哈利波特裡面嘅地點

呢度列出咗果啲出現喺《哈利波特》系列作品裡面嘅地點。

住宅

洞穴屋

洞穴屋嘅比例模型係作為向公眾展示嘅倫敦華納兄弟工作室之旅：哈利波特嘅製片展場永久展覽嘅一部分。

洞穴屋The Burrow ── 衛斯理一家嘅住處，位於英國德文郡奧特河沿岸嘅奧特里聖卡奇波爾Ottery St. Catchpole村莊外面，果度亦都喺露娜·羅古德、西追·迪哥里同埋茉莉·衛斯理嘅外家附近。洞穴屋喺《混血王子的背叛》入面被形容做一個加咗額外房間嘅豬欄。每當一個新生嘅細路出世果陣，茉莉同亞瑟都會喺果間屋上面加一個額外嘅房，最終令到果間屋樓高七層，舊到爛蓉蓉到淨係靠住魔法先至勉強維持屹立不倒。就算間屋嘅外觀舊到爛蓉蓉，不過哈利喺佢第一次到訪果陣話果度係佢去過最好嘅屋，仲成為咗世界上第二個佢最的鍾意嘅地方（只係差過霍格華茲），之後佢仲試過住喺果度。果間屋嘅前門出面係一堆亂七八糟嘅威靈頓靴同埋一個生咗鏽嘅舊大釜。洞穴屋附近有一個隱秘嘅果園，果度仲做咗衛斯理家嘅男仔同埋金妮·衛斯理嘅魁地奇雙打練習場。洞穴屋嘅花園裡面生滿旺晒好多雜草，大量嘅花園地精Gnomes住喺果度仲喺果度出沒。果度仲有一個小車房，亞瑟·衛斯理會將果度用嚟做佢帶返屋企嘅麻瓜物品工作坊（呢樣嘢搞到衛斯理太太好煩）。隨住霍格華茲校長阿不思·鄧不利多喺1997年過身之後，同埋用嚟做保護古里某街12號嘅鳳凰會總部嘅赤膽忠心咒Fidelius Charm喺《死神的聖物》入面被毀，於是眾人妥協用衛斯理家嘅洞穴屋嚟做鳳凰會嘅臨時總部，直到佢失去咗被給予嘅保護。

洞穴屋裡面嘅廚房又窄又細仲相當逼狹gip6，中間擺咗一張整潔嘅木枱同幾張木凳。牆上面嘅大鐘無數字嘅，淨係喺邊緣上寫滿好似係「在路上」，「沖茶時間」、「餵雞時間」同埋「你遲到喇」嘅字樣，而幾支指針就全部代表住佢哋嘅家庭成員。喺《混血王子的背叛》入面，果個大鐘嘅全部指針都指向12點位置嘅「致命危險」雖然啲指針有時會移去其他位置，但無幾耐之後又會移返去致命危險。壁架上放著三疊厚厚嘅書，大多都係《對你的乳酪下符咒Charm Your Own Cheese》、《烘焙的魔法Enchantment in Baking》同埋《一分鐘宴會大餐—這是魔法One Minute Feasts - It's Magic!》之類嘅書。

高錐客洞

位於高錐客洞嘅波特一家小屋，喺華納兄弟利維斯登工作室拍攝。

高錐客洞Godric's Hollow係一個虛構嘅村莊，舊時叫做高錐客山谷，小說裡面嘅位置係喺英國嘅西郊，值得注意嘅係，高錐客洞同奧特里聖凱奇波Ottery St. Catchpole同埋錫特沃斯Tinworth一樣都係魔法社區。果個村莊係哈利洞穴屋附近有一個隱秘嘅果園，果度]]·波特阿爸嘅鄉下，果度亦都係詹姆·波特同莉莉·波特仲有佢哋個仔嘅屋企，佢哋兩個最後藏身喺果度仲係俾佛地魔殺死咗，呢度亦都係佢哋兩個啱啱世嘅仔哈利留低咗佢嘅閃電疤痕嘅地方。

高錐客洞係已故嘅霍格華茲其中一個創辦人—高錐客·葛來分多Godric Gryffindor嘅鄉下，果個村莊亦都因為咁就用咗佢嘅名字嚟命名。哈利·波特喺《死神的聖物》裡面有意去佢父母嘅墓地果度睇吓，佢喺妙麗·格蘭傑嘅陪同之下一齊返到去高錐客洞果陣，佢發現高錐客洞嘅教堂墓地係好多巫師界人物安息嘅地方，當中包括佢哋嘅同學漢娜·艾寶Hannah Abbott嘅家族成員，同埋最出名嘅伊諾特·皮福雷Ignoramus Peverell同埋哈利嘅波特家族成員。其他村裡面出名嘅居民包括發明魁地奇金探子嘅鮑曼·賴特Bowman Wright，仲有《魔法史》呢本書嘅作者芭蒂達·巴沙特Bathilda Bagshot。

喺高錐客洞嘅廣場中心樹立咗一座由魔法組成嘅戰爭紀念碑，用嚟紀念詹姆·波特、莉莉·波特同埋哈利·波特一家人，每當巫師或女巫行近佢而佢哋身邊無麻瓜陪同喺一齊果陣，呢個紀念碑就會出現，而麻瓜就唔會睇到果個紀念碑。哈利舊屋嘅殘骸（俾佛地魔襲擊之後留返喺度咁樣）就喺大街嘅盡頭。

阿不思·鄧不利多嘅阿媽甘德拉·鄧不利多Kendra Dumbledore喺佢老公博知維·鄧不利多Percival Dumbledore因為三個麻瓜男仔對佢個女阿蕊安娜·鄧不利多Ariana Dumbledore嘅欺負行為而作出詛咒攻擊，甘德拉喺佢俾人拉咗仲判咗坐監之後將鄧不利多一家搬去高錐客洞。就喺那裡，芭蒂達·巴沙特將佢嘅姪孫蓋勒·葛林戴華德介紹俾阿不思·鄧不利多去識。

喺《死神的聖物》入面，哈利同妙麗喺高錐客洞俾佛地魔嘅蛇妖娜吉妮（佛地魔嘅其中一個分靈體）攻擊，佢打扮成芭蒂達·巴沙特咁嘅樣，搞到哈利嘅魔杖意外被整爛咗。羅琳喺接受BBC兒童節目《Newsround》嘅訪問入面含蓄咁證實咗「高錐客·葛來分多」同「高錐客洞」之間嘅關係。喺果個系列小說嘅最後一輯──《死神的聖物》入面，妙麗·格蘭傑亦都毋庸置疑咁講咗呢個關聯出嚟。

小漢果頓

小漢果頓Little Hangleton係個虛構嘅麻瓜村莊，以佛地魔嘅父系同母系祖先嘅起源地而出名，亦都係佛地魔喺《火盃的考驗》裡面恢復佢身體形態嘅地方。雖然呢個村莊喺果個系列嘅第四輯先至第一次出現，不過直至第六輯電影《混血王子的背叛》先至被講到。

呢個村莊喺山谷嘅底部，四面以陡峭嘅山脈為界，跟大漢果頓Great Hangleton嘅定居點相隔唔遠。山谷一邊嘅村莊上面有一座教堂、一個墓園同埋瑞斗府Riddle House，果度係貴族家庭瑞斗嘅前莊園，果度曾經係村裡面最好嘅一間屋。學生時代嘅湯姆·瑞斗，佢喺瑞斗府裡面殺死咗自己嘅老豆同埋阿爺阿嫲。瑞斗府第一次出現喺《火盃的考驗》裡面嘅開頭果陣，果度係瑞斗府嘅老花王法蘭克·布萊斯Frank Bryce被謀殺嘅地方；喺哈利·波特嘅呢個年代，果度已經破舊到俾藤蔓覆蓋住，仲被認為係富豪為咗稅務嘅目的而揸住，就算實際上係防止佢被賣出去或者被拆。

喺山谷嘅另一邊，唯一嘅住所似乎淨係得屬於純血家族──薩拉札‧史萊哲林Salazar Slytherin嘅反社會後裔──岡特家族The Gaunts嘅一間爛溶溶嘅平房，岡特家族間屋仔座落喺爬出山谷之後沿住著蜿蜒道路旁邊嘅一片細細哋嘅灌木林裡面。佛地魔同哈利‧波特就係喺小漢果頓嘅墓地裡面對戰。

小惠因區

小惠因區水蠟樹街4號。

小惠因區Little Whinging係英國倫敦以南，位於薩里郡嘅一個虛構嘅城鎮。美國小說家兼學者艾莉森·盧裡喺《紐約書評》裡面指出，小惠因區呢個名係「美國讀者可能聽唔明嘅笑話：我哋（美國人）會將果個地方叫做『小嗚嗚Little Whining』。」

小惠因區水蠟樹街4號係德思禮一家The Dursleys住嘅地方，哈利自從15個月大就同佢嘅佩妮姨媽、威農姨丈同埋表哥達力喺果度一齊住，佢之前就同父母住喺高錐客洞；不過，自從佢開始喺霍格華茲讀書之後，佢留喺果度嘅時間並唔多，就算佢喺暑假期間好唔情願咁返去度假。係人都知，水蠟樹街4號住所嘅樓上有四個睡房，樓下就至少有一個浴室、一個廚房、一個客廳，同埋樓下嘅一個溫室（除咗樓梯底櫥櫃下面用嚟擺雜物嘅房）。

哈利·波特嘅房。

這條街嘅名所指嘅係包圍好多郊區花園嘅樹籬，呢個就正如羅琳鍾意圍籬嘅諗法一樣。德思禮嘅屋企喺小說同電影入面都係喺一個體面而沉悶無聊嘅街區，啲鄰居排斥哈利，哈利亦都因為佢記得自己喺果度受到嘅殘酷待遇而討厭同鄙視小惠因區。小說入面德思禮一家嘅鄰居──費太太就住喺同水蠟樹街4號相隔兩條街嘅距離（電影入面嘅馬路對面），由於佢係鳳凰會嘅爆竹成員，鄧不利多就安排佢喺小惠因區睇住仲好細個嘅哈利。鄧不利多喺《鳳凰會的密令》裡面透露咗哈利一定要至少每年返去一次嘅原因，果個係因為哈利阿媽喺犧牲自己條命嚟救佢果陣所俾佢嘅保護。呢個舉動令「古老嘅魔法」發揮咗作用，咁樣意味住只要哈利同佢阿媽有血緣關係嘅人（呢個就係佢嘅佩妮姨媽）一齊生活嘅話，佢就永遠唔會受到傷害；呢種魔法喺哈利17歲之前唔會失效。

《神秘的魔法石》入面水蠟樹街嘅拍攝地點實際上係喺倫敦以西25英里（40公里）伯克郡布拉克內爾Bracknell嘅一個叫做「12 Picket Post Close」嘅真實市區嚟拍攝。對於跟住之後喺水蠟樹街拍嘅所有電影場景，拍攝都係喺華納兄弟利維斯登工作室嘅一個搭建嘅複製嘅佈景上面進行，事實證明呢個仲平過拍外景。呢個企喺度嘅佈景喺長達十年嘅《哈利波特》系列電影拍攝歷史入面一直喺入面用，仲喺Google地圖嘅工作室鳥瞰圖入面仲仍然可以睇到。呢個同其他《哈利波特》嘅佈景仲有道具都座落喺同一個位置。

馬份莊園

馬份莊園Malfoy Manor係貴族家庭馬份嘅莊園大宅，佢哋嘅成員包括魯休思·馬份、水仙·馬份，同埋佢哋嘅獨生仔跩哥·馬份，後嚟喺第五輯小說提到佢哋嘅成員仲包括埋水仙嘅家姐—貝拉·雷斯壯。馬份莊園位於英國威爾特郡嘅某個地方。馬份家嘅一切家務都係由家庭小精靈多比照顧，直到哈利·波特出術去呃魯休思·馬份將多比釋放。果個莊園被認為係巫師世界裡面最富有嘅房地產之一。

跩哥曾經喺《消失的密室》入面透露莊園嘅客廳下面有佢哋自己嘅密室，果度係用嚟喺魔法部突擊搜查莊園果陣時，用嚟隱藏有價值嘅黑魔法人工製品；佛地魔喺《死神的聖物》入面至少一次利用馬份莊園嚟做大本營。馬份一家被囚禁喺自己屋企，佢哋仲對自己嘅性命安全覺得非常咁真實嘅恐懼。幾個被囚禁嘅人喺《死神的聖物》入面按照住佛地魔嘅命令被關押喺地下室，包括：露娜·羅古德、丁·湯瑪斯、古靈閣銀行嘅拉環，同埋奧利凡德魔杖店嘅店主兼魔杖製作師奧利凡德先生。當死拿錢將哈利、榮恩同妙麗抓咗之後，就將佢哋帶咗去馬份莊園。哈利一班人同食死人對戰，佢哋喺家庭小精靈多比嘅幫助之下走甩咗出去。馬份家果四個人跟住就俾佛地魔軟禁，直至後嚟佢哋同其他食死人一齊參與霍格華茲大戰。

馬份莊園嘅靈感係嚟自打比郡嘅克域莊園Hardwick Hall，部分場景仲喺果度拍嘅，果個係一間英國鄉村別墅，而家由英國國民信託管理。

古里某街12號

古里某街12號No.12, Grimmauld Place係位於倫敦嘅一個大宅嘅地址，果個大宅係屬於一個古老而純血嘅巫師家族—布萊克Black，佢嘅雙關語係「陰森嘅老地方」。呢個地方喺《鳳凰會的密令》第一次出現，佢嘅建築結構係一座佐治時代建築嘅聯排屋。

古里某街12號大宅其中一個房間嘅牆上面掛住布萊克家族譜系圖嘅掛毯，同埋天狼星·布萊克嘅阿媽—沃布爾加·布萊克Walburga Black嘅一幅迷人肖像。果度有一隻好老同深度瘋狂嘅家庭小精靈怪角，佢對布萊克夫人嘅肖像非常忠心。大宅裡面仲有其他布萊克家族成員嘅肖像，包括曾經係布萊克家族之首兼曾經係霍格華茲裡面最唔受歡迎校長嘅菲尼亞斯·奈傑勒斯·布萊克Phineas Nigellus Black。大宅裡面嘅樓梯排列住被斬頭tau2嘅前家庭小精靈嘅頭顱，有啲就被鑲嵌喺埲bung6牆上面。

果度採取咗好多安全措施，包括果度被施放咗反現影術咒語Anti-Apparition Charm，而且果個地點係唔可以被定位嘅，亦都唔能夠喺地圖上面搵到；佢哋成座樓都受到赤膽忠心咒Fidelius Charm嘅保護，能夠阻擋其他闖入嘅人同埋假扮成麻瓜嘅人。喺第七輯小說入面，值得注意嘅係，佢哋嘅鄰居好耐之前達成咗一項協議：11號嘅屋能夠一直延伸去到13號嘅屋。果度同任何魔法住宅一樣咁安全，仲可以容納大量嘅人。天狼星基於呢個原因而願意將佢借俾鳳凰會，後嚟揀中咗做鳳凰會重組之後嘅總部。呢間屋淨係得有魔法能力嘅人先至可以睇到佢，而且只有守密人Secret Keeper本人先至可以話果個位置俾人知。呢個大宅甚至唔會受由政變後嘅魔法部所強加嘅禁忌咒Taboo嘅影響，呢樣嘢係人都知，因為妙麗·格蘭傑喺大宅裡面至少一次提到佛地魔個名。

喺天狼星·布萊克被監禁喺阿茲卡班果12年裡面，呢間屋已經變得年久失修，隨着佢喺越獄之後喺第五輯小說入面返到屋企，佢發現果度而家係一片陰森嘅廢墟，周圍滿佈住灰塵、腐爛、魔法生物同各種危險嘢，是一個令人唔開心嘅居所。哈利、榮恩、妙麗同埋鳳凰會嘅每個成員在小說嘅進程入面逐漸將呢間屋恢復到適宜去住嘅狀態。喺《混血王子的背叛》入面，哈利喺天狼星過咗身之後根據佢嘅遺囑而繼承咗呢間大宅，就算佢後嚟將呢間屋捐贈俾鳳凰會（唔希望天狼星認為自己被困嘅地方有任何關係，同埋呢個地方喺佢過身之前一啲用處都無）。

呢個地方喺《死神的聖物》入面成為咗哈利、榮恩同妙麗匿埋嚟避開佛地魔嘅避難所。當佢哋三個試吓透過消影術喺魔法部走甩果陣，妙麗喺運用消影術嘅過程入面唔小心俾科班·牙克厲捉住咗，仲跟住佢哋一齊被送到去古里某街12號嘅布萊克大宅。咁樣就打破咗大宅入面嘅赤膽忠心咒，令到佛地魔嘅食死人大軍知道咗佢哋嘅位置，迫使哈利同佢啲朋友放棄再用果度。

古里某街12號嘅外觀係喺倫敦嘅克萊爾蒙特廣場果度拍嘅。

貝殼居

《死神的聖物》裡面嘅貝殼居。

貝殼居Shell Cottage係比爾·衛斯理同花兒·戴樂古喺《死神的聖物》裡面結咗婚之後住嘅地方。果個建築物實際上喺俯瞰康和郡錫特沃斯村village of Tinworth出面嘅海灘，而外景就喺威爾斯嘅彭布羅克郡海岸線國家公園裡面嘅清水西海灘取景。果度係哈利·波特、榮恩·衛斯理、妙麗·格蘭傑、露娜·羅古德、丁·湯瑪斯、奧利凡德先生同埋拉環佢哋喺家庭小精靈多比嘅幫助之下諗辦法利用消影術喺馬份莊園嘅禁錮入面走甩咗出嚟之後所去到嘅地方。佢哋喺果度用現影術嚟現影同匿埋。

家庭小精靈多比喺幫咗佢哋走甩之後犧牲咗，哈利、妙麗同榮恩用人類嘅方式將佢埋葬喺距離貝殼居無幾遠嘅花園入面，墓碑上面寫住「多比，一個自由嘅家庭小精靈，喺呢度長眠」。喺霍格華茲大戰入面，比爾成為咗佢自己同花兒嘅守密人Secret Keeper。

紡紗街

紡紗街Spinner's End係一條是麻瓜街道嘅名，賽佛勒斯·石內卜嘅老家就係座落喺呢度。呢條街被形容做幾條相同嘅磚房街之一。這條街道靠近一條污糟嘅河流，河岸上面周圍都係垃圾，附近有一座好高煙囪嘅磨坊，依佢周邊環境嘅描述嚟睇，呢度好可能就係賽佛勒斯·石內卜成長嘅地方，從而令呢個地方成為曲禾夫Cokeworth一樣嘅虛構小鎮。

石內卜屋企嘅前門打開咗就直接通去客廳，果度有一盞喺天花板上面垂落嚟昏暗嘅燭光吊燈，感覺就好似一個黑暗陰沉、爛傢俬、有軟墊牢房感覺嘅地方，客廳嘅牆壁度擺滿晒書。屋裡面有一道隱藏門，通去一條好窄嘅樓梯。

紡紗街第一次喺《混血王子的背叛》入面出現，當時貝拉·雷斯壯同埋水仙·馬份一齊去石內卜嘅屋企。喺《死神的聖物》入面透露，石內卜自細就住喺果度，佢同莉莉·波特仲有佩妮·德思禮就住喺同一個小鎮上面。

斜角巷

斜角巷Diagon Alley係一條位於倫敦虛構嘅高街High Street，巫師同女巫能夠喺呢度入到去巫師世界。佢係一個魔法世界嘅購物街同經濟樞紐，但果個地方喺麻瓜世界入面隱藏咗嘅。不過，如果果個麻瓜係由識得魔法嘅人陪埋一齊，又或者係需要陪同佢哋麻瓜出身仔女嘅話，佢哋就會獲准入去。巫師或女巫一切所需嘅魔法用品都好有可能喺斜角巷裡面搵到。

斜角巷嘅一個入口可經由倫敦查令十字路Charing Cross Road穿過一間巫師酒吧兼旅館——破釜酒吧The Leaky Cauldron行入去就到。破釜酒吧就喺書店同唱片舖之間，麻瓜係睇唔見嘅。如果要入去斜角巷，就一定要穿過破釜酒吧嘅後院，仲要敲打磚牆上面嘅一舊磚，透過三個向上同兩個交叉，數三次就在可以入去；不過喺電影裡面敲打磚牆上嘅窿周圍嘅五舊磚就可以打開通去斜角巷嘅大門。鑑於果個地區嘅繁忙性質，來往斜角巷嘅旅程通常可以用魔法嚟去到，例如係現影術或者呼嚕網絡Floo Network。呢兩種方法都係巫師世界嘅運輸方式。果條街仲包括提供各種魔法用品嘅舖頭，同埋由妖精經營嘅古靈閣銀行。

《哈利波特：消失的密室》嘅DVD包括咗斜角巷嘅影片，呢個顯然就係喺原始電影場景裡面拍出嚟嘅。喺第一輯電影裡面，破釜酒吧嘅入口係喺利德賀市場附近嘅牛頭通道Bull's Head Passage果度拍嘅；不過斜角巷喺第六輯戲入面插入去查令十字路，位置介乎喺書店同測量師嘅店面之間。

斜角巷Diagon Alley呢個名同對角線diagonally有近似嘅諧音，所以哈利喺第二輯小說同電影嘅開始果陣講錯咗呢個短語果陣，呢種情況就用嚟做咗劇情設置。

咿啦貓頭鷹商場

咿啦貓頭鷹商場Eeylops Owl Emporium係一個賣唔同品種嘅貓頭鷹同埋佢哋用品嘅地方，好似係貓頭鷹嘅雀籠同小食。舖頭裡面係一片昏暗嘅，充滿住輕柔嘅貓頭鷹叫聲同埋沙沙聲，仲閃爍住「寶石咁嘅明亮眼睛」。

喺《神秘的魔法石》裡面，魯霸·海格就係喺呢度買咗雪鴞嘿美Hedwig嚟送俾哈利‧波特做佢嘅11歲生日禮物。

伏林‧伏德秋雪糕店

伏林‧伏德秋雪糕店Florean Fortescue's Ice-Cream Parlour係由創始人兼店主伏林‧伏德秋Florean Fortescue主理，售賣各種雪糕同埋其他零食，舖頭外面有啲戶外餐枱俾客人坐低享用。哈利‧波特喺三年級之前嘅暑假喺果度過咗一段愉快嘅時間仲做晒啲功課。伏德秋先生親自幫佢完成學校論文，仲每半個鐘頭為佢提供免費嘅新地。每逢暑假就嚟結束果陣，哈利都會喺果度會合榮恩同妙麗。

伏林‧伏德秋喺《混血王子的背叛》入面失蹤咗，而佢嘅雪糕店就被木板封住，羅琳確認話伏林·伏德秋已經被謀殺咗。

華麗與污痕書店

華麗與污痕書店嘅櫥窗擺放住吉德羅‧洛哈嘅自傳《神奇的我》。

華麗與污痕書店Flourish and Blotts賣種類繁多嘅各種魔法書籍，應有盡有，包括霍格華茲課程嘅教科書，以及其他有普遍魔法興趣嘅書。書店後面有一個專門用嚟占卜嘅角落，占卜枱上面堆疊住好似係《預測不可預測的事：使自己免受衝擊Predicting the Unpredictable: Insulate Yourself against Shocks》、《破球：當命運轉壞時Broken Balls: When Fortunes Turn Foul》呢啲書，仲有一個擺放住《死亡預兆：當您知道最壞的情況即將來臨時該怎麼辦Death Omens: What to Do When You Know the Worst is Coming》呢本書嘅小型展示區。通常，書店嘅櫥窗裡面都會陳列住好似鋪路石板咁大嘅金色浮雕咒術書，但係書店喺《阿茲卡班的逃犯》入面，櫥窗前面掛住咗一個鐵籠，裡面擺滿幾百本海格作為霍格華茲三年級嘅奇獸飼育學教授而設置嘅呢啲邪惡教科書—《怪獸的怪獸書The Monster Book of Monsters》。為咗對付呢啲邪惡嘅教科書，被騷擾嘅書店經理無得唔戴住厚厚嘅手套嚟處理—佢用一支旋鈕嘅枴杖戳向佢哋，然後果啲書就會傾向於將對方互相撕裂。果個經理話佢哋買咗200本《隱形的隱形書The Invisible Book of Invisibility》果時，但呢啲書都被放錯咗地方，佢以為自己睇到咗最差嘅情況。

喺《消失的密室》裡面，名人作家吉德羅·洛哈喺哈利去買二年級教科書果日喺書店裡面為佢自己嘅自傳《神奇的我Magical Me》舉行新書簽名會，果個簽名會吸引咗大批粉絲（主要係中女）。與此同時，呢度亦都係魯休思·馬份靜靜雞將湯姆·瑞斗嘅日記放咗落去金妮·衛斯理嘅大釜裡面嘅地方，從而搞到《消失嘅密室》事件開始發生。

嬉戲與戲謔巫術惡作劇商店

嬉戲與戲謔巫術惡作劇商店Gambol and Japes Wizarding Joke Shop係專門賣各種巫師惡作劇商品嘅舖頭。

呢間舖頭喺《消失的密室》簡略咁提到，而弗雷同喬治·衛斯理仲有李·喬丹喺果度囤積咗唔少飛力博士嘅神奇水燃無熱煙火Dr. Filibuster's Fabulous Wet-Start, No-Heat Fireworks。

古靈閣巫師世界銀行

古靈閣巫師世界銀行嘅正面。

想知多啲：哈利波特世界嘅經濟

古靈閣巫師世界銀行Gringotts Wizarding Bank，巫師世界裡面嘅人簡稱做古靈閣Gringotts，呢度係《哈利波特》小說同電影系列裡面唯一已知嘅魔法世界銀行，主要由妖精管理。古靈閣銀行係一座雪白色嘅建築物，聳立喺附近舖頭之中，佢位於鄰近斜角巷同夜行巷之間嘅交匯處。客戶需要通過一組青銅色嘅大門，然後推郁一道銀色大門先至入到去銀行嘅大廳。主樓層鋪咗大理石，仲有張一路沿住樓層嘅長度嚟延伸嘅長櫃枱，啲妖精職員在呢度背後做啲好似係數硬幣同埋更新帳戶分類帳嘅工作。喺銀行裡面，巫師同女巫客戶會將佢哋嘅金錢同其他貴重嘢存放喺一個非常之複雜同保護嘅保安措施非常之強大嘅保險庫裡面。果個保險庫位於倫敦嘅地下伸延去到幾英里之外，仲可以透過乘坐沿住軌道高速滑行嘅魔法導航拉車沿着粗糙嘅岩石通道去到佢所屬嘅保險庫。古靈閣仲提供麻瓜同巫師世界嘅貨幣兌換服務。

古靈閣巫師世界銀行。

當魯霸·海格喺哈利第一次去到古靈閣果陣同佢講，指如果有人試吓打劫古靈閣嘅話，（咁佢）肯定係發神經。啲妖精對佢哋保管嘅金錢同貴重物品有好強嘅佔有慾，佢哋會不惜一切代價來保護佢，令佢哋成為魔法世界貴重物品嘅理想守護者。。另外，根據海格嘅講法，古靈閣被認為係除咗霍格華茲之外「世界上保存嘢最安全嘅地方」。

打開保險庫嘅方法有幾種：大多數嘅金庫，就好似係哈利·波特果款，可以使用金鎖匙仔去開；對於更高安全性嘅果啲保險庫，佢嘅門上面可能有各種魔法結界或者其他措施。例如係鄧不利多嘅713號保險庫嘅大門，裡面曾經短暫咁擺過魔法石，佢一定要經過由古靈閣妖精嘅撫摸認證，然後某種物質會溶化嚟去俾使用者入去金庫裡面。如果係古靈閣妖精以外嘅人掂到金庫大門嘅話，果個人將會被吸到去金庫嘅某個地方，大約每10年先會檢查一次係咪有賊人被困。古靈閣嘅最底層係銀行裡面最大嘅保險庫，由龍去守衛，裡面仲有一個地下瀑布叫做「防賊瀑布Thief's Downfall」，呢個作用係透過推冧經過佢嘅拉車嚟將拉車上面嘅人倒晒出嚟，仲清洗晒潛在搶劫者所用嘅偽裝魔咒。

喺《神秘的魔法石》入面提到，古靈閣嘅713號保險庫擺咗一個用紙包住嘅包裹仔，裡面係一塊魔法石，鄧不利多派海格喺佢護送哈利果陣攞埋呢樣嘢返去。奎若教授喺當日稍後時間按佛地魔嘅命令闖入去果個保險庫，雖然奎若並無攞到果個魔法石，但係呢次闖入嘅消息震驚咗成個巫師世界，因為古靈閣被搶劫係巫師世界聞所未聞嘅事。拉環聲稱由於果個保險庫被清空咗，果度所需要嘅保護就係因為咁而減少咗。喺《死神的聖物》裡面，哈利、榮恩同妙麗喺拉環唔情願嘅幫手之下闖入去食死人貝拉·雷斯壯嘅保險庫裡面，而佛地魔嘅其中一個分靈體（赫夫帕夫嘅金盃）收埋咗喺果度。不過，當佢哋三個闖入到貝拉·雷斯壯嘅保險庫之後，佢哋好驚訝咁發現裡面各種各樣嘅寶藏被施咗複製咒Gemino Curse同埋烈火咒Flagrante Curse，每件寶物當被掂過之後都會不斷咁自我複製仲變得熾熱到燃燒起上嚟。佢哋三個後嚟帶住佛地魔嘅果個分靈體走佬，仲爬上咗作為保險庫保安嘅一條半盲龍嘅背脊騎住佢嚟走甩咗。

雖然古靈閣嘅員工主要都係包括拉環Griphook同埋雷那Ragnok咁樣嘅妖精，但係人都知銀行裡面都有人類嘅職員，但好明顯唔係用喺銀行和會計服務嘅工作，例如比爾·衛斯理喺埃及嘅古靈閣擔任喺古埃及墳墓同金字塔入面檢索人工製品嘅解咒師Curse-breaker；花兒·戴樂古喺參加《三巫鬥法大賽》之後為咗提高佢自己嘅英語能力而喺古靈閣搵到一份兼職工作。喺《死神的聖物》裡面提到，花兒喺哈利佢哋三個闖入古靈閣果陣擔任銀行嘅巫師警衛。

夜行巷

夜行巷Knockturn Alley喺文字上有「夜行性」嘅戲稱，果度係同斜角巷呈斜角嘅一條黑鼆mang1鼆、爛溶溶又污煙瘴氣嘅巷仔，果度係黑巫師成日住而麻瓜唔入得嘅地方。夜行巷兩邊有好多黑巫師成日幫襯嘅黑魔法用品舖頭，裡面最出名嘅係專門賣啲邪惡同危險嘢嘅舖頭—波金與伯克氏商店。哈利曾經喺《消失的密室》電影版裡面用呼嚕粉去斜角巷果陣，佢因為太緊張而唔小心將「斜角巷」講咗做「斜角廊」（小說裡面無講明佢嘅發音），海格喺果陣因為幫霍格華茲嘅捲心菜田去搵食肉除蟲劑而喺果度出現而遇到哈利，仲將哈利差啲俾一個啲牙生滿晒青苔仲攞住指甲托盤嘅巫婆手上救返出嚟，仲將佢帶返去斜角巷。佢哋兩個喺果度遇到妙麗，海格於是將佢哋兩個帶去衛斯理家。

波金與伯克氏商店

波金與伯克氏商店Borgin and Burkes係一間喺夜行巷專門賣黑魔法藝術品嘅古董舖頭。果間舖頭由波金先生Mr. Borgin同加拉塔克·伯克Caractacus Burke兩個人共同擁有，而淨係得波金先生係唯一曾經喺《哈利波特》系列入面出現舖頭嘅擁有人。呢間舖頭賣好多危險同黑暗嘅人工製品，例如係受詛咒嘅蛋白石頸鏈、光榮之手，同埋跩哥·馬份喺《混血王子的背叛》入面用嚟穿越去到霍格華茲嘅半組消失櫥櫃套裝。據講佛地魔喺1940年代中期喺離開霍格華茲之後曾經喺波金與伯克氏商店做過一段好短嘅時間。

破釜酒吧

破釜酒吧

破釜酒吧The Leaky Cauldron係一間喺倫敦查令十字路嘅麻瓜街道入面嘅巫師酒吧兼旅館，呢間酒吧兼旅館喺1500年由第一任老板娘黛西·多德里奇Daisy Dodderidge（1467-1555）創立，作為「斜角巷同非巫師世界之間嘅門戶」。作為斜角巷嘅入口，破釜酒吧係一個為巫師同女巫提供食物、飲料同出租房間嘅地方，佢亦都會招待一啲喺麻瓜世界入到去斜角巷嘅麻瓜出身者同埋佢哋嘅父母。而家嘅旅館老闆兼酒保係一個叫做湯姆Tom嘅巫師。

旅館嘅主樓層入面設有酒吧、幾個私人客廳同一個大飯廳，喺較高嘅樓層入面有好多房可以出租；哈利曾經住喺房裡面有一塊識得講嘢嘅鏡嘅11號房間，同埋俾佢睇到查令十字路嘅窗口。從外地嚟到倫敦做購物之旅嘅果啲人成日喺破釜酒吧度流連。呢間巫師酒吧兼旅館係麻瓜出身者同埋佢哋嘅父母入去斜角巷嘅一種方式（直到佢哋霍格華茲寄出嘅第一封取錄信之前，佢哋都無魔法知識或者係入去斜角巷嘅方法）。

破釜酒吧嘅後欄通去一個凍冰冰嘅庭院仔，需要入去斜角巷嘅人一定要敲三下某幾塊特定嘅磚嚟到打開通去斜角巷嘅路徑。

摩金夫人各式長袍店

摩金夫人各式長袍店Madam Malkin's Robes for all Occasions係喺華麗與污痕書店旁邊嘅一間服裝舖，而摩金Malkin呢個詞語係個臭檔阿婆嘅古老術語。果間舖頭賣各種唔同嘅長袍同其他服裝，包括霍格華茲所需要嘅純黑色工作長袍，同埋禮服長袍。摩金夫人同佢啲助手喺舖頭裡面會幫客人度身嚟訂製啱身嘅長袍。

哈利同跩哥曾經喺摩金夫人嘅舖頭裡面見過兩次：喺《神秘的魔法石》裡面，哈利第一次遇到同佢自己同齡嘅第一個巫師。哈利因為佢對魔法世界嘅好多方面仍然好唔熟悉，所以佢對跩哥嘅提問覺得好困惑；佢哋嘅第二次見面喺《混血王子的背叛》，果次係佢哋兩個六年級開始之前，果次見面更加令人唔開心，仲喺跩哥同佢阿媽好厭惡咁走咗去之前，果個氣氛好快就升級去到幾乎決鬥嘅層面。

奇獸動物園

奇獸動物園Magical Menagerie係一間賣各種魔法生物同寵物嘅舖頭，除咗賣魔法生物之外，仲會提供有關動物護理同健康嘅建議。果間舖頭喺斜角巷南側，果度非常之擠逼，因為每一寸嘅地方都掛滿晒密密麻麻嘅籠，搞到果度又嘈又臭。奇獸動物園裡面賣嘅各種動物包括：好大隻嘅紫色蟾蜍、火螃蟹、有毒嘅橘色蝸牛、一隻可以變形做絲質禮帽嘅肥白兔、各種顏色嘅貓、渡鴉、蒲絨絨、個殼上面鑲滿寶石嘅大烏龜、貓頭鷹，仲有一籠可以用佢哋嘅尾嚟去玩跳繩遊戲嘅油光水滑聰明黑老鼠...等等。

當哈利、榮恩同妙麗喺《阿茲卡班的逃犯》裡面參觀果間舖頭果陣，一個戴住好厚黑色眼鏡嘅女巫幫佢哋。榮恩喺果度幫佢自己嘅寵物老鼠斑斑Scabbers買咗老鼠強身劑，而妙麗喺果度買咗佢嘅混種獅尾貓half-Kneazle—薑黃色嘅歪腿Crookshanks。

奧利凡德魔杖店

奧利凡德魔杖店上面嘅櫥窗。

奧利凡德魔杖店Ollivanders係斜角巷入面唯一嘅魔杖專賣店，舖頭嘅門牌上面髹咗一個金色字母嘅招牌標誌，上面寫住：「奧利凡德魔杖店：自公元前382年以來嘅精美魔杖製造者Ollivanders: Makers of Fine Wands since 382 BC.」嘅標語，而果個金色字母標語嘅油漆正喺度剝落緊。果間舖頭由老闆兼魔杖製作者加里克·奧利凡德Garrick Ollivanders主理同經營。唯獨係俯瞰斜角巷果邊嘅櫥窗展示嘅係一支擺咗喺一個褪咗色嘅紫色咕𠱸上面嘅魔杖，而櫥窗外面佈滿晒塵埃。舖頭裡面擺咗無數個載住魔杖嘅窄盒，果啲盒好整齊咁由地面堆到上到天花板上面。舖頭裡面仲有凳腳細長嘅一張凳（當海格坐低果陣整爛咗）。

奧利凡德魔杖店嘅店主—加里克·奧利凡德Garrick Ollivanders係個白頭髮同淺色眼珠嘅老人家（電影裡面由莊·赫特飾演），佢會為啱啱入學嘅巫師同女巫製作同賣魔杖，亦都會喺佢哋嘅舊魔杖斷咗或者壞咗果陣時製作同賣魔杖俾佢哋。大部分學生嘅魔杖都係喺呢度賣出去，奧利凡德先生亦都能夠記得佢自己所賣出去嘅每一支魔杖。奧利凡德先生為咗確定去幫巫師或女巫揀到最好嘅魔杖，佢會去量度使用者身體嘅每個部分（例如哈利·波特嘅情況，佢會去度吓哈利鼻哥窿之間嘅距離），然後檢查所揀嘅各種魔杖對買家嘅反應，佢將呢個過程叫做「魔杖揀選佢哋嘅巫師the wand choosing the wizard」。

哈利嘅第一支魔杖就係喺呢度買嘅，而佛地魔嘅都係，佢哋兩個嘅魔杖同樣都係由佛客使嘅尾羽毛製成，而佛地魔就用佢自己嘅魔杖嚟殺死咗哈利嘅父母。佛地魔喺《混血王子嘅背叛》入面命令食死人去綁架奧利凡德先生嚟試吓發現更多關於佢自己嘅魔杖同哈利魔杖之間嘅聯繫，而奧利凡德魔杖店就因為奧利凡德先生嘅失蹤而閂咗門。哈利·波特喺《死神的聖物》裡面將奧利凡德先生救咗出嚟。

帕特奇大釜店

帕特奇大釜店Potage's Cauldron Shop，佢嘅位置距離破釜酒吧嘅入口非常之近。根據舖頭外面嘅標誌，呢間舖頭賣唔同種類同埋晒士size嘅大釜，包括咗：金、銀、銅、黃銅、白鑞、自己攪拌同埋折得埋嘅大釜。霍格華茲要求佢哋嘅學生擁有一個2號嘅白鑞大釜（就好似《神秘的魔法石》提到嘅書單列嘅咁樣）。

優質魁地奇用品商店

優質魁地奇用品商店Quality Quidditch Supplies，專門賣飛天掃把同埋魁地奇嘅相關用品。果間舖頭嘅櫥窗成日吸引住一啲後生仔顧客用啲好恨又眼甘甘咁啤住佢哋嘅產品。櫥窗裡面展示住佢哋最出名嘅產品──叫做「光輪2000Nimbus 2000」同埋「火閃電Firebolt」嘅掃把，「火閃電」係國家級魁地奇比賽所用到嘅掃帚，職業聯賽都會用到佢。哈利最終擁有過上述呢兩件產品，分別由麥教授喺《消失的密室》所送嘅「光輪2000」，同埋由天狼星·布萊克喺《阿茲卡班的逃犯》最後用匿名嘅方式送俾哈利嘅聖誕禮物。「火閃電」亦係哈利喺三年級之前嘅暑假一直好恨又眼甘甘咁啤住櫥窗裡面全新型號嘅掃把，不過佢嘅價錢只能夠喺問到果陣先至會知道；而榮恩就曾經好恨得到舖頭裡面提供嘅成套查得利砲彈隊Chudley Cannons嘅長袍。

斜角巷文具用品店

喺斜角巷嘅文具舖。

斜角巷文具用品店Scribbulus shop係喺優質魁地奇用品商店隔離，呢間舖頭賣一啲羽毛筆、墨水同埋羊皮紙。據說，哈利第一次去到斜角巷買霍格華茲所需用品果陣第一次遇到跩哥·馬份，哈利喺佢哋見面後心情覺得有啲低落，但係當佢喺呢間舖頭裡面見到一種變色墨水之後，佢嘅心情就變得好返好多。

蛞蝓與寄生蟲藥房

喺斜角巷嘅蛞蝓與寄生蟲藥房。

蛞蝓與寄生蟲藥房Slug & Jiggers Apothecary係一間魔藥嘅藥材舖，佢哋賣磅重磅、魔藥同製作魔藥嘅成分。呢間舖頭相當迷人，不過裡面陣味好臭好難聞（壞雞蛋同爛白菜混合物嘅氣味）。舖頭裡面嘅嘢包括咗天花板上面懸掛住一串串嘅獠牙串同埋咆哮嘅爪，架上面擺咗啲草藥罐、乾燥咗嘅根同埋閃令令嘅粉末，仲有地板上面有一桶桶黐chi1𥹉𥹉nap9嘅嘢。哈利成日喺果度買魔藥成分嘅原材料仲有佢嘅秤。

一啲可用嘅魔藥成分包括銀色嘅獨角獸嘅角、閃閃發光嘅黑甲蟲眼，同埋龍肝。

攤檔仔

斜角巷除咗有好多商舖，仲設有一啲攤檔仔Stalls，賣各種各樣嘅魔法物品、糖果同埋啲平價小飾物。好多巫師同女巫喺《混血王子嘅背叛》試圖利用啲人對佛地魔返生所帶嚟嘅恐懼而從中獲利。佢哋開設一啲攤檔仔嚟賣護身符同埋其他物品，據講可以保護你唔洗受到催狂魔、狼人同埋陰屍嘅侵害。不過，呢啲「黑魔法保護」嘅攤檔仔都係非法嘅，仲好可能係騙局。亞瑟·衛斯理就係負責去捉呢啲攤檔仔店主嘅魔法部職員。

何紳與華邊

何紳與華邊Twilfitt and Tattings係喺斜角巷南側嘅一間巫師服裝舖，呢間舖頭英文名裡面嘅「Twilfitt」嘅意思明顯就係「it will fit」，而「tatting」就係指梭結花邊。客人可以喺呢度買黑色、綠色、啡色嘅絨面禮帽、黑色、藍色、綠色嘅巫師尖頂帽，同埋紅色、綠色、藍色帶搭扣嘅巫師尖頂帽。跩哥·馬份某次喺摩金夫人果度撞到哈利·波特、榮恩·衛斯理同妙麗·格蘭傑，跩哥嘅阿媽水仙·馬份就帶住佢個仔粗魯咁離開咗舖頭，仲大大聲咁話自己更加鍾意何紳與華邊。喺水仙·馬份嘅語氣入面知道，暗示住何紳與華邊稍微高檔些少；水仙·馬份曾經喺《混血王子的背叛》裡面提到，因為哈利·波特、榮恩·衛斯理同埋妙麗·格蘭傑馬份家族主要因為佢血統而睇唔起嘅喺度，所以水仙·馬份指佢自己會喺果度買嘢而唔會去摩金夫人果邊。

維澤埃克魔法用品店

位於斜角巷嘅維澤埃克魔法用品店。

維澤埃克魔法用品店Wiseacre's Wizarding Equipment係一間喺斜角巷北側嘅舖頭，果度賣巫師世界入面所用各種各樣嘅裝置，例如係望遠鏡、月球儀同埋沙漏。哈利曾經喺呢度買咗佢嘅第一支望遠鏡。

衛氏巫師法寶店

内文：衛氏巫師法寶店同衛氏巫師法寶店 § 產品

衛氏兄弟巫師法寶店Weasley's Wizard Wheezes係弗雷同喬治·衛斯理喺《混血王子的背叛》嘅夏天創辦嘅笑話舖，呢間舖頭專門賣佢哋兩個發明嘅惡作劇產品，仲有一啲麻瓜魔術用品，同埋關於防禦術魔法嘅嘢。

當衛斯理孖仔仲係霍格華茲嘅學生果陣就已經受到啟發，開發咗唔少嘅惡作劇產品，例如係佢哋兩個幫啲同學用嚟詐病去逃課嘅糖。喺《火盃的考驗》裡面，佢哋兩個最初喺洞穴屋嘅屋企自己房裡面做研發嘅工作，作為佢哋兩個經營嘅校園公司仔，佢哋最初由提供貓頭鷹郵遞服務owl-post service嘅方式嚟展開佢哋銷售商品嘅郵購業務。為咗籌集開舖嘅資金，衛斯理孖仔就將佢哋自己嘅全部積蓄都押晒落去同魯多·貝漫嘅賭注度，去賭魁地奇世界盃賽嘅賽果。佢哋後嚟雖然贏咗，但係貝漫呃佢哋將矮精靈嘅金幣俾佢哋，果啲金幣喺幾個鐘頭之後就消失晒。

喺《混血王子的背叛》嘅夏天，弗雷與喬治喺霍格華茲畢業離校的初期得到咗哈利喺三巫鬥法大賽入面嘅獎金嚟做佢哋嘅啟動資金，佢哋仲搵到斜角巷93號嘅舖位，喺果度開咗一間流行惡作劇玩意嘅舖頭仔，賣各種開玩笑同惡作劇嘅玩意、新穎而有用嘅發明同埋過癮嘅糖果。

衛氏巫師法寶店嘅貓頭鷹郵遞服務後嚟發展到用呢個服務嚟送貨，《預言家日報》都用咗呢項服務嚟派報紙，呢項服務後嚟被各種企業用嚟將佢哋嘅產品交付俾買家。事關衛氏巫師法寶店嘅商品成為咗霍格華茲嘅違禁品，所以弗雷同喬治將啲商品扮成香水同咳藥水喺學校管理員飛鼠嘅眼皮底下就咁樣走私去霍格華茲。

喺《死神的聖物》裡面，由於食死人密切咁關注住衛斯理家嘅一舉一動，所以搞到衛氏巫師法寶店無得唔暫時閂門，不過弗雷同喬治繼續用貓頭鷹郵遞服務嚟管理同繼續經營佢哋嘅業務。作者羅琳喺《哈利波特：死神的聖物》出版之後，佢喺一個專訪裡面話喬治喺弗雷過咗身之後重開咗斜角巷嘅舖頭因為舖頭已經成為咗一棵好大嘅搖錢樹，而接受緊正氣師訓練嘅榮恩喺魔法部嘅工餘時間都會喺放咗工之後去到舖頭度幫手。

活米村

活米村Hogsmeade係英國唯一一個淨係由巫師、女巫同埋其他魔法生物居住嘅定居點，亦都係英國內唯一無麻瓜嘅地方。呢個地方喺霍格華茲嘅西北方，由中世紀巫師木透克羅夫特嘅漢吉斯Hengist of Woodcroft創立嘅一個魔法村落，佢為咗逃避諾森伯倫郡麻瓜對巫師嘅迫害而走佬去到蘇格蘭。佢喺活米村裡面嘅好多建築都反映咗佢嘅中世紀起源；果條村以佢哋傾斜嘅中世紀房屋而出名，裡面最出名嘅係由漢吉斯屋企故居遺址上面嘅建成嘅古老旅館三根掃把旅館Three Broomsticks，果度都係以1612年英國妖精叛亂嘅戲劇性巫師事件做背景旅館上層嘅房係魔法部用嚟做平息高地叛亂嘅總部。活米村主要由一條高街High Street嘅單一通道貫穿，大部分嘅舖頭同魔法地點都喺果度；不過，喺主幹道分支出嚟嘅一啲仲未命名嘅巷仔都係啲歷史名勝嘅所在地，例如係豬頭酒吧Hog's Head pub同埋泥腳夫人茶館Madame Puddifoot's Teashop。

最近霍格華茲嘅火車站係以活米村嘅名稱嚟命名，果個火車站係霍格華茲特快列車往返倫敦路線嘅終站點。霍格華茲嘅學生喺二年級開始就可以由9¾月台去搭霍格華茲特快列車去終點站去到活米村，學生去到果個站之後可以步行或者再搭由騎士墮鬼馬拉郁嘅馬車往返霍格華茲；至於三年級以上嘅學生，只要佢哋有父母或者監護人簽署嘅同意書回條，就可以獲准喺預定嘅期間同無人陪嘅朋友去到活米村遊覽、買嘢同交流。啲學生主要成日去村裡面嘅高街，同埋幫襯果度嘅專賣店同酒吧。除此之外，佢哋可以繼續向前行去徘徊嚟睇吓臭名昭著嘅尖叫屋。

截至2004年嘅《哈利波特：阿茲卡班的逃犯》，活米村喺呢個系列嘅前作都仲未出現過。呢個之後，呢條村喺《哈利波特：鳳凰會的密令》、《哈利波特：混血王子的背叛》同埋《哈利波特：死神的聖物2》裡面再出現。喺所有活米村嘅場景裡面，可以睇到嘅係果度俾厚厚嘅積雪冚住咗。

德維與班吉禮品店

德維與班吉禮品店Dervish and Banges係喺活米村高街盡頭嘅一間銷售同維修魔法裝置嘅舖頭。

風雅氏高級巫師服飾商店

風雅氏高級巫師服飾商店Gladrags Wizardwear係一間賣衫褲嘅店舖，果間舖頭喺倫敦同巴黎都有其他分店。舖頭裡面充滿古怪嘅商品，例如係專門生產奇怪同埋唔尋常嘅襪，哈利·波特為咗感謝家庭小精靈多比喺三巫鬥法大賽嘅第二個任務中嘅幫手，所以佢曾經去到果度幫多比選購咗一系列古怪嘅襪。

活米村火車站

活米村火車站Hogsmeade Station係距離霍格華茲最近嘅火車站，喺倫敦英皇十字車站開出嘅霍格華茲特快列車就可以去到呢度。戲裡面嘅活米村站場景係喺北約克荒原鐵路嘅高斯蘭火車站果度拍攝，果個站建喺1865年，並且幾乎無變過，呢個係服務北約克荒原高斯蘭村落居民主要嘅交通工具之一。根據羅琳嘅插圖，活米村站並唔係喺活米村入面，但係佢嘅位置係喺黑湖The Black Lake嘅對面。

活米村郵局

活米村郵局Hogsmeade Post Office係巫師世界嘅通訊中心，就好似麻瓜嘅郵局一樣。郵局裡面至少有200-300隻貓頭鷹，呢啲貓頭鷹負責向巫師世界嘅人派送郵件，佢哋由體型大嘅灰色烏林鴞去到體型細到可以企喺掌心嘅角鴞淨係用喺本地交付都應有盡有。郵局裡面嘅貨架會根據目的地嘅派送速度嚟進行唔同嘅顏色編碼，而呢啲貓頭鷹能夠喺彩色編碼嘅貨架上面發出高而長嘅聲再向下飛嚟派送郵件。

豬頭酒吧

豬頭酒吧The Hog's Head係除咗三根掃把旅館Three Broomsticks之外，活米村嘅另一間酒吧。直至果個系列最後一輯小說才透露，呢間酒吧嘅老闆兼酒保係霍格華茲嘅校長阿不思·鄧不利多嘅細佬——阿波佛·鄧不利多。酒吧前面嘅吊牌上面掛住一個被斬斷咗嘅公豬頭，佢嘅血濺到去周圍嘅白布上面。呢間酒吧本嚟就好污糟邋laat6遢taat3，地板上覆蓋住一層層嘅污垢，啲窗仲積滿晒污垢，幾乎無光線可以穿透入去。呢間酒吧成日吸引咗一啲比三根掃把旅館聲名狼藉嘅顧客，好多顧客為咗唔想被認出而將自己塊面遮起上嚟。呢間酒吧嘅主樓層係一間用嚟做酒吧嘅房，但樓上仲額外設有幾個客房。哈利留意到呢間酒吧裡面有一祲zam1濃烈嘅山羊氣味。

就算豬頭酒吧嘅聲譽唔好，不過果度都係哈利波特世界入面嘅幾項重要事件嘅發生場所：呢間旅館係魔法部喺1612年英國妖精叛亂果陣時嘅總部；喺哈利·波特出生之前嘅幾個月，先知西碧·崔老妮就正喺果度接受鄧不利多校長作為占卜學教授一職嘅面試果陣，向佢透露咗佛地魔同哈利有連結嘅果個預言，而石內卜就淨係偷聽到呢個預言嘅上半部分；呢度亦都係扮做僕人嘅佛地魔同海格賭錢而贏到非法龍蛋（蘿蔔Norbert）嘅地方；喺《哈利波特：鳳凰會的密令》入面，鄧不利多的軍隊嘅第一次會議都係喺呢度秘密咁進行。

喺《哈利波特：死神的聖物1》裡面，鄧不利多的軍隊喺萬應室成立佢哋嘅總部，而阿波佛·鄧不利多揭示咗一條通去霍格華茲萬應室嘅秘密通道，呢條秘密通道喺豬頭酒吧果邊嘅入口就隱藏喺阿不思同阿波佛嘅細妹——阿蕊安娜·鄧不利多Ariana Dumbledore幅畫嘅背後。喺霍格華茲大戰開始之前，呢條通道用嚟撤離學校裡面嘅未成年學生。鄧不利多的軍隊同鳳凰會嘅其他成員就喺豬頭酒吧裡面集合，然後透過呢條通道入到去霍格華茲城堡，嚟到去同佛地魔仲有佢嘅食死人作戰。

關於酒館嘅名「豬頭」，呢樣嘢所指嘅係一種古老嘅液體測量單位，呢個亦都可能係對莎士比亞嘅舞台劇《亨利四世》裡面嘅野豬頭酒館Boar's Head Tavern嘅引喻。同豬頭酒吧一樣，莎士比亞嘅呢間酒館都係一啲名聲唔好嘅人物出沒嘅地方。應該注意嘅係，距離J·K·羅琳喺蘇格蘭愛丁堡嘅住所唔夠一英里嘅地區，果度有一間叫做「豬頭The Hog's Head」嘅二手音樂舖。果間舖頭喺《哈利波特：神秘的魔法石》發行嘅四年之前就已經成立。

蜂蜜公爵糖果店

蜂蜜公爵糖果店Honeydukes Sweetshop係活米村裡面最受歡迎嘅一間糖果舖，舖頭成日都迫滿晒霍格華茲嘅學生，甚至係果間學校嘅教授都會偶爾嚟幫襯。舖頭裡面充滿住好多唔同種類而且滿眼所見都係好靚好美妙嘅零食同埋野生甜食，例如係酷酸果Acid Pops、柏蒂全口味豆子Bertie Botts Every Flavoured Beans、大鍋蛋糕Cauldron Cakes、血腥味棒棒糖Blood-Flavoured Lollipops、吹寶超級泡泡糖Drooble's Best Blowing Gum等等...仲有更多。

蜂蜜公爵糖果店嘅地窖裡面仲有一條通去霍格華茲城堡三樓走廊嘅秘密通道，果條秘密通道就喺格斯墨的岡希爾達Gunhilda of Gorsemoor嘅大石雕像嘅後面，哈利·波特喺《阿茲卡班的逃犯》裡面就係利用呢個入口嚟潛入去活米村。

泥腳夫人茶館

泥腳夫人茶館嘅茶飲同埋蛋糕。

泥腳夫人茶館Madam Puddifoot's Tea係喺活米村高街嘅一條巷仔上面，果度係一間霍格華茲嘅小情侶出去拍拖果陣最鍾意去嘅小茶館。果度被形容做一個所有嘢都係以蝴蝶結或褶邊裝飾住嘅狹窄又瀰漫住蒸汽嘅地方，果度嘅每張小圓枱都設定做兩人枱。每逢情人節果陣時，泥腳夫人都會請嚟浮動嘅金色小天使向光臨茶館嘅事一眾情侶拋擲粉紅色嘅五彩紙碎。喺《哈利波特：鳳凰會的密令》入面，哈利同張秋喺呢度慶祝情人節。

寫字人羽毛筆店

寫字人羽毛筆店Scrivenshaft's Quill Shop係賣一系列嘅巫師文具用品，例如係各種羽毛筆、羊皮紙、信封、墨水同印章......等等霍格華茲學生所需要嘅文具用品。舖頭裡面同時亦都有賣彩虹墨水，或者係超大羽毛筆等等呢啲比較特殊嘅商品，但係往往當啲學生想買呢啲「特殊嘅羽毛筆」果陣，佢哋會比較偏好去到桑科嘅惡作劇商店去買笑話羽毛筆或者糖絲羽毛筆。喺《鳳凰會的密令》裡面，妙麗喺果度買咗一支新嘅羽毛筆。

尖叫屋

尖叫屋Shrieking Shack係一間喺活米村郊區嘅屋，佢就喺村莊上方唔遠嘅地方，不過兩者之間嘅距離好遠。呢間屋外面有一個植物生得過而且雜草叢生嘅花園，佢拉上式嘅窗都用木板封晒起嚟，它被形容做「即使喺日頭都有啲俾人毛骨悚然嘅感覺」。

尖叫屋透過埋藏喺渾拚柳Whomping Willow下面嘅秘密通道嚟同霍格華茲相連，果棵植物係專門為咗隱藏條秘道而種嘅，而入去渾拚柳樹底下嘅窿就係入去尖叫屋嘅唯一途徑。尖叫屋嘅建造係為咗俾身為狼人嘅雷木思·路平喺佢每個月需要變身果段期間可以匿埋，以免傷害其他同學或者無辜嘅人。每個月路平住喺尖叫屋果陣時，活米村嘅居民都聽過路平嘅嚎叫聲，仲誤認係某種暴力幽靈嘅嚎叫。呢個傳聞喺鄧不利多嘅推動同阻止任何人調查之下，搞到果度被傳出係英國鬧鬼鬧得最犀利嘅謠言，官方亦都認為果度係英國最鬧鬼嘅建築。

當天狼星·布萊克喺《哈利波特：阿茲卡班的逃犯》裡面返到去霍格華茲果陣時，尖叫屋成為咗果輯小說戲劇性結論嘅一部分：天狼星將榮恩同埋佢隻寵物老鼠斑斑Scabbers拖到去果度，仲打算殺咗斑斑，而斑斑嘅真正身份被揭露就係天狼星以前嘅朋友—化獸師彼得·佩迪魯，佢因為變節轉投去佛地魔而背叛咗佢嘅老死——哈利·波特嘅阿爸阿媽，洩露咗佢哋一家嘅行蹤，天狼星仲因為咁而揹咗罪名而被判終身監禁。

石內卜喺《哈利波特：死神的聖物2》裡面喺尖叫屋裡面俾佛地魔同佢嘅蛇妖娜吉妮殺死咗。

三根掃把旅館

三根掃把旅館The Three Broomsticks係喺活米村高街嘅出名旅館同酒吧。人人都知，佢最出名嘅係住喺酒吧樓上嘅靚女女主人羅梅塔夫人Madam Rosmerta，同埋果度好好味嘅奶油啤酒Butterbeer。羅梅塔夫人通常都會喺酒吧嘅前面或者側面嘅房裡面做嘢。酒吧嘅後面有一個壁爐，上面有一間旅館仔。果度被形容做溫暖、煙霧繚繞、逼狹同嘈雜。呢度都係果個系列裡面重要事件嘅發生場地，包括哈利喺五年級果陣時喺果度接受麗塔·史譏嘅採訪。

呢間酒吧最出名嘅除咗奶油啤酒Butterbeer之外，仲有就係似乎唔適合學生飲用嘅火焰威士忌Firewhisky，就好似榮恩喺五年級果時喺豬頭酒吧裡面提到嘅咁樣，三根掃把旅館仲提供紫羅蘭水Gillywater，仲有羅梅塔夫人自己釀製嘅橡木熟成蜂蜜酒Oak matured mead，同埋好多麻瓜飲品，例如係南瓜汁Pumpkin juice。

桑科嘅惡作劇舖頭

内文：桑科嘅惡作劇舖頭

桑科嘅惡作劇商店Zonko's Joke Shop係活米村嘅一間惡作劇舖頭，佢哋嘅惡作劇同技巧「甚至可以實現弗雷同喬治最癡線嘅夢想」，裡面嘅商品包括：糞彈Dungbombs、打噎糖Hiccough Sweets、青蛙產卵番梘Frog Spawn Soap，同埋咬鼻茶杯Nose-Biting Teacups。果間舖頭喺《混血王子的背叛》裡面閂咗門，弗雷同喬治曾經諗住喺活米村開舖嚟買咗呢個地方去擴大佢哋嘅版圖，但礙於霍格華茲大戰嘅黑暗時代即將嚟到，佢哋後嚟就否決咗呢個開舖嘅計劃。

政府所屬的地點

阿茲卡班監獄

内文：阿茲卡班

  提示：呢篇文講嘅唔係阿巴坎, 阿布哈茲,或者阿塞拜疆。

喺《哈利波特：鳳凰會的密令》裡面被破壞咗嘅阿茲卡班監獄。

阿茲卡班監獄Azkaban Prisoner，簡稱阿茲卡班Azkaban，呢個係一個巫師監獄，任何違反咗英國巫師世界法律嘅巫師或者女巫都會被韞wan3喺果度，而小說裡面亦都提到另一座咁樣嘅監獄──紐蒙迦德監獄Nurmengard。

根據《混血王子的背叛》入面嘅描述，阿茲卡班係喺無邊際洶湧嘅北海中央嘅入口處，果度係一個花崗岩嘅古堡式建築，建成日期遠遠早過16世紀之前，果度非常之陰暗，牢房嘅空置率又好高，由催狂魔做獄卒守衛，保安非常之森嚴，催狂魔會以囚犯嘅快樂同希望嚟做糧食，令囚犯俾絕望同悲傷折磨到生不如死。

喺阿茲卡班坐監嘅巫師或女巫通常都係犯咗極嚴竣嘅罪行，有好多囚犯喺裡面被折磨到發癲，甚至係死埋。不過，天狼星·布萊克曾經講到，當佢以狗嘅化獸師形態由監禁咗12年嘅阿茲卡班走甩咗之後，佢游水去英國，然後向北去到霍格華茲（呢個意味住阿茲卡班嘅緯度低過喺蘇格蘭嘅霍格華茲）。雖然小說裡面並無對阿茲卡班嘅外觀有詳細嘅描述，但提到如果有囚犯死咗喺監獄果陣時，佢哋會被埋葬喺監獄以外嘅地方。喺果個系列嘅改編電影入面，阿茲卡班係一個呈三角柱形狀嘅高建築物，建築物中間嘅位置係空心嘅。

好多阿茲卡班嘅囚犯都係佛地魔嘅支持者（佢哋被叫做食死人），就算佢哋係因為被誤解而搞到其他人被監禁。例如，天狼星·布萊克喺彼得·佩迪魯殺死咗十幾個麻瓜之後，佩迪魯偽造自己死咗嘅事實，仲老屈天狼星犯下呢啲罪，等佢喺未經審判之下被判坐監，直至佢坐咗監12年之後逃獄。哈利喺兩年之後因為佢自己施展咗護法咒Patronus Charm嚟到喺催狂魔嘅攻擊入面將佢自己同佢表哥達力·德思禮拯救咗出嚟而受到韞住喺阿茲卡班嘅威脅。任何巫師或者女巫對人類施展任何「不赦咒Unforgivable Curses」都會喺阿茲卡班被強制判處終身監禁，不過正氣師Aurors喺戰爭期間就唔受呢個禁令嘅限制。某啲角色喺成個系列入面都施展咗不赦咒而無受到相應嘅懲罰。其他應該坐監嘅罪行包括襲擊魔法部喺《鳳凰會的密令》入面拘留嘅食死人、擅自闖入魔法部喺同一輯裡面嘅史特吉·包莫，仲有就係做無註冊嘅化獸師，同埋冒充陰屍。

阿茲卡班監獄喺成個系列入面都出晒名係邪惡同埋恐懼，喺成個系列開始果陣提到，阿茲卡班係隸屬於魔法部仲由催狂魔看守住。催狂魔大量咁存在令到果度啲囚犯無辦法得到快樂，仲迫佢哋不斷去重溫佢哋最差嘅回憶，搞到佢哋逐漸變得無助，仲成日令人變到嚴重嘅精神錯亂。根據天狼星嘅形容，好多囚犯索性唔食嘢，最後餓死咗，而佢對呢樣嘢嘅推論係「佢哋無咗生存嘅意願」。由於催狂魔極之難傷害──唯一對佢哋嚟講有效嘅魔咒係護法咒。直至天狼星逃獄之前，阿茲卡班長久以嚟一直被認為係唔可能走得甩嘅地方，雖然小巴提·柯羅奇曾經喺佢阿爸阿媽嘅協助之下成功逃獄，不過鄧不利多曾經講過，如果佢想咁樣做嘅話，佢都可以突破阿茲卡班嚟走甩。

佛地魔最忠誠同最危險嘅10個追隨者喺《鳳凰會的密令》裡面逃獄走甩咗，當中包括咗貝拉·雷斯壯。鄧不利多成日好唔避忌咁話用催狂魔去看守佛地魔最大嘅支持者係一個錯誤，如果佛地魔重新掌權之後，佢哋就係最大嘅得益者。鄧不利多講嘅嘢後嚟被證實係啱嘅，因為當催狂魔喺阿茲卡班撤離咗之後，佢哋就同佛地魔結盟，而阿茲卡班監獄仲仍然運作，但由於監獄長嘅反抗而搞到佢嘅有效性被大大咁削弱咗。阿茲卡班監獄都有各種巫師守衛住，佢哋大部分時間都喺度控制催狂魔，主要係監管日常嘅檢查同埋管理少數嘅探監安排。阿茲卡班喺《死神嘅聖物》開始嘅時候爆發咗另一次食死人嘅逃獄潮。佛地魔接管魔法部之後，魔法部嘅叛徒—桃樂絲·恩不里居將好多政治犯送咗去阿茲卡班監獄，當中包括露娜·羅古德嘅老豆—贊諾·羅古德Xenophilius Lovegood，同埋佛地魔實施反麻瓜法果陣時受到迫害嘅麻瓜出身巫師。所有受害者都喺佛地魔倒台之後被釋放出嚟，而恩不里居同其他喺霍格華茲大戰入面倖存落嚟嘅食死人都被韞住喺果度。

隨著佛地魔滅亡之後，金利·俠鉤帽停咗喺阿茲卡班監獄果度用催狂魔。

王十字車站

王十字車站King's Cross Station係現實中嘅火車站，果個車站係羅琳嘅《哈利波特》系列小說入面標誌性嘅建築物之一，當中標誌性嘅通道有時會因為遊客同哈利波特嘅粉絲停低影相，或者佢哋試吓推住行李車穿過埲bung6牆而迫到連水都流通唔到。呢個車站係霍格華茲特快列車嘅起點同終點站，入去果個車站需要穿過9號月台同10號月台中間嘅分隔磚牆，先至入到去麻瓜係睇唔到嘅9¾月台。不過，現實中嘅9號月台同10號月台係喺主體分離嘅建築裡面，兩者並唔係分隔一埲牆，而係兩條分開嘅鐵路。羅琳有意將呢個地點揀嚟做車站嘅主體建築物，但係佢喺小說出版咗之後先至發現自己將倫敦英皇十字車站同尤斯頓車站嘅布局撈亂咗，亦都搞錯咗月台嘅編號，先至造就到而家咁嘅樣。羅琳喺2001年嘅一次訪問入面話自己將兩個車站混淆咗，而事實上尤斯頓車站嘅9號同10號月台都係用兩條鐵路嚟分開嘅。

喺《哈利波特系列電影》嘅拍攝過程入面，車站場景嘅拍攝係喺主車站嘅4號同5號月台進行，劇組將月台嘅號碼重新編號。當《神秘嘅魔法石》上映果陣，9號同10號月台出面嘅地面上鋪設咗大型嘅標誌嚟顯示「霍格華茲特快列車」嘅位置，不過果個標誌喺無幾耐之後被拆除咗嘞。喺英皇十字車站嘅9號同10號月台所身處嘅附屬建築裡面，豎立咗一個「9¾月台」嘅鑄鐵標誌，仲喺標誌嘅下面有一架行李手推車半卡喺牆裡面：果架行李手推車喺接近通道嘅果一半係見得到嘅，而另外果一半似乎係穿過埲牆消失咗。

英皇十字車站喺成個《哈利波特》系列入面都扮演咗關鍵嘅角色，同時亦都係小說同電影系列裡面最後嘅場景。

9¾月台

9¾月台嘅標誌係喺王十字車站嘅西翼離境大堂，近住9號同10號月台，走向通去主樓嘅行人通道。

戲裡面用咗GWR 4900 Class 5972 Olton Hall蒸汽火車嚟做霍格華茲特快列車。

9¾月台Platform 9¾係麻瓜喺倫敦嘅王十字車站去搭霍格華茲特快列車嘅月台，呢個地方隱藏喺麻瓜嘅視線之外，佢哋係睇唔到嘅。巫師同女巫只要穿過9號同10號月台之間嘅障礙物就可以去到果度。

羅琳喺小說出版咗之後先至發現自己將倫敦英皇十字車站同尤斯頓車站嘅布局撈亂咗，而倫敦英皇十字車站嘅9號同10號月台並唔係佢希望設置魔法月台嘅地方。英皇十字車站現實中嘅9號同10號路線之間並無月台喺度，電影製片人為咗解決呢個問題，佢喺拍攝期間將4號同5號月台改咗做9號同10號。喺現實入面，英皇十字車站同埋尤斯頓站嘅9號同10號月台係由鐵路路線分隔開。電影嘅外景鏡頭係喺倫敦聖潘克拉斯萬麗酒店去拍攝嘅，果度係接連住英皇十字車站隔離嘅聖潘克拉斯車站嘅一部分。喺外面睇落，聖潘克拉斯車站相比英皇十字車站更有視覺戲劇性。

一塊描繪咗假定位置嘅牌匾連同埋一架半「卡」喺牆裡面嘅行李手推車被設置喺9-11號月台嘅建築物埲牆上面。喺車站嘅大規模翻新工程入面，呢個裝置被臨時搬到去尤斯頓路嘅外牆，然後喺2012年移去新嘅西部候車大堂。9¾月台用嚟做電影佈景嘅鍛鐵製閘門而家保存喺大英鐵路博物館。隨住阿倫·烈卡文喺2016年過身之後無幾耐，啲粉絲喺9¾月台上面為果個演員起咗一個紀念碑。另外，一間哈利波特主題舖頭亦都開咗喺車站裡面呢個牌匾附近嘅位置。

美國魔法國會

美國魔法國會Magical Congress of the United States of America，簡稱美國魔法部M.A.C.U.S.A.，呢個機構係由美國魔法國會主席領導，負責管理美國國內巫師世界嘅人口。MACUSA係一院制嘅，佢同美國麻瓜國會區分咗眾議院同埋參議院係唔同嘅。佢嘅位置喺紐約市中心嘅鄔禾夫大樓裡面，大樓入面橫跨幾百樓層。

喺電影《怪獸與牠們的產地》裡面，紐特·斯卡曼德參觀咗呢座建築物，由於佢喺麻瓜雅各·科瓦爾斯基Jacob Kowalski面前用咗魔法，違反咗巫師世界嘅保密法仲造成咗威脅，所以當時佢俾前正氣師嘅蒂娜·金坦Tina Goldstein拉咗仲帶咗佢入去。

英國魔法部

内文：魔法部

英國魔法部Ministry of Magic，簡稱M.o.M，係英國魔法界政府嘅行政機關，呢個部門負責處理英國魔法世界任何大大細嘅嘅事務，甚至係某啲部分牽涉到麻瓜嘅案件。呢個部門最早出現喺《哈利波特》嘅第一輯小說同電影《神秘的魔法石》裡面。

《哈利波特》系列嘅作者J·K·羅琳喺一個訪問裡面話，哈利·波特、榮恩·衛斯理同妙麗·格蘭傑三個喺佢哋畢咗業之後喺魔法部做唔同嘅崗位。

紐蒙迦德監獄

紐蒙迦德監獄Nurmengard Prisoner，簡稱紐蒙迦德Nurmengard，呢個係由巫師蓋瑞·葛林戴華德起嚟韞住佢嘅敵人同埋麻瓜嘅監獄。果度嘅入口用「為咗更大嘅利益」嘅傳說同埋死神聖物嘅符號嚟做標記。監獄入面嘅囚犯喺鄧不利多打敗咗葛林戴華德之後得到釋放，而葛林戴華德本人就被韞住喺最頂層嘅監倉裡面。

最後一輯小說入面都有提到紐蒙迦德監獄，佛地魔當時去到監獄嚟搵葛林戴華德，同埋去攞有關接骨木魔杖嘅消息。喺葛林戴華德唔肯向佛地魔提供任何信息果陣時，佛地魔就喺葛林戴華德自己起嘅監獄度將佢殺死。

聖蒙果魔法疾病與傷害醫院

聖蒙果魔法疾病與傷害醫院St. Mungo's Hospital for Magical Maladies and Injuries，簡稱聖蒙果醫院St. Mungo's Hospital或者係聖蒙果St. Mungo's。呢間醫院由出名嘅巫師治療師芒戈·博咸Mungo Bonham喺17世紀初創立嘅一間哈利波特世界醫院。呢間醫院嘅創立係為咗治療英國巫師世界嘅魔法疾病、受傷同埋流行疾病而設，佢嘅標誌係由骨頭同魔杖交叉起嚟組成。呢間醫院位於英國倫敦市中心，係英國魔法世界中最大嘅醫院。

如果係霍格華茲嘅學生受傷嘅話，一般會由果間學校嘅醫院側翼接受駐校嘅護士長龐芮夫人Madam Pomfrey治療咗先，不過如果果個學生受傷比較嚴重嘅話，佢就會被送去聖蒙果醫院果度接受更加好嘅治療。例如霍格華茲學生凱娣·貝爾Katie Bell喺掂到一串受詛咒嘅頸鏈之後，佢就被送咗入去聖蒙果醫院。如果係麻瓜中咗魔咒嘅話，佢哋都有可能被送到聖蒙果醫院接受治療。麻瓜眼中喺外表睇起上嚟，呢間醫院會扮成一間百貨公司叫做「清浸百貨公司Purge & Dowse Ltd.」嘅地方，果度係一間由紅磚起成嘅舊式廢棄百貨公司，睇起上嚟污糟邋laap6遢taap3，櫥窗裡面擺咗一個沾滿灰塵而且個樣極醜嘅模特兒公仔，如果要入去嘅話就一定要隔住櫥窗同佢講出暗號同埋講明嚟嘅目的，果個模特兒公仔就會點頭，啲巫師同女巫就可以穿過玻璃行入去。

聖蒙果醫院樓高六層，裡面嘅環境同外在睇到嘅完全相反，一切都非常乾淨同整潔，睇起上嚟就同麻瓜醫院無唔同。不過，如果麻瓜行入去果度嘅話，裡面就係溶溶爛爛又污糟嘅建築物，呢間百貨公司嘅天花板上面掛住寫咗「內部裝修，暫停營業」嘅牌。醫院裡面嘅空間夠晒去收治全英國嘅巫師病人，話晒英國嘅巫師人口比麻瓜人口少得多。醫院裡面嘅醫護人員一般唔會被叫做醫生，而係治療師Healers，佢哋一般會穿住青檸綠色嘅長袍。

醫院裡面有好多巫師同女巫喺入面穿梭，呢度亦都係亞瑟·衛斯理喺魔法部俾佛地魔嘅蛇妖—娜吉妮攻擊受傷之後被送到去嘅醫院；而麥教授就因為魯霸·海格被迫逐出霍格華茲而被嚴重擊暈受傷所住嘅醫院；哈利·波特曾經同奈威·隆巴頓仲有佢阿嫲奧古斯塔·隆巴頓Augusta Longbottom一齊去果度去探住喺長期護理病房嘅隆巴頓夫婦。佢哋仲喺果度撞返佢哋二年級嘅前任教授吉德羅·洛哈，佢到果陣時都仲係受到自己當年記憶咒反彈嘅影響而令自己失憶。