魁地奇

魁地奇套裝

魁地奇（英文：Quidditch，讀音：[ˈkwɪdɪtʃ]）係J·K·羅琳嘅小說系列《哈利波特》入面嘅一種虛構嘅空中球賽，球員一定要騎住飛天掃把嚟參賽，比賽方式類似現實入面嘅板球或者馬球。

魁地奇係巫師世界入面最興嘅球賽運動，唔單止有好多職業球隊，霍格華茲裡面嘅每個學院都各有一支球隊。哈利·波特自從一年級起就開始參加校內嘅比賽，佢喺系列嘅第四輯《火盃的考驗》入面仲去睇魁地奇世界盃嘅賽事。魁地奇喺成個系列嘅頭六輯裡面扮演住好重要嘅角色，不過第六輯係羅琳最後一次寫魁地奇球賽。

創作靈感

根據J·K·羅琳所講，魁地奇比賽係佢喺曼徹斯特嘅一間旅館仔入面同男友嘈咗一輪之後創造出嚟嘅。佢喺寫滿五頁用「Q」字開頭嘅單詞之後，先至決定將呢個比賽命名叫做「魁地奇Quidditch」。

歷史

根據小說裡面嘅資料，魁地奇早期係一種簡單咁騎住飛天掃把嘅運動，喺早期巫師世界嘅畫作入面都有描繪到古老飛天掃把嘅運動。

有人認為魁地奇Quidditch呢個名嘅由來係合併咗唔同種類嘅波個名而產生出嚟：包括咗搏格Bludger、快浮Quaffle，同埋金探子Snitch。不過喺故事裡面嘅世界，最初魁地奇呢個運動嘅名，佢嘅雛形係由11世紀喺嘅發源地魁地沼Queerditch Marsh而嚟，而遊戲方式基本上同而家嘅魁地奇相似。

後嚟飛天掃把進步去到能夠俾球員飛行者彎過轉角仲有變化速度同高度嚟互相去傳波（即係入面嘅快浮Quaffle）嗰時，佢哋將個波射入球場兩邊嘅龍門就攞到分。跟住就加入埋當時用施咗咒嘅石頭—搏格Bludger，呢種改變可能係受到危險性高啲嘅蘇格蘭球賽「石雨」嘅影響。石雨嘅參賽者要用頭上面綁住嘅大釜去接住跌落嚟嘅石頭。到後來，金探子Snitch嘅加入，亦都係受到巫師世界嘅一種早期運動嘅影響。嗰個運動係源於啲巫師試吓去捉住一種飛得好快叫做「金探鳥」嘅魔法雀仔。金探鳥後嚟瀕臨絕種，於是一個巫師依照住金探鳥嘅行為同埋飛行模式嚟打造出魁地奇嘅金探子。

瑞典嘅巫師世界年度飛天掃把競速慶典，可以追溯返去到10世紀左右。嗰陣嘅球員由庫柏格飛到去阿爾耶普盧格，飛行總長度大約300幾英哩。比賽嘅路線橫跨一個龍嘅野生保護區。呢項運動而家已經成為咗國際性嘅比賽，而比賽嘅獎座亦都採用咗瑞典短吻龍嘅造型。

魁地奇國際最高嘅主管機構—國際巫師聯盟魁地奇委員會International Confederation of Wizards Quidditch Committee (ICWQC)指魁地奇喺西元1050年發明。1105年繪畫而成嘅知名畫作《暴力者古特爾係贏家Günther der Gewalttätige ist der Gewinner》就描繪咗德國嘅古老比賽—Stitchstock，呢種比賽係棟起一枝20英呎高嘅柱，將一個龍嘅膀胱吹脹咗之後掛喺頂度，由一個騎住飛天掃把嘅參賽者負責去保護呢個波。嗰個參賽者就要喺腰度綁條繩仲固定喺條柱上面，限制咗佢唔可以飛離條柱超過10英呎，其他參賽者就輪流去嘗試，用磨尖咗嘅掃把將呢個波去篤穿。負責看守住個波嘅參賽者可以帶埋魔杖嚟擊退其他人嘅進攻。比賽以係咪可以成功篤穿個波，或者守門員可唔可以施法令到所有對手退出比賽嚟做結束比賽嘅標準。

規則

魁地奇比賽

魁地奇球賽係喺一個長橢圓形嘅球場入面進行，範圍包括咗看台區，同埋兩邊各設有三個得分嘅龍門。限時內得分多啲嗰隊就會贏。每隊各有７個球員，包括：看守手Keeper同埋搜捕手Seeker各１個、２個打擊手Beater，同埋３個追蹤手Chaser。

金探子

比賽入面會牽涉４款波：快浮Quaffle係４款波裡面速度慢啲嘅，呢個同麻瓜世界裡面嘅球賽所用嘅波好相似，佢大細同足球差唔多，雖然佢無飛行能力但係用咗咒語嚟等佢落嚟嘅速度減緩，仲有啲特殊嘅形狀嚟方便球員用手捉住同埋傳波。快浮由追蹤手去負責，佢哋喺進攻入面將個波射入去對方嘅龍門度可以攞到10分，又或者喺防禦入面攔截對方嘅波。看守手負責防守龍門，因為咁而全身都可以掂個波，另外亦都可以攞住快浮去參與前場嘅進攻；搏格Bludger係沉重嘅兩粒鐵波，呢兩粒鐵波會自動喺球場裡面飛來飛去嚟試吓將球員（特別係攞住快浮嘅球員）喺掃把上面撞落嚟，打擊手無攞住快浮嘅責任，因為佢哋要攞住支球棒嚟將搏格打出去，保護自己嘅隊員，又或者攞住佢嚟攻擊同埋干擾對家球員；最後就係體積最細嘅一個波，有翼嘅金探子Golden Snitch係金色嘅，好似粒合桃咁大粒，佢背後有對銀色嘅翼仔。金探子負責圍住個球場衝住嚟周圍飛，搜捕手要負責捉住佢，成功捉到佢嘅話，捉到佢嗰隊就會額外加多150分，而個比賽就會即時完。

如果捉唔到嘅話比賽係唔可以完嘅，或者要經過兩隊球隊嘅隊長同意下先至可以完咗個比賽。故事入面就曾經提到一場持續咗三個月嘅球賽，球員需要用輪班制嘅方式嚟比賽去到完場。

魁地奇有700種犯規嘅規定，喺1473年嘅第一屆魁地奇世界盃入面，呢700種犯規嘅例子全部都上演過一次。