榮恩·衛斯理

榮納德·畢流思·衛斯理 Ronald Bilius Weasley
魯拔·格連特飾演嘅榮恩·衛斯理。
首次出場	《哈利波特：神秘的魔法石》
尾次出場	《哈利波特：死神的聖物2》
作者	J·K·羅琳
扮演	魯拔·格連特（電影） 保羅‧索恩雷（舞台劇）
配音	陳祖兒（粵語配音）
詳細信息
性別	男性
家庭	亞瑟·衛斯理（阿爸） 茉莉·衛斯理（阿媽） 比爾·衛斯理（大哥） 花兒·戴樂古（大嫂） 薇朵兒·衛斯理（侄女） 多明妮奎·衛斯理（侄女） 路易斯·衛斯理（侄仔） 查理·衛斯理（二哥） 派西·衛斯理（三哥） 奧黛麗·衛斯理（三嫂） 小茉莉·衛斯理（侄女） 露西·衛斯理（侄女） 弗雷·衛斯理（四哥） † 喬治·衛斯理（五哥） 莉娜·強生（五嫂） 弗雷·衛斯理二世（侄仔） 羅克珊·衛斯理（侄女） 金妮·衛斯理（阿妹） 哈利・波特（妹夫） 詹姆·天狼星·波特（姨甥） 阿不思·賽佛勒斯·波特（姨甥） 莉莉·露娜·波特（姨甥女）
配偶	妙麗·格蘭傑
仔女	露絲·格蘭傑─衛斯理Rose Granger-Weasley 曉高·格蘭傑─衛斯理Hugo Granger-Weasley
國籍	英國

榮恩·衛斯理（英文：Ron Weasley），係英國作家J·K·羅琳嘅奇幻小說《哈利波特》系列入面嘅３個主角之一，亦係第２男主角。佢第一次出現係喺《哈利波特：神秘的魔法石》入面，當時係一個準備搭火車去霍格華茲魔法學校嘅新生，後來喺9¾月台識咗哈利·波特同妙麗·格蘭傑，後來佢哋３個做咗同學兼老友。

榮恩係純血嘅巫師家族—「衛斯理氏」嘅成員，佢哋一家住喺奧特里聖卡奇波爾Ottery St. Catchpole出面嘅洞穴屋。榮恩同哈利仲有妙麗都係霍格華茲葛萊分多學院嘅成員，作為３個主角裡面唯一喺巫師世界裡面成長嘅嗰個，榮恩仲將自己對魔法世界入面嘅習俗同埋傳統話俾哈利同妙麗去知，佢喺成個系列入面嘅大部分行動都喺度。

榮恩嘅細妹金妮，佢由細細個已經好鍾意哈利，佢哋兩個最後拉埋天窗，所以榮恩除咗係哈利嘅老友之外，哈利後尾做埋佢嘅妹夫。

角色發展

根據羅琳嘅講法，榮恩係佢第一日創作嘅其中一個角色。榮恩嘅靈感嚟自羅琳最老友嘅朋友尚恩·哈里斯Sean Harris（據講《哈利波特：消失的密室》係獻俾佢嘅），但係佢明確咁話自己「從來都無諗住用榮恩嚟形容尚恩，但榮恩有住尚恩式嘅措辭。」就好似哈里斯對羅琳咁樣，榮恩總會喺哈利需要佢嗰陣「總會喺身邊」。榮恩符合好多拍檔嘅刻板印象；佢成日被用嚟做喜劇調解；佢忠於作為主角嘅哈利，而至少喺成個系列早期裡面，佢無哈利所擁有嘅好多天份（魔法力量嚟講）。不過，榮恩好多次證明咗自己嘅勇氣同魔法能力，例如：喺第１輯小說入面去捉「真正嘅巫師棋」；喺第２輯小說裡面，就算佢自己有蜘蛛恐懼症，但都仍然肯陪哈利入去禁忌森林；佢喺第５輯小說入面施展到護法咒；甚至喺第７輯小說入面，佢喺唔了解爬說語嘅情況下透過扮哈利嘅爬說嘴嚟入到去密室攞到蛇妖嘅毒牙。

榮恩嘅一啲特質能夠映襯到哈利：哈利係個孤兒，佢擁有比自己所需更多嘅錢，而榮恩就嚟自一個充滿愛但好鬼窮嘅屋企，佢自己嘅好多資產都係二手嘢；哈利好出名，但係佢寧願避開焦點；相比之下，榮恩成日被睇成係一個平平無奇又單純嘅人，有時佢都會妒忌哈利得到嘅認同；榮恩嘅名聲同成就成日都俾佢自己咁多個阿哥同細妹仲有老友掩蓋咗，佢嘅自卑情結同埋想去證明自己嘅需要成為咗佢角色性格嘅主要推力。榮恩隨住小說嘅發展，佢由一個缺乏安全感嘅男仔成長到一個有戰略同領導能力嘅能幹後生仔。

家庭

名嘅來源

榮恩·衛斯理嘅全名係榮納德·畢流思·衛斯理Ronald Bilius "Ron" Weasley，佢喺1980年3月1號出世。小說同電影入面所有人都叫佢做「榮恩Ron」，而唔係「榮納德Ronald」（露娜·羅古德喺原文上確實係叫榮恩做「榮納德」，而妙麗都曾經喺第４輯戲開頭同埋第５輯戲裡面咁樣叫過佢一次）。

榮納德Ronald係斯堪的納維亞語嘅名「Ragnvald」嘅蘇格蘭語形式，呢個名源於古斯堪嘅納維亞語「Ragnvaldr」，佢由「ragn」同「valdr」兩個部分組成，佢嘅意思分別係「建議」同埋「統治者」；同呢個名字同源嘅「Reginald」則係喺德語形式嘅「Raginwald」入面演變過嚟，佢嘅意思係「王子嘅謀士」。呢啲名嘅含義所指嘅都係當權者值得信賴嘅顧問，呢一點上同榮恩做哈利嘅朋友同知己都非常之似。

衛斯理一家嘅每個家族成員嘅名大部分都揀咗用亞瑟王時期嘅名，「榮恩」喺蒙茅斯嘅謝菲嘅《不列顛諸王史》裡面係亞瑟王長矛嘅名。喺威爾士語入面，「Ron」係「Rhongomyniad」嘅縮寫，意思係「暗殺者長矛」。榮恩嘅中間名「畢流思Bilius」係源自意為膽汁嘅單詞「bile」，喺古希臘醫學理論嘅體液學說入面，「黃膽Yellow bile」同「黑膽Black bile」係組成人體嘅４種體液入面嘅兩種。黃膽象徵嘅元素係「火」，呢個亦係葛萊分多學院嘅象徵元素。喺英語入面，「bilious」呢個形容詞就有「壞脾氣」嘅意思，而「火」大嘅人一般都會被認為就好似榮恩咁樣係脾氣唔好嘅人。

家庭成員

衛斯理家的族譜
布萊克家族 天狼星 亞瑟 茉莉 獅子阿爾發·布萊克 花兒·戴樂古 比爾 查理 派西 奧黛麗·衛斯理 喬治 莉娜·強生 榮恩·衛斯理 妙麗·格蘭傑 弗雷 金妮 哈利·波特 薇朵兒 露西 多明妮克 小茉莉 露西 弗雷 羅克珊 露絲·格蘭傑─衛斯理 雨果·格蘭傑─衛斯理 詹姆·天狼星·波特 阿不思·賽佛勒斯·波特 莉莉·露娜·波特 註： 關於布萊克家族嘅狀況省略咗，而貝拉·雷斯壯因為無後代所以唔會顯示。

榮恩係亞瑟·衛斯理同茉莉·衛斯理７個仔女入面嘅第６個，亦都係屋企嘅么仔。喺佢之上有５個阿哥，分別係：比爾、查理、派西、弗雷同埋喬治，仲有佢哋對落嘅細妹—金妮。榮恩同佢父母好親近，佢同屋企人之間嘅關係好好，就算佢有陣時會因為屋企窮而覺得尷尬，但係佢都係會努力去保護自己班阿哥同細妹，亦都會堅決咁為佢哋同自己嘅父母抗辯。

衛斯理一家係為數唔多嘅純血巫師家族之一。榮恩阿爸係魔法部麻瓜人工製品濫用局嘅員工，佢人工唔高，細路又多，佢哋嘅家境同富有差好遠，而佢哋屋企入面嘅大部分物品都係二手嘅（榮恩對呢樣嘢好在意），因為咁就俾馬份一家呢啲有錢又勢利嘅古老巫師家族睇唔起。衛斯理一家住喺德雲郡凱奇波區奧特瑞街Ottery St Catchpole附近嘅洞穴屋，榮恩自細喺呢度住同長大，而衛斯理家族嘅所有成員都被派去霍格華茲嘅葛萊分多學院。

榮恩同佢啲阿哥同阿妹每個都有佢哋獨特嘅性格特徵。榮恩好尊敬自己兩個最大嘅阿哥—比爾同埋查理，就算佢哋做出嚟嘅成就搞到佢有啲不安，令到榮恩覺得唔能夠辜負呢啲嘢。榮恩曾經試過以派西嚟做榜樣，但係榮恩就覺得佢只係自負同埋煩；不過，榮恩成為咗派西同屋企人鬧僵之後唯一聯絡過嘅一個屋企人，派西亦都係弗雷喺霍格華茲大戰入面犧牲咗之後安慰住榮恩同埋佢屋企人嘅嗰個。喺性格上，榮恩同弗雷同喬治比較似啲，雖然佢嘅孖生阿哥好鬼鍾意取笑佢，而佢哋細妹金妮亦都係，不過榮恩同佢哋嘅關係都好親近。榮恩都好注意保護金妮，尤其係唔贊成佢嘅感情生活，呢個亦都曾經令佢哋兩個因為咁而嘈起上嚟。榮恩成日都俾佢啲阿哥同細妹嘅成就掩蓋咗。人人都知，佢嘅阿哥比爾、查理同埋派西除咗係男生長之外，亦都被任命為佢哋學院嘅級長；除此以外，衛斯理家族嘅所有細路都曾經加入過葛萊分多嘅魁地奇球隊，而查理至少喺佢嘅一個學年裡面擔任魁地奇球隊隊長。榮恩最終都隨住成長而成為咗一個出色嘅魁地奇看守手同埋級長，呢個證明咗係因為佢對自己無自信，而唔係無實際嘅天賦或者能力。另外，除咗派西、榮恩同金妮之外，衛斯理一家都係鳳凰會嘅成員，佢哋３個喺畢咗業之後幫鳳凰會做嘢，不過就唔清楚佢哋後來有無正式咁加入鳳凰會。

就算亞瑟·衛斯理一家因為同非純血嘅巫師有關而被睇成「血腥叛徒blood traitors」（但佢哋唔會認），但佢哋同好出名嘅純血嘅布萊克家族成員—天狼星·布萊克仲有獅子阿爾發·布萊克又有遠親嘅關係。佢哋其他嘅遠親包括咗都係嚟自純血家族嘅跩哥·馬份、小仙女·東施同埋貝拉·雷斯壯；而鳳凰會嘅創會成員吉昂·普瑞Gideon Prewett同費邊·普瑞Fabian Prewett就係榮恩佢哋幾兄妹嘅舅父。

角色性格與特徵

初期電影入面嘅榮恩·衛斯理。

外觀上

榮恩繼承咗衛斯理家族嘅典型特徵：一頭標誌性嘅火紅色頭髮同埋臉上面嘅雀斑。有一對藍眼嘅榮恩，羅琳將佢形容為「又高又瘦，身材瘦長又有雀斑，大大隻手同腳，仲有個長鼻」，羅琳喺小說入面形容榮恩有雀斑，而飾演榮恩嘅演員魯拔·格連特就無。當榮恩尷尬嗰陣，他隻耳仔就會漲紅起上嚟。榮恩嘅身材就好似佢阿哥比爾同派西咁，但係比查理、弗雷同喬治仲要大隻啲。正喺度發育嘅榮恩確實成為咗哈利其中一個最高嘅同學，甚至比佢嘅一啲阿哥仲要高。

性格上

性格方面，榮恩係一個鍾意用簡單方法嚟做嘢嘅人，因為佢唔鍾意好辛苦咁做嘢。榮恩喺１年級嗰時，當佢喺霍格華茲圖書館裡面同哈利仲有妙麗３個人去搵尼樂·勒梅嘅資料嗰陣，佢只係漫無目的咁將啲書喺書架上面抽出嚟揭吓咁樣；佢仲習慣老作占卜學嘅預言作業，佢大部分啲功課都鍾意直接咁去抄妙麗嘅。不過，榮恩喺遇到艱難嘅處境嗰陣都能夠克服呢個習慣，比如係佢喺３年級嗰時幫海格隻鷹馬巴嘴去辯護而搵資料嗰陣時。榮恩嘅呢個性格同埋習慣就算喺大個咗之後都無消失到。

榮恩作為人哋個仔，佢對自己屋企貧困嘅狀況好敏感，有陣時仲會因為呢樣嘢而覺得尷尬。佢屋企嘅資金成日都好緊拙，就算唔係全部都好，榮恩大部分嘅資產都係由屋企人傳落嚟嘅，包括佢件長袍、教科書、魔杖，甚至仲有佢隻寵物鼠斑斑，呢啲搞到榮恩成為咗跩哥·馬份嘲笑嘅目標。不過，榮恩會喺馬份對佢嘅侮辱之後，就衝住佢講咗一啲佢從來連喺自己阿媽面前都唔敢講嘅嘢；喺霍格華茲大戰期間，榮恩喺第２次救咗跩哥條命之後就鬧佢係個「陰險狡猾同耍兩面手法嘅衰人」。另外，榮恩喺佢同自己啲阿哥同埋老友去比較嗰陣，佢就好容易對自己嘅能力無信心；佢覺得自己好似一直生活喺一班阿哥同老友哈利嘅陰影之下，呢樣嘢一直令佢覺得自己唔夠人哋咁叻。榮恩嘅雙耳喺覺得不安同尷尬嗰陣就會紅到發漲，呢樣嘢都成為咗佢嬲或尷尬嗰陣嘅明顯標誌。

榮恩出晒名係對食物嘅熱愛，他特別鍾意煙肉三文治，但係唔鍾意罐頭咸牛肉三文治。佢習慣咗一邊食嘢一邊講嘢，呢樣嘢令到妙麗覺得佢好乞人憎。榮恩同哈利一樣都好聰明，佢只係喺課堂上面無學習動力。當佢哋３個喺學校嗰陣，榮恩成日都想妙麗幫吓自己，而喺被拒絕或者妙麗唔喺身邊嗰陣，佢就唔知道自己應該做啲咩。

榮恩出晒名風趣幽默、忠誠、隨時準備捍衛佢嘅朋友，佢嗰種諷刺、俏皮嘅幽默感成日為佢嘅朋友帶嚟歡笑同放鬆；佢好注意同保護佢自己所關心嘅人，仲好多次顯示出佢寧願死都唔想佢關心嘅人受到傷害。榮恩亦都好勇敢，勇敢到可以同佢老友哈利相提並論。佢好多次總係諗唔唔洗諗咁樣就同哈利仲有妙麗一齊冒住極端嘅生命危險嚟行事，而呢種勇氣並無被佢嘅朋友忽略。不過，榮恩嘅幽默偶爾都會好傷人，就好似妙麗·格蘭傑同露娜·羅古德講嘅咁樣，雖然有可能係無心嘅。另外，榮恩往往喺情感上唔成熟，而且仲有啲遲鈍。喺佢同哈利仲有妙麗一起去搵分靈體嗰陣，榮恩變得更加成熟咗，甚至喺哈利情緒低落嗰陣時領導住３人組嘅行動。羅琳喺一次訪問裡面形容榮恩好得意，但係佢感覺遲鈍同細路仔脾氣，佢話：「榮恩有好多唔成熟嘅地方，呢個就係佢有好多幽默嘅來源。」

作為榮恩同埋飾演３人組裡面核心人物演員嘅第一次練習裡面，執導嗰個系列第３輯電影《阿茲卡班的逃犯》嘅導演艾方索·柯朗叫佢哋用第一人稱嚟寫一篇關於佢哋角色嘅自傳散文，由出世跨越去到發現魔法世界嘅體驗，入面包括埋角色嘅情感體驗。對於魯拔·格連特篇文章，柯朗回憶話：「魯拔無寫到文章，當我問佢點解無咁樣做嗰陣時，佢話：『我係榮恩嘅話，榮恩係唔會咁樣做。』所以我話：『好啦，你確實係了解你嘅角色。』」羅琳喺最後嗰輯小說裡面評論榮恩嘅角色發展嗰陣解釋話：「榮恩係３個主角入面最唔成熟嗰個，但佢喺第７輯長大咗。佢從來都唔大隻，啲人大多都淨係將佢睇成係哈利嘅朋友；佢阿媽實際上想要個女，佢喺最後嗰輯小說裡面終於無得唔承認自己嘅弱點，但係呢個正正就係令到榮恩變成男人嘅原因。」

榮恩嘅另外兩個性格特徵係喜怒無常同沒有安全感。佢同其他人可以變得乜都拗一餐，尤其喺同妙麗有拗撬嗰陣；佢又會發脾氣，特別係喺佢愛錫嘅人受到侮辱嗰陣就會挑釁對方，但係佢就唔會用魔法嘅方式嚟同對方發生衝突（例如，被激嬲嘅榮恩喺唔止一個場合選擇用拳頭而唔係用魔杖）。榮恩成日喺嘗試去保護佢愛錫嘅人嗰陣表現出極大嘅勇氣：佢喺２年級嗰時選擇克服自己嘅蜘蛛恐懼症而留喺哈利身邊（呢個係因為佢阿哥弗雷喺榮恩好細個嗰陣將佢嘅啤啤熊變成蜘蛛而搞成咁）；當妙麗喺《混血王子的背叛》入面俾貝拉·雷斯壯帶去用酷刑咒嚟審問嗰陣，佢好希望自己可以代替妙麗。就算榮恩對魁地奇充滿熱情，佢仲係查得利砲彈隊Chudley Cannons嘅球迷，而且仲飛得都唔錯，但係佢都係有緊張失準嘅問題，有時佢喺比賽嘅表現都會因為咁而受影響。史萊哲林小金匣仲將佢內心深處嘅恐懼揭示咗出嚟：佢一直最唔受自己阿媽嘅寵愛，而佢又誤會妙麗鍾意嘅其實係哈利，不過佢自己最終都克服咗呢一切。

榮恩對於某啲話題嘅睇法往往屬於老一輩嘅巫師觀點，因為咁成日會同哈利仲有妙麗嘅觀點互相衝突，因為佢哋兩個都係喺麻瓜世界裡面長大，不過掉轉頭嚟睇，榮恩通常會更加清楚咁了解巫師所遵從嘅標準。有一個例子就係，榮恩自己喺成個３年級都一直好鍾意雷木思·路平，不過當佢知道路平係狼人之後，佢就開始討厭仲疏遠路平；喺榮恩發現魯霸·海格係混血巨人嗰陣，佢相比哈利同妙麗顯得仲要震驚得多；喺《死神的聖物》裡面，榮恩對於巫師唔俾妖精用魔杖呢個話題同妖精拉環發生咗爭執。

魔法能力與技能

榮恩喺霍格華茲讀１年級嗰陣，佢得到佢阿哥比爾嗰件舊長袍、查理嗰支由梣木製成而個底伸出一條獨角獸毛嘅舊魔杖，仲有原本屬於派西嘅老鼠。喺《消失的密室》開始嗰陣，佢將嗰支魔杖用魔法膠帶綁埋一齊嗰陣時，差啲將支魔杖分開做兩半，不過自此之後嗰支魔杖就會發生啲好得人驚嘅故障，包括搞到咒語逆火反彈，仲發出啲奇怪嘅聲，同埋喺錯嗰一邊發出咒語。榮恩後嚟喺霍格華茲３年級開始之前終於買咗屬於自己嘅魔杖，嗰支係一支14英寸長由柳木同獨角獸毛整嘅魔杖。

榮恩嘅才能好少展示到出嚟，但佢同其他鄧不利多的軍隊成員一樣，喺《鳳凰會的密令》入面同食死人激烈嘅戰鬥入面倖存到，仲暗示喺《混血王子的背叛》入面俾食死人襲擊嗰陣，佢因為攞到幸運藥福來福喜嘅幫手之下令到佢有好好嘅表現。榮恩喺《死神的聖物》裡面無咗佢支魔杖，佢就將彼得·佩迪魯嘅魔杖當係自己嘅。後來，隨住榮恩同哈利發生咗好犀利嘅拗撬之後突然間成熟起上嚟，佢開始表現得更加有常識同才能。佢喺哈利有嚴重抑鬱嘅嗰段時間入面有效咁帶領住３人組去搵分靈體。

羅琳曾經話，榮恩嘅護法咒係以傑克羅素㹴嘅形式嚟呈現，「嗰個係一個好感性嘅選擇」，因為羅琳本人有一隻傑克羅素犬。

相關情節

神秘的魔法石

内文：哈利波特：神秘的魔法石同哈利波特：神秘的魔法石 (電影)

羅琳喺《神秘的魔法石》裡面首先介紹咗榮恩同佢屋企人俾讀者認識。當時哈利·波特喺國王十字車站嘅月台蕩失路，嗰次係榮恩同哈利第一次見面，衛斯理一家人引導哈利去穿過9¾月台嘅屏障嚟入到去魔法世界。後嚟因為霍格華茲特快列車嘅車廂滿晒座，榮恩問哈利可唔可以共用一個車廂之後，佢哋兩個咁就正式咁識咗，佢哋嘅友誼就係咁樣展開。榮恩對鼎鼎大名嘅哈利好著迷，而哈利都著迷喺過住平凡生活嘅榮恩。榮恩喺成程車裡面展示咗佢隻寵物老鼠斑斑俾哈利睇，而哈利就分享咗佢啲零食。佢哋兩個喺火車上面遇到妙麗·格蘭傑，佢哋兩個初頭都唔多鍾意佢，但後嚟佢哋三個一齊經歷咗唔同嘅事之後先至做咗好朋友。

當哈利同榮恩知道咗山怪闖入咗霍格華茲城堡嘅消息之後，佢哋仲意識到當時正留喺女洗手間嘅妙麗有俾山怪襲擊嘅危險，佢哋兩個於是飆到咁去女洗手間，企圖將山怪韞住喺女洗手間入面。佢哋兩個為咗幫妙麗解圍，分別試吓去引開山怪嘅注意力，最後榮恩喺妙麗嘅指導下成功咁用咗漂浮咒搞到山怪揸住嘅棍懸浮喺半空，再扑中佢個頭搞到佢暈咗。原本對妙麗覺得好討厭嘅榮恩，睇到佢向麥教授代佢哋解釋成事件經過嘅情景真係Ｏ晒嘴；但亦因為呢個契機令佢哋三個成為咗交情好深嘅鐵三角。

榮恩同哈利一齊成為霍格華茲葛萊分多學院嘅學生，佢哋兩個喺成個系列入面一齊接受相同嘅課程，仲喺學業上通常都有相似嘅成功同失望。佢哋兩個喺霍格華茲宿舍嘅室友係奈威·隆巴頓、西莫·斐尼干，同埋丁·湯瑪斯。棋藝高超嘅榮恩好鍾意玩巫師棋，仲好熱心咁教哈利點樣玩。榮恩喺拯救魔法石嘅嘅過程裡面扮演咗好重要嘅角色，佢喺巫師棋入面嘅策略令到哈利同妙麗可以好安全咁通過一場真人咁大而又危險嘅巫師棋遊戲。榮恩喺棋賽裡面揀咗犧牲自己隻棋子嚟去贏，跟住就被打暈咗（後尾醒返）。霍格華茲嘅校長阿不思·鄧不利多喺嗰個學年嘅結業晚宴上面，因為榮恩喺嗰次象棋嘅表現而額外俾葛萊分多學院加多50分，用嚟表揚佢喺「霍格華茲多年嚟最出色嘅國際巫師棋比賽」嘅表現，而呢啲最後時刻嘅分數令葛萊分多學院贏到嗰個學年嘅學院盃。

消失的密室

内文：哈利波特：消失的密室同哈利波特：消失的密室 (電影)

第２輯嘅小說同電影—發生喺魔法石事件跟住嗰年。榮恩喺暑假期間曾經寫過幾次信俾哈利，不過因為家庭小精靈多比阻止哈利啲巫師郵件嘅關係，搞到哈利收唔到榮恩嘅信，榮恩亦都收唔到哈利嘅回信。咁樣搞到榮恩好擔心，令到佢同埋佢兩個阿哥弗雷同喬治揸住佢哋阿爸嗰架魔法汽車去到德思禮家去接哈利返去洞穴屋。哈利喺跟住落嚟嗰一個月嘅暑假都喺衛斯理家嘅洞穴屋裡面度過。喺佢哋兩個去到王十字車站嗰陣，榮恩同哈利發現自己穿過唔到9¾月台嘅屏障，同哈利一齊嘅榮恩於是就諗到揸自己阿爸嗰架魔法汽車返去霍格華茲。呢個計劃雖然成功咗，但係嗰架魔法汽車喺旅程完咗嗰陣就無晒動力，結果就撞咗埋去渾拚柳嗰度，而榮恩支魔杖就喺呢個過程入面整斷咗，榮恩淨係用魔法膠帶黐住，搞到嗰支魔杖以後都唔能夠發揮正常嘅功能（成日都會逆火反彈）。衛斯理先生嗰架魔法汽車撞咗埋去渾拚柳之後就自動駛咗入去禁忌森林—嗰個係霍格華茲範圍邊緣唔准學生入去嘅一片森林。榮恩後嚟收到自己阿媽寄嚟嘅一封咆哮信，鬧佢揸走咗佢哋阿爸架魔法汽車仲搞到好麻煩。

喺小說同電影嘅後嚟，霍格華茲嘅學生之間忽然間傳起「史萊哲林傳人」嘅傳聞，仲陸續有啲學生同學校教職員被石化咗。榮恩喺搵史萊哲林傳人嘅過程入面，佢負責去搵湯姆·魔佛羅·瑞斗身份嘅第一條線索：佢諗返起自己曾經見過學校入面嘅一個「學校提供特殊服務」嘅獎盃上面刻咗「T·M·瑞斗」嘅名。哈利、榮恩同妙麗為咗知道關於「史萊哲林傳人」嘅線索，佢哋三個喺萬聖節嗰晚利用變身水嚟令到佢哋變到好似跩哥·馬份嘅心腹—克拉Crabbe同高爾Gregory，咁樣佢哋三個就有機會𥄫到馬份，仲有機會擢chok到佢講自己對密室嘅了解。哈利、榮恩同馬份後嚟因為俾人罰而被迫跟住海格入去禁忌森林嗰度去做勞動服務，榮恩被迫面對住佢最恐怖嘅噩夢—蜘蛛，佢哋兩個仲入到去蜘蛛繁殖地嚟去搵海格喺佢學生時期所養嘅八眼巨蛛—阿辣哥，嗰隻巨型蜘蛛仲有佢啲子子孫孫差啲將哈利同榮恩佢哋兩個食咗，不過衛斯理家嘅魔法汽車喺禁忌森林出現仲救咗佢哋兩個。

呢輯故事裡面都展示咗榮恩嘅屋企狀況：當跩哥·馬份鬧妙麗係麻種嗰陣，榮恩本嚟就詛咒佢食蛞蝓，不過因為佢支魔杖嘅狀況而搞到咒語反彈返去佢自己身上，結果令到佢搞到自己嘔咗一大堆蛞蝓出嚟；哈利同榮恩後嚟跟住佢哋搵到嘅線索搵到密室，同埋要去救俾人捉咗仲韞住喺嗰度嘅金妮嗰陣，榮恩嗰支魔杖又再失靈而令到有意外發生，搞到密室入口嘅天花板冧咗落嚟，一邊韞住咗榮恩同洛哈教授，另一邊就韞著哈利。哈利後嚟繼續去救金妮仲化險為夷。不過，當洛哈教授用榮恩嗰支魔杖嚟消除佢哋兩個人嘅記憶嗰陣，嗰支魔杖又再一次失靈而發生意外，結果搞到咒語反彈返去洛哈自己身上，搞到佢自己有永久嘅失憶症，需要送去聖蒙果醫院仲入住埋長期護理病房。

由於榮恩同哈利喺密室嘅成功，佢哋兩個因為咁而得到咗學校嘅服務特別獎，佢哋兩個仲齊齊幫自己嘅學院攞到200分。

阿茲卡班的逃犯

内文：哈利波特：阿茲卡班的逃犯同哈利波特：阿茲卡班的逃犯 (電影)

榮恩喺小說同電影入面發現佢養緊嗰隻老鼠斑斑失蹤咗，佢因為咁而怪責妙麗新買返嚟養嘅貓歪腿，搞到佢哋兩個反面。當妙麗因為上太多堂而搞到精神崩潰，同埋為咗巴嘴嘅命運而覺得苦惱嗰陣，佢哋兩個最後和好如初。海格因為佢擁有嘅巴嘴呢隻動物整親跩哥·馬份而要面臨處決風險嘅審判，榮恩就主動提出幫手去搵巴嘴抗辯嘅預備工作，但咁樣都無補於事。哈利、榮恩同妙麗喺巴嘴行刑嗰日去探海格嗰陣時，佢哋發現斑斑匿埋喺海格嘅屋仔裡面。到佢哋走嗰時，斑斑掙扎擺脫榮恩仲走甩咗。

哈利三人組同斑斑追逐去到渾拚柳，榮恩喺嗰度俾一隻大黑狗咬住仲拖咗落去隱藏喺渾拚柳樹底下嘅地道而入到去尖叫屋裡面，嗰隻大黑狗實際上就係天狼星·布萊克嘅化獸師嘅動物形態，而作為哈利契爺嘅布萊克就係啱啱喺巫師監獄阿茲卡班監獄逃獄走甩出嚟嘅逃犯。就喺呢個時候，嗰年嘅黑魔法防禦術教授雷木思·路平跟實哈利同妙麗之後去到嗰度。布萊克同路平齊齊向斑斑施展咒語，證明咗佢就係一個叫做彼得·佩迪魯嘅化獸師。路平、布萊克、佩迪魯同埋哈利嘅阿爸—詹姆·波特４個人係喺霍格華茲讀書嗰陣嘅老友，而佩迪魯被認為俾天狼星謀殺死咗。假扮已經死咗嘅佩迪魯自嗰時開始就一直用老鼠嘅形態嚟生活，佢唔承認布萊克同路平所講嘅一切，不過路平同布萊克咁多年嚟將以前嘅所有嘢拼湊埋一齊就得出佩迪魯一直就係佛地魔嘅僕人，佢仲喺當時向佛地魔洩露咗哈利父母下落嘅秘密，結果搞到佢哋兩個被謀殺死咗。

起初，榮恩並唔信天狼星所講嘅嘢，仲唔肯將斑斑交俾佢，但係當佢知道呢隻老鼠嘅真正身份嗰陣時，真相令到佢覺得好反感。當佢哋一班人帶佩迪魯走出渾拚柳樹窿嗰陣，佢就走甩咗。榮恩俾佩迪魯嘅咒語打低咗，搞到佢被送咗去霍格華茲嘅醫院側翼嗰度仲被迫喺嗰度留醫，而哈利同妙麗就喺鄧不利多校長嘅提醒下利用時光器返番去以前，仲及時拯救咗天狼星同埋巴嘴。

天狼星喺小說嘅結尾為咗彌補榮恩無咗斑斑呢隻寵物而送咗一隻容易興奮嘅貓頭鷹仔俾佢嚟做補償，金妮將佢改名做豬水鳧Pigwidgeon，而榮恩就暱稱呢隻貓頭鷹做「豬仔Pig」。

火盃的考驗

内文：哈利波特：火盃的考驗同哈利波特：火盃的考驗 (電影)

衛斯理一家人喺小說同電影開頭邀請咗哈利同妙麗一齊去睇魁地奇世界盃。榮恩對佢自己最鍾意嘅魁地奇冠軍維克多·喀浪Victor Krum抱住敬畏嘅心態。對於喀浪用德姆蘭學院冠軍代表嘅身份去到霍格華茲參加三巫鬥法大賽Triwizard Tournament嗰陣時，榮恩對呢樣嘢覺得更加興奮。嗰個比賽係霍格華茲同其餘兩間魔法學校之間競逐歐洲排名頭三位嘅一場巫師魔法錦標賽。不過，當未成年嘅哈利好神秘咁成為咗第４名冠軍代表嗰陣，榮恩因為誤會而加入咗反對者嘅行列，佢哋認定哈利實係用咗某啲方法喺火盃度出術嚟作弊，搞到榮恩更加對哈利覺得失望；根據妙麗嘅講法，呢個係源於榮恩潛藏喺心裡面對哈利嘅妒忌，因為佢覺得自己俾佢啲阿哥又或者係作為佢老友嘅哈利推到去焦點以外嘅地方。呢道裂痕嚴重到搞到佢哋兩個冷戰咗幾個禮拜都仲未和好。不過，榮恩喺後嚟意識到嗰個三巫鬥法大賽嘅危險性，同埋佢最終都相信哈利並唔係佢將自己個名掉deu6入去火盃，不過佢哋兩個喺哈利成功咁通過第１項任務之後先至好返。

按照三巫鬥法大賽嘅傳統，霍格華茲會喺聖誕節嗰陣舉辦聖誕舞會。榮恩同哈利對於聖誕舞會確定約會嘅前景覺得揦手都唔成勢，榮恩用佢唔成熟嘅約會方式嚇親妙麗，尤其佢係無邀請對方，好明顯就係直到最後嗰刻先至意識到妙麗係個女仔。哈利喺最後嗰刻邀請到芭蒂同芭瑪·巴堤同佢哋兩個一齊參加舞會先至挽救到嗰個局面，不過芭瑪似乎對榮恩脾氣差嘅態度仲有佢嗰件爛溶溶嘅禮服似乎唔多高興。當榮恩見到妙麗同佢嘅前偶像維克多·喀浪約會嗰陣，搞到佢妒忌到極點。當妙麗過嚟搵榮恩同哈利友好咁傾計嗰陣，榮恩嬲到控制唔到自己咁話對方係「私通敵人」。佢哋兩個喺舞會完咗嗰陣嘈得好犀利，妙麗話榮恩指佢應該喺喀浪邀請佢之前就去問自己，而唔係好簡單咁希望喺默認嘅情況下約會佢。榮恩完全無得到暗示，如果佢唔否認嘅話，就係佢忽視咗佢哋兩個人對大家越來越明顯嘅感情。榮恩對喀浪嘅妒忌亦都反映咗喺妙麗對榮恩明顯迷戀嘅花兒·戴樂古（三巫鬥法大賽裡面波巴洞嘅代表）所產生嘅討厭身上，佢哋兩個似乎成日為呢啲嘢嘈得相當開心。

喺三巫鬥法大賽嘅第２項任務入面，由於榮恩同妙麗係哈利最掛心嘅人，所以佢被揀中要哈利喺霍格華茲湖底深處營救嘅人。榮恩最終俾哈利成功咁救咗出嚟，佢仲溫和咁取笑哈利，覺得執行任務嘅人質實際上係喺危險之中。榮恩有時顯示都會嫉妒佢嘅朋友妙麗，而有啲爭論就證明咗妙麗係佢最鍾意嘅女仔。不過，露娜·羅古德曾經暗示過對榮恩有興趣。

鳳凰會的密令

内文：哈利波特：鳳凰會的密令同哈利波特：鳳凰會的密令 (電影)

榮恩喺呢輯小說同電影入面被任命做葛萊分多學院嘅級長，呢個令佢自己同其他人都覺得驚訝，尤其係另一位新任級長妙麗。榮恩阿哥派西喺嗰陣時同屋企人嘅關係疏遠咗，佢派咗隻貓頭鷹嚟祝賀榮恩，仲建議佢同哈利「斷絕關係」而去揀去企喺霍格華茲新任黑魔法防禦術教授桃樂絲·恩不里居嗰邊，呢封信搞到佢激嬲埋榮恩。當啲同學暗示哈利對佛地魔翻生係個大話嗰陣時，榮恩好鐵決咁表示佢對哈利嘅忠誠同支持，有時仲會用埋佢作為級長嘅權力嚟要脅佢哋收聲。就算榮恩同妙麗好似平時咁嘈，不過佢哋兩個都仲係企喺統一戰線上面支持哈利。對於恩不里居利用魔法部嚟慢慢接管咗由鄧不利多營運嘅學校，黑魔法防禦術嘅學習喺學校裡面幾乎係被禁嘅，妙麗因為咁就建議哈利將實用嘅黑魔法防禦術教吓啲同學，榮恩對呢樣嘢都表示支持。佢哋三個共同創立咗一個叫做鄧不利多的軍隊嘅秘密學生組織。榮恩仲用看守手嘅身份加入去葛萊分多魁地奇球隊，佢嘅精神同埋自信心問題成日喺訓練同比賽入面搞到佢嘅狀況變得唔多好，呢樣嘢搞到史萊哲林球隊創作咗一首關於榮恩將會點樣確保佢哋球隊贏得到校內隊際魁地奇盃嘅歌。不過，榮恩喺最後一場比賽入面打得仲更加好，令到葛萊分多魁地奇球隊贏到比賽仲贏埋魁地奇盃。

榮恩同哈利、妙麗、金妮、奈威仲有露娜喺小說同電影嘅高潮部分入面，佢哋喺魔法部神秘部門嘅戰鬥入面同食死人作戰。榮恩喺戰鬥入面受咗傷，不過佢喺小說結尾嗰陣完全好返晒。

混血王子的背叛

内文：哈利波特：混血王子的背叛同哈利波特：混血王子的背叛 (電影)

榮恩喺小說同電影裡面嘅暑假期間生得高咗好多，仲吸引到女同學文妲·布朗嘅注意。作為葛萊分多魁地奇新任隊長嘅哈利，佢揀咗榮恩繼續擔任魁地奇隊嘅守門員，而唔係競逐嗰個位嘅候選人寇馬·奧布萊恩Cormac O'Brien，奧布萊恩同榮恩有同等嘅技能，但係奧布萊恩喺團隊合作同服從命令方面都有困難。榮恩喺知道妙麗好有可能錫咗喀浪之後，佢喺魁地奇比賽入面嘅表現越來越唔掂，佢仲因為妒忌自己以前嘅偶像而對妙麗變得唔友善。榮恩嘅自卑心對阿妹金妮都無乜幾多幫助，當榮恩發現自己阿妹同佢嘅男朋友錫錫之後嘅反應好弊，金妮拋出一個事實就係，榮恩喺成班阿哥同細妹裡面係唯一一個從來未得到過初吻嘅人。哈利為咗增強榮恩嘅自信心，佢假扮將一種可以令飲咗嘅人帶嚟好運嘅魔藥—福來福喜俾榮恩飲，榮恩真係信佢自己飲咗幸運藥（其實係安慰劑），結果佢喺魁地奇比賽入面幫葛萊分多魁地奇球隊贏咗個比賽，而佢嘅表現更加令人欽佩。不過，呢樣嘢搞到榮恩同妙麗之間炒大鑊：妙麗鬧哈利幫榮恩出術嚟作弊（事實唔係咁），而榮恩就鬧妙麗唔信任佢嘅能力。文妲·布朗喺魁地奇比賽之後嘅慶祝活動入面錫咗榮恩，對呢樣嘢妒忌到發癲嘅妙麗為咗報復，佢將奧布萊恩睇成係佢嘅約會對象，仲同奧布萊恩一齊去咗新任嘅魔藥學教授赫瑞司·史拉轟搞嘅聖誕派對，但事實證明咗奧布萊恩係一個自大狂。妙麗喺聖誕節過咗之後繼續無視榮恩，佢行過榮恩身邊嗰陣仲特登停低嚟淨係為咗俾佢一個不屑嘅眼神同埋偶爾嘅冷嘲熱諷。直至嗰陣時為止，榮恩明顯係唔係好明白自己同文妲嘅關係。

喺榮恩３月生日當日，佢意外咁食咗實際上係準備俾哈利已經注入咗痴心水Amortentia嘅朱古力大鍋Chocolate Cauldron。哈利將佢帶去史拉轟教授嗰度俾教授醫返好之後，佢又飲咗實際上係由跩哥·馬份準備俾鄧不利多嘅有毒蜂蜜酒，全靠哈利當時將一種解毒劑—毛糞石Bezoar塞咗入去佢個嘴嚟救返佢條命，榮恩後嚟被轉送去到學校裡面嘅醫院側翼嗰度留醫。驚到唔記得咗嬲嘅妙麗唔知點算咁趕到去醫院側翼，哈利、金妮同埋佢哋兩兄妹嘅孖生阿哥都坐晒喺榮恩床邊，佢哋都聽到榮恩吟吟沉沉又語無倫次咁叫住妙麗個名，但係又聽唔明榮恩喺度講乜就將佢忽略咗；相反，當文妲嚟到探佢嗰陣，榮恩就作狀詐瞓。喺榮恩好返晒之後，佢同妙麗好返，而榮恩同文妲喺無幾耐之後就分開咗。羅琳喺一次訪問入面講到自己「真係好鍾意寫榮恩同文妲嘅故仔，而令人開心嘅原因係，對比其餘兩個主角嚟講，榮恩到而家為止都仲係好唔成熟，佢需要令自己襯得起妙麗......佢一定要喺情感上有所成長，而家佢就跨出咗一大步。」

起初，榮恩對哈利話跩哥·馬份就係食死人—佛地魔嘅追隨者嘅事表示唔支持，但佢後嚟被說服咗。喺哈利同鄧不利多一齊離開霍格華茲去搵分靈體返嚟之前，哈利安排佢同妙麗仲有金妮—同埋佢哋可以召喚任何嘅鄧不利多的軍隊成員密切咁關注住馬份同埋石內卜。哈利仲提供咗細細樽嘅幸運藥福來福喜嘅殘骸俾佢哋，希望可以用嚟幫到佢哋。就算有鄧不利多的軍隊嘅監視，馬份都仲可以幫食死人提供到一個入到去霍格華茲嘅秘密入口，一場戰鬥隨即就展開。多得福來福喜嘅幫手，榮恩、妙麗同金妮喺戰鬥入面無受到食死人詛咒嘅傷害。當馬份證明自己做唔到嗰陣，石內卜喺天文塔之戰入面殺咗鄧不利多。喺鄧不利多嘅葬禮上面，榮恩安慰住喺度喊緊嘅妙麗。佢哋兩個發誓要幫哈利找到同摧毀分靈體，仲要殺死佛地魔，就算呢個意味住佢哋要暫時離開霍格華茲。榮恩同妙麗日漸加深嘅關係好多次引起咗讀者嘅注意，佢同妙麗仲未解決嘅浪漫張力成為咗小說嘅主要（實際上係成個系列）嘅其中一個子情節。另外，哈利同榮恩嘅友誼已經強化到俾哈利可以直接同榮恩老實咁講，話佢喺魁地奇嘅表現正喺度危及佢喺球隊中成員資格嘅地步，不過呢個係無任何一個角色能夠親自接受（咁直接嘅事實）。

死神的聖物

内文：哈利波特：死神的聖物、哈利波特：死神的聖物1同哈利波特：死神的聖物2

哈利３人組喺鄧不利多過咗身咗之後分別得到屬於佢嘅遺物，而榮恩得到嘅係鄧不利多嘅熄燈器。榮恩同妙麗應承同哈利一齊去搵佛地魔嘅所有分靈體，等佢喺最後可以打低佛地魔。不過榮恩擔心而家俾佛地魔接管嘅魔法部會知道佢喺度同哈利一齊執行任務，於是佢喺佢阿爸加埋阿哥弗雷同喬治嘅幫手之下，俾屋企嘅食屍鬼著住佢嘅睡衣，仲四圍散播住佢惹咗一種傳染性極強嘅魔法皮膚病—散花痘Spattergroit嘅謠言—佢嘅症狀會搞到患者爆發好鬼肉酸又難睇嘅瑕疵同膿瘡，仲會令佢留低令人毛管戙嘅痘痕同瘡，呢個用嚟做佢缺席霍格華茲７年級課程嘅一個藉口。當３人組試吓去搵桃樂絲·恩不里居攞到嘅金匣仔嗰陣，榮恩將自己扮成魔法部嘅職員雷格·卡特摩Reginald Cattermole。

哈利喺搵分靈體嘅旅途上面，因為佢擔心金匣仔可能會唔見咗或者俾人偷走咗，所以就決定希望有人可以將嗰個分靈體一直戴喺身上。但係嗰個分靈體對榮恩有更加深遠嘅影響，呢個似乎比起哈利或者妙麗嘅影響仲更加犀利。榮恩最後因為旅程上嘅唔舒適同埋無具體嘅計劃而沮喪得嬲到震，結果搞到佢離開咗自己嘅同伴。哈利同妙麗為咗佢唔喺度而覺得好苦惱，喺佢走咗出走嗰段時間入面甚至無提起佢個名。不過，當佢哋終於提到榮恩嗰陣，榮恩就即刻為咗自己走咗去嘅決定而覺得後悔，但當時佢就俾死拿錢捉住咗，榮恩後嚟因為妙麗喺附近施展咗對抗食死人嘅結界而令到佢返唔到去佢哋身邊，不過佢喺鄧不利多遺物嘅熄燈器入面嘅未知魔法引導佢返到去哈利嘅位置。

當哈利試吓喺冰凍嘅湖水裡面攞返把葛萊分多寶劍嗰陣，榮恩透過拯救哈利等佢唔好浸親咁好戲劇性咁返到嚟。哈利叫榮恩用把葛來分多寶劍嚟摧毀個金匣仔嗰個分靈體嗰陣，半空上面就突然出現咗幻象，喺分靈體裡面嘅佛地魔部分靈魂就透過揭示榮恩係「好恨有個女嘅阿媽最唔在意嘅一個仔女」嚟利用榮恩嘅不安全感，然後又展示俾佢睇哈利同妙麗嘅一個假嘅幻象，幻象入面嘅佢哋話無咗榮恩會更加開心，仲有幻象入面嘅妙麗話揀咗同哈利拍拖而無辦法回報佢嘅感情。呢個明顯搞到榮恩對佢哋兩個嘅信心動搖咗，不過真正嘅哈利大聲話自己只係當妙麗係好朋友同兄弟姊妹咁樣，淨係咁樣。榮恩終鼓起勇氣仲克服咗幻象，仲將嗰個分靈體一分為二咁摧毀咗。

哈利突然相信榮恩返嚟所創造嘅命運，佢即刻就原諒咗榮恩，仲同妙麗講得好實咁話一定係榮恩用葛萊分多寶劍嚟摧毀咗史萊哲林嘅金匣仔。佢哋３個最後都俾死拿錢捉到，貝拉·雷斯壯仲利用酷刑咒去折磨妙麗嚟得到佢想要嘅消息，呢樣搞到榮恩陷入咗恐慌，就算哈利叫佢冷靜落嚟同埋去諗一個更好嘅計劃，但係佢都係尖叫到停唔到，仲用盡晒全力想出去救妙麗。佢哋３個後嚟同埋其他被囚禁嘅人俾家庭小精靈多比救咗出嚟，不過多比喺逃走嘅過程度俾貝拉·雷斯壯殺死咗。

哈利３人組後嚟返到去霍格華茲，希望可以搵到哈利喺佢腦海度出現嘅最後嗰個未知分靈體。喺將葛萊分多寶劍交俾妖精拉環之後，榮恩就諗到可以攞到多啲蛇妖毒牙嘅辦法，仲諗辦法講到夠多嘅爬說語嚟打開舊陣時嗰個消失的密室嘅大門，而妙麗喺嗰度摧毀咗用嚟做分靈體嘅赫夫帕夫金盃。當榮恩講到自己開始擔心霍格華茲入面啲家庭小精靈嘅命運嗰時，聽到呢番說話嘅妙麗丟deu6低咗佢自己跟身帶住嘅蛇妖毒牙，佢哋兩個仲第一次錫對方。

榮恩後嚟參與咗霍格華茲大戰，仲睇住自己阿哥弗雷死咗，後尾佢同奈威·隆巴頓聯手打低咗焚銳·灰背。

後記

喺佛地魔倒台嘅19年之後，雖然電影結尾無明確咁講到榮恩同妙麗結咗婚，但新聞文章同其他來源都當呢個係事實。後來妙麗仲做咗魔法部部長。佢哋兩個有兩個仔女：露絲·格蘭傑─衛斯理（大女）同埋曉高·格蘭傑─衛斯理（細仔）。電影裡面最後嗰一幕就係榮恩同妙麗兩個送佢哋個女去霍格華茲讀一年級嘅情景。

榮恩喺結婚之後通過咗佢嘅麻瓜駕駛考試，不過妙麗好明顯就相信佢如果唔係對考官施展咗混淆咒嘅話就做唔到呢一點（榮恩偷偷咁同哈利透露自己確實係咁樣做過）。榮恩同哈利以正氣師嘅身份喺魔法部嗰度做嘢，佢哋仲同妙麗一齊幫手改造魔法部；令到嗰度同以前嗰個存在住好大嘅分別。榮恩喺做正氣師之前，佢得閒嗰陣就會同佢阿哥喬治一齊經營衛氏巫師法寶店，呢間舖頭成為咗一樣非常之有利可圖嘅業務。

喺家庭生活方面，據妙麗所講，佢哋兩個喺婚後發現大家後續嘅婚姻生活相處得並唔和睦，因為咁需要尋求婚姻輔導嘅協助。

描寫

電影系列

魯拔·格連特喺《哈利波特》系列全部８套戲入面都飾演榮恩·衛斯理嘅角色。格連特喺睇咗BBC嘅兒童新聞節目《Newsround》邀請細路發送關於佢哋自己信息嘅一條片之後參加試鏡，而格連特就傳咗一張相、一個由佢自己寫嘅劇本同埋一段說唱，裡面記錄咗佢演繹呢個角色嘅願望。羅琳好支持呢個選角，佢話格連特對榮恩嘅角色係「完美」嘅選擇。格連特對呢個角色嘅刻畫攞到一致好評，令到佢喺《衛星獎》嘅「傑出新人」裡面攞到獎，仲憑住佢喺第一輯電影入面嘅表現而攞到《青年藝術家獎》嘅「最有前途年輕新人」。佢嘅演繹成日都被認為係三個主角之中最好嘅嗰個。

格連特喺頭３輯《哈利波特》系列電影入面嘅都係屬於有啲搞笑嘅角色，不過榮恩呢個角色喺第４輯電影入面似乎會變得嚴肅得多，但去到第５同第６輯裡面又變返佢原本嘅性格。

舞台系列

2016年，英國演員保羅·索恩利為倫敦西區劇院嘅皇宮劇院上演《哈利波特：被詛咒的孩子》入面飾演榮恩·衛斯理嘅角色，佢係倫敦原版嘅演員，佢喺2017年嘅《Whatsonstage.com》獎入面被提名做「最佳戲劇男配角」。

2018年，索恩利喺百老匯嘅抒情劇院重演榮恩·衛斯理嘅角色。

迴響同評價

榮恩·衛斯理呢個角色好受歡迎。《IGN》揀咗榮恩做佢哋最鍾意嘅《哈利波特》角色嘅第三位，提到榮恩作為喜劇演員嘅角色令佢「即刻變得可愛」，而他對妙麗·格蘭傑嘅挫敗感同調情係個「亮點」。榮恩同哈利嘅友誼被列為文學同電影入面表現最好嘅人物之一，而佢同妙麗由朋友去到戀人嘅關係通常俾人稱為粉絲嘅最愛，亦都成為嗰個系列入面最好嘅配對之一。

流行文化

• 榮恩嘅角色曾多次出現喺哈利波特嘅戲仿作品入面。
• 薛夫·邁亞斯喺《Saturday Night Live》嘅小品入面飾演榮恩，而蓮茜·露漢喺入面做妙麗。
• 喺阿利斯泰爾·麥高恩嘅節目《大印象》入面，佢做咗一個叫做《路易斯·波特與哲學家的鬆餅Louis Potter and the Philosopher's Scone》嘅小品，佢用安妮·羅賓遜做榮恩嘅印象嚟做特色。
• 喜劇救濟喺2003年演出咗一個叫做《哈利波特與阿塞拜疆的神秘大壺Harry Potter and the Secret Chamberpot of Azerbaijan》嘅惡搞故事，其中珍妮花·桑達絲用榮恩同J·K·羅琳嘅身份出現。
• 喺猶他州沙漠之星劇院上演嘅一齣由路易斯三姊妹：羅拉·J、艾美·K同埋安娜·M寫劇本嘅戲劇《哈利普特：伙計，我的魔杖在哪裡？Harry Podder: Dude Where's My Wand?》入面，榮恩嘅角色以「榮恩·斯內斯利Ron Sneasley」嘅身份出現。
• 榮恩仲喺喜劇小品《All That》入面嘅「哈利球膽Harry Bladder」嗰度出現，喺入面榮恩由布萊恩·赫恩Bryan Hearne飾演嘅ReRon身份出現。
• 喺尼爾·西塞雷加嘅《波特木偶夥伴》嘅小品入面，榮恩都係常規角色；喺其中一集《神秘的滴答聲The Mysterious Ticking Noise》入面，榮恩同哈利、妙麗、石內卜同鄧不利多一齊俾佛地魔裝嘅炸彈炸死咗；嗰個劇集係截至2008年有史以嚟瀏覽次數排名第17位嘅片，仲喺YouTube上得到2007年嘅《最佳喜劇》獎。
• 2008年美國喜劇電影《乜都得先生》入面，占·基利飾演嘅卡爾參加咗由里斯·達比做嘅諾曼去主持嘅一個哈利波特主題派對，諾曼喺入面扮成榮恩。
• 由星童製作嘅2009年戲仿音樂劇《非常波特的音樂劇》同2010年嘅《非常波特的音樂劇續集》入面，榮恩呢個角色由祖兒·里希特Joey Richter飾演。