石內卜

賽佛勒斯・石內卜（英文：Severus Snape），係英國作家J. K. 路靈嘅奇幻小說《哈利波特》系列其中一個主要角色。佢係主角哈利波特讀緊嘅霍格華茲魔法學校嘅魔藥學教授，喺鄧不利多死咗之後接任校長。佢係一個強大嘅巫師，喺魔藥學方面好有天賦。嚴肅、古板嘅外表底下隱藏住強烈嘅情感、痛苦。喺成個故事入面佢都好憎哈利波特，因爲見親哈利佢就諗起佢老頭詹姆·波特，而詹姆喺讀書時期成日都恰佢。