哈利波特裡面嘅魔法物品

喺《哈利波特》系列小說裡面，啲人所用各式各樣嘅魔法物品。

魔法物品

水晶球

水晶球Crystal ball係一種占卜用嘅嘢，西碧·崔老妮教授喺哈利三年級嗰陣嘅占卜學課程上面都有用到水晶球嚟教學，不過哈利同榮恩等等啲學生淨係喺裡面見到一團團白色嘅漩渦。崔老妮教授亦都喺霍格華茲大戰入面用水晶球嚟對抗食死人，狼人首領焚銳·灰背就係俾佢用水晶球打低咗。

熄燈器

熄燈器

熄燈器Deluminator係阿不思·鄧不利多發明嘅魔法裝置。呢樣嘢嘅外型類似打火機，用嚟熄咗或者收集嚟自附近街道上面任何光源嘅光（仲可以回復），為佢嘅使用者提供掩護，嚟防止麻瓜睇見佢哋。

死神的聖物

内文：死神聖物

死神的聖物Deathly Hallows係一組三件嘅魔法聖物，分別包括咗傳說無敵嘅接骨木魔杖Elder Wand、可以令人重生嘅重生石Resurrection Stone，同埋令著咗佢嘅人變得隱形嘅隱形斗篷Invisibility Cloak，呢三樣嘢唔會好似一般嘅魔法用品咁樣隨住時間流逝而無咗效用。

仇敵鏡

仇敵鏡Foe-glass係無論喺焦點內定外都可以檢測仲顯示佢擁有者敵人嘅一塊鏡，具體取決於佢哋嘅距離。

分靈體

内文：分靈體

分靈體Horcruxes係一種用嚟儲存某個人部分靈魂嘅載體，保護佢唔洗真正咁死（類似於其他奇幻作品入面嘅護命匣嘅功能）。如果分靈體擁有人嘅肉身被毀，咁佢用嚟做分靈體嘅嗰部分靈魂依然會存在喺呢個世上，唔會過渡去到另一個世界，而係會用一種能夠被另一個巫師復活嘅非物質形式嚟存在；如果巫師或者女巫嘅分靈體全數被摧毀，咁佢嘅靈魂喺物質世界入面嘅唯一支柱就係佢嘅肉身，由於無咗分靈體，所以破壞佢嘅肉身就會搞到佢最後真正咁死。創造分靈體被認為係所有魔法之中最黑暗邪惡嘅一種，亦都極之殘酷。

咆哮信

榮恩·衛斯理曾經收到嘅咆哮信。

咆哮信Howler係一種猩紅色嘅信，通常用嚟將發信人嘅唔開心或者嬲怒直接傳達俾收信人。當封信被打開嗰陣，信入面嘅內容就會對住收信人公開咁大聲咆哮讀出嚟，而發信人把聲仲會被魔法放大到震耳欲聾嘅音量嚟表達佢極之嬲嘅訊息。當咆哮信將訊息內容吼叫完晒之後，佢就會將自己撕碎，最後透過燃燒嚟自動毀滅。若咆哮信無被打開或者延遲被打開，佢就會咆吼得仲大聲同猛烈咁爆炸，而且仲會比正常情況更大嘅聲量去將訊息嗌出嚟。

咆哮信喺電影版本入面會用摺紙嘅方式嚟將嘴唇同啲牙折疊出嚟，然後大聲咁將訊息讀出嚟，最後就會自動撕成碎片再燒成灰燼。

穆敵嘅魔眼

穆敵嘅魔眼Moody's Mad-Eye係阿拉特·穆敵當年喺第一次巫師世界大戰嗰陣同食死人戰鬥嗰時無咗佢嘅左眼，於是佢就喺空眼窩嗰度利用施咗魔法嘅玻璃眼球嚟取而代之，自此之後佢就有「瘋眼穆敵Mad-Eye Moody」呢個綽號。呢枚魔眼上面有好多神奇嘅結界，賦予佢有睇穿牆同埋其他固體物件嘅能力，尤其係隱形斗篷。嗰隻魔眼可以360°咁轉，甚至亦可以睇穿穆敵自己嘅後尾枕，仲可以喺頭度將佢完全掹出嚟。

全效望遠鏡

全效望遠鏡Omnioculars係哈利三人組喺第四輯小說嘅魁地奇世界盃嗰陣所用嘅一對魔法黃銅雙筒望遠鏡。嗰個雙筒望遠鏡除咗有雙筒望遠鏡嘅放大功能之外，仲有好多其他有用嘅功能。雖然佢嘅副作用係鏡頭入面嘅視圖唔係即時嘅，而且仲可能會搞到對比狀態嘅混淆，但佢有能力放慢或者重播透過鏡頭睇到嘅嘢。全效望遠鏡仲有逐格播放嘅功能，當中魁地奇球員嘅名會用亮紫色字母顯示出嚟。佢仲可以列出球員嘅姓名同號碼，亦可以好快咁快將球員歸零。

儲思盆

儲思盆

儲思盆Pensieve係一個用嚟回顧記憶嘅石盆，呢樣嘢設喺霍格華茲裡面嘅鄧不利多嘅校長辦公室同埋石內卜嘅教授辦公室。儲思盆嘅上面覆蓋咗雕刻嘅神秘符文，入面包含住物理形式既唔係氣體又唔係液體嘅記憶。巫師或者女巫可以提取自己或人哋嘅記憶，將嗰啲記憶儲存喺儲思盆度嚟等第日翻睇，尤其係當大量訊息充斥住大腦而變得混亂嗰時，儲思盆仲可以緩解思緒嘅壓力。任何人都可以透過儲思盆嚟睇返人哋嘅記憶，而湯姆·瑞斗嘅日記亦都可能有類似嘅裝置。呢個亦都可以令查閱嘅人完全沉浸喺已經儲存咗嘅記憶入面，呢個就好似現實裡面虛擬實境嘅魔法形式。

呢個裝置嘅使用者會喺第三者嘅角度嚟睇返啲記憶，有啲似睇緊電影咁樣提供對所保存事件近乎全知嘅視角。入去儲思盆裡面嘅人一定要跟住事件嘅主角（提供記憶嘅人），而入到去儲思盆裡面嘅人可以睇到主角已經唔記得咗，或者係唔留意嘅嘢。J·K·羅琳證實咗即使係過去事件發生嗰陣時啲人並無注意到或者係記起嗰啲嘢，儲思盆入面嘅記憶可以俾啲人睇返件事發生嘅細節，仲話：「呢個就係儲思盆嘅魔力，可以令事物活過嚟」。儲思盆裡面所包含嘅記憶有銀色線嘅外觀。儲思盆嘅記憶會因為年齡漸長而退化，或者會被大量操縱又或篡改嚟改變視角（例如史拉轟教授嘅咁樣），咁樣嘅話個記憶可能會睇落變得厚實同埋呈啫喱狀，仲提供咗模糊嘅視覺效果。

可以睇到記憶嘅並唔單止係人類巫師或者女巫，家庭小精靈哈佳亦都提供咗啲記憶俾鄧不利多。

誠實探測器

誠實探測器Probity Probe能夠探測隱藏法術同隱藏魔法物品嘅工具。呢種探測器喺《鳳凰會的密令》嘅魔法部入面第一次出現，佢係一支細細支嘅金色棒。呢個探測器喺佛地魔捲土重來之後被用嚟做古靈閣提高安全性嘅一部分，同埋用嚟掃描霍格華茲嘅學生去搵黑暗嘅物品。呢樣嘢最後一次出現喺《死神的聖物》入面，出現喺哈利、榮恩同妙麗去到古靈閣打劫貝拉·雷斯壯嘅金庫去搵佛地魔嘅其中一個分靈體。

羽毛筆

羽毛筆Quill係《哈利波特》嘅世界裡面用嚟寫字嘅工具。

以下係幾種唔同嘅羽毛筆：

• 自動作答羽毛筆Auto-Answer Quill：呢款係一種被施咗魔法嘅羽毛筆，當佢接觸到羊皮紙Parchment上面嘅問題嗰時，呢枝筆就會即刻寫低答案。普等巫測O.W.L.s唔准用呢支羽毛筆，仲喺每次考試開始嗰時都會檢查墨水。
• 防止出貓羽毛筆Anti-Cheating Quill：呢款係一種帶有防止出貓符咒嘅羽毛筆，最早出現喺《神秘嘅魔法石》入面。呢款羽毛筆喺第五輯小說入面被派俾參與普等試嘅每個考生，大概仲有嗰啲參與其他考試嘅人，用嚟為咗防止學生喺筆試裡面出貓。
• 鮮血羽毛筆Blood Quill：桃樂絲·恩不里居喺《鳳凰會的密令》裡面用嚟懲罰嗰啲被罰勞動服務學生所用嘅酷刑羽毛筆。呢支筆被形容做有一個異常鋒利黑色筆尖嘅羽毛筆。當用呢支筆嘅人寫字嗰陣時，佢會用魔法神奇而痛苦咁樣𠝹穿使用者嘅手背，仲會用佢哋嘅血嚟做墨水。哈利喺第五輯小說入面俾恩不里居罰咗幾次放學之後留堂，佢被要求寫低句子：「我唔可以講大話」，直到恩不里居相信「嗰個信息已經被牢牢咁記住」之前，佢唔會被放出嚟。如果呢個懲罰長時間反覆咁做嘅話，咁就會搞到有致永久性嘅疤痕，就好似哈利喺最後兩輯小說入面向盧夫·昆爵所展示嘅咁樣。每當哈利聽到恩不里居嘅名字嗰陣時，佢嗰個疤痕都會覺得刺痛，但唔清楚呢個係心理作用，定係就好似哈利額頭上面嘅傷疤喺佛地魔活躍時期嘅咁樣。呢種懲罰方式嘅另一個受害者係李·喬丹；喺呢輯小說嘅改編電影版入面，鄧不利多的軍隊成員亦都被迫去用呢啲羽毛筆。喺巫師世界裡面，擁有呢支鮮血羽毛筆會被認為係唔合法嘅事。
• 速記羽毛筆Quick Quotes Quill：呢支係一種速記工具，顏色係酸綠色。麗塔·史譏喺《火盃的考驗》入面利用呢支筆去將佢同訪談對象嘅對話用誇張失實嘅方式筆錄落嚟。佢喺裡面用呢枝筆嚟採訪哈利，仲喺《預言家日報》嘅專欄入面報導關於佢參與「三巫鬥法大賽」嘅事。雖然哈利不斷咁提醒佢要注意羽毛筆所寫嘅嘢唔準確，但係佢一直都唔理；另外，麗塔·史譏喺《死神的聖物》入面喺佢《預言家日報》裡面嘅採訪提到由佢所寫嘅鄧不利多身故後嘅傳記，佢嘅速記羽毛筆幫佢喺鄧不利多過身之後喇喇聲咁快就搞掂咗呢本書。
• 接納之筆Quill of Acceptance：根據《Pottermore》嘅講法，嗰個係一種可以檢測到有魔法能力嘅小朋友出世嘅啊一種魔法工具，呢樣嘢喺霍格華茲入面嘅一本大型名冊上面記錄住嗰啲細路嘅姓名。麥教授每年都會查閱呢本名冊，當嗰啲細路年滿11歲嗰時就會派貓頭鷹去寄霍格華茲錄取通知書出去。呢樣嘢亦都出現喺《Pottermore》封閉測試版嘅註冊用戶，令到呢樣嘢非常之受歡迎。
• 拼字校正筆Spell-Checking Quill：呢支筆可以喺使用者寫嘢嗰陣暫時糾正錯誤嘅拼寫，不過一旦魔法消失咗，就算使用者寫得啱個拼字出嚟，呢樣嘢都會不斷咁拼錯單字出嚟。最明顯嘅例子係呢樣嘢喺《混血王子的背叛》入面將榮恩個名拼錯咗做「Roonil Wazlib」。呢樣嘢喺弗雷同喬治·衛斯理嘅惡作劇舖頭—衛氏巫師法寶店都有得賣。

記憶球

位於華納兄弟工作室倫敦巡迴—哈利波特的製作特輯入面嘅記憶球。

記憶球Remerbrall係一個透明又細粒嘅玻璃球，大概係一粒大彈珠咁大。當呢粒玻璃球發現佢嘅使用者唔記得咗某啲嘢嗰時，玻璃球裡面嘅煙霧就會變成紅色。但係唔好彩嘅係，呢粒玻璃球話唔到俾使用者知道究竟佢自己唔記得咗啲乜嘢事。大頭蝦嘅奈威·隆巴頓喺《哈利波特：神秘的魔法石》入面收到一個由佢嫲嫲寄嚟嘅記憶球，但係奈威喺無幾耐之後都係將呢個玻璃球整唔見咗。記憶球係唔准喺普等試O.W.L.s期間去用。

現形擦

現形擦Revealer係一種鮮紅色嘅特殊擦膠，用喺唔使去用符咒嘅情況下，令到隱形墨水所寫嘅隱藏文字可以顯現到出嚟。呢樣嘢第一次出現喺《哈利波特：消失的密室》裡面，妙麗試吓令到湯姆·瑞斗嘅日記裡面隱藏嘅文字顯現出嚟。

秘密感應器

秘密感應器Secrecy Sensor係一種被形容做「一個睇落好似特別彎曲嘅金色電視天線」嘅黑魔法探測器，感應器當偵測到大話同隱瞞嘅事嗰時就會即時震動。

測奸器

測奸器Sneakoscope係充當黑魔法探測器。呢個裝置被形容做一個微型嘅玻璃陀螺，喺探測到存在呃人嘅情況下就會發出刺耳嘅噪音，例如，當附近出現唔值得信賴嘅人，又或者附近發生欺詐行為嗰時，呢樣嘢就會著燈旋轉仲會響聲。

魔法膠帶

魔法膠帶Spellotape係一種神奇嘅魔法膠紙。呢樣嘢嘅名嚟自喺英國受歡迎透明膠帶品牌通用商標嘅Sellotape。

• 榮恩喺《哈利波特：消失的密室》入面喺試吓阻止佢老豆衛斯理先生嘅飛行汽車逃走嗰陣整斷咗佢支魔杖，於是佢就利用魔法膠帶嚟修理佢支魔杖；
• 妙麗喺《哈利波特：阿茲卡班的逃犯》裡面用呢樣嘢嚟綁住佢嘅教科書《怪獸的怪獸書The Monster Book of Monsters》嚟防止被咬到；
• 家庭小精靈怪角用呢樣嘢嚟修補貝拉·雷斯壯張相；
• 金妮喺《哈利波特：火盃的考驗》入面用呢樣嘢嚟修補佢本教科書《一千種神奇藥草與蕈類One Thousand Magical Herbs and Fungi》。

劫盜地圖

劫盜地圖

劫盜地圖The Marauder's Map係雷木思·路平、彼得·佩迪魯、天狼星·布萊克同埋詹姆·波特喺霍格華茲讀書嗰時專門用嚟搞惡作劇而一齊製作出嚟嘅一張地圖。詹姆、天狼星同佩迪魯喺知道咗佢哋嘅好朋友雷木思嘅狼人身份外號係「月影」之後，佢哋三個就做咗化獸師，喺月圓之夜分別變身做雄鹿、大黑狗同埋老鼠外號「鹿角」、「獸足」同「蟲尾」，陪住變咗身做狼人嘅路平一齊四圍遊蕩，同埋進行夜間探險。呢個令到佢哋對霍格華茲嘅地下通道了解得更加多，佢哋將呢啲秘密通道畫咗仲整成地圖，又喺上面寫咗淨係得佢哋幾個先知道嘅外號。衛斯理孖仔弗雷同喬治讚佢哋話：「高尚嘅人啊，係咁唔怕攰咁做嘢，為嘅就係幫新一代破壞法規嘅人」。

驟眼睇落去，呢張地圖只不過係一張平平無奇嘅空白羊皮紙，但係當使用者用魔杖指住張地圖仲講出「我喺呢度鄭重發誓，我絕對不懷好意I solemnly swear that I am up to no good」嗰陣，霍格華茲嘅詳細地圖就會浮現出嚟；而當使用者用魔杖指住張地圖再講出「惡作劇完成Mischief managed」嗰陣，呢張地圖就會變返做羊皮紙原本嘅空白狀態嚟防止俾其他人睇到。

衛斯理孖仔喺《哈利波特：阿兹卡班的逃犯》裡面將呢張劫盜地圖送俾哈利·波特，咁樣佢就可以經秘密通道去到活米村，而呢張地圖係衛斯理孖仔喺飛鼠嘅辦公室嘅櫃桶裡面偷返嚟嘅，呢個可能係飛鼠喺沒收咗劫盜地圖之後並無搞清楚點樣去用，跟住就隨手將佢放咗喺擺急險物品嘅櫃桶入面。石內卜教授後嚟發現咗哈利嘅呢張地圖，就試吓去搵入面嘅秘密出嚟，點知就俾張地圖嘲笑同羞辱咗一次。當時黑魔法防禦術教授嘅路平（地圖嘅其中一個製作人）話佢會去查吓呢樣「黑魔法物品」就將地圖帶走咗，不過喺佢辭職唔做霍格華茲嘅教授之後就將呢份地圖還返俾哈利。劫盜地圖自從嗰時之後就成為咗哈利其中一樣最有用嘅魔法道具。

小巴堤·柯羅奇喺《哈利波特：火盃的考驗》裡面飲咗變身水扮成瘋眼穆敵之後曾經發現過劫盜地圖，仲知道咗佢嘅作用，用嚟幫佛地魔效力。但係亦都有人對呢樣嘢提出問題：既然劫盜地圖可以顯示到著咗隱形斗篷嘅哈利同埋假穆敵嘅全名；咁點解睇住個假穆敵喺霍格華茲周圍走嚟走去咁耐但係就從來都無疑問；點樣哈利察覺唔到真嘅穆敵喺個箱度長期唔郁；當然，亦都有人對呢樣解釋做故事裡面嘅箱俾人施咗某種魔法。哈利喺《哈利波特：死神的聖物》裡面喺度搵分靈體嘅途中一直都帶住呢份劫盜地圖，一嚟可以間接咁了解霍格華茲學校發生緊嘅事，仲有好重要嘅一點，就係佢可以喺地圖上面搵到金妮，呢個俾到哈利好大嘅安慰同鼓勵。最後，哈利佢哋幾個潛入霍格華茲去搵佛地魔嘅分靈體嗰陣時，亦都需要用到劫盜地圖。

變身水同埋隱形斗篷都呃唔到劫盜地圖，例如喺《哈利波特：阿茲卡班的逃犯》入面被認為已經死咗嘅彼得·佩迪魯，其實佢係變咗做老鼠走甩咗，同埋小巴堤·柯羅奇喺《哈利波特：火盃的考驗》飲咗變身水變成咗瘋眼穆敵都喺地圖上面顯示咗出嚟。但係有啲地方係劫盜地圖上面顯示唔到出嚟嘅，例如係萬應室同埋消失的密室。呢個或者係因為幾位製造者並唔知道有呢啲地方，又或者係因為呢啲地方喺地圖上面係唔可以標繪出嚟。

羅琳喺一次線上問題入面被問到「哈利會將劫盜地圖留畀佢嘅邊個細路」嗰陣，佢答：「我有一種感覺就係，佢無將地圖留俾任何一個仔女，但係哈利嘅大仔詹姆有一日會偷偷地喺佢爸爸張書枱裡面攞走咗張地圖。」

時光器

時光器

時光器Time-Turner可以用嚟做短短哋嘅時空穿梭。妙麗·格蘭傑喺《哈利波特：阿茲卡班的逃犯》裡面嘅學期開頭嗰陣就得到由麥教授借出嚟嘅時光器，等佢可以喺同一時間上晒所有佢想讀學科嘅堂（因為有啲學科會喺同一時間上堂）。妙麗奉命要對所有人保密，包括佢嘅老友哈利同埋榮恩，就算佢哋兩個確實留意到佢嘅日程安排唔可能到好有可疑，同埋有幾次奇怪嘅失蹤同後嚟重新出現返。喺小說嘅結尾，為咗去用時光器嚟拯救天狼星·布萊克同埋巴嘴，妙麗最後都俾哈利同榮恩知道呢個秘密。由於功課作業帶嚟咗沉重嘅壓力，妙麗喺小說結尾嗰時將時光器還返俾麥教授。不過喺電影版裡面，淨係得麥教授、鄧不利多校長同埋哈利知道佢有時光器，不過榮恩親眼睇住哈利同妙麗喺佢病房嘅床邊一而再咁穿越時空，後嚟喺套戲就嚟完嗰陣又再見到佢哋企埋喺一齊。

魔法部就好似《哈利波特：鳳凰會的密令》咁講保存咗大量嘅時光器；不過，喺小說所形容嘅事件入面，妙麗提到同食死人喺魔法部大戰嗰時，魔法部裡面嘅一個裝住時光器嘅玻璃櫃被打爛咗，入面嘅時光器全部都被跌爛晒。由於時光器係有影響時間嘅特性，所以嗰個玻璃櫃後嚟被見到反覆咁跌落嚟、粉碎同埋自我修復。

妙麗喺《哈利波特：混血王子的背叛》裡面引用咗《預言家日報》嘅一篇文章，嗰篇文章話「魔法部入面時光器嘅全部庫存」喺嗰次事件裡面被摧毀晒。嗰個系列嘅小說並無討論到除咗魔法部之外，仲有邊個可能有時光器嘅擁有權。時光器如果落咗入去錯嘅人手上係非常危險嘅事，因為據講好多巫師意外咁將未來嘅自己殺死嚟到步向死亡，所以魔法部係會非常之小心咁去派呢啲工具。

魔法部曾經有個職位唔講得嘅一個叫做艾蘿·敏塔布Eloise Mintumble嘅女巫，佢喺1402年因為利用時光器而被困咗５日，佢嘅身體返到嚟現實嗰陣時佢嘅年齡增加咗５個世紀，仲受到唔可以掹得返嘅傷害，最後喺聖蒙果醫院死咗。呢件事仲搞到至少有25個名佢喺過去曾經遇到嘅人佢哋嘅後代喺現世憑空咁消失咗，變成「從來未出世」。除此之外，由於以前嘅時間受到干擾，搞到敏塔布重新出現之後嘅嗰個星期二嘅時間過咗2.5日，而星期四就係短暫得４個鐘。魔法部從此就設立咗嚴格時空穿梭嘅限制。

妙麗嘅嗰個時光器類似於頸鍊上面嘅金色沙漏鍊墜；目前仲未清楚呢樣嘢係咪全部都係咁樣。使用者需要去扭郁個沙漏鍊墜，扭郁嘅次數係要對應返需要回程嘅時數。

魔杖

魔杖Wand係一種木棍咁樣嘅嘢，喺魔法世界裡面可以被用嚟做工具同武器。呢樣嘢係作為巫師同女巫運用法術（符咒同變形術等等）嗰陣所用嘅媒介，用嚟引導魔法力量仲從而增加佢嘅力量，根據奧利凡德嘅講法，如果嗰個巫師夠強大嘅話，任何物體都可以做引導魔法嘅媒介，魔杖只係因為佢嘅效率而成為最成日用嘅嘢（亦都因應擁有者同魔杖本身嘅聯繫）。巫師同女巫用魔杖嗰陣時需要同時間講咒語出嚟，所以呢個幾乎係所有魔法嘅一個重要方式，仲非常重視魔杖嘅掌握（有啲巫師同女巫亦可以喺洗唔講咒語之下就施咒，咁樣先會令佢哋有霎眼嘅先機）。如果唔係就淨係可以用到有限嘅魔法（魔法力量大打折扣），咁樣亦都可以解釋到一啲巫師點樣可以喺無魔杖嘅情況下用到法術。魔杖通常放喺巫師或女巫嘅長袍裡面或者隨身帶住；不過，呢樣嘢亦都可以放喺其他對象度。例如，魯霸·海格就將佢嗰支斷開兩截嘅魔杖收埋喺雨遮入面；魯休斯·馬份會將佢支魔杖收埋喺佢嘅士的裡面。

不同種類嘅魔杖

魔杖係由一個精通魔杖學嘅魔杖製造者去整嘅，例如小說同電影裡面唯一出現嘅魔杖舖兼魔杖製造商—斜角巷入面嘅奧利凡德魔杖店嘅老闆—加里克·奧利凡德Garrick Ollivander咁樣，佢對魔杖有遺覺記憶，仲識別到魔杖嘅顯著特性。奧利凡德喺《火盃的考驗》裡面評估咗兩支外地嘅魔杖：維克多·喀浪Viktor Krum嘅魔杖係由葛果羅威Gregorovitch去整嘅，杖芯嘅材料用咗龍嘅心弦，感覺異常咁厚實；而花兒·戴樂古嘅就由一位唔知咩名嘅魔杖製造者去創作，魔杖由玫瑰木帶有迷拉嘅杖芯嚟整。奧利凡德認為迷拉嘅毛髮整嘅魔杖會產生「喜怒無常」嘅特性，所以一般唔會去用。接骨木魔杖喺《哈利波特：死神的聖物》被形容做唯一一支杖芯由騎士墜鬼馬嘅尾羽毛嚟做嘅魔杖。

魔杖通常由嚟自優質木材或者係由可以維持到魔法嘅優質「魔杖木」手工整成，例如係冬青木、紫杉木、烏木、橡木、桃花心木、櫻桃木、同埋葡萄藤木等等。魔杖嘅杖芯Wand Cores會由上到下插入到魔杖中間，令到嗰支魔杖有產生神奇效果嘅魔力。常見嘅杖芯包括龍嘅心弦、獨角獸同埋鳳凰嘅尾羽毛，有啲亦會利用到迷拉嘅頭髮，但由於呢種物質唔穩定而唔太成日用。

魔杖通常被認為係屬於巫師同女巫非常之個人嘅物品。屬於其他巫師嘅魔杖可以被借嚟用，但係會搞到效用大打折扣，出現相對弱啲嘅效果。哈利喺《神秘嘅魔法石》裡面無得唔去試吓好多支唔同嘅魔杖先至搵到「揀中佢」嘅魔杖。哈利嘅魔杖材質係冬青木，而佛地魔嘅魔杖材質就係紫杉木；作者羅琳指出，冬青樹喺歐洲嘅傳統入面係象徵住驅除邪惡，而紫杉樹就象徵住死亡同埋重生。喺《火盃嘅考驗》入面，據講哈利同佛地魔兩個人各自嘅魔杖都包含住一條嚟自屬於鄧不利多嘅寵物鳳凰—佛客使嘅尾羽毛。由於無任何一隻鳳凰、龍同埋獨角獸係相同嘅，所以每支魔杖都係獨一無二。當同一杖芯來源嘅魔杖被迫互相決鬥嗰陣時就會出現好似哈利同佛地魔嘅魔杖咁樣嘅「符咒倒轉Priori Incantatem」效果。喺符咒倒轉嘅情況出現咗之後，嗰支魔杖就好似《死神嘅聖物》所講咁樣先至開始認識到同佢對立嘅主人。

當一個巫師喺巫師世界入面俾霍格華茲踢出校嗰陣時，佢哋嘅魔杖會被拗斷做兩半。呢種對魔杖嘅損害幾乎係無辦法修復，但係亦都有個別嘅例外：哈利能夠喺魔力最強大嘅接骨木魔杖嘅協助之下成功咁修復到佢被妙麗唔小心整斷咗嘅魔杖。

魔杖可以因為決鬥贏咗而成功喺對方巫師或者女巫手上繳械，嚟到令佢哋對勝出者臣服嚟改變魔杖嘅忠誠度。呢個就正如奧利凡德所解釋嘅咁樣，當哈利喺馬份莊園攞走咗跩哥嘅魔杖就係呢種情況，所以嗰支魔杖嘅忠誠轉投向哈利；而咁樣就可以推到去接骨木魔杖嘅忠誠亦都係咁樣經過多次易手。

霍格華茲其中一個創辦人嘅薩拉札·史萊哲林Salazar Slytherin，佢支魔杖裡面包含住一塊蛇妖角basilisk horn嘅碎片，呢個令到史萊哲林同其他擁有佢嘅爬說嘴Parselmouths能夠喺遠距離透過爬說嘴嚟施法。喺美國，魔杖嘅起源係17世紀由第一個魔杖製造者伊索·瑟爾Isolt Sayre用咗河蛇嘅角、貓豹毛髮、鳥形龍嘅心弦同埋長耳鹿角大野兔嘅鹿茸整成，瑟爾係一個愛爾蘭移民，仲喺麻省創立咗伊法魔尼巫術與魔法學校Ilvermorny School of Witchcraft and Wizardry，仲成為史萊哲林魔杖嘅最後一位主人。瑟爾將佢嘅魔杖埋咗喺學校校園出面，一棵未知品種嘅蛇木樹喺一年之內喺墓地裡面生咗出嚟。呢棵樹抵制咗所有修剪又或者殺死佢嘅企圖，但係啲人喺幾年之後發現佢嘅葉含有強大嘅藥用價值。

魔杖喺《哈利波特》系列小說同改編電影推出咗之後成為咗熱門嘅周邊商品，世界各地嘅哈利波特相關景點都有得賣，例如係環球影城裡面嘅哈利波特魔法世界The Wizarding World of Harry Potter。

J·K·羅琳同華納兄弟電影共同擁有嘅跨媒體製作「魔法世界Wizarding World」嘅商標由９支魔杖組成，呢九支魔杖嘅擁有者都係《哈利波特系列電影》仲有《怪獸系列電影》嘅主角，分別係：哈利·波特、榮恩·衛斯理、妙麗·格蘭傑、阿不思·鄧不利多、紐特·斯卡曼德、蒂娜·金坦、奎妮·金坦、佛地魔同埋蓋勒·葛林戴華德。呢個標誌喺2018年3月發佈嘅《怪獸與葛林戴華德之罪》嘅電影預告入面第一次出現。羅琳創立嘅慈善機構「路摸思」喺2018年作為倫敦城市藝術計劃的一部分而喺倫敦豎立咗９個巨型魔杖嘅裝置。

魔杖文字

巫師可以用魔杖喺空中寫字，例如湯姆·瑞斗喺《消失嘅密室》嘅結尾用魔杖嚟寫我係佛地魔王I am Lord Voldemort嘅字樣，其實呢個係湯姆·魔佛羅·瑞斗Tom Marvolo Riddle嘅變位字；阿不思·鄧不利多喺《火盃的考驗》電影嘅刪除片段入面，佢喺半空中寫咗霍格華茲校歌嘅歌詞出嚟。

衛斯理屋企嘅鐘

衛斯理屋企嘅鐘。

位於洞穴屋嘅衛斯理屋企裡面有個特別嘅時鐘，裡面有九支指針，每支指針代表住每個家庭成員。除咗話俾佢哋知時間之外，嗰個時鐘仲會顯示每個家庭成員嘅位置或者狀態。一啲已知嘅地點包括：屋企、學校、返工、出去、蕩失路、醫院、監獄同埋死得人嘅危險。衛斯理一家喺嗰個系列入面係唯一提到擁有呢種時鐘嘅屋企。鄧不利多曾經指嗰個時鐘「非常之好」，而且仲似乎對佢印象深刻。

「致命危險」嘅位置通常喺數字12所在嘅位置。指針嘅變化喺頭五輯小說入面反映咗每個家庭成員嘅唔同狀態，但喺第六輯小說入面，除咗有人出遊之外，全部九支指針都指向「死得人嘅危險」。衛斯理太太認為呢個意味咗隨住佛地魔捲土重來，佢哋每個人都總係處於死得人嘅危險之中，但係佢無辦法證實呢一點，因為佢唔知道仲有邊個擁有呢種時鐘。

魔法文物

葛萊分多寶劍

高錐客·葛萊分多劍Godric Gryffindor's Sword係一把由妖精鑄造嘅劍，劍柄嘅圓波鑲嵌咗一粒大紅寶石，劍身上面仲有高錐客·葛萊分多嘅全名。呢把劍曾經係霍格華茲嘅其中一位中世紀創辦人高錐客·葛萊分多所擁有。哈利喺《哈利波特：消失的密室》裡面由分類帽裡面將佢掹出嚟同薩拉扎·史萊哲林Salazar Slytherin嘅蛇妖戰鬥仲將佢殺死。當鄧不利多知道咗哈利擔心自己並唔屬於葛萊分多學院嗰陣時，佢嘅部分原因係因為佢好似佛地魔咁樣識得爬說語，不過鄧不利多俾佢知道，淨係得嗰個學院嘅真正傳人先至可以喺佢需要嗰陣將把劍召喚到出嚟，咁樣先至令佢放低心頭大石。呢把劍喺《死神嘅聖物》入面亦發揮咗關鍵嘅作用：當佢被用嚟對付蛇妖之後，據講把劍喺嗰陣已經沾滿咗蛇妖嘅毒液，「將佢吸收嚟變得更強大」。後嚟呢把劍被用嚟做摧毀佛地魔嘅３件分靈體嘅工具。

由於呢把寶劍係由妖精鑄造嘅，所以呢把劍係堅不可摧。根據妖精拉環Griphook所講，呢把劍最初係由妖精萊格納克一世Ragnuk the First鑄造，後嚟就俾葛萊分多「偷咗」；因為貝拉·雷斯壯嘅金庫喺第７輯小說入面俾哈利三人組突襲嗰陣時，呢把寶劍喺哈利手上滑咗落嚟，於是把寶劍就俾拉環搶走咗。後嚟當奈威·隆巴頓將佢喺分類帽裡面攞出嚟仲用佢嚟將佛地魔嘅蛇妖娜吉妮斬首，呢把寶劍又返番去巫師嘅手上。呢個表示無論當時把寶劍喺邊度都好，只要當葛萊分多學院嘅真正成員需要佢嗰陣，寶劍就會重新出現喺分類帽裡面。

嗰個系列嘅作者羅琳後嚟已經證實咗葛萊分多並無喺萊格納克一世嗰度將把寶劍偷走，而且呢種信念只係拉環對巫師嘅偏見同埋唔信任嘅一部分。事實係高錐客·葛來分多委託妖精萊格納克一世按照佢嘅規格將把寶劍整出嚟。當萊格納克一世整咗呢把寶劍出嚟，然後喺佢將呢把寶劍呈現俾葛萊分多之後，佢發現自己好鍾意把寶劍，後嚟佢同其他妖精講嗰把寶劍俾人偷咗，仲派僕人幫佢攞番返嚟。葛萊分多用魔法將啲妖精打敗但係無殺死佢哋，仲施魔法俾佢哋返到去萊格納克一世嗰邊，仲話如果佢再試吓拎起把劍嘅話，佢就會用呢把寶劍嚟對付佢哋。萊格納克一世好認真咁對待嗰個威脅，但係直到佢過身嘅嗰一日，佢都仍然堅持話嗰把寶劍係對方喺佢嗰度偷返嚟嘅。

火盃

閒置嗰陣嘅火盃

火盃The Goblet of Fire係由一個木製嘅高腳杯，裡面燒起藍白色嘅火焰而成，仲喺每屆嘅三巫鬥法大賽Triwizard Tournament開始嗰時去用。火盃只係用嚟去揀參賽學校嘅冠軍代表，三間參賽學校分別係霍格華茲Hogwarts、波巴洞Beauxbatons同埋德姆蘭Durmstrang，鄧不利多形容佢係「公正無私嘅裁判」。三間院校裡面有參賽資格嘅學生都可以將寫咗自己姓名嘅羊皮紙掉deu6入去火盃裡面，去做三巫鬥法大賽嘅潛在候選人。

火盃喺用緊嗰陣，佢會被擺喺霍格華茲嘅入口大堂，鄧不利多用魔法咒語喺火盃側邊設立咗年齡分界線去包圍住火盃，用嚟防止年齡唔符合規定嘅未成年學生去報名。任何未成年嘅學生試吓用老化藥Aging Potion嚟瞞住嚟呃火盃嗰陣時，佢哋都會留咗長長哋嘅白鬍鬚，就好似電影入面嘅衛斯理孖仔咁樣。寫咗參與學生姓名嘅羊皮紙會喺指定時間內喺火盃裡面嘅魔法火焰噴泉入面被噴出嚟，每間學校都會揀出一個代表。假扮成阿拉特·穆敵嘅小巴堤·柯羅奇曾經話，火盃係「一個異常咁勁嘅魔法物品」，除非有人施展出異常強大嘅迷糊咒Confundus Charm，如果唔係就好難蒙蔽到呢樣嘢。假扮嘅穆敵教授用咗非常強大嘅迷糊咒嚟瞞過火盃，令到哈利成為咗三巫鬥法大賽歷史上首位第四名鬥士。

三巫鬥法大賽嘅獎盃

三巫鬥法大賽嘅獎盃係頒俾呢個大賽冠軍嘅獎盃，佢喺第三項任務嗰陣擺咗喺迷宮嘅中心。嗰個獎盃喺比賽事前俾小巴堤·柯羅奇偷偷哋將佢變成港口鑰再擺喺迷宮嘅中心，所以當哈利·波特同西追·迪哥里同時握住獎盃嗰陣時，佢哋兩個即刻被送到去小漢果頓嘅佛地魔家族墓地，哈利後嚟透過揸住作為港口鑰嘅獎盃帶埋西追嘅遺體走甩返去霍格華茲。

火盃喺閒置嗰陣會保存喺鄧不利多衣櫃裡面嘅珍品盒仔裡面。

魔法石

内文：哲人之石

魔法石

根據古代嘅煉金術，魔法石Philosopher's stone好有傳奇嘅色彩，因為佢可以將所有金屬都鍊成黃金，而且仲可以提煉出一種可以令飲咗佢嘅人長生不老嘅魔藥，所以令好多人都想要。呢塊魔法石喺《哈利波特：神秘的魔法石》裡面第一次被提到，亦由鄧不利多嘅老朋友尼樂·勒梅Nicolas Flamel擁有。

呢塊魔法石雖然喺成個系列入面多次被引用，但係佢只係出現喺第一輯同最後一輯小說裡面。鄧不利多最後喺勒梅嘅同意下，佢喺第一輯小說嘅尾聲入面將呢塊魔法石銷毀。

這塊魔法石喺系列嘅美國版本裡面被叫做男巫士之石Sorcerer's stone。

分類帽

内文：分類帽

設置喺主題公園哈利波特與禁忌之旅排隊區嘅分類帽

分類帽The Sorting Hat係霍格華茲嘅魔法道具，呢樣嘢係一頂古老、爛溶溶仲識講嘢嘅帽。呢頂帽酷似一頂爛溶溶嘅錐形皮革寬邊巫師帽，佢嘅褶皺同撕開嘅位置令佢睇起上嚟有眼同個嘴。呢頂帽喺霍格華茲每個學年一開始嘅開學宴上面戴喺每個一年級新生嘅頭上用嚟分配佢哋去到霍格華茲嘅各個學院。分類帽會利用破心術Legilimency（本質上係讀心術）嚟決定學生所屬嘅學院──分別係葛萊分多、赫夫帕夫、雷文克勞同埋史萊哲林。分類帽會喺分類典禮上面同被分類嘅學生做短暫嘅交流，仲會喺做決定嗰陣時考慮學生嘅偏好。最後分類帽會將個結果大聲咁宣佈出嚟，然後嗰個新生就會加入去獲派嘅嗰個學院。

魔鏡

意若思鏡

荷李活環球影城入面嘅達哈利波特的魔法世界裡面嘅意若思鏡。

意若思鏡Mirror of Erised係哈利·波特喺《哈利波特：神秘的魔法石》入面裡面喺霍格華茲嘅一間廢棄咗嘅課室入面發現嘅神秘魔鏡，鏡嘅頂部寫住：「意若思，思特拉，厄魯，歐特，烏比，卡佛魯，歐特，昂，烏西erised stra ehru oyt ube cafru oyt on wohsi」，當鏡像嘅文字以啱嘅間隔仲重新整理之後顯示出嚟，就會寫成：「我所展示嘅唔係你嘅樣，而係你內心嘅渴望I show not your face but your heart's desire.」，呢個就正如「意若思erised」呢個詞語調返轉嚟拼寫就係「慾望desire」，所以呢塊鏡其實就係「慾望之鏡Mirror of Desire」。

任何人面對住呢塊鏡都會見到佢內心深處最渴望發生嘅嘢：哈利喺遇到呢塊鏡之後，佢喺鏡入面可以睇見佢自己嘅父母，同埋似乎係一班親人圍繞喺佢身邊；榮恩就見到自己做咗級長、仲做咗學生會嘅男生主席，同埋手揸住學院盃嘅魁地奇球隊隊長，從而表明佢好想擺脫佢兩位非常成功嘅阿哥，仲有佢嗰個更加受歡迎嘅老友—哈利嘅影子。

鄧不利多係小說入面喺面對塊鏡嗰陣淨係見到自己為數唔多嘅角色之一，佢曾經同哈利講佢喺塊鏡前面見到自己拎住咗佢一直好想要嘅一對厚厚嘅羊毛襪羊毛襪喺英國係有親情嘅含義。佢話俾哈利聽「一個人永遠唔會有足夠嘅襪」，佢仲感嘆自己喺聖誕節連一對襪都無收到，因為人哋堅持送書俾佢（第七輯小說講明咗鄧不利多並無講真話出嚟，因為考慮到鄧不利多嘅經歷，佢可能渴望住見到佢嘅屋企能夠團聚返，而羊毛襪喺英國文學入面寓意住親情，所以佢所講嘅嘢亦唔係全部都係假話，而係話佢表面上桃李滿門，同埋有受人尊敬嘅風光，但係就永遠都無辦法重獲已經失去咗嘅親情，包括佢仍然在世嘅細佬阿波佛·鄧不利多在內）。不過哈利懷疑鄧不利多所講嘅嘢並唔係真嘅，因為佢喺《死神嘅聖物》入面暗示佢真正睇到嘅係佢成個家庭都仲生勾勾喺度，佢哋又再幸福快樂咁聚埋一齊，就好似哈利一樣。鄧不利多喺中年時期嗰陣見到嘅係蓋勒·葛林戴華德。

鄧不利多曾經告誡哈利，指呢塊鏡本身嘅提供唔到知識，亦都提供唔到真相，佢淨係可以展示人哋心裡面最深切嘅渴望，啲人喺佢前面會俾佢哋所見到嘅影像迷住咗而浪費咗佢哋嘅生命，唯一世界上最開心嘅人先至可以將呢塊意若思鏡當係一般嘅鏡子嚟用。喺《神秘的魔法石》裡面，鄧不利多用意若思鏡嚟作為對魔法石最後嘅保護。佢將魔法石收埋喺塊鏡裡面，佢知道只有搵到魔法石但唔會利用佢嘅人先可以得到呢塊魔法石。如果唔係嘅話，任何人如果見到自己喺度整長生不老藥，又或者見到將事物點石成金之類畫面嘅話，咁就永遠無辦法得到呢塊魔法石。

雙面鏡

雙面鏡Two-way Mirrors係屬於天狼星·布萊克嘅一樣嘢，哈利喺《哈利波特：鳳凰會的密令》裡面喺古里某街12號嘅布萊克家族大宅過聖誕之後，佢收到嚟自天狼星用包裹寄嚟嘅一塊鏡。呢塊鏡係天狼星同哈利嘅阿爸詹姆·波特被單獨韞wan3住嗰陣佢哋用嚟互相交流嘅一面鏡。呢個係一組雙向嘅鏡，透過握住其中一面仲講出另一面擁有者嘅名嚟啟動塊鏡，令佢哋個樣出現喺來電者塊鏡子上面，調返轉亦都係咁。

哈利起初選擇唔打開個包裹，因為佢最初以為係可以令天狼星離開古里某街而唔肯拆封，所以哈利後嚟先至會兩次冒險喺無被監視嘅火爐度試吓去聯絡天狼星，佢直到直到天狼星過咗身之後先至打開個包裹，哈利喺嗰陣先至發現到嗰塊鏡，但係塊鏡喺嗰陣已經起唔到作用。因為天狼星跌落去死亡拱門嗰陣並無帶埋塊鏡，失落嘅哈利於是將自己嗰面鏡掟爛砸成碎片。

雙面鏡第二次出現喺《哈利波特：死神的聖物》入面，當蒙當葛·弗列契喺古里某街嘅大宅將佢擸走咗，仲將天狼星嘅嗰面鏡賣咗俾阿波佛·鄧不利多，阿波佛於是利用呢塊鏡喺《死神的聖物》入面照顧哈利。當哈利向住塊鏡裂咗嘅碎片絕望咁求助嗰時，一隻屬於阿波佛嘅明亮藍眼睛出現咗，當時哈利曾經誤認為嗰隻眼係阿不思·鄧不利多。阿波佛後嚟派多比去馬份莊園嚟幫哈利佢哋一班人脫險，仲帶佢哋走甩去到貝殼居。

收納用具

釜

唔同晒士嘅釜。

釜Cauldron係用嚟釀製魔藥嘅魔法容器，唔同材料嘅釜可以喺斜角巷入面嘅帕特奇大釜店入面買到，仲有好多唔同嘅晒士可以揀。霍格華茲嘅學生會被要求去買一個簡單嘅錫製２號大釜，就算哈利喺第一輯小說入面曾經話好恨要一種純金大釜。

派西·衛斯理喺《哈利波特：火盃的考驗》入面認為外國進口嘅產品有安全風險，佢喺魔法部嘅新工寫咗一份關於大釜嘅報告，用嚟希望可以推動到對釜底厚度嘅監控。

妙麗嘅手袋

妙麗喺《哈利波特：死神的聖物》裡面對佢嘅珍珠手袋施展咗無形伸展咒Extension Charms，喺唔影響手袋物理晒士嘅情況下擴大咗佢裡面嘅容量。另外，手袋入面嗰啲嘢嘅質量會被抵消咗嚟到容易啲攞走。

類似嘅手袋亦都曾經出現喺其他虛構作品入面，例如係《龍與地下城》裡面嘅「持有之袋bag of holding」，或者好多其他遊戲裡面嘅「魔法背囊仔magic satchel」，同埋菲力貓嘅「一袋絕技bag of tricks」。《歡樂滿人間》嘅瑪麗·包萍都有個類似嘅手袋。

伸縮蜥皮袋

伸縮蜥皮袋Mokeskin pouch係一種淨係可以由擁有嘅人操作嘅拉繩袋。哈利喺17歲生日嗰陣喺海格嗰度收到一個伸縮蜥皮袋嚟做生日禮物。哈利喺嗰個伸縮蜥皮袋放咗佢自己嘅一啲重要嘢，例如係金探子、劫盜地圖、佢嗰支斷咗嘅魔杖、假嘅小金匣，仲有天狼星嘅嗰塊爛咗嘅雙面鏡碎片。

穆敵嘅魔法行李喼

穆敵嘅魔法行李喼Moody's Magical Trunk係屬於阿拉特·穆敵嘅，呢個奇怪嘅魔法行李喼上面有７把鎖，呢啲鎖各自鎖住裝咗唔同種類嘢嘅箱。最後一個箱（第７個）大約有10英尺（3米）咁深，假冒穆敵嘅小巴堤·柯羅奇將真正嘅穆敵韞wan6住咗仲收埋喺呢度。呢個行李喼裡面其他嘅箱收埋嘅嘢包括有咒語書、黑暗探測器Dark Detectors同埋穆敵嘅隱形斗篷。

魔法帳篷

喺《哈利波特》裡面，無論帳幕喺外表睇起上嚟係有幾咁細，佢哋都係用魔法裡面嘅無形伸展咒嚟將內部放大到一間單位咁大。哈利喺第４輯同埋第７輯裡面所用嘅帳篷係魔法部官員薄京Perkins已經唔用仲棄置咗嘅嗰個。

斗篷

斗篷Cloak係巫師居家必備、旅遊出外嘅最佳良伴。呢樣嘢同飛毯唔同嘅係，斗篷一次淨係可以俾一個人去用，大啲嘅亦最多淨係可以俾三個以內嘅人去用，而飛毯就無論人數幾多幾少，同埋體重幾輕幾重都好都可以去用。

• 旅行斗篷：成日出去公幹嘅巫師會用到，鄧不利多、石內卜、麥教授每個人都有一件；另外鳳凰會裡面嘅衛斯理家族都擁有至少４件，分別屬於亞瑟、茉莉、比爾，同埋派西（魔法部俾嘅）。
• 黑斗篷：食死人用嘅，唔知有咩功能。
• 隱形斗篷：喺巫師魔法世界入面係用嚟令穿著嘅人變得隱形。只要披上呢件斗篷，人哋就睇你唔到。所有呢啲服裝都非常之貴而且稀有，因為隱形斗篷好可能係由喺遠東發現嘅一種魔法草食動物—幻影猿嘅毛皮紡製出嚟，所以非常之珍貴；一般斗篷可以帶有滅幻咒Disillusionment Charm，或者係用障眼法Bedazzling Hex整出嚟。

相同埋肖像

魔法世界入面啲相同埋肖像裡面嘅人物或者動物都係郁得嘅。相入面嘅人像會按照影相當時嘅心情同埋佢嘅個性啲做出動作，就好似洛哈您夾硬摟住哈利一齊影相咁樣，張相入面會見到洛哈拖住啱啱想逃出去框外面嘅哈利隻手；大部分紀念相裡面嘅人都會睇落去好似唔會手酸一樣咁一直揮住手嚟笑，而肖像裡面嘅人物唔單止會郁仲會講嘢，佢哋離開自己嘅肖像去另一幅肖像度傾吓閒計更加係家常便飯嘅事。利用呢啲特性，有啲肖像會被委託嚟傳令或者做守衛嘅工作，例如葛萊分多宿舍嘅入口就有一幅肥女士畫像守住，要向佢講出正確嘅通關密語先至可以入去。

相

巫師世界入面魔法人物嘅相同埋魔法肖像都有相似嘅特性：相裡面嘅人物可以四圍走，甚至有時會離開個相嘅框架。佢哋會出現喺巫師報紙同其他雜誌上面，仲有朱古力蛙嘅卡片度。柯林·克利維喺《哈利波特：消失的密室》入面提到佢宿舍裡面有個男仔話，如果佢用「啱嘅魔藥」去沖洗用麻瓜相機嚟影嘅菲林嘅話，啲相就會識得郁。不過，同肖像唔同嘅係，巫師嗰啲相入面嘅人物唔可以講嘢，亦都表現唔到一啲感覺出嚟。睇起上嚟佢哋確實對現世嘅嘢有啲了解，就例如喺《哈利波特：鳳凰會的密令》入面，亞瑟·衛斯理張辦公枱上面嘅全家福張相顯示，除咗派西之外，佢哋全家所有人都「似乎已經走出咗張相以外嘅地方」。

肖像

霍格華茲入面嘅肖像畫。

喺成個《哈利波特》系列裡面，魔法肖像嘅主體（甚至係已經死咗嘅角色）都可以郁得，佢哋可以同在世嘅觀察者做互動同講嘢，仲可以表現出佢哋明顯嘅情感同埋個性。有啲甚至可以去同其他肖像度互相去拜訪，或者去傳遞訊息，又或者透過佢哋嘅肖像喺唔同嘅地點之間嚟移動如果佢哋唔單止存在喺一幅主題嘅畫作入面。呢方面嘅一個例子就係天狼星·布萊克嘅太爺—菲尼亞斯·奈傑勒斯·布萊克Phineas Nigellus Black，喺霍格華茲嘅校長室入面有一幅佢嘅肖像畫嚟去為現任校長俾建議，而佢嘅另一幅肖像畫就喺古里某街12號嘅布萊克家族大宅裡面。喺霍格華茲嘅牆上面仲可以搵到好多類似嘅肖像畫。

有啲肖像畫係用嚟隱藏啲房或者通道嘅入口，例如：

• 肥女士嘅肖像擋住喺葛萊分多交誼廳嘅入口，學生同教職員需要向佢講出啱嘅密碼嚟等張畫擺開嚟將個入口打開，同埋喺防止啲外人入去嗰陣時閂埋；
• 喺《哈利波特：死神的聖物》裡面，萬應室裡面就有一幅阿蕊安娜·鄧不利多Ariana Dumbledore嘅肖像畫，幅畫後面隱藏住通去豬頭酒吧嘅秘密通道。
• 霍格華茲嘅廚房前面仲有一幅大水果碗嘅畫，如果𢯎ngaau1吓個梨嘅話，嗰個入口就會露出嚟仲會擺開嗰道隱藏咗嘅門。

肖像畫可以俾藝術家用魔法嚟郁佢，但係佢哋同其他人互動嘅程度就取決於佢哋主體嘅力量。羅琳曾經評論話啲肖像畫只係死者一個微弱嘅印記，啲肖像畫模仿咗佢哋嘅基本性格同埋思維模式，佢哋因為咁就「唔會好似幽靈咁樣有徹底嘅意識」。阿不思·鄧不利多嘅肖像畫喺《哈利波特：被詛咒的孩子》裡面就將佢自己形容做「繪畫同埋記憶」，而佢嘅繼任人麥教授就評論話，雖然佢可以同鄧不利多去傾嚟幫佢做決定，但係佢會謹慎咁記住嘅係，肖像畫甚至唔可以代表佢哋一半嘅主體。

校長辦公室裡面嘅肖像

除咗桃樂絲·恩不里居之外，霍格華茲嘅校長辦公室裡面掛晒所有霍格華茲歷任校長嘅肖像畫。嗰啲肖像畫會為現任校長提供建議，根據前任校長阿曼多·狄劈Armando Dippet嘅講法，佢哋「有義務為現任校長去提供服務」。作者羅琳解釋話，歷任校長嘅肖像畫往往會比大多數人嘅畫嚟得更真實，因為佢哋所討論嘅主題通常會傳授知識仲教佢哋喺過身之前點樣做嘢。石內卜嘅肖像畫喺1998年5月2號嘅霍格華茲大戰之後因為哈利·波特嘅要求而可以有得擺喺校長室裡面。

肥女士嘅肖像

葛萊分多嘅交誼廳入口由肥女士嘅肖像畫嚟覆蓋住，當門外嘅人俾出啱嘅密碼嗰陣時，佢就會將道門打開（有時會唔情願咁做）。佢成日被嗌醒之後覺得心煩意亂，有時亦會見到佢同佢嘅老友—紫羅蘭Violet齊齊飲醉咗。肥女士並無其他已知嘅名—就算係一貫彬彬有禮嘅鄧不利多亦都只係叫佢做「肥女士」—而且佢可能並唔係一個真實嘅人，而係佢個肖像畫家嘅發明。

肥女士喺《神秘的魔法石》入面喺半夜將自己嘅肖像畫留低，將哈利、榮恩、妙麗同奈威鎖住喺葛來分多塔出面，搞到佢哋迫住去繞住學校去跑。對佢哋幾個嚟講好彩嘅係，當佢哋返到嚟嗰陣，肥女士已經返咗去佢嘅肖像畫裡面，等佢哋可以走返去葛來分多塔；天狼星·布萊克喺《阿茲卡班嘅逃犯》入面因為無密碼嘅情況下就俾肥女士拒之門外之後，佢就將肥女士嘅畫像劈爛咗，肥女士需要一段時間之後先至敢再返去守衛葛萊分多塔。喺佢嘅肖像畫得到修復之後，佢請求保護嚟防止有人試吓再攻擊佢嘅肖像畫，霍格華茲因為咁而請咗兩隻保安山怪返嚟。肥女士喺《哈利波特：混血王子的背叛》入面對哈利嘅夜返覺得好忟憎，假扮密碼已經改咗，仲試圖喺佢同鄧不利多傾緊嘢嗰陣攔截佢嚟叫佢返嚟。當哈利後嚟確認鄧不利多嘅死訊嗰時，佢抽泣起上嚟，佢喺悲傷裡面唔需要哈利俾密碼就開開俾佢，咁樣係呢個系列入面唯一嘅一次。

胖女士嘅角色喺《神秘的魔法石》裡面係由伊麗莎白·斯普里格斯去飾演，而喺《阿茲卡班的逃犯》入面就係由唐·法蘭奇去做。

交通工具

飛天掃把

飛天掃把Broomsticks係一種有魔法仲可以用嚟飛嘅掃把，呢個係巫師同女巫最成日用嘅交通工具，呢樣嘢有一套完整嘅歷史，就好似現實生活入面嘅汽車咁樣，係巫師世界入面每個年齡階段嘅巫師同女巫所用嘅其中一種交通工具，亦都被用喺參與巫師世界嘅運動比賽魁地奇Quiddich。

飛天掃把嘅用途類似於飛毯，就算英國魔法部後嚟禁止咗去用後者。不過，就算用咗減震咒Cushioning Charm，飛天掃把對於長途旅程嘅應用亦都會令到使用者覺得唔舒服，所以好多巫師或女巫更加鍾意喺呢啲旅程入面去用其他方式嘅交通工具。

飛天掃把喺魔法世界入面被睇成係一種主要嘅消費品，當中有好多掃帚製造商同型號俾人揀，包括狂風Cleansweep同埋彗星Comet，佢哋喺功能上都各有唔同。呢啲產品嘅範圍由距離地面飛行只係幾英尺嘅細路仔玩具掃把，以至到昂貴嘅高性能型號，再去到可容納幾個人仲喺座位區下面設有行李箱嘅家庭式掃把亦應有盡有。

作為霍格華茲嘅一年級學生，原則上係不可以擁有掃把嘅，不過哈利·波特就例外得到通融，俾佢可以參與佢自己所屬學院嘅魁地奇球隊。因為哈利參加魁地奇比賽嘅關係，佢嘅飛天掃把由光輪2000Nimbus 2000去到後來嘅火閃電Firebolt喺小說同電影系列入面都最突出。哈利嘅第一支掃把係喺鄧不利多嘅特別同意下，透過揀咗佢做葛萊分多魁地奇球隊搜捕手Seeker嘅麥教授送俾佢嘅光輪2000。喺魁地奇比賽嗰陣，哈利嘅掃把俾渾拚柳The Whomping Willow整爛晒之後，佢嘅契爺天狼星·布萊克送咗火閃電俾佢嚟做聖誕禮物。

火閃電超越咗之前嘅記錄保持者嘅光輪2001，佢去到而家都仍然仲係世界上最快嘅掃把。跩哥·馬份亦都有呢個型號，佢嘅老豆魯休思·馬份做禮物嚟送晒俾成個史萊哲林魁地奇球隊嚟賄賂俾個仔做佢哋嘅搜捕手。由於火閃電嘅價錢咁高，淨係可以應要求嚟提供。

成個系列入面嘅掃把；

• 狂風Cleansweep系列：1926年由歐樂頓三兄弟成立嘅牌子。衞斯理孖仔，同埋《阿茲卡班的逃犯》嘅雷文克勞代表隊就用狂風7Cleansweep 7嘅系列，榮恩喺《鳳凰會的密令》做咗級長之後亦都轉用呢個系列嘅狂風11Cleansweep 11。
• 彗星Comet系列：榮恩喺《鳳凰會的密令》之前用嘅掃把係裡面嘅彗星260號Comet 260。馬份屋企嘅掃把係彗星120號Comet 120。
• 火閃電Firebolt系列：呢個系列淨係得佢同埋喺2007年推出嘅至尊火閃電Firebolt Supreme。哈利喺《阿茲卡班的逃犯》之後就用火閃電嘅掃把。呢個系列同時亦都係《火盃的考驗》入面魁地奇世界盃嘅標準比賽專用嘅掃把。
• 光輪Nimbus系列：呢個牌子喺1967年成立，哈利·波特用嘅第一支掃把就係呢個系列嘅光輪2000；史萊哲林嘅魁地奇球隊喺哈利二年級之後所用嘅係光輪2001系列。
• 橡木柄79Oakshaft 79系列：呢個系列由掃把製造師艾利斯·葛林史東喺1879年製造嘅，外型極之靚，配咗專門為長途旅行而設計能夠抵禦強風嘅橡木粗實手柄，但係由於佢太過笨重而漸漸俾注重靈巧性嘅人唔會去用。呢個掃把喺《穿越歷史的魁地奇》裡面有提到。
• 銀箭號Silver Arrow系列：呢個係一款已經停產嘅舊式掃把，根據霍格華茲嘅飛行教練胡奇夫人所講，呢把掃把嘅性能相當唔錯，堪稱係舊式掃把裡面嘅火閃電。
• 流星號Shooting Star系列：呢個係一款非常舊式掃把嘅型號，俾好多人叫佢做「古董」，呢款係霍格華茲飛行學嘅課堂上面用到嘅掃把制式。

《穿越歷史的魁地奇》入面提到嘅掃把

《穿越歷史的魁地奇》入面提到嘅掃把包括：

• 綴月號：由葛雷迪·布斯比喺1901年設計同出產嘅掃把。
• 橡木箭79Oakshaft 79：呢個係由住喺樸茨茅夫嘅掃把製造師艾利斯·葛林史東喺1879年製作出嚟嘅，因為咁所以就叫呢個名。
• 銀箭號Silver Arrow系列：由單一巫師李歐納·裘克斯Leonard Jukes生產同製造出嚟嘅進一步革新運動用掃把，順風嘅時速可以去到每個鐘70英哩。
• 狂風Cleansweep：呢個係取代咗銀劍號嘅運動用掃把，榮恩喺小說入面一開始就用流星號，後嚟就改咗用狂風11Cleansweep 11。
• 火種爆同埋快帚：火種爆係由黑森林嘅艾勒比暨史普莫公司喺1940年出產；而快帚就係艾勒比暨史普莫公司出產嘅第二款飛天掃把。
• 流星號Shooting Star：流星號係環球掃把公司喺1955年出產嘅一款平價嘅飛天掃把（截至而家為止一直都係最平嘅一款）。不過流星號喺推出咗一段時間之後被發現隨住使用年期嘅增加就會出現失速同飛得唔高嘅問題，搞到銷量大跌，環球掃把公司亦都喺1978年被迫退出市場。榮恩一開始曾經用咗一段時間流星號，後嚟新嘅狂風11Cleansweep 11取代咗佢。

飛天汽車

電影入面衞斯理一家嘅飛天汽車。

喺小說裡面魔法世界嘅設定，嗰啲飛天汽車Flying Car都係比較古典嘅，但係就有麻瓜汽車做唔到嘅功能，例如內籠嘅空間比起外觀大，同埋可以輕鬆滑過水溝等等。亞瑟·衛斯理就擁有一架令佢着迷嘅飛天汽車，嗰架係1960年嘅福特安格利亞105E，嗰架車可以飛得亦可以隱形。雖然佢以前無魔法嘅內部晒士（無限伸展咒）同埋其他功能，但係佢仍然夠晒去車衞斯理一家。

呢架車喺《消失的密室》入面俾榮恩同埋弗雷同喬治借用嚟去德思禮家嚟營救哈利。後嚟由於通去9¾月台嘅大門俾家庭小精靈多比封鎖咗後，榮恩同哈利將架車偷咗去嚟返去霍格華茲。當佢哋去到學校之後，架車降落仲撞埋落去棵渾拚柳之後，架車就將哈利同榮恩仲有佢哋啲行李彈晒出嚟之後，佢無視住榮恩要求佢返嚟嘅請求就一直衝入去禁忌森林。後尾因為有七個麻瓜見到７個麻瓜見到嗰架車飛越倫敦市中心同埋英國嘅鄉郊地區，搞到亞瑟·衛斯理好快就要面對魔法部嘅調查，仲被迫要俾巨額罰款。

戲裡面出現嘅其中一架福特安格利亞105E。

當哈利同榮恩去禁忌森林拜訪阿辣哥同佢啲蜘蛛子孫嗰陣時，呢架車又再出現；當巨蛛群試吓將哈利同榮恩嗰陣時，呢架車出現嚟攻擊嗰群蜘蛛，仲將呢兩個男仔帶到去安全嘅地方。佢哋兩個人靠住呢架車嚟走甩，就算架車救咗榮恩同哈利，但係佢並無返去衛斯理家，而係重新入去禁忌森林仲自己一個留喺嗰度。呢架飛天汽車目前嘅狀態唔清楚；榮恩評論話呢架魔法汽車變得好「狂野」，好似就好似野生動物一樣咁自主活動。根據榮恩嘅講法，呢架車唔需要燃料就可以行到佢摧毀為止。佢喺正常情況下仍然喺禁忌森林裡面漫遊，等緊衛斯理一家再去用佢。

戲入面所使用嘅1962年福特安格利亞俾做榮恩·衛斯理呢個角色嘅魯拔·格連特收購咗，而佢而家喺博利厄國家汽車博物館裡面展出。喺拍攝架車撞向渾拚柳嘅場景入面，一共有14架福特安格利亞嘅車被撞爛咗。處於野生狀態下嘅飛天汽車複製品可以喺冒險島樂園嘅龍之挑戰雲霄飛車嘅排隊隊列入面見到。偶爾，當佢嘅運動探測器感應到遊客企喺佢前面又或者喺佢身邊行過嗰陣時，佢就會閃吓佢嘅車頭燈同埋響咹嚟示意。

呼嚕粉

呼嚕粉Floo Powder係巫師同女巫用嚟出遊同埋通過壁爐嚟進行交流嘅一種綠色閃閃發光嘅粉末，呢樣嘢係由伊格納蒂亞·懷爾德史密斯Ignatia Wildsmith（1227-1320）發明，佢仲以煙道嚟命名，嗰個係由壁爐通向煙囪仲俾熱氣走出嚟嘅通道。

呼嚕粉可以用喺任何由好多個壁爐連接而成嘅呼嚕網Floo Network，如果使用者要由一個運輸點去到另一個，佢就一定要首先企喺壁爐前面點著咗出發點嘅火，然後攞一執Zap1呼嚕粉掉Deu6落去啲火度將啲火變成翠綠色，然後行入去壁爐裡面仲要把聲要清晰而有目的咁樣去講明預定嘅目的地個名就可以㗎喇；又或者，使用者首先喺壁爐入面灑啲呼嚕粉（有無點著都得）然後再行入去，呢個好似係一個點對點嘅鐵路集體運輸，但係使用者一定要經過核突噁心嘅旋轉過程先至可以去到目的地。

另外，呼嚕粉亦可以用嚟通訊，用法係巫師或者女巫可以跪喺壁爐前面，然後將佢哋身體任何一個部份伸入呼嚕粉嘅火焰入面（例如頭同埋塊面），呼嚕粉嘅綠色火焰就會出現喺目標壁爐入面，巫師或者女巫咁樣就可以唔使全身去到目的地都可以自由咁同其他人傾計。係人都知，其他身體部位亦都可以透過呼嚕粉嚟傳輸，天狼星·布萊克第二次透過呼嚕網嚟同哈利傾計嗰時差啲俾桃樂絲·恩不里居捉住。語音亦都可以透過呼嚕網嚟傳輸，就好似石內卜喺《阿茲卡班嘅逃犯》裡面見到嘅咁樣，佢喺審問哈利關於劫盜地圖嘅嘢嗰陣時透過佢辦公室嘅壁爐去搵路平。

呼嚕網係由魔法部控制，嗰個部門喺佢哋總部仲有700幾個壁爐嚟方便官員同埋魔法部嘅員工人可以直接返工同放工而唔使坐掃把或者港口鑰咁嘈雜──又或者無得唔好似喺《死神的聖物》入面形容嘅咁樣，要承受通過公廁馬桶嚟將自己沖落去嘅恥辱。

衛斯理一家喺《消失的密室》度利用呼嚕粉嚟去到斜角巷，不過哈利就因為俾呼嚕粉嘅煙霧同埋灰燼濁親而咳，搞到佢並無講清楚個地點，結果佢被送到去夜行巷嘅波金與伯克氏商店；亞瑟·衛斯理喺《火盃的考驗》入面利用佢喺魔法部嘅職位嚟將德思禮一家嘅壁爐暫時連接去到呼嚕網，但係佢並唔知道嗰個壁爐其實已經被封鎖咗；天狼星·布萊克喺同一輯小說入面都係透過嗰個網絡嚟同哈利聯絡；哈利喺《鳳凰會的密令》入面去用葛萊分多嘅壁爐嚟同天狼星通訊，後嚟因為恩不里居開始監視住霍格華茲嘅所有呼嚕網（除咗佢自己辦公室嘅壁爐之外），所以哈利先至被迫去用恩不里居嘅嗰個。

根據《Pottermore》嘅講法，英國唯一攞到呼嚕粉許可嘅生產商係一間總部喺斜角巷嘅公司飛路嘭Floo-Pow，以前從來都未有過呼嚕粉短缺嘅報導，亦都無任何人知道邊個製造呢樣嘢。呼嚕粉嘅價格喺呢100年嚟一直都保持唔變：１殼係兩個西可Sickle。

飛毯

飛毯Flying Carpets係一種有魔法飛行能力嘅地毯，通常呢樣嘢都係一張喺中東地區製造嘅厚毯。比起飛天掃把，飛毯嘅優勢喺佢嘅舒適程度明顯比騎住掃把高，同埋佢可以俾好多人去坐。飛毯曾經係英國魔法界公認嘅旅行方式。就算喺以亞洲為主嘅世界上其他地方仍然係合法去用，但係由於飛毯俾魔咒物品登記處Registry of Proscribed Charmable Objects被定義做麻瓜製品而被禁去用，所以喺至少喺英格蘭嘅歐洲地區入面，喺地毯上面施咒或者用嚟飛行都係違反英國巫師法嘅行為。衛斯理先生濫用佢自己喺麻瓜文物辦公室嘅職位，佢仲積極參與咗呢項立法嘅制定。據透露，呢個禁令係相對最近嘅，唔單止係因為衛斯理先生嘅參與，亦都係因為巴堤·柯羅奇嘅阿爺喺飛毯被禁之前擁有仲操作緊一張擁有12個座位嘅阿克明斯特花毯Axminster Carpet，呢件事佢曾經喺《火盃的考驗》裡面提及過。

霍格華茲特快列車

内文：霍格華茲魔法學校 § 霍格華茲特快列車

霍格華茲特快列車The Hogwarts Express係《哈利波特》小說同電影入面嘅一架魔法列車，呢架列車喺霍格華茲嘅每個學期開始和結束嗰時負責接送學生往返倫敦同霍格華茲，仲會接送想返屋企過聖誕假嘅學生。嗰條列車路線嘅起點站設咗喺倫敦王十字車站，乘客要穿越嘅9號同10號月台之間嘅魔法牆先至入到去9¾月台，佢嘅終點係喺活米村火車站。列車上隨時都有女巫推住餐車去為學生供應餐點同埋糖果小食。

騎士巴士

喺《阿茲卡班的逃犯》入面所見到嘅騎士巴士，而家擺喺華納兄弟利維斯登工作室。

騎士巴士The Knight Bus係一架喺麻瓜及巫師世界行駛嘅紫色三層公共巴士，佢車前面嘅擋風玻璃上面印住一排「騎士巴士」嘅金色字樣，係為啲巫師同女巫提供嘅緊急交通工具，不過啲[[麻瓜]係睇佢哋唔到嘅，但如果發生意外都係會察覺得到。想搭巴士嘅人無論喺何時何地，只要佢哋舉起魔杖架車就會停低，巴士就會將乘客送到佢哋想去嘅陸地上任何地方。

騎士巴士比起坐掃把仲快，但係唔會好似近乎霎眼嘅呼嚕粉同現形術Apparating咁快。對於鍾意騎士巴士或者唔可以經其他方式出遊嘅巫師同女巫嚟講，呢種係一種方便又快嘅公共交通工具。

呢種巴士第一次喺《阿茲卡班的逃犯》裡面出現，哈利當時喺無意中伸出佢揮魔杖嘅手臂嚟阻止自己仆倒嗰陣就叫咗佢埋嚟。嚟自英國各地嘅巴士似乎都可以將啲乘客接走晒，仲將佢哋帶到去各自揀嘅目的地，而呢種巴士似乎無固定嘅路線。騎士巴士會喺麻瓜睇唔到嘅馬路上面風馳電掣，仲會搞到其他物體喺短途入面避開佢（而唔係相反）。呢種巴士係按距離收費嘅—哈利由小惠因區去到破釜酒吧就要俾11個西可Sickle嘅價錢。巴士裡面會根據一日裡面嘅時間而做變化，日頭有座位，而夜晚就有床位。巴士上面設咗熱水壺、牙刷同埋熱朱古力等等方便嘅設施俾乘客去用，需要用嘅話淨係要俾些少額外嘅費用。對於更長途嘅距離，騎士巴士會伴隨住巨大嘅轟鳴聲同埋會即刻霎吓眼就躍起100英里（160公里），咁樣就會搞到好扽dan3。根據哈利同榮恩嘅講法，嗰度非常之唔舒服。騎士巴士唯一提到佢嘅旅程限制就係佢無辦法喺水上面航行。哈利同佢班朋友最後一次搭騎士巴士就係喺《鳳凰會的密令》裡面。

電影裡面嘅騎士巴士。

騎士巴士嘅巴士司機兼車長嘅係史坦·桑派Stan Shunpike，而司機就係爾尼·爾蘭Ernie Prang。喺第三輯電影入面，爾尼同埋一個由連尼·亨利配音識得講嘢嘅縮頭術腦袋喺埋一齊。正如《Pottermore》所透露嘅咁樣，騎士巴士作為俾未成年或者體弱嘅巫師同女巫嘅一種謹慎咁運送去某個地方嘅方式，呢款巴士喺1865年第一次投入服務。呢個諗法係由當時嘅魔法部部長杜加爾德·麥菲爾Dugald McPhail提出，佢喺好多其他諗法例如帶邊車嘅飛天掃把被否決咗之後，佢喺當時相對新啲嘅巴士服務入面汲取靈感從而設計出嚟。

喺改編電影入面見到嘅騎士巴士實物係由倫敦AEC Regent III RT巴士通過嫁接頂層甲板去到另一架RT巴士個頂嚟起嘅，嗰兩款巴士最初都係為咗倫敦嘅運輸而建造出嚟；「RT」係標準嘅倫敦柴油動力雙層巴士，由1939年去到1950年代中期生產咗大約4,000架（仲喺1979年之前用喺日常服務）。騎士巴士實際上用嘅係RT3882型號嘅巴士註冊型號LLU681，額外嘅頂層甲板前身係RT2240註冊型號KGU169。另外，佢仲用咗RT4497註冊型號OLD717嘅零件。

騎士巴士嘅複製品座落喺佛羅里達環球影城裡面哈利波特嘅魔法世界倫敦門面嘅前面，作為一個小型觀眾互動節目嘅舞台，入面有一個同史坦·桑派生得一模一樣嘅人仲同縮頭術腦袋喺埋一齊嘅裝置。

港口鑰

港口鑰Portkey第一次出現喺《火盃的考驗》，係一種喺施咒之後喺指定時間同條件下面可以瞬間轉移嘅物體，呢樣嘢可以喺轉移嗰陣將掂住佢嘅巫師同女巫一齊帶到去指定嘅目的地。港口鑰可以比喻做令人轉到頭暈嘅飛機，呢樣嘢一般都設置喺一啲平凡而睇落唔起眼嘅爛嘢或者垃圾，咁樣就可以防止有麻瓜會掂到或者攞走。港口鑰嘅咒語係「港口現Portus」，呢個咒語極之簡單，所以呢樣嘢成日俾人濫用，需要得到官方（魔法部）嘅批准先可以設置，不過鄧不利多有兩次曾經喺無批准就設置，有一次仲喺魔法部大堂同埋魔法部部長嘅面前。

喺《火盃的考驗》裡面嘅魁地奇世界盃大賽期間，由於不單止英國國內，亦都有大量嘅外國巫師女巫去到英國嚟觀賽，所以魔法部就喺英國國內同埋世界各地都設咗港口鑰，去幫唔想用現影術嘅人入去會場裡面。同一年，哈利·波特仲有西追·迪哥里俾小巴堤·柯羅奇嘅暗中安排下用咗港口鑰去到佛地魔匿埋嘅地方嚟幫佢恢復身體同東山再起。

鄧不利多喺《鳳凰會的密令》入面為咗避開魔法部派去霍格華茲嘅桃樂絲·恩不里居，佢曾經用港口鑰嚟送走哈利同埋衛斯理一家。佢跟住因為佛地魔嘅現身，喺魔法部嘅鄧不利多為咗俾哈利即刻返番去學校而又再設置港口鑰。

魔法電單車

天狼星·布萊克嘅魔法電單車。

天狼星·布萊克擁有一架「魔法電單車Magic Motorbike」，佢喺哈利阿爸同阿媽過身嗰晚將架車借咗俾魯霸·海格。當海格喺第一輯小說入面將仲係BB嘅哈利送去水蠟樹街4號嘅德思禮家嗰陣，呢架電單車係第一次出現，然後海格喺最後一輯小說利用佢嚟將哈利送去安全屋嗰時先至再出現。衛斯理先生對呢架電單車做咗各種嘅修改，令到佢產生一面喺排氣管噴出嘅磚牆或者一個網，仲能夠喺排氣管入面射龍嘅火焰出嚟去促使電單車突然加速。海格同哈利喺佢哋俾佛地魔追趕嗰陣用龍火嘅功能發揮咗好好嘅作用。不過，衛斯理先生警告咗呢架電單車有不明嘅安全性，淨係可以喺緊急情況下去用。佢咁講係啱嘅，因為呢架電單車嘅邊車會喺突然加速之後無受到海格魔法嘅影響而甩咗落嚟。

當海格同哈利喺車上面嗰陣，呢架電單車撞咗入去泰迪·東施Ted Tonks同埋美黛·東施Andromeda Tonks嘅花園池塘搞到架車嚴重壞咗。衛斯理先生偷偷哋話俾哈利知，佢將架電單車收埋喺雞舍裡面仲諗辦法整返佢，仲計劃喺「得閒」嗰陣將架電單車擺返喺原位，意思即係喺衛斯理太太分心又或者唔記得咗呢件事嗰陣時。佢喺《死神嘅聖物》尾聲同完咗之間嘅時間將呢架車交返俾哈利。哈利到而家仍然係呢架電單車嘅擁有人，但係佢又唔會去用呢架車。

消失櫥櫃

消失櫥櫃Vanishing Cabinet係以兩個做一組仲可以互通嘅櫃，呢組櫥櫃一個設喺霍格華茲裡面嘅萬應室，另一個就設喺夜行巷嘅波金與伯克氏商店。如果用得啱嘅話，使用者踏入去其中一個櫃裡面，然後就可以即刻喺另一個櫃入面踏返出嚟。消失櫥櫃第一次出現喺《消失的密室》入面，當時哈利透過呼嚕網意外咁去到波金與伯克氏商店之後，佢為咗避開馬份兩仔爺而匿咗入去呢個櫥櫃裡面；由於哈利並無完全咁閂埋個櫥櫃門，所以就無啟動到呢個櫥櫃嘅運輸功能；當差啲無頭嘅尼克說服調皮搗蛋嘅皮皮鬼嚟將佢掉deu6入去飛鼠先生嘅辦公室嚟幫哈利去擺脫喺泥濘嘅追蹤，呢個可能就係搞到呢個消失櫥櫃壞咗嘅原因。

呢個消失櫥櫃喺《鳳凰會的密令》入面俾衛斯理孖仔弗雷同喬治用嚟強迫做史萊哲林嘅魁地奇球隊隊長兼恩不里居偵查小隊嘅成員蒙太Montague入到去裡面嚟撤銷佢扣除咗葛萊分多嘅分數。跩哥·馬份後嚟知道咗蒙太嘅經歷，先至發現到消失櫥櫃可以互通，而消失櫥櫃嘅另一邊就係喺波金與伯克氏商店。喺《混血王子的背叛》入面，讀緊六年級嘅馬份諗辦法整返好喺霍格華茲嘅嗰個壞咗嘅消失櫥櫃，嚟到去方便將食死人偷偷哋引入去高度戒備嘅霍格華茲城堡裡面，嚟幫馬份將鄧不利多暗殺。雖然呢個設置係嗰個系列小說入面唯一提到嘅嗰個，不過喺嗰輯小說嘅電影版裡面就揭示咗呢樣嘢喺佛地魔第一次執掌嗰時變得好受歡迎，因為呢樣嘢可以俾啲人可以喺緊急情況下喇喇聲走甩嚟避開佛地魔同食死人嘅迫害。

遊戲

爆炸牌

爆炸牌Exploding Snap係巫師世界嘅一種紙牌遊戲，呢個同麻瓜嘅紙牌差唔多，唯一唔同嘅係呢種紙牌隨時可能突然喺遊戲入面全部爆炸，容易令玩牌嘅人受傷。呢個遊戲喺霍格華茲嘅學生裡面好受歡迎。

多多石

多多石Gobstones係喺小說裡面除咗巫師棋同埋爆炸牌之外，年輕巫師所玩嘅好多魔法遊戲之一。呢個遊戲貫穿晒成個系列，霍格華茲裡面甚至仲有一個多多石學會。

多多石類似於麻瓜嘅彈珠同埋法式滾球，不同嘅係，喺多多石遊戲入面，當佢哋失分嗰時，嗰啲波會向另一方玩家塊面上面吐出／噴出一種氣味好難聞嘅液體。

喺小說系列裡面仲提到，石內卜嘅阿媽—艾琳·普林斯Eileen Prince喺讀書嗰時，佢喺15歲就做咗霍格華茲裡面多多石學會嘅會長。

自動洗牌嘅啤牌

自動洗牌嘅啤牌Self-Shuffling Playing Cards係一種帶有魔法仲識自動洗牌嘅紙牌。

喺《哈利波特：消失的密室》裡面，有人提到一款自動洗牌嘅啤牌，嗰個係榮恩喺洞穴居屋企間房地板上亂咁掉deu6嘅其中一樣嘢。

巫師棋

電影裡面嘅棋子。

巫師棋Wizard chess同麻瓜嘅普通國際象棋無論係棋子、棋盤定係規則都幾乎一樣。呢啲棋子都係生勾勾嘅，玩家喺捉棋嗰時就好似指揮軍隊咁樣，棋子喺遊戲嗰陣會猛烈咁互相去攻擊，將輸咗嘅棋子打碎仲將佢拖離棋盤。玩家需要利用代數記譜法嚟命令啲棋子去郁。

榮恩嘅爺爺將一副巫師象棋留咗俾佢，而哈利第一次捉棋嘅係喺西莫·斐尼甘嗰度借返嚟嘅棋子，因為佢哋唔信任榮恩，所以榮恩不停咁向哈利大嗌佢嘅建議。哈利後嚟喺霍格華茲嘅第一個聖誕節期間得到一套屬於佢自己嘅巫師棋。

喺《哈利波特：神秘的魔法石》小說嘅第16章，哈利、榮恩同妙麗喺一場真人版巫師棋遊戲入面做咗人類棋子，由於榮恩出色嘅指揮同埋作為整體棋子嘅犧牲，令到哈利喺比賽入面贏咗。喺戲裡面，嗰啲棋子嘅描繪係用咗劉易斯棋子嘅複製品。

魁地奇

内文：魁地奇

魁地奇Quidditch係巫師世界裡面嘅一種危險但係又係最時興嘅球賽運動，由女巫同巫師做球員嚟騎住支飛天掃把嚟參賽。

惡作劇嘅嘢

内文：衛氏巫師法寶店同哈利波特裡面嘅地點 § 桑科嘅惡作劇舖頭

喺衛氏巫師法寶店同埋桑科嘅惡作劇舖頭係專門去賣佢哋各自舖頭嘅一啲惡作劇商品，包括惡作劇玩意、糖果、愛情魔藥...等等。

魔法糖果

内文：衛氏巫師法寶店同哈利波特裡面嘅地點 § 蜂蜜公爵糖果店

巫師世界裡面嘅柏蒂全口味豆Bertie Bott's Every-Flavour Beans同埋衛氏巫師法寶店嘅速效逃課糖Skiving Snackbox......等等呢啲糖果喺現實世界係由Jelly Belly生產。另外，喺小說同電影入面，蜂蜜公爵糖果店亦都有得賣好多魔法糖果。

自從2001年以嚟，柏蒂全口味豆除咗正常嘅味道之外，Jelly Belly仲生產咗小說同電影裡面提到嘅奇怪口味。

朱古力蛙

朱古力蛙Chocolate Frog係巫師世界裡面一種受歡迎嘅魔法糖果。每個包裝都附有一張朱古力蛙嘅卡，裡面展示咗中世紀去到現代出名嘅巫師或者女巫嘅魔法相同簡介，包括咗梅林、鄧不利多、尼樂·勒梅Nicolas Flamel，同埋霍格華茲嘅四位創辦人...等等。

黑魔法嘅嘢

光榮之手

光榮之手Hand of Glory係一隻萎縮嘅人手，呢樣嘢喺夜行巷嘅波金與伯克氏商店有得賣，老闆波金先生話喺光榮之手嘅手上面插咗蠟燭之後，淨係得揸住嘅人先至會睇到蠟燭光，光到甚至可以穿透到秘魯神奇黑暗粉製造出嚟嘅黑暗，所以呢樣嘢係賊仔同強盜嘅最愛。哈利喺電影版裡面觸摸到光榮之手嗰陣時即刻俾佢捉實咗。

黑魔標記

黑魔標記The Dark Mark係佛地魔嘅標記，呢個標記由一個骷髏頭同埋喺佢口裡面伸出嚟嘅一條蛇形嘅脷組成。喺佛地魔勢力嘅全盛時期，每當食死人殺咗一個人嗰陣，佢哋就會向天空射出呢個黑魔標記。食死人嘅左前臂都有黑魔標記嘅紋身，不過並唔係每個食死人都有，淨係得最高級嗰班人先至會有。喺皮膚上面嘅黑魔標記遠睇就好似艷紅嘅紋身，喺天空度嘅就係由翡翠綠色嘅星星組成。只要佛地魔本人掂到任何一個食死人嘅黑魔標記，所有嘅食死人都會有灼熱嘅感覺，然後就會即刻同佛地魔會合。佛地魔喺《死神的聖物》入面對食死人落命令，只要捉到哈利·波特嘅話就可以㩒落去手臂上面嘅黑魔標記嚟召喚佢。