哈利波特:消失的密室 (電影)

出自維基百科,自由嘅百科全書
跳去導覽 跳去搵嘢

哈利波特:消失的密室》(Harry Potter and the Chamber of Secrets)係一部2002年奇幻電影,改編J. K. 羅琳嘅1998年同名小說。主演係丹尼爾域卡夫魯拔格連特愛瑪屈臣

劇情簡介[編輯]

喺上個學年完咗之後,哈利波特由學校放假返去佢姨丈屋企,喺新學年開學之前,有個家庭小精靈多比出現喺哈利波特嘅房度,警告哈利如果返去霍格華茲就會有生命危險。雖然多比用到魔法,都係阻唔到哈利返去霍格華茲。

榮恩·衛斯理個妹金妮·衛斯理喺新學年亦都入咗霍格華茲就讀。

之後學校發生咗有貓同學生被石化嘅事,仲有人喺牆度大大隻字寫咗「密室嘅門已經打開咗,傳人嘅敵人要小心」。麥教授同學生講,「密室」係好多年之前霍格華茲創辦人之一嘅史萊哲林臨走之前起嘅,只有佢或者佢嘅傳人先知道點樣入到去,校方以前都搵過但係搵唔到間密室。之後連妙麗·格蘭傑都畀唔知乜嘢石化咗。之後哈利喺愛哭鬼麥朵匿埋嘅女廁度搵到湯姆·瑞斗嘅日記,睇到喺50年前發生嘅事。另一方面,因為有學生被石化,搞到魯霸·海格畀人送咗去阿茲卡班監獄度,同埋校長鄧不利多被停職。

金妮·衛斯理失咗蹤,校方叫吉德羅‧洛哈教授去救人,洛哈知道自己除咗消除人哋記憶之外,其它魔法都唔掂,於是就想執包袱離開霍格華茲,畀哈利同榮恩阻止咗。哈利同榮恩迫洛哈陪佢哋一齊去救金妮,佢哋通過麥朵嗰度個女廁,去到秘道入面。洛哈唔想行入去,想用魔法令到哈利同榮恩失憶,咁就可以走人唔救金妮,之後再作故仔話救唔到。點知佢用咗榮恩嗰支爛魔杖,搞到魔咒反彈返去自己度。條通道冧咗,分開咗哈利同榮恩。哈利繼續行,喺密室搵到金妮,而湯姆·瑞斗喺呢個時候又出現,話自己就係佛地魔,又放出蛇妖攻擊哈利,好在鄧不利多隻鳳凰飛咗入嚟,整盲咗蛇妖,又送咗分類帽嚟,帽入面有葛來分多寶劍,哈利就用嗰把劍殺咗蛇妖,又用蛇妖嘅牙銷毀咗湯姆·瑞斗嘅日記嘅魔法,湯姆·瑞斗消失咗。之後金妮醒番。

妙麗同其他石化咗嘅人都解除咗石化。鄧不利多復職,海格由阿茲卡班監獄放番出嚟。另外家庭小精靈多比因為哈利用計仔而得到自由。