米奈娃·麥

米奈娃·麥 Minerva McGonagall
《哈利波特》嘅角色
霍格華茲嘅副校長米奈娃·麥。
首次出場	《哈利波特：神秘的魔法石》
尾次出場	《哈利波特：死神的聖物2》
作者	J·K·羅琳
扮演	瑪姬·史密芙（哈利波特系列） 費歐娜·葛拉史考特（前傳）
配音	謝月美（粵語配音）
詳細信息
性別	女性
職業	霍格華茲校長（1997年至今） 葛來分多學院導師（1956-1998年） 霍格華茲副校長及變形術教授 魔法法律執法司官員（1956年之前）
家庭	羅拔·麥（父）† 伊莎貝爾·羅斯（母）† 馬爾科姆·麥（兄弟）† 小羅拔·麥（兄弟）†
配偶	埃爾芬斯通·厄夸特 †
國籍	英國

米奈娃·麥（英文：Minerva McGonagall），係英國作家J·K·羅琳嘅奇幻小說《哈利波特》系列入面嘅虛構人物。小說裡面嘅人物一般會用「麥教授」嚟稱呼佢。麥教授既係霍格華茲魔法與巫術學院嘅副校長，同時又係葛來分多嘅學院導師同變形術教授，佢亦係鳳凰會嘅成員，係鄧不利多最堅定嘅支持者之一。喺鄧不利多校長過咗身之後，麥教授作為代理校長盡力保護學校唔俾黑魔法勢力侵蝕，直到賽佛勒斯·石內卜接任之後，她先至返去做副校長。

後來，霍格華茲師生喺第二次巫師大戰入面贏咗，佛地魔俾麥教授嘅學生哈利·波特打敗，佢都升職做正式校長。麥教授喺霍格華茲嘅教授團隊入面係個無庸置疑嘅強者，她曾經親自同佛地魔對打仲倖存，係個法力強大嘅女巫。

喺《哈利波特》系列嘅改編電影入面，麥教授嘅角色由女爵士瑪姬·史密芙飾演，史密芙將呢個角色形容為「戴著巫師帽嘅珍·布羅迪小姐」，不過隨住套戲嘅劇情進展，麥教授喺電影入面嘅戲份越來越少。

喺怪獸系列電影《怪獸與葛林戴華德之罪》同《怪獸與鄧不利多的秘密》入面，年輕嘅麥教授角色由費安娜·格拉斯科特飾演。電影嘅故事時間設定喺1927年，同咁多輯小說互相違背，對於呢件事官方已經講明將會重新設定麥教授嘅生平。

人物概述

麥教授個名入面嘅「米奈娃」係代表住智慧嘅羅馬女神；而佢嘅姓氏就嚟自19世紀登地（蘇格蘭東部港市）詩人威廉·托巴斯·麥。

角色性格同能力

米奈娃·麥喺1935年10月4號喺蘇格蘭出世，羅琳後來喺訪問度揭露佢嘅阿爸阿媽分別係羅拔·麥Robert McGonagall同埋伊莎貝爾·羅斯Isobel Ross。因為佢阿爸係麻瓜而阿媽係女巫嘅關係，所以令米奈娃成為咗一個混血女巫。

米奈娃喺11歲開始喺霍格華茲接受教育，喺經歷葛萊分多同雷文克勞兩個學院之間有史以來最長嘅學院分配儀式之後，佢被派去葛萊芬多學院。米奈娃同赫夫帕夫嘅同學帕莫娜·芽菜做咗朋友（後來做埋同事），仲喺當時嘅變形術教授阿不思·鄧不利多嘅指導下攞到變形術方面嘅呢種特殊才能。喺呢段時間裡面，麥教授諗辦法變成咗一個化獸師，佢可以變成一隻虎斑貓，仲提交咗文件嚟做正式嘅註冊。佢都係葛萊分多魁地奇球隊嘅一個熟練嘅成員。畢業之後，米奈娃做咗魔法部入面魔法法律執法司嘅一個員工，佢仲喺嗰度遇到同識到後來做咗佢老公嘅埃爾芬斯通·厄夸特Elphinstone Urquart。後來米奈娃有得升職，但係俾佢推咗，佢仲申請喺鄧不利多之下嘅霍格華茲教變形術。

1956年12月，米奈娃去到霍格華茲返工。喺霍格華茲做嘢期間，麥教授同鄧不利多變得特別親近，佢哋兩個係形影不離嘅朋友同埋同事，鄧不利多都開始承認米奈娃係佢最信任嘅其中一個盟友。最後，麥教授做咗變形術嘅學科負責人同埋葛萊分多學院嘅學院教授，仲要求所有學生要尊敬佢。喺前任校長阿曼多·狄劈退休，同埋鄧不利多被任命做咗校長之後，麥教授就成為副校長，仲成為咗開學宴上面負責執行分類儀式嘅教授。鳳凰會係佛地魔喺第一次巫師戰爭入面嘅一支最重要嘅反抗力量，不過米奈娃並唔係鳳凰會最初成立嘅成員。喺嗰次戰爭期間，麥教授無咗佢嘅兄弟小羅拔·麥Robert McGonagall Jr.，同埋佢最鍾意嘅兩個學生—詹姆·波特同莉莉·波特。隨著波特夫婦過身同佛地魔第一次倒台之後，麥教授就陪鄧不利多同魯霸·海格將嗰次遭遇嘅唯一倖存者—仲係BB嘅哈利·波特送去位於薩里郡嘅德思禮一家交俾佢嘅姨媽同姨丈。就算麥教授對德思禮一家係「最差嘅麻瓜」有所保留，但係佢都明因為哈利嘅契爺天狼星·布萊克被俾人屈同坐緊監，令到德思禮一家成為咗呢個細路唯一嘅親屬。

喺第一次巫師世界大戰之後，米奈娃同埃爾芬斯通結婚，不過埃爾芬斯通喺三年後死於毒觸手Venomous Tentacula嘅螫傷，令到米奈娃成為咗寡婦。

角色形象

米奈娃·麥係小說入面第一個出現嘅女巫。佢嘅形象係將黑髮紮成高髻，仲著住鮮綠色長袍，佢成日俾人睇到佢嚴肅嘅表情。佢戴嘅方形眼鏡嘅花紋就好似佢化身成虎斑貓嘅花紋，佢特別鍾意蘇格蘭格仔款嘅衫、飾物同用品，例如佢嘅睡袍就係蘇格蘭格仔嘅款式。根據作者羅琳所講，佢係一個「有活力嘅」70歲老人。喺故事情節入面，麥教授被認為係一個魔法力量強大嘅女巫，佢精通好多種形式嘅魔法，尤其係變形術同施展咒語。佢可以喺唔洗施展咒語或者有時唔用魔杖嘅情況下用某啲魔法。麥教授係一個註冊咗嘅化獸師，佢可以隨意將自己變身成為一隻虎斑貓。

麥教授嘅個性特質喺一啲章節入面完全顯露無遺：

• 關心人哋：好似擔心當鄧不利多計劃將哈利留喺佢唯一生存嘅親戚——德思禮一家中會俾佛地魔手下嘅食死人攻擊；
• 智力過人：由於修練做化獸師嘅「化獸法」相當難，一般需要幾年嘅時間先至掌握到呢個魔法；
• 乾脆同粗魯嘅性格：佢批評好似魯霸·海格、西碧·崔老妮...等特定對象嗰陣；

麥教授出咗名嚴肅同有冷面笑匠嘅幽默感，佢一直受到霍格華茲嘅同齡人仲有學生嘅敬愛擁戴，仲得到僅次於鄧不利多嘅地位。大部分學生對麥教授嘅第一印象通常係嚴厲、乾脆果斷而且係鐵面無私嘅教授。咁樣嘅印象後來被證實係真嘅，但佢事實上偶爾都會展現出隨和嘅一面，呢個通常會令其他教授同啲學生覺得震驚。因為詹姆·波特同莉莉·波特都曾經係佢學生，佢因為咁而特別關心哈利·波特，佢都成日用間接嘅方式嚟幫哈利，仲成日暗示咗某啲事嚟幫哈利攞到好處，俾哈利當成除咗鄧不利多以外最信任嘅教授。麥教授好鍾意魁地奇，身為葛來分多嘅學院導師，佢一直支持住自己學院嘅球隊，仲對嗰個球隊嘅練習進展有興趣，亦都曾經因為葛來分多贏到魁地奇冠軍而好高興，甚至會感動到流眼淚。

喺佛地魔第二次崛起嗰陣，麥教授唔單止係鳳凰會嘅成員，更是鄧不利多校長最堅定嘅支持者，佢喺鄧不利多同石內卜過身之後繼任校長嘅職務。

相關情節

神秘的魔法石

内文：哈利波特：神秘的魔法石同哈利波特：神秘的魔法石 (電影)

麥教授喺《神秘的魔法石》開頭嘅章節入面第一次登場，當時佢全日守候住喺小惠因區嘅水蠟樹街4號，直至佢見到鄧不利多，佢喺嗰陣已經有能力喺無魔杖嘅幫助之下變成一隻貓，呢個就即刻證明咗佢係一個化獸師。

1991年，鄧不利多向自己最親密嘅同事同埋盟友透露，佢會保留住尼樂·勒梅嘅魔法石，仲叫佢嘅每個同事負責為呢塊魔法石設計一種保護措施，而麥教授設計嘅保護措施就係一個真人咁大嘅巫師界西洋棋—巫師棋。哈利·波特喺嗰年去到霍格華茲開始佢一年級嘅教育，佢派咗去由麥教授擔任導師嘅葛萊分多學院。

當哈利喺跩哥·馬份手上攞返奈威·隆巴頓嘅記憶球嗰陣，佢憑住自己施展嘅高難度技巧嚟攞返記憶球，搞到身為葛來分多學院導師嘅麥教授覺得好驚訝，令佢即刻要將波特推薦俾自己學院嘅魁地奇球隊隊長奧利佛·木透，話佢已經幫球隊搵到新嘅搜捕手。佢又俾哈利知道佢阿爸詹姆亦曾經係一個出色嘅搜捕手，仲曾經做過英格蘭國家隊國手呢件事，令到佢對魁地奇更有興趣。雖然一年級學生通常唔可以加入球隊，不過麥教授說服咗校長俾哈利加入葛來分多學院嘅代表隊，成為100年來最年輕嘅搜捕手。為咗確保哈利可以有屬於自己嘅掃把，佢都請求校長同意俾哈利擁有掃把，麥教授仲幫哈利買咗一把當時被譽為最好嘅飛天掃把—光輪2000Nimbus 2000，仲將葛萊分多重奪學院盃嘅重任都寄託喺哈利身上（後來哈利都無辜負佢嘅厚望，讀書嗰陣攞過幾次學院賽冠軍）。

喺嗰年嘅萬聖節盛宴嗰陣，黑魔法防禦術教授奎里納斯·奎若打斷晒所有人，佢警告所有人話有山怪出現喺地牢。鄧不利多於是命令啲學生返去宿舍，而佢就同其他教授去地牢。不過山怪並唔係喺地牢，啲教授留意到樓上傳嚟咗一陣好嘈雜嘅聲。佢哋咁多個人去到女生洗手間被毀嘅現場，而山怪俾哈利同榮恩·衛斯理打低咗，同時拯救咗佢哋嘅朋友妙麗·格蘭傑。妙麗為自己嘅朋友承擔起責任，話自己去搵山怪但如果唔係哈利同榮恩，自己一早就俾山怪殺死咗。麥教授喺妙麗嗰度扣咗學院5分，但係哈利同榮恩每人有5分，理由係「純粹嘅好彩」。

喺嗰年嘅後來，麥教授捉到喺落堂之後仲喺城堡裡面遊蕩嘅跩哥·馬份。馬份話喺海格嗰度見到哈利，仲有一條非法嘅幼龍。差唔多同一時間，妙麗同奈威俾學校管理員阿各·飛鼠捉到，佢哋都俾人罰留堂。到學期尾嗰陣，據透露同佛地魔有關嘅奎若教授試過去偷魔法石，但俾哈利、榮恩同妙麗阻止咗。由於佢哋三個嘅勇氣同埋奈威·隆巴頓嘗試企出嚟反對佢哋違反規則嘅勇敢，令到葛來分多學院最終贏到嗰年嘅學院盃。

消失的密室

内文：哈利波特：消失的密室同哈利波特：消失的密室 (電影)

跟住落嚟嘅學年開始，麥教授無得唔處理哈利同榮恩喺入唔到9¾月台仲錯過咗霍格華茲特快列車之後將亞瑟·衛斯理嘅飛天汽車撞埋去渾拚柳，仲差啲將魔法世界嘅事暴露俾麻瓜民眾知道。麥教授喺懲罰哈利同榮恩嗰方面比起史萊哲林嘅學院教授—魔藥學大師賽佛勒斯·石內卜會公平啲，麥教授只係將佢哋罰留喺學校而唔係將佢哋踢出校。

喺嗰年嘅晏啲時候，據講「消失的密室」之門經已被打開，呢個搞到葛來分多學院嘅兩個學生—妙麗同柯林·克利維由於係麻瓜出身嘅關係而石化咗。直到學期尾，因為魔法部暫停咗鄧不利多嘅職務，令到麥教授做咗臨時校長。最後，麥教授發現咗史萊哲林繼承人嘅另一張紙條，上面寫住佢將金妮·衛斯理帶咗入密室。麥教授好驚呢個將會係霍格華茲嘅終結，就喺新任黑魔法防禦術教授吉德羅·洛哈講佢所謂嘅英雄行為嗰陣，佢哋強迫洛哈搵出密室仲將金妮營救返出嚟。哈利同榮恩迫洛哈一齊入去二樓女生洗手間下面嘅窿，將金妮營救咗出嚟。鄧不利多嘅寵物鳳凰—佛客使將葛來分多寶劍交俾哈利，俾哈利喺佢嘅協助之下打低蛇妖。喺呢次遭遇入面，哈利喺不知不覺中用咗掂到蛇妖嘅血嘅毒牙嚟摧毀咗佛地魔嘅第一個分靈體—湯姆·瑞斗嘅日記。隨住蛇妖被打低之後，密室就閂埋咗。鄧不利多都恢復咗佢嘅職務，仲指派咗麥教授去準備慶祝宴會。

阿茲卡班的逃犯

内文：哈利波特：阿茲卡班的逃犯同哈利波特：阿茲卡班的逃犯 (電影)

喺嗰個學年嘅初頭，麥教授將一個時光器交俾妙麗，等佢可以同時修讀幾個課程。天狼星·布萊克喺阿茲卡班逃獄之後潛入去霍格華茲城堡，仲去到葛來分多交誼廳。由於奈威·隆巴頓因為成日無記性而寫低咗密碼清單，布萊克明顯就係咁就入到去。喺催狂魔嘅襲擊搞到哈利嘅掃把—光輪2000整爛咗之後，哈利收到由佢契爺天狼星送嚟嘅火閃電Firebolt。不過，麥教授就因為假設嗰支掃把係俾天狼星落咗詛咒送嚟將佢沒收，喺認為嗰支掃把安全之後就還返俾哈利。麥教授喺嗰年親眼睇住自己嘅學院贏到咁多年嚟嘅第一個魁地奇盃，令到佢公開咁流咗喜悅嘅淚水。

火盃的考驗

内文：哈利波特：火盃的考驗同哈利波特：火盃的考驗 (電影)

喺嗰個學年，霍格華茲宣佈將會舉辦三巫鬥法大賽，仲會為波巴洞魔法學校同德姆蘭學院提供住宿安排。就算未成年同裝備未夠都好，哈利都係被選做三巫鬥法大賽嘅冠軍代表。麥教授擔心佢學生嘅安全，仲懇求鄧不利多校長同魔法部嘅代表老巴堤·柯羅奇將哈利喺比賽入面除名但唔得。麥教授因為咁就將佢嘅課室借俾哈利、榮恩同妙麗，等佢哋可以為三巫鬥法大賽嘅第三個，亦都係最後一個任務嚟進行練習。喺冠軍賽結束同西追·迪哥里過身之後，麥教授就陪同鄧不利多校長同埋石內卜一齊喺食死人小巴堤·柯羅奇手上將哈利救出嚟，後者一直扮成新任黑魔法防禦術教授阿拉特·穆敵，嚟作為佛地魔復活計劃嘅一部分。據透露，小柯羅奇將哈利個名放入去火盃入面，仲落咗魔法迫使哈利參加比賽。小柯羅奇仲將三巫鬥法大賽嘅獎盃變成咗港口鑰嚟將哈利送去小漢果頓嘅墓地，喺嗰度攞哈利嘅血嚟令到佛地魔復活。麥教授被指示看守住小柯羅奇，但係佢阻止唔到魔法部部長康尼留斯·夫子派出嘅催狂魔將佢殺咗，嚟試吓阻止巫師公眾對佛地魔返嚟嘅大規模歇斯底里。魔法部開始咗一場針對哈利同鄧不利多嘅抹黑運動，嚟平息任何關於佛地魔翻生嘅謠言，仲因為咁結果淡化咗西追·迪哥里嘅死訊。

鳳凰會的密令

内文：哈利波特：鳳凰會的密令同哈利波特：鳳凰會的密令 (電影)

由於佛地魔的捲土重來，麥教授最終同鄧不利多、石內卜同海格，仲有佢嘅前同事雷木思·路平同阿拉特·穆敵一齊加入去重新組建嘅鳳凰會。麥教授返到去霍格華茲後，佢面臨住魔法部任命嘅黑魔法防禦術教授桃樂絲·恩不里居嘅挑戰。就算其他霍格華茲嘅教職員都怕咗佢，但麥教授一啲都唔畏懼咁明顯展現出佢對恩不里居仲有佢方式嘅厭惡同憎惡。恩不里居開始接管學校，仲宣布話魔法部部長康尼留斯·夫子任命自己做「總督察」。恩不里居仲試過干涉麥教授工作嘅嘢，甚至想取代校長行使任免教授嘅權力，令到麥教授當眾好嚴厲咁駁斥佢。雖然麥教授係一個嚴師，不過佢成日暗示某啲嘢幫哈利攞到好處，其中一個例子係佢喺哈利五年級嗰陣警告對方話魔法部正喺度監視住霍格華茲。考慮到恩不里居唔俾學生去學黑魔法防禦術，麥教授對哈利、榮恩同妙麗組成嘅鄧不利多的軍隊嚟教同學點樣自衛，佢對呢樣嘢表示支持。由於鄧不利多唔在位嘅情況，恩不里居將自己任命做校長，而唔係麥教授。

當恩不里居闖入去五年級嘅生涯諮詢果陣，恩不里居係都唔停咁打斷哈利，仲話佢永遠都唔會成為魔法部嘅正氣師之後，麥教授終於對佢發火。麥教授將哈利拉埋一邊仲同恩不里居大聲咁嘈，佢宣布自己會幫哈利去實現佢成為正氣師嘅夢想，就算嗰樣嘢係佢可以為哈利做嘅最後一件事。

麥教授喺保護海格唔好俾恩不里居炒咗嘅同時，佢嚟唔切抽出魔杖就俾恩不里居嘅正氣師用昏擊咒襲擊仲打中佢心口而冧低，佢被送咗去聖蒙果醫院。呢樣嘢令到霍格華茲嘅師生都對恩不里居更加不滿，話晒麥教授都係得到全體師生尊敬嘅女巫。後尾好彩麥教授嘅復原能力好唔錯，佢氣色仲相當好。麥教授直至神秘事務部戰鬥之後先至返到去霍格華茲教書，而佛地魔回歸嘅事實亦都俾世人知道。麥教授向參與神秘事務部戰鬥嘅學生，包括哈利、榮恩、妙麗、奈威同金妮，仲有及雷文克勞嘅學生露娜·羅古德，麥教授向佢哋嘅學院每個人各俾50分，嚟到表彰佢哋向巫師世界對佛地魔嘅回歸發出警告嘅嘉獎。

喺恩不里居被強行帶離霍格華茲校園嗰陣，麥教授都喺現場，佢指自己如果唔係佢嘅傷勢阻止佢嘅話，佢就會加入惡作劇精靈皮皮鬼輪流用拐杖同粉筆嚟趕走恩不里居嘅行列，而好多學生都跑去入口大堂睇住恩不里居一直飆出去。麥教授有氣無力咁告誡咗幾聲之後，就挨住教職員餐枱張凳；有人仲清楚咁聽到佢好遺憾咁講，好可惜佢唔可以親自去送恩不里居教授，因為皮皮鬼借走咗佢支枴扙；而當皮皮鬼想將水晶吊燈拆落嚟嘅時候，麥教授仲偷偷地幫手。

混血王子的背叛

内文：哈利波特：混血王子的背叛同哈利波特：混血王子的背叛 (電影)

麥教授係凱蒂·貝爾被詛咒之後，哈利、榮恩同妙麗最早求助嘅其中一個人，佢請石內卜同飛鼠先生調查貝爾掂到而搞到佢受詛咒嘅頸鍊。石內卜阻止咗詛咒嘅蔓延，哈利都承認自己嘅理論指跩哥·馬份應該對呢件事負責，不過佢嘅理論被駁返轉頭。

喺嗰年嘅晏啲時候，麥教授喺天文塔之戰度同食死人艾朵·卡羅決鬥，佢後尾先至知道石內卜殺死咗鄧不利多。麥教授原本最初被任命做代理校長，但係佢喺佛地魔掌權操控學校仲任命石內卜繼任做校長之後被降職—佢都仲係繼續做副校長、葛萊分多嘅學院導師，同埋變形學教授嘅職務。

死神的聖物

内文：哈利波特：死神的聖物、哈利波特：死神的聖物1同哈利波特：死神的聖物2

霍格華茲就算俾食死人佔領，麥教授都仍然留喺學校，嚟確保一眾學生唔會受到傷害。嗰年嘅晏啲時候，當哈利、榮恩同妙麗返去霍格華茲去搵雷文克勞嘅王冕嗰陣，麥教授都喺度。佢發現艾米克·卡羅聲稱佢個妹艾朵·卡羅喺雷文克勞塔而嘗試夾硬闖入去。麥教授打開咗雷文克勞嘅交誼廳，發現艾朵喺嗰度昏迷不醒。艾米克透露佢曾被警告過哈利會嘗試闖入雷文克勞塔，仲承認佢會將責任推卸俾宿舍裡面嘅學生。當麥教授唔肯仲俾艾米克向佢塊面吐口水嗰陣，哈利嬲到暴露咗自己嘅諗法，仲喺露娜嘅協助之下令佢哋兩兄妹無咗行動能力。麥教授跟住打低咗石內卜仲將佢逐出霍格華茲，同埋開始保衛學校嘅措施。佢責成奈威同西莫摧毀木橋嚟防止死拿錢潛入去霍格華茲校園。

麥教授後來幫手將年幼嘅學生疏散去到活米村，仲俾潘西·帕金森同所有贊成將哈利交俾佛地魔嚟換佢哋條命嘅學生離開。麥教授在場親眼睇住哈利徹底咁將佛地魔打敗，仲係除咗榮恩、妙麗同金妮之外，成為第一批祝賀哈利嘅其中一個人。

後續

霍格華茲大戰完咗之後，麥教授被任命做正式嘅霍格華茲校長，佢仲得到新任魔法部部長金利·俠鉤帽頒梅林一等勳章俾佢。由於奈威·隆巴頓喺草藥學嘅天份，麥教授因為咁就最終請咗佢做草藥學嘅新任教授，仲俾佢選做葛萊分多學院嘅新任學院教授。麥教授後來先至知石內卜係哈利嘅秘密保護者，石內卜亦係應鄧不利多嘅要求而殺死佢。麥教授於是獨排眾議，宣佈將石內卜嘅肖像掛喺校長室，同其他歷任校長嘅肖像並列嚟嘉許佢嘅勇氣，仲承認石內卜作為前任校長嘅身分。

根據《吟遊詩人皮陀故事集》同埋舞台劇《哈利波特：被詛咒的孩子》，仲有J·K·羅琳後來喺訪問入面提到，麥教授喺霍格華茲大戰之後做咗霍格華茲嘅正式校長，直到哈利·波特嘅細仔阿不思·賽佛勒斯·波特入學嗰陣仍然在任。

評價

《IGN》將麥教授列做嗰個電影系列最佳角色嘅第18位，仲指出：「作為霍格華茲嘅副校長同葛萊分多學院嘅院長，麥教授係一個紀律嚴明嘅人。佢好快就將行為唔好嘅學生踢出課室，仲喺情況允許下扣學院積分。呢個就係麥教授嘅可愛之處。」

《WatchMojo》將麥教授列做嗰個系列最佳角色嘅第九位，仲指：「作為霍格華茲嘅變形學教授、葛萊分多學院院長同鳳凰會嘅成員，麥教授係一位嚴厲同具有強烈責任感嘅女強人，佢要佢嘅學生受到唔遵守規則就要拘留嘅威脅，但喺極少數情況下都有較溫柔嘅一面，唔只係當佢將自己變成一隻貓嗰陣。隨住事態發展，米奈娃·麥即使喺霍格華茲大戰入面面對住佛地魔，佢都係個擁有強大魔法力量嘅強大女巫。」瑪姬·史密芙對呢個角色嘅詮釋都得到咗好多讚譽，作者J·K·羅琳話自己一直將呢位女演員想像成為麥教授嘅角色。就算係咁，史密芙話佢喺電影製作嗰陣覺得唔太自在，而且「感覺唔似做戲」，但佢話自己樂於參與到呢個系列嘅電影，因為咁樣令佢同佢啲孫建立咗聯繫。史密芙喺2007年被診斷出患有乳腺癌，期間她仲喺拍緊《混血王子的背叛》期間陷入咗掙扎，但佢喺2009年全面康復。

麥教授喺電影《怪獸與葛林戴華德之罪》裡面喺霍格華茲教書，但對粉絲嚟講係極具爭議，因為粉絲根據考證呢個角色仲未出世。

參見

• 鄧不利多
• 哈利·波特
• 妙麗·格蘭傑
• 榮恩·衛斯理

出面網頁

• 米勒娃·麦（Wayback Machine嘅版面存檔備份）在哈利波特中文維基嘅條目