌碧麗亞》（Coppélia）就係最後一齣[4]，當中《芝莎》可以話係浪漫芭蕾舞當中最出名嘅劇目：
芝莎
[編輯]《芝莎》（Giselle）係由 19 世紀法國大作曲家亞道夫亞當（Adolphe Adam）所作曲嘅一齣芭蕾舞劇[3][5]。
芝莎故仔大概係噉嘅：第一幕講天真嘅村婦芝莎愛上男主角萊斯（Loys）；萊斯查實係個貴族，真名叫艾伯列特（Albrecht），為咗避開佢未婚妻而假扮農民嚟到山旮旯嘅農村暫住；及後艾伯列特屋企人嚟到農村扚佢返去結婚，而芝莎亦都知道咗真相，冇幾耐芝莎仲死咗（死因視版本而定，多數版本話芝莎天生體質弱，因為受唔住打擊心臟病發）；第二幕講芝莎死咗化成幽靈，並且喺森林撞到一班棄婦嘅幽靈，呢班女鬼生前俾男人呃過，家陣死咗就靠喺森林殺死後生男人嚟出氣；有一日，艾伯列特為咗掃芝莎嘅墓走入去森林，班女鬼想對艾伯列特落手，但芝莎出於愛而出手阻止佢哋，仲救返艾伯列特。對好多評論家嚟講，芝莎嘅女鬼主題係最令人印象深刻嘅：喺所有版本嘅芝莎當中，都會有一個舞段係由扮演艾伯列特嘅男舞蹈員用跳舞表達恐懼等嘅情緒，同時會有班打扮成幽靈嘅女舞蹈員圍住佢跳舞，表達艾伯列特俾女鬼纏繞嘅情節，而芝莎嘅宣傳海報封面多數會係作幽靈打扮嘅女舞蹈員[4][6]。
芝莎喺好多方面都係典型嘅浪漫芭蕾舞劇：成套劇以一個柔弱嘅女性角色（芝莎）做中心、編舞上重視輕盈性（飾演幽靈嘅女舞蹈員基本上實會想要有輕盈感，所以多數會勁用腳尖企）、而且主題涉及女性靈異生物（女鬼）[4]。
睇埋
[編輯]攷
[編輯]- ↑ Romantic Ballet. Victoria and Albert Museum.
- ↑ 2.0 2.1 Garafola, L. (1997). Rethinking the Sylph: New Perspectives on the Romantic Ballet. Wesleyan University Press.
- ↑ 3.0 3.1 Ashton, Geoffrey (1985), Giselle, Woodbury, New York: Barron's.
- ↑ 4.0 4.1 4.2 Homans, Jennifer (2010). Apollo's Angels: A History of Ballet. New York: Random House. pp. 1–4.
- ↑ Beaumont, Cyril W (1996), The Ballet Called Giselle, London: Dance Books.
- ↑ The Ballerina’s Legacy of GISELLE. En Pointe with Houston Ballet.
