跩哥·馬份

跩哥·馬份（英文：Draco Malfoy，大陸版譯德拉科·馬爾福）係英國作家J. K. 路靈寫嘅奇幻小說《哈利波特》系列嘅其中一個角色，係同哈利同屆嘅史萊哲林書院學生。佢身邊成日跟住兩個跟班文森·克拉同葛果里·高爾，係哈利·波特學生時期嘅主要「敵人」。

馬份係一個好懦弱嘅男仔，但係會爲咗得到一啲嘢而去傷害其他人。書入面寫佢係一個臉色蒼白、有淡金色頭髮同灰色眼睛嘅男仔。

佢出身於廿八聖族之一嘅馬份家族，係魯休思·馬份同水仙·馬份（原姓布萊克）嘅獨子。經常睇唔起好似妙麗呢啲麻瓜出身嘅人。喺戲入面馬份呢個角色係由Tom Felton演嘅。

角色塑造

馬份係作為哈利嘅映襯角色出現，靈感嚟自J.K.羅琳讀書嗰陣遇到嘅㗇㗇霸霸嘅同學。哈利喺摩金夫人長袍專賣店度第一次見到馬份。羅琳用馬份呢個角色嚟代表啲傲慢、無禮、只睇血脈唔睇能力嘅人。馬份受佢嘅家庭影響，用「麻種」（Mudblood）呢個侮辱、歧視性嘅字眼去稱呼啲有麻瓜血脈嘅巫師，並認為佢哋唔配得到教育。哈利一見到佢，對巫師世界嘅種種美好想像就即刻破滅咗。羅琳話：「（哈利）發現巫師世界入面好多人其實同麻瓜世界入面啲人一樣咁衰。」

喺第一本書哈利波特：神秘的魔法石最早期嘅手稿入面，馬份原本係叫「Draco Spungen」，個姓後嚟改咗做「Spinks」，再改做依家嘅「Malfoy」。Philip Nel認為Malfoy係由法文詞彙「mal foi」衍生而成，係「壞嘅信念」咁解。喺一篇2002年發表嘅文章入面，Nilsen、Nilsen認為Draco同「draconian」呢個字有關，而個姓就係用「mal」開頭，喺法文入面係一個解「衰」或者「邪惡」嘅前綴。

馬份阿媽嗰邊好多親戚（布萊克家族）都係用恆星或者星座嚟命名，例如天狼星·布萊克、獅子阿爾法布萊克、Andromeda Black Tonks、貝拉·雷斯壯、Cygnus Black、Orion Black等等，Draco自己都係星座（天龍座）。馬份自己最後都用咗個星座—Scorpius（天蠍座）—做佢仔個名。