哈利波特裡面嘅魔咒

喺J·K·羅琳嘅《哈利波特》小說系列入面，嗰度將魔法形容做１種可以用嚟凌駕喺自然法則常規上面嘅１種超自然力量。嗰個系列裡面存在住好多虛構嘅魔法生物，而一般生物有時都會表現出佢哋嘅魔法屬性。《哈利波特》世界入面嘅好多魔法元素都係建基喺現實世界嘅神話同魔法嗰度，羅琳將呢樣嘢都形容做「一種賦予世界質感嘅方式」。喺嗰個系列嘅小說入面都有形容到唔同嘅魔法物品，少數可以施展到魔法嘅人巫師同女巫將其他唔知道魔法世界存在嘅嗰班人畀個統稱佢哋，喺英國叫做「麻瓜muggles」，而喺美國就叫做「莫魔no-maj」。

魔法能力係先天遺傳嘅，帶有「顯性彈性基因」。巫師夫婦啱啱出世嘅BB通常都有魔法，嗰啲由巫師夫婦所生但係冇辦法施展到魔法嘅人就會被叫做「爆竹squibs」；而麻瓜父母所生嘅巫師或者女巫就會被叫做「麻瓜出身muggle-born」，佢哋有時會畀純血Pure-blood嘅巫師同女巫貶稱做「麻種mudblood」。雖然麻瓜出身嘅人好常見，但係爆竹就極之罕見。

《哈利波特》世界入面嘅好多魔法元素都係建基喺現實世界嘅神話同魔法上面，羅琳將呢樣嘢形容做「一種賦予世界質感嘅方式」。

《哈利波特》裡面嘅魔法喺2017年做咗大英圖書館嘅展覽同埋隨住展覽嘅附帶紀錄片主題。呢個叫做《哈利波特：魔法史Harry Potter: A History of Magic》嘅展覽係大英圖書館第１次以在世作家嘅單一系列做靈感嘅作品展。

魔法嘅使用

巫師同女巫需要去學習同訓練點樣去控制佢哋所用嘅魔法。對於年紀細而且未受過訓練嘅細路，魔法會喺佢哋產生強烈嘅情緒包括：擔心、驚、嬲同悲傷呢啲情感裡面下意識噉樣顯現出嚟。例如，哈利·波特曾經喺有次喺髮型剪得好差之後令到佢自己啲頭髮重新生返出嚟；佢喺倫敦動物園嗰陣搞到佢嘅表哥—達力放咗條蟒蛇出嚟，仲搞到達力困喺個玻璃窗入面；哈利又搞到瑪姬姑媽膨脹去到個巨型嘅晒士。雖然呢啲反應通常都係冇辦法控制嘅，但作為個未受過訓練嘅細路仔，湯姆·魔佛羅·瑞斗可以喺唔掂到物體嘅情況下令嗰啲嘢郁，又唔使訓練啲動物就可以令到啲動物幫佢去做佢想啲動物做嘅嘢，搞到嗰啲激嬲佢嘅人發生「壞事」，或者如果佢想嘅話就會令到嗰啲動物受到傷害。另外，莉莉·伊凡可以透過思想嚟引導仲控制啲花嘅綻放。

幾乎所有魔法都係利用魔杖嚟做嘅。關於去用唔使魔杖嘅魔法，羅琳話：

「

你可以喺冇魔杖嘅情況下做啲唔集中同唔受控嘅魔法（例如當哈利搞到瑪姬姑媽膨脹仲爆炸），但如果要施展個好嘅咒語，係嘅，你需要１支魔杖。

」

巫師同女巫淨係喺用自己嘅魔杖嗰陣先至可以喺最好嘅狀態。當佢哋用人哋支魔杖嗰陣時，嗰個人所施嘅咒語亦唔會好似平時嗰啲嘅噉強。喺小說裡面，所有咒語嘅技術細節都係模糊嘅。喺哈利嘅課程入面，淨係得嗰啲涉及到魔法生物、魔藥、占卜嘅課程先至會有詳細嘅介紹。

賽佛勒斯·石內卜喺《哈利波特：鳳凰會的密令》嘅第１堂鎖心術Occlumencyj上面，佢曾經同哈利講過：「時間同空間喺魔法世界裡面係好重要嘅」；同埋喺搵到通去分靈體—史萊哲林小金匣嘅神奇隱藏地點之後，鄧不利多曾經同哈利講過：「魔法總係會留低痕跡，有時仲會留低非常獨特嘅痕跡」。

施展咒語

咒語係巫師同女巫嘅萬能工具—用嚟完成單一嘅專門任務嘅短暫魔法爆發，例如係開鎖或者點火。落咒通常都需要１個咒語，最成日見嘅係拉丁語嘅變體形式（例如係狗拉丁Dog Latin），然後就利用魔杖嚟做手勢。不過，雖然用魔杖產生嘅魔法通常會更加精準同再強啲，不過羅琳透露話特別有天份嘅巫師或女巫可以喺冇魔杖嘅輔助之下施展到魔法。

咒語亦都可以喺冇聲之下施展，但係就需要用到魔杖。呢種特殊嘅魔法技巧喺霍格華茲嘅６年級裡面就有教到，呢樣嘢仲要求施展者將注意力集中喺咒語嗰度。有啲咒語（例如係飄浮咒）好明顯就係為咗非語言嘅使用嚟設計。小說裡面所騷出嚟嘅大部分魔咒都需要施展者講出聲，但有啲可能取決喺巫師或者女巫而唔使。鄧不利多可以冇聲咁施展令人印象深刻嘅魔法，例如係召喚足夠去容納成個學生群體嘅軟腍腍紫色睡袋，又或者喺《哈利波特：鳳凰會的密令》就嚟完嗰陣時同佛地魔決鬥嗰陣。呢個亦都可以喺唔揸住魔杖嘅情況下去用咒語。喺《鳳凰會嘅密令》裡面，當哈利支魔杖擺咗喺佢附近嘅地上面嗰時，哈利就用咗咒語「路摸思Lumos」嚟點著佢支魔杖。另外，化獸師Animagus同埋變形師Metamorphmagus唔需要用到魔杖就可以變形。

咒語亦都有分類嘅，例如係符咒Charms、詛咒Curses、魔咒Hexes又或者係惡咒Jinxes。故仔嘅世界裡面有好多攻擊性同埋有潛在危險嘅詛咒，其中３個被認為淨係對大壞蛋先至可以用，呢個令嗰啲咒語有特殊嘅分類：不赦咒Unforgivable Curses。

限制

喺《哈利波特》第１輯小說出版之前，羅琳花咗５年嘅時間嚟確立魔法嘅局限性──確定呢樣嘢可以做啲乜，同埋有乜嘢唔做得。佢喺2000年嗰陣話：「決定幾時創造幻想世界裡面最重要嘅，就係啲角色有乜嘢唔可以做。」例如，雖然係可以憑空變啲嘢出嚟，但係建立符合確切規格而唔係通用規格嘅嘢就棘手得多。另外，任何噉樣變出嚟嘅嘢往往唔會持久。

情緒

就好似上面噉講，未經訓練嘅後生巫師喺情緒高漲嘅狀態之下可以觸發到唔受控嘅魔法。不過經過受訓嘅巫師同女巫同埋佢哋嘅魔法能力都會受到情緒嘅影響。例如喺《混血王子的背叛》裡面，當雷木思·路平開始疏遠小仙女·東施嗰時，傷心到死嘅東施暫時冇咗佢嘅變形師Metamorphmagus力量，而佢嘅護法咒嘅形態亦都會隨住佢嘅憂鬱而改變；另一個例子就係佛地魔阿媽—魔柔·岡特Merope Gaunt，當岡特喺老豆嘅壓迫入面解脫出嚟先至展現到佢自己嘅魔法能力，但係當佢老公拋棄佢嗰陣時，佢嘅魔法能力又再冇咗。

有啲魔法咒語喺施展嗰陣需要用到特定嘅情緒，例如護法咒Patronus Charm就要求施展者專注喺一段開心嘅回憶。意志力喺情有可原嘅狀態下面會有好大嘅幫助，呢方面嘅例子係，當天狼星·布萊克正喺催狂魔之吻Dementor's kiss嘅危險關頭嗰陣時，哈利有能力召喚到一個有形嘅護法咒；另一個例子就係搞到中咒者承受住極大痛苦嘅酷刑咒Cruciatus Curse；就好似哈利同貝拉·雷斯壯決鬥嗰陣噉樣，有效噉去用呢種禁忌嘅黑魔法就需要有施虐狂噉樣嘅慾望。

廣義嘅愛係被形容做一種特別強大嘅魔法形式。根據鄧不利多嘅講法，愛係一種「相比起自然嘅力量同埋人類嘅智慧仲有死亡嚟得更加奇妙同更加得人驚嘅力量」。莉莉·波特為咗救自己個仔—哈利而自願犧牲，佢將BB嗰陣嘅哈利喺佛地魔手上救返出嚟；而哈利喺《死神的聖物》結尾入面亦都為咗拯救佢班朋友而做咗類似嘅犧牲。成個系列入面嘅某個關鍵預言將哈利形容做「黑魔王未知道嘅力量」，裡面提到咗去愛嘅能力。

真愛並唔可能由魔法去創造出嚟，而魔藥亦都淨係可以營造出強烈嘅迷戀同埋痴迷嘅感覺。

死亡

羅琳喺小說裡面將死亡形容做最重要嘅主題。因為噉樣，就好似鄧不利多喺《火盃的考驗》裡面所說嘅噉，冇任何咒語能夠真正噉令到已經死咗嘅人起死回生。雖然屍體可以根據在生嘅巫師嘅命令而變成順從嘅陰屍Inferi，不過佢哋只不過係冇咗自己靈魂或意志嘅喪屍Zombie。但係，巫師世界裡面都啲同死者交流嘅方式，但效果有限。例如，所有霍格華茲嘅校長喺過咗身之後都會出現喺校長室嘅肖像裡面，用嚟畀繼任校長去做諮詢。巫師仲可以透過高階罕見嘅符咒倒轉Priori Incantatem效果嚟同畀魔法謀殺咗「影子」咁樣嘅幽靈去交流。重生石可以畀巫師或女巫嚟同死者交流，不過重生石帶返嚟嘅並唔係死者嘅肉體，佢哋亦唔希望喺平靜嘅安息入面受到打攪。呢個限制喺成個系列裡面不斷被重覆咁提住，啲巫師仲成日試吓去超越，不過後果係非常之嚴重。

同樣，除非啲人用啲有強烈力量嘅物體嚟維持生命，例如係魔法石或者係分靈體，如果唔係就冇可能長生不死。如果一個人擁有晒傳說入面嗰３樣死神聖物，佢就可以擁有成為「死神主宰」嘅工具。不過，故事入面暗示要做真正嘅「死神主宰」，就係要願意接受死亡係一件避免唔到嘅嘢。其他延長生命嘅方法包括咗飲獨角獸嘅血，就算死亡喺水浸眼眉嘅情況下飲呢樣嘢都可以令到飲咗嘅人吊返起條命，不過就要付出永遠被詛咒呢個好得人驚嘅代價。魔法可以延長一個人嘅壽命，喺成個系列入面有幾個角色都異常咁長壽，例如喺鄧不利多考普等試嗰陣做監考員嘅溫順·馬治邦。差啲無頭嘅尼克喺第５輯小說裡面透露，所有嘅巫師同女巫都可以揀喺死咗之後變成幽靈；不過，呢樣嘢被形容做「對生活嘅蒼白模仿」；而石內卜指幽靈只係「逝去嘅靈魂留喺地上面嘅印記」。魔法部裡面嘅神秘部門入面有一間專門研究死亡嘅房，房裡面擺咗塊神秘嘅紗幕鏡，羅琳將嗰樣嘢形容做「生同死嘅分界線」。至於另一邊究竟係乜嘢，佢解釋話：「我相信你係咪會繼續？係呀，我相信你會繼續落去。雖然我絕對會對住呢樣嘢抱住懷疑仲一直都存在，不過我確實相信有來世，而你就喺嗰度。」天狼星·布萊克喺《鳳凰會的密令》裡面畀佢表妹貝拉·雷斯壯嘅咒語打中咗之後就穿過呢塊紗幕鏡仲跌咗落去死咗。

岡普基本變形定律嘅主要例外

妙麗曾經提過「岡普基本變形定律嘅主要例外Major exceptions to Gump's fundamental law of metamorph」嘅魔法理論，榮恩後嚟喺最後嗰輯小說入面重複咗１次。佢解釋話，食物就係其中１樣嘢：巫師或者女巫可以用魔法嚟煮同埋準備食物，甚至可以繁殖食物，但係就唔可以無中生有。喺嗰個系列小說嘅食物裡面，有好多例子似乎都係從冇到有嘅，例如茉莉·衛斯理喺廚房個鍋裡面，個鍋入面嘅配料突然之間物質化噉出現；同埋麥教授喺《消失的密室》裡面幫哈利同榮恩整咗盤可以自動補充嘅三文治。喺所有情況下，呢啲事件都可以合理噉解釋做食物嘅繁殖或者係喺其他地方送上嚟。後者嘅另一個例子係喺霍格華茲舉行嘅宴會上面——嗰啲食物都係由家庭小精靈喺廚房準備嘅，然後直接放喺禮堂４個學院嘅餐枱枱底，然後啲食物就會巧妙噉運送去到餐枱上面。

呢個喺系列入面唯一明確噉提到嘅例外。不過，羅琳曾經喺採訪入面話，巫師係唔可以憑空變啲錢出嚟，如果唔係巫師世界嘅經濟體系就將會被嚴重噉破壞。雖然魔法石確實由煉金術整出嚟，呢樣嘢嘅擁有者喺並未有利用呢種力量嘅情況下，呢樣嘢被形容做一樣極其罕有，甚至係獨一無二嘅嘢。

魔法能力

以下係哈利波特世界裡面嘅巫師或者女巫可能擁有嘅特殊能力：

化獸師

化獸師Animagi係動物Animal同埋魔法師Magus嘅混成詞，佢哋唔使魔杖就可以變身做動物。化獸師亦都係為數唔多可以唔依靠魔杖而施展魔法嘅人。淨係得能力強大嘅巫師先至可以做到化獸師。化獸師通常淨係可以有１種動物形態，而且佢嘅動物形態係由嗰個巫師嘅性格特質嚟決定，而唔係人為嘅選擇。

化獸師極之難去修煉，隨時會走火入魔。羅琳喺《吟遊詩人皮陀故事集》裡面表明化獸師同透過變形術嚟做動物係有唔同嘅：化獸師保留咗嗰個巫師原有嘅意識同埋推理、記憶嘅能力；而變形術就會搞到嗰個巫師擁有動物嘅大腦，搞到佢哋喺不知不覺中唔記得咗自己係個巫師而被韞wan3住咗，除非有另外嘅巫師將佢哋變番返嚟。魔法部會密切噉關注住啲化獸師，喺魔法部裡面有一份記載晒所有化獸師嘅名單，名單上面有齊晒每個化獸師變成各種動物嗰陣時嘅特徵，例如麥教授可以化身做貓，仲喺佢雙眼附近有類似佢副眼鏡嘅花紋。另外，如果嗰個巫師嘅身體有一定嘅改變（例如彼得·佩迪魯嘅手指斷咗），呢種改變亦都會反映喺佢哋嘅動物形態上面。冇喺魔法部註冊做化獸師嘅巫師，佢哋畀人發現咗之後就會被拉去阿茲卡班坐監。

小說裡面明確噉強調咗化獸師同狼人之間嘅分別。化獸師可以完全噉控制佢哋嘅轉變仲保留住佢哋嘅思想，而狼人嘅轉變就係非自願嘅，包括佢哋性格上嘅嚴重變化。佢哋喺變成狼人之後「...唔會再記得自己係邊個。佢會殺死自己最好嘅朋友。狼人淨係會回應自己同類嘅呼喚」。縛狼汁Wolfsbane Potion係狼人喺變身嗰陣時唯一用嚟維持佢哋嘅理智、智力同記憶力嘅方法。

現影術同消影術

現影術Apparition同埋消影術Disapparition係１種巫師世界裡面瞬間轉移嘅魔法方式，巫師或者女巫透過呢種形式可以喺一個位置消失（消影）然後喺另一個位置出現（現影）。呢種方式通常都會有爆裂聲或者「砰」一聲跟住，就算好似鄧不利多咁熟手嘅巫師可以「咁突然而冇聲噉現影」，以至於佢哋似乎「喺地下度飆出嚟」。根據哈利嘅講法，現影術仲會有種非常唔舒服嘅擠壓感跟住，就好似係通過緊一條拉緊咗嘅橡膠管咁嚟傳送。

巫師同女巫要用現影術同消影術嘅話就一定要夠１７歲，又要有現影術嚟做交通工具嘅執照，仲要攞到魔法部嘅批准之下先至可以用，呢個大致就好似喺現實世界嘅麻瓜政府要求市民去攞車牌噉樣。霍格華茲嘅學生可以喺６年級嗰陣時參加由魔法部監管嘅現影術課程，仲喺佢哋年滿17歲嗰時參加考試。事實證明，雖然後生嘅巫師同女巫可以喺冇批准嘅情況下用現影術，不過佢哋通常都唔會噉樣做（除非喺課程裡面），而且呢個行為係非法嘅。未成年嘅巫師可以同成年嘅巫師一齊嗰陣時用現影術同消影術，哈利喺《死神的聖物》裡面並冇現影術嘅牌，不過因為佢嘅蹤絲the Trace已經被解除咗，所以魔法部好可能唔知道佢曾經噉樣做過。只要能夠成功噉消影到，其他巫師就冇辦法去追蹤，所以魔法部喺正式承認佛地魔返咗嚟之後，佢哋要求所有英國嘅巫師家庭裡面嘅成年成員都要識得去落呢個咒語。

去學現影術係有一定嘅難度，有啲人會認為係非常難嘅嘢，學生要冒住「肢體異位被分裂」嘅危險性──喺起點同終點之間被物理分割──雖然白鮮嘅精華都可以修補到某啲傷口，不過呢個仲需要魔法部「魔法意外逆轉小隊Accidental Magic Reversal Squad」嘅幫手先至可以正確噉樣處理。喺課堂上面，身體被分裂係好常見嘅嘢，而且根據身體被分裂嘅部位可能會令到施展嘅人覺得特別唔舒服（有時甚至相當得人驚），不過如果係逆轉得啱嘅話，施展嘅人最終係唔會受傷嘅。雖然榮恩識得用現影術，但係佢嘅技術並唔係十分之純熟，而且佢至少將自己扭傷過３次（分別冇咗半邊眉毛、兩塊指甲同部分嘅手臂）。相比之下，哈利同妙麗都好快噉掌握到呢項技能。

就正如喺《混血王子的背叛》裡面所解釋嘅噉，現影同消影喺嗰度係冇咒語嘅，但係施展嘅人一定要專注喺佢現影嘅位置，呢個需要全神貫注喺個咒語裡面，而且仲要透過成個身體嚟「感受」呢樣嘢。曾經有人話，用現影術嚟直接入去私人地方（例如係人哋屋企）會被認為係粗魯嘅行為。鄧不利多喺《混血王子的背叛》入面話呢個「就好似一腳䟫yang2開人哋度門一樣咁冇禮貌」。好多屋企都係因為呢個原因，亦都係因為保安理由，佢哋嘅屋企都有反現影術咒語Anti-Apparition Charm嚟保護佢哋唔好受到不請自來嘅人去入侵。作為一種公認去探訪人哋屋企嘅方式，就係用現影術去到目的地附近嘅地點然後再行到去最終嘅目的地。喺長距離旅程入面使用現影術被認為係唔可靠嘅，就算係對呢個技術好有經驗嘅巫師，佢哋有時都會更加鍾意用例如係飛天掃把呢啲其他嘅魔法交通工具。羅琳曾經話遠距離去用現影術係取決於巫師嘅技能，而「跨大陸嘅現影術幾乎肯定會搞到有嚴重嘅傷亡」。事實上，就算係技術精湛嘅佛地魔喺佢去好鬼遠嘅紐蒙迦德監獄之後都揀飛返去英國。

霍格華茲城堡嘅場地同建築物為咗安全嘅原因都受到古老嘅反現影術Anti-Apparition Charm同埋反消影術Anti-Disapparition Charm嘅咒語嚟保護，用嚟防止外來嘅人隨便闖入去城堡裡面，同埋喺校園裡面現影，不過呢個咒語限制唔到家庭小精靈嘅現影術。仲有個咒語可以用嚟防止啲人消影，鄧不利多喺《鳳凰會的密令》入面將呢樣嘢放喺畀魔法部捉到嘅食死人身上：呢樣嘢畀一個人喺一個位置度現影，但防止到佢哋用消影術嘅姊妹咒語，呢個同食死人喺活米村施展嘅貓叫春咒Caterwauling Charm係一致嘅。如果要去防止入侵嘅巫師利用消影術走甩，就可以喺嗰個區域落反消影術，令佢喺嗰個區域裡面冇辦法消影。霍格華茲嘅成個範圍都用咗反消影術，如果要夾硬離開霍格華茲嘅話就一定要用到飛天掃把或者係去騎鷹馬。

巫師同女巫可以用隨行現形術Side-Along Apparition同埋隨行消影術Side-Along Disapparition嚟喺佢哋用現影術同消影術嗰陣將其他人一齊帶走。食死人同埋鳳凰會嘅成員喺《鳳凰會的密令》入面分別喺黑色同白色嘅煙霧裡面現影同消影。雙方喺電影裡面似乎都可以「半現形half-apparate」同「半消影half-disapparate」—佢哋嘅身體由煙霧構成嚟令到佢哋可以飛得。弗雷同喬治試過現影同消影兩次，佢哋都好似小說裡面咁樣咁砰一聲就做到。鄧不利多喺《混血王子的背叛》裡面幾次成功噉用呢種方式嚟運送哈利；而哈利第１次喺非課程嘅嘗試係同埋鄧不利多喺海邊嘅山窿回程嗰陣時，當時佢同虛弱嘅鄧不利多一齊去用隨行現形術。

現形Apparate同埋消影Disapparate呢兩個詞語喺小說裡面都係用大楷嚟寫，而好似「惡咒jinx」同「魔咒hex」之類嘅既定英文單字就唔係。嗰兩個意思係「出現」同「消失」嘅詞語本身好可能源自法文嘅「apparaître」同「disparaître」；另一種可能性係衍生自英文單詞嘅「apparition」，佢嘅意思係「一種人或事物嘅超自然外觀」／「任何出現嘅嘢，尤其係顯著或者令人驚訝嘅嘢」／「出現嘅行為」；呢個詞語嚟自出席嘅拉丁文「Apparitio」，而「Apparitio」可能係嚟自同一個詞語，但係佢嘅前面嘅「dis-」用嚟表示否定或者係逆轉。

其他傳送方式

有啲魔法生物係有佢哋自己嘅瞬間旅行方式，例如係家庭小精靈有瞬間轉移嘅能力，或者係鳳凰能夠喺火焰爆發裡面有現影同消影嘅能力。呢啲生物同巫師係唔同嘅，佢哋唔受反現影術Anti-Apparition嘅限制。多比同怪角仲有其他嘅家庭小精靈可以喺霍格華茲的校園裡面施展現影術，就好似佢哋喺幾個場合度所展示嘅噉。最值得注意嘅係，當家庭小精靈多比去醫院探哈利嗰陣時，同埋當哈利召喚多比同怪角仲派佢哋去跟蹤跩哥·馬份嗰陣時；當鄧不利多喺《鳳凰會的密令》入面匿埋去避咗魔法部官員拉佢嗰陣時，佛客使同鄧不利多跟住一齊喺魔法部官員手上用消影術喺霍格華茲嘅校長辦公室裡面消失。同時，謎蹤鳥有能力突然喺一個地點消失，然後再喺另一個地方飆出嚟嘅本事，呢樣嘢類似巫師嘅現影術。

其他提供魔法傳送嘅方式包括：呼嚕網、港口鑰同埋消失櫥櫃。

破心術同鎖心術

破心術Legilimency係１種喺人哋腦海度攞到佢哋感情同記憶嘅魔法技能—呢個係魔法方式嘅「心靈感應」。呢樣嘢簡單嚟講係能夠知道一個人心裡面嘅意識層面，最顯易見嘅功能就係知道一個人有冇講大話。雖然石內卜係有呢種能力嘅實踐者，佢口語化噉駁斥咗「讀心術」呢個詞語係太過極端噉簡單化嚟形容。呢樣嘢仲可以畀一個人向另一個人傳達願景或者記憶，無論嗰個係真實嘅定係想像出嚟。擁有呢樣技能嘅巫師同女巫都畀人叫做破心者Legilimens，例如佢哋可以發現另一個人去呃人嘅大話，亦可以見證另一個人過去嘅記憶，又或者「植入」虛假嘅幻象去到人哋嘅腦海入面。鄧不利多同佛地魔都係已知嘅高階破心者。

破心術嘅反向技能就係鎖心術Occlumency，運用呢種技能嘅巫師同女巫都畀人叫做鎖心者Occlumens。呢門科目好冷門，但係就好有用。巫師同女巫可以透過呢樣嘢去區分自己嘅情緒，又或者可以阻止到破心者發現佢哋同自己所講嘅說話又或者行為仲有思想或者記憶互相矛盾嘅地方，嚟保護佢哋自己嘅心智唔好受到外界魔法嘅入侵。高階形式嘅鎖心術係喺封鎖所有其他真實記憶嘅同時，喺鎖心者嘅腦海度植入虛假嘅臨時記憶，所以就算係一個技藝高超嘅破心者，如果佢要試吓讀取人哋嘅心靈，被讀取嘅人淨係會記住啲錯嘅記憶，仲會相信呢一切都係真嘅。

呢種技能喺《鳳凰會的密令》入面第１次被提到。破心術同鎖心術並唔係霍格華茲正規課程嘅一部分，而且大部分學生都會喺冇學到呢兩樣嘢嘅情況下畢業。石內卜同史拉轟係已知嘅高階鎖心者。鄧不利多喺《鳳凰會的密令》裡面指示要石內卜向哈利傳授鎖心術嘅課程，不過哈利直到《死神的聖物》先至成功學識咗呢門知識。

鄧不利多、佛地魔同石內卜都擅長破心術同鎖心術。石內卜曾經話佛地魔係個超強嘅破心者，因為佢幾乎喺所有情況下都可以即刻知道係咪有人呃緊佢。佛地魔喺成個《混血王子的背叛》嘅時期都喺度練習鎖心術嚟阻止哈利接觸到佢嘅思想同情感，而佢喺《死神的聖物》入面反覆噉去用破心術嚟審問佢啲受害者。不過佛地魔喺《死神的聖物》裡面一而再噉冇咗控制，搞到佢非常之強大嘅思想、願景同埋情感偶爾爆發傳到去哈利嘅腦海裡面。

因為哈利同佛地魔兩個人對立嘅關係，哈利暗中想知道佛地魔嘅諗法，不過進展得好慢，佢淨係得１次成功噉衝破過石內卜嘅鎖心術而入到去佢嘅腦海。石內卜喺成個系列裡面一再噉被指對鎖心術掌握得非常熟手，呢個就可以解釋到佢點樣可以呃到佛地魔咁多年。哈利甚至喺《鳳凰會嘅密令》之前就有石內卜可以讀心嘅印象。當多比喺《死神的聖物》裡面過身嗰陣時，哈利終於掌握咗鎖心術──佢向佛地魔封閉咗自己嘅心智。佢意識到自己嘅悲傷──或者好似鄧不利多所講嘅——愛——係可以擋住黑魔王嘅嘢。

喺哈利·波特嘅時代之前，《怪獸與牠們的產地》裡面嘅奎妮·金坦Queenie Goldstein係天生就精通呢種能力嘅破心者，因為佢可以讀得明戲裡面嘅角色—雅各·科沃斯基Jacob Kowalski同埋其他人嘅諗法，仲可以喺好遠嘅地方透過佢哋嘅思想同情感嚟去感知同聽到佢哋諗法。不過奎妮·金坦同鄧不利多、石內卜同佛地魔唔同嘅係，佢係唔需要用到魔杖嚟施展破心術，因為佢天生就有呢種讀心嘅能力。

變形師

變形師Metamorphmagi係變形Metamorph同埋魔法師Magus嘅混成詞，有呢種天賦嘅巫師同女巫一定係與生俱來嘅，冇辦法透過其他方式嚟得到。

小仙女·東施同埋佢個仔泰迪·路平Teddy Lupin係目前嗰個系列裡面唯一已知嘅變形師；呢個係１種非常罕見嘅技能，可能係遺傳嘅。東施可以根據自己嘅心情嚟改變自己嘅髮型同髮色，佢有時甚至會用老女人嘅身份出現。泰迪·路平亦都繼承咗東施呢種能力同特徵，據講佢嘅頭髮可以反覆噉變色。呢啲改變外觀能力嘅範圍同限制到而家仲未完全清楚。根據羅琳嘅講法，變形師可以完全改變晒佢嘅外表，膚色由黑到白，由後生到老，由靚仔到樸素...等等，而變形師嘅情緒亦會影響佢哋嘅能力。喺一個例子裡面，東施透過將佢自己個鼻改造成「好似石內卜一樣嘅喙狀突起」、「類似於大啡菇咁嘅嘢」，仲有「好似豬鼻咁嘅嘢」嚟改變佢嘅面部外觀，呢個就令到哈利諗起佢嘅表弟達力·德思禮。

爬說嘴

爬說語Parseltongue即係講蛇話，雖然呢樣嘢通常同黑魔法有關，但係鄧不利多指呢樣嘢唔一定係邪惡嘅品質。擁有呢種能力係非常之罕見嘅，佢哋會畀人叫做「爬說嘴Parselmouths」。一般巫師同女巫唔可以透過學習嘅方式嚟得到呢種技能，淨係可以透過例如係基因遺傳、黑魔法又或者特殊語言能力先至有。《消失的密室》入面解釋話，由於佛地魔喺嘗試殺死哈利嗰一晚同時將佢自己嘅一啲能力傳咗畀哈利，哈利就係因為噉所以喺17歲之前就識得講爬說語。《死神的聖物》揭示咗哈利體內嘅佛地魔某部分靈魂碎片賦予咗哈利有呢種能力；當嗰塊靈魂碎片被摧毀咗之後，哈利就喪失咗爬說嘴嘅能力。

其他已知嘅爬說嘴包括咗薩拉札·史萊哲林Salazar Slytherin同埋佢嘅後裔—包括咗佛地魔同埋岡特家族嘅成員。鄧不利多亦都可以理解到爬說語；不過佢嘅爬說語係自學返嚟嘅，而唔係天生就有嘅爬說嘴呢種能力。鄧不利多喺《混血王子的背叛》入面重複咗魔份·岡特Morfin Gaunt嘅爬說語；而榮恩喺《死神的聖物》裡面只係模仿哈利打開密室嗰陣時發出嘅聲嚟將消失的密室重新打開。

護法咒

護法咒Patronus主要用嚟打走催狂魔。護法咒亦都可以用嚟畀有經驗嘅巫師同女巫用嚟做交流。鄧不利多曾經設計同發明咗１種用護法咒嚟傳遞聲音同訊息嘅通訊方式，仲將呢樣嘢專係畀鳳凰會嘅成員去用，呢個比起用貓頭鷹或者呼嚕網嚟得更加安全，仲唔會受到魔法部嘅監控。鄧不利多、麥教授、金利·俠鉤帽同埋亞瑟·衛斯理喺成個系列入面都係透過呢種護法咒嚟傳遞訊息。麥教授亦係嗰個系列裡面唯一１個有能力同時施展仲投放幾個護法咒嚟分別去出幾個訊息畀唔同對象嘅角色。護法咒亦都係唯一已知嘅可以趕走吸魂衣Lethifolds嘅方法。

石內卜喺《死神的聖物》裡面利用咗佢自己嘅護法咒嚟引領哈利去到隱藏喺森林水池裡面嘅葛萊分多寶劍。

先知

先知Seer係嗰啲有預視能力嚟預測未來事件嘅巫師同女巫，佢哋透過呢種能力嚟畀出嚟嘅預測有時可以係自我實現預言，而鄧不利多喺《鳳凰會的密令》入面話，佢哋並唔係所有嘅預測都會成真，呢個取決於所提到嘅嗰啲人所揀嘅決定。呢個似乎表明咗先知所預測到嘅只係可能或者係將會發生嘅事，至少喺某啲情況下就係噉樣。喺魔法部神秘部門入面嘅預言大廳Hall of Prophecy嗰度，有成千上萬個玻璃球裝滿住先知對每個人所做嘅預言記錄。淨係得預言裡面提到嘅人先至可以安全咁攞返屬於佢自己嘅玻璃球，任何其他試圖攞嗰啲玻璃球嘅人最後都會被逼到癡咗線。

根據麥教授嘅講法，真正嘅先知係極其罕見嘅。西碧·崔老妮係唯一喺小說裡面嘅先知，就算有人提到西碧嘅太嫲—卡珊卓·崔老妮Cassandra Trelawney喺佢嗰個時代係個出名嘅先知都好，不過崔老妮啲學生好多都認為佢係個「騙子」。崔老妮後嚟喺第５輯小說裡面因為被指冇能力而畀桃樂絲·恩不里居炒魷。不過，崔老妮曾經兩次做過真實嘅預言——呢兩個預言對哈利·波特都尤其重要——不過佢後嚟對佢自己所講嘅任何一個預言都完全唔記得晒，甚至係冇印象。

迷拉魔咒

迷拉魔咒Veela’s curse係１種歸因喺迷拉Veela嘅能力同埋佢哋繼承嘅嘢，就好似花兒·戴樂古嘅迷拉魔咒用嚟吸引男性噉樣，呢樣嘢就好似係《奧德修記》入面嘅海妖一樣。男性接觸佢哋就會隨住時間而變得對佢哋越嚟越難去抗拒，如果迷拉可以為男性帶嚟驚喜，迷拉魔咒就—可以充分噉發揮作用，呢個就正好似榮恩喺《混血王子的背叛》入面所講嘅噉樣。

《哈利波特：火盃的考驗》裡面講到，迷拉嘅毛髮可以用嚟做魔杖嘅杖芯。根據出名嘅魔杖製造者奧利凡德先生所講，呢款魔杖會有啲「喜怒無常」。

魔法抗性

呢樣嘢係指對龍、巨人同埋洞穴巨人等等存在喺強大生物裡面嘅生物對妖術同埋咒語有一定程度嘅免疫。魯霸·海格就係因為佢流住巨人嘅血，所以佢會對某啲咒語（例如係昏迷咒Stunning Spell）有抵抗力。不過呢種阻力並唔係唔可以超越，例如，如果一次向住有魔法抗性嘅生物施展足夠噉多嘅昏迷咒，嗰個生物仍然可能會冇咗知覺。另外，巫師同女巫可以憑住佢哋自己嘅意志力去抵抗某啲咒語，例如哈利喺《火盃的考驗》入面所做嘅嘢噉，當時小巴堤·柯羅奇假扮做阿拉特·穆敵嚟試吓用蠻橫咒Imperius Curse去控制哈利，而哈利就將呢樣嘢反抗咗。喺同一輯小說入面，老巴堤·柯羅奇就喺幾個月之後就自己擺脫咗韞wan3住佢嘅蠻橫咒。

霍格華茲嘅科目

内文：霍格華茲科目

霍格華茲嘅學生喺５年級之前都需要修讀８科嘅必修科，包括天文學、符咒學、黑魔法防禦術、草藥學、魔法史、魔藥學同埋變形術，同埋１年級嘅飛行學課程。當學生喺２年級尾聲嗰陣時，佢哋必須喺３年級開始嗰陣時嘅教學大綱入面，喺５個科目裡面最少加多２個嚟做選修科。呢５個選修科包括：奇獸飼育學、古代符文研究、麻瓜研究、占卜學，同埋算命學。

如果霍格華茲有夠晒需求嘅話，學校有時會為學生最後嗰兩年課程提供啲非常之專門嘅學科，例如係煉金術。

霍格華茲裡面通常夾埋有１２個教授，而每位教授專攻其中１個科目。

黑魔法

黑魔法Dark Arts通常係用喺黑暗／惡意目的而做嘅魔法。實踐黑魔法嘅人通常會畀人叫做黑巫師Dark Wizard或者係黑女巫Dark Witch，喺裡面最出名嘅係佛地魔，佢啲追隨者尊稱佢做黑魔王Dark Lord，而佢嗰啲追隨者就叫做食死人Death Eater。佢哋喺聽佛地魔嘅命令嘅同時亦都一邊喺度練習黑魔法。黑魔法特有嘅咒語就叫做詛咒Curse，呢啲咒語通常會對中咒者造成傷害，而施咒者嘅動機會影響詛咒嘅效果。喺一定嘅程度上，所有詛咒喺某啲情況下都係合理嘅。呢樣嘢最明顯就係喺酷刑咒Cruciatus Curse嘅案例入面，當哈利對佢嘅契爺死喺貝拉·雷斯壯嘅手上嗰陣，佢當時嬲到想施展呢個咒語嚟懲罰對方，噉樣會引起短暫嘅痛苦。就好似貝拉·雷斯壯噉講，正義嘅怒火唔會令到咒語持續得太耐。當佛地魔呢類人物施展嗰陣時，嗰啲會為咗自己嘅利益而渴望施加落其他人身上嘅痛苦，只要黑巫師或者黑女巫願意嘅話，呢個所導致到強烈嘅痛苦就會持續到有噉耐得幾耐。佛地魔喺佢自己尋求延長壽命同埋得到強大力量嘅過程入面就用咗呢種魔法，而黑魔法會腐蝕施咒者嘅身體同埋靈魂，搞到佛地魔睇落去畸形同埋唔人道，呢個就係佢用黑魔法同埋佢將自己嘅靈魂分裂做分靈體嘅副作用。

黑魔法嘅咒語可以分做３類，分別係：詛咒Curse、魔咒Hexes同埋惡咒Jinxes。根據石內卜嘅講法，黑魔法係「多種多樣、千變萬化、永恆嘅...唔固定、變異嘅、堅不可摧嘅」。好多咒語喺魔法決鬥入面都可以用嚟做攻擊、固定又或者係解除對手嘅武裝而唔會對佢哋造成痛苦或者永久嘅傷害；不過，好似酷刑咒Cruciatus Curse或者撕淌三步殺Sectumsempra呢啲咒語，因為呢啲係用某種方式嚟對受害者造成傷害或者嚴重嘅痛苦，所以畀可靠嘅權威判定呢啲就係黑魔法。

喺巫師世界入面，黑魔法嘅使用受到強烈嘅污名化，某啲方面更加係非法嘅；不過呢啲咒語係非常之普遍，甚至喺佛地魔崛起之前，包括霍格華茲在內嘅好多魔法學校都將黑魔法防禦術列做標準學科噉樣去教，裡面嘅技巧包括用嚟消除或者解除攻擊者嘅武裝，又或者用嚟打走某啲魔法生物嘅簡單咒語，仲有一啲反詛咒Counter-Curses。好似係德姆蘭學院嘅其他魔法學校，佢哋會向學生教授黑魔法，而喺食死人操控下嘅霍格華茲仲會有黑魔法嘅課程。

黑魔標記

睇埋：[[:黑魔標記]]

黑魔標記Dark Marks係佛地魔同埋食死人嘅標記同埋象徵，呢個標記嘅形狀係用１個骷髏頭加條蛇咁樣嘅形態嚟做脷喺嘴裡面伸出嚟噉樣嘅形式。每當食死人謀殺咗人嗰陣，呢個印記就會喺天空度出現，而「魔魔斃Morsmordre」就係召喚呢個標記嘅咒語。呢個印記第１次出現喺《火盃的考驗》裡面，呢樣嘢被形容做「一個由睇落去好似翡翠星星噉嘅嘢組成個好大嘅骷髏頭，有條好似蛇噉樣嘅脷喺嘴裡面伸出嚟」。當呢個標記喺天空度出現，呢樣嘢就好似「喺綠色煙霧嘅陰霾裡面燃燒」。黑魔標記亦都烙印咗喺同佛地魔最親密追隨者嘅左前臂上面，而呢個標記亦都係用嚟做佛地魔同佢每個擁有呢個標記嘅追隨者之間嘅聯繫；佛地魔可以透過觸摸自己嘅標記嚟召喚佢啲追隨者，噉樣會令到佢同佢哋嘅標記變色仲會燃燒起上嚟；食死人亦都可以用同樣嘅方式嚟召喚佛地魔。喺佛地魔最後冧咗檔之後，食死人身上嘅黑魔標記逐漸變咗做「類似」哈利額頭上面嘅疤痕噉樣。

喺小說裡面，黑魔標記被形容做綠色嘅，不過呢樣嘢喺其他嘅改編電影都係呈灰色，淨係喺魁地奇世界盃嗰陣出現係呈綠色。

分靈體

内文：分靈體

分靈體Horcrux係１種用黑魔法創造嚟達到有永生效果嘅物體。分靈體嘅概念第１次出現喺第６輯小說《混血王子的背叛》裡面，就算曾經出現喺小說系列嘅早期，不過呢樣嘢冇被形容出嚟又或者被擴展。巫師同女巫如果要創造分靈體嘅話，佢哋必定要首先喺儀式入面準備好已經揀好咗嘅物件，之後嗰個巫師或者女巫就一定要去殺人，呢個就係１種叫做「靈魂分裂」嘅行為。跟住就需要進一步嘅黑暗儀式先至可以喺製作者身上攞佢嘅靈魂碎片出嚟仲將嗰樣嘢放入去已經準備好嘅物件度。當分靈體搞掂咗之後，嗰樣嘢幾乎唔會受到任何形式嘅破壞，要破壞就需要極其強大嘅魔法又或者物質先至可以做得到。當１個人嘅身體被殺，佢嘅靈魂通常會去到另一個世界。不過，分靈體擁有者就算肉身被殺，殘留喺佢身體裡面嘅嗰部分靈魂就唔會去到另一個世界，而係用嚟畀另一個巫師用非物質形式存在嚟復活。如果嗰個巫師或女巫嘅分靈體全數被摧毀嘅話，噉佢嘅靈魂喺物質世界裡面唯一嘅錨點就係佢嘅肉身，破壞佢嘅肉身就會搞到佢去到終極嘅死亡，調返轉亦都係噉樣。如果要摧毀分靈體，嗰個分靈體就一定要畀毀滅者用連魔法都冇辦法修復嘅方式嚟摧毀。

喺第７輯小說入面，蛇妖嘅毒牙、掂到蛇妖毒液嘅葛萊分多寶劍、同埋咒語「惡魔之火Fiendfyre」都係用嚟摧毀分靈體嘅物髏。

陰屍

  提示：呢篇文講嘅唔係喪屍、殭屍或吸血鬼。

陰屍Inferius係指畀黑巫師用咒語嚟控制嘅屍體。行屍並唔係生勾勾嘅生命體，而係個被落咗咒嘅屍體，就好似落咗巫術嘅扯線公仔噉樣；被控制嘅屍體對眼入面會呈現出白霧。佢哋冇辦法有自己去諗嘢：佢哋被創造出嚟係用嚟執行由指揮佢哋嘅黑巫師分派畀佢哋做嘅特定職務，就好似喺《死神的聖物》入面海邊洞穴裡面守衛住佛地魔分靈體嘅陰屍噉樣，佢哋喺執行任務之前可以一直都係處於閒置嘅狀態，然後無論係咪會產生任何嘅結果，呢項任務都會畀佢哋輕率噉執行。陰屍係好難會畀魔法傷害到，不過佛地魔喺海邊洞穴裡面嘅陰屍因為佢哋從來都冇接觸過火或者係任何其他形式嘅光又或者熱呢啲元素，所以呢啲嘢可以驅散到佢哋。當佢哋被打敗之後，佢哋又會返番去閒置嘅狀態。

喺拉丁語裡面，單數「陰屍Inferius」呢個詞語嘅意思係「下面」，而複數形式「陰屍inferi」通常係用嚟指代「下面嘅眾神（冥界神）」又或係死者嘅靈魂。陰屍一般會用「Inferius」呢啲低等嘅中性單數形式嚟表示，嗰個意思係「下級」嘅比較形容詞。

巫師世界認為陰屍係好危險同埋好得人驚嘅嘢，以至到冒充陰屍係１種值得要拉去阿茲卡班監獄坐監嘅罪行，而蒙當葛·弗列契據報曾經喺《混血王子的背叛》裡面噉樣做過。

魔法部擔心佛地魔殺嘅人夠晒多去組成１隊陰屍大軍：就係因為佢哋死咗所以就好難去阻止。當佛地魔喺以前收埋佢自己嘅其中１個分靈體嗰陣時，佢喺山窿嘅湖裡面利用咗好多陰屍嚟填滿嗰度，呢啲陰屍會攻擊除咗佛地魔以外入任何到去仲攞走小金匣嘅人，佢哋仲會將嗰個人拉去湖裡面祲zam1死。當哈利同鄧不利多攞到小金匣嗰陣時，啲陰屍集體去攻擊哈利，而鄧不利多就用火繩索fire lasso嚟打走佢哋；呢個亦都透露咗當家庭小精靈怪角飲晒盆裡面啲藥水嚟幫佛地魔收埋佢嘅分靈體之後，嗰班陰屍差啲就將佢殺死，但係怪角喺完成佛地魔嘅任務之後就被命令返番去佢嘅主人身邊，怪角就用現形術嚟離開嗰個山窿。當獅子阿爾發·布萊克R.A.B.偷咗嗰個真嘅分靈體仲命令怪角去將呢樣嘢摧毀嗰陣時，嗰班陰屍跟住就殺死咗布萊克。

不赦咒

不赦咒Unforgivable Curses係已知最強大嘅黑魔法咒語，呢啲咒語喺1717年第１次被歸類做「不赦咒」。例如係佛地魔同食死人呢啲小說系列裡面嘅反派角色就會用到呢類咒語，喺某啲情況下仲有魔法部裡面嘅人，佢哋用嚟激發恐怖同埋引起其他人產生極大嘅恐懼。呢類詛咒之所以噉叫，係因為呢啲咒語喺巫師世界裡面係被禁止去用同埋唔可以原諒嘅，用咗仲會被判去阿茲卡班監獄嘅無期徒刑。唯一嘅例外係，嗰個人被證明到係喺畀人精神操控嘅影響之下去做呢個行為。所以，呢啲詛咒好少畀人公開噉去用。

• 酷刑咒Cruciatus Curse：呢個咒語叫做「咒咒虐Crucio」，而咒語嘅拉丁語意思係「我折磨」，呢個咒語被用嚟做酷刑，喺唔會對受害者造成實際嘅身體傷害之下搞到受害者好劇烈噉痛，而詛咒嘅強度就由落咒者去決定。呢種詛咒可以用嚟折磨人去到佢哋筋疲力竭而猝死，又或者喺落咒者施虐成性嘅情況下，呢樣嘢會搞到受虐者永久性失憶同埋精神錯亂。食死人成日都會用到呢個咒語，有效嘅施法會要求施法者有虐待狂噉嘅慾望。呢個詛咒喺施放嗰陣時會顯示做一條光猛嘅褪藍光（呢樣嘢喺戲裡面通常都係睇唔到嘅，甚至係紅色嘅光柱）。

• 蠻橫咒Imperius Curse：呢個咒語叫做「噩噩令Imperio」，非正規嘅拉丁語意思係「我命令」。呢個詛咒用喺思想控制或者係催眠身上，仲可以強迫受害者去做佢哋通常唔想又或者做唔到嘅事。詛咒嘅強度同埋持續時間取決於落咒嘅人，同埋受害者嘅抵禦能力。呢個詛咒喺施放嗰陣會表現出一條光猛嘅陰霾（呢樣嘢喺戲入面唔係隱形嘅，係綠色霧噉樣嘅薄霧）。

• 索命咒Killing Curse：呢個咒語叫做「啊哇呾喀呾啦Avada Kedavra」，呢個係１種殺戮咒，表現係一束綠色嘅光，仲會搞到中咒者唔留痕跡噉即刻無啦啦就死咗。殺戮咒並冇反咒語，亦都冇辦法畀大多數魔法手段擋得住，不過愛係可以擋得走呢個咒語。另外，受害人可能會畀避得過呢種綠色嘅能量箭，又或者畀固體嘅嘢擋住咗，又可以畀尤其係昏迷咒Stunning Spell呢啲其他強大嘅快速咒語攔截到。

類似咒語嘅效果

符咒倒轉

符咒倒轉Priori Incantatem，又或者叫做重放咒效果Reverse-spell Effect係用嚟檢測魔杖施展過嘅咒語。用咗呢個咒語，魔杖施展過嘅咒語喺就會用反向嘅順序出現喺煙霧繚繞或者好似幽靈噉樣嘅複製品入面，最近嘅咒語會最先出現。呢樣嘢第１次出現喺《火盃的考驗》入面，嗰陣時老巴堤·柯羅奇嘅家庭小精靈眨眨畀人捉到佢攞住哈利支魔杖。呢個咒語亦都係用嚟揭示老柯羅奇個仔確實係用咗哈利支魔杖嚟放黑魔標記嘅人。

喺《混血王子的背叛》裡面揭示咗，佛地魔喺佢自己仲係少年嗰陣時就利用佢阿叔魔份·岡特Morfin Grant嗰支魔杖嚟謀殺咗佢老豆同埋阿爺阿嫲，因為佢知道經過咗檢查之後，啲人就會憑住嗰支魔杖嚟認定魔份就係兇手。哈利喺《死神的聖物》入面擔心緊如果食死人攞到妙麗支魔杖之後就會用嗰支魔杖嚟施展符咒倒轉。呢個就揭示咗佢哋兩個喺早啲嗰陣差啲喺佛地魔手上走甩咗嗰時，當時妙麗嘅詛咒衰咗，佢喺唔小心嘅情況下整斷咗哈利嗰支冬青木同鳳凰尾羽魔杖。結果，佢哋兩支魔杖共享核心嘅保護噉就冇咗，而仲大鑊嘅係，就係畀佛地魔知道咗呢一點。喺哈利同佛地魔嘅最後對決入面，佛地魔提到佢知道咗哈利嘅冬青同鳳凰尾羽魔杖被整斷咗，呢個就意味住就好似佢哋兩個都擔心嘅噉：符咒倒轉確實已經喺妙麗嘅魔杖上面執行過。

強迫兩支共享杖心來源嘅魔杖去做對決亦都會搞到出現１種更加有效嘅符咒倒轉形式。當兩支魔杖嘅主人正喺度展開一場意志力較量嘅戰鬥嗰陣時，兩支魔杖嘅尖啄就會連接埋一齊而形成１條好粗嘅金色能量「脈絡」。失敗者嗰支魔杖就會將咒語嘅陰影用反向嘅順序投射嚟湧返番去。呢種現象曾經發生喺《火盃嘅考驗》尾聲嗰時哈利同佛地魔之間嘅決鬥入面。佢哋同時分別施展嘅咒語─哈利施展咗繳械咒「去去武器走Expelliarmus」，而佛地魔就施展咗索命咒「啊哇呾喀呾啦Avada Kedavra」嚟觸發去形成呢種脈絡。當佛地魔喺輸咗意志嘅戰鬥嗰陣時，佢支魔杖嘅能量以相反嘅方向嚟投射，仲迴盪住佢嗰支魔杖最後殺咗嘅人嘅迴聲，包括咗：西追·迪哥里、瑞斗府嘅花王法蘭克·布萊斯Frank Bryce、魔法部嘅員工柏莎·喬金斯，仲有哈利嘅阿爸阿媽—詹姆·波特同埋莉莉·波特。

奧利凡德魔杖店嘅店主奧利凡德先生之前曾經同哈利講過，魔杖係會揀佢哋嘅主人，而「揀咗」佢嘅冬青木魔杖係紫杉木魔杖嘅「兄弟」，而嗰支魔杖嘅主人令對方主人嘅額頭上面多咗一道閃電狀嘅疤痕，不過當時小說裡面就冇討論到呢一點嘅重要性。鄧不利多後嚟向哈利透露，哈利同佛地魔嘅魔杖都包含咗鄧不利多隻寵物鳳凰佛客使嘅１條尾羽毛。

不破誓

不破誓The Unbreakable Vow係指巫師或女巫之間自願達成有約束力嘅嘅協議。

不破誓需要３個人一齊去做施展咒語嘅儀式：雙方面對面發誓，佢哋兩個身邊一定要有契約者Bonder嘅情況下去做。做儀式嗰陣時，發誓人會同接受誓言嘅人雙手緊握喺一齊，而見證人就會用魔杖指向佢哋兩個雙手，仲會將佢哋嘅魔杖揸住喺雙方同意嘅人互相握住而連接嘅手上面，契約者嘅魔杖喺呢個時候會伸出一條好似火舌噉樣細細紅紅嘅魔法繩索將佢哋好實噉樣綑住綁埋一齊。而家仲未清楚知道如果另一邊唔肯嘅話會造成乜嘢後果。呢個誓言並唔係單單喺字面意思上面嘅「牢不可破」，因為如果接受誓言嘅人背棄佢嘅諾言嘅話就會搞到佢即刻就會死。

不破誓第１次出現喺《混血王子的背叛》裡面，跩哥·馬份喺裡面因為受到黑魔王嘅命令要去完成任務，水仙·馬份要求石內卜喺貝拉·雷斯壯做契約者嘅情況下應承去保護水仙個仔—跩哥。如果跩哥任務衰咗嘅話，石內卜就要幫佢去搞掂呢單嘢。《混血王子的背叛》入面嘅另一個例子係，榮恩話畀哈利知弗雷同喬治試過要佢發不破誓，不過最後因為佢哋老豆嘅干預搞到做唔成。

其他咒語相關嘅嘢

催狂魔之吻

催狂魔之吻Dementor's kiss係催狂魔嘅終極武器。催狂魔可以喺巫師同女巫嘅口裡面將佢哋嘅靈魂吸咗出嚟，不過就算佢哋冇咗靈魂都仍然仲可以生存到落去，因為佢哋嘅心臟同大腦仲繼續運作到，而佢哋喺跟住落嚟嘅日子裡面只係會好似活死人噉樣生存，佢哋嘅所有記憶、情緒、感覺都已經永遠噉冇晒。小巴堤‧柯羅奇喺第４輯裡面就係被執行咗呢個刑罰。

滅幻咒

滅幻咒Disillusion係將施咒嘅對象隱藏咗嘅魔法，一般嘅巫師同女巫可以做到將施咒嘅對象加咗保護色，令到佢哋同周邊嘅環境同化到好難去發覺，少數好勁嘅巫師去用呢個咒語嗰陣時能夠做到令施咒嘅對象完全隱形，不過效果就唔可以持續到好耐，如果要長期用滅幻咒嚟隱藏某樣生物或者物品嗰時，最低限度一定要每日去施咒。喺魔法部正式承認佛地魔返生之後，魔法部要求英國所有巫師家庭嘅成員都一定要學識去用呢個咒語，嚟增加畀食死人襲擊嗰陣時嘅生還率。另外，去飼育特別顯眼嘅怪獸（例如係鷹馬同天馬）嗰陣，飼主一定會用到呢個咒語嚟防止畀麻瓜發現得到。

飛行咒

飛行咒Flying，呢種係佛地魔自創嘅魔法咒語，施法者可以唔使借助任何嘢（飛天掃把）或者係生物（鷹馬）喺空中去飛，呢樣嘢對空中交戰同埋長距離嘅移動極之著數。呢樣嘢喺佛地魔之前從來都冇巫師可以做得到。佛地魔淨係將呢種魔法親自傳授過畀佢嘅親信—石內卜，佢喺《鳳凰會的密令》入面同食死人一齊去同正氣師交戰嗰陣時都有用過呢種魔法。

忠實咒

忠實咒Fidelius Charm，呢個係１種特殊而複雜嘅咒語，主要嘅用途係用呢種咒語去收埋個秘密喺「守密人Secret-Keeper」心裡面，除非守密人之後主動噉對其他人洩漏呢個秘密出嚟，如果唔係呢個秘密就永遠唔會有人發現到。聽過呢個秘密嘅人係唔會轉述得到嗰個秘密出嚟畀其他人知，嗰個秘密淨係可以出自守密人嘅口中，又或者睇到守密人自己寫嘅字條。

喺佛地魔返咗嚟之後，英國嘅巫師家庭裡面嘅家長紛紛都會施展呢個咒語嚟將自己屋企隱藏起上嚟，只要守密人（通常係家長）未去畀食死人逼問到呢個秘密出嚟嘅話，噉呢個家庭就永遠都唔會畀對方發現到。但係如果守密人死咗，其餘喺守密人嗰度知道呢個秘密嘅人通通都會即刻做咗新嘅守密人，不過被問出秘密嘅機會就會增加，所以忠實咒嘅效力就會因為噉大減。

咒語

好多嘢喺巫師世界入面都係依賴去用魔法符咒嚟完成，以下係部分喺小說入面講到嘅魔法符咒。呢啲符咒一般都會由角色加埋佢哋支魔杖，仲用特定嘅姿勢同埋一啲狀態而使用到出嚟。

《混血王子的背叛》裡面正式介紹咗唔使唸出嚟就施展到出嚟嘅無聲咒Non-verbal spell。喺早期啲嘅作品入面，除咗一啲成年巫師偶爾會使出唔使唸出嚟嘅咒語之外，一啲重要嘅角色喺每次使出一種咒語嗰時都會唸出啱用嘅咒語。雖然係咁講，由喺第６集同第７集入面出現嘅嗰啲唔使唸出嚟嘅咒語最終都無被正式紀錄落嚟，只係用嗰啲咒語出現嗰陣時相關嘅狀態而去加嗰啲名上去。

下面個表入面嘅中文咒語名後面括號裡面係佢嘅英文或者係拉丁文原名；部分未知咒語名嘅魔法就淨係用佢所知嚟命名，呢個係因為佢哋曾經喺小說裡面俾人用過但係又未有呢啲咒語嘅紀錄，又或者部分只係曾經俾人形容過但係無被施放。值得注意嘅係，嗰個系列夾埋７輯嘅作品裡面，喺最後決鬥嗰時俾人用到嘅魔法符咒多數都係無被紀錄落嚟嘅，而呢啲符咒就淨係可以用佢哋嘅使用效果嚟去做區別。

《哈利波特》系列入面嘅魔咒

分類／咒語		電影
		神秘的魔法石	消失的密室	阿茲卡班的逃犯	火盃的考驗	鳳凰會的密令	混血王子的背叛	死神的聖物
								I	II
年齡分界線Age Line	唔知				✓
擴音咒Amplifying Charm	哄哄響Sonorus				✓
鎧甲咒Armor spell	固若金湯Fianto Duri								✓
氣象咒Atmospheric Charm	撒撒氣象Meteolojinx Recanto							✓	✓
驅逐咒Banishing Charm	唔知						✓
爆炸咒Blasting Curse	爆爆炸Confringo							✓	✓
清潔咒Cleansing Spell Charm	滅滅淨Scourgify					✓
混淆咒Confundus Charm	糊糊迷Confundo							✓	✓
酷刑咒Cruciatus Curse	咒咒虐Crucio				✓	✓	✓	✓	✓
切除咒Cutting Spell	吩吩綻Diffindo				✓		✓	✓
黑魔標記Dark Mark	魔魔斃Morsmordre				✓
繳械咒Disarming Charm	去去武器走Expelliarmus		✓	✓	✓		✓		✓
幻身咒Disillusionment Charm	多身咒Protean Charm				✓
消隱咒Eradication Spell	吹吹除Deletrius			✓
暴食咒Engorgement Charm	暴暴吞Engorgio				✓				✓
生火咒Fire-Making Spell Curse	吼吼燒Incendio				✓		✓	✓
定向咒Four-Point Spell	指引我方向Point me					✓
複製咒Gemino Curse	雙雙製Geminio							✓
通用破解咒General Counter-Spell	止止止Finite 止止魔咒消Finite Incantatem	✓			✓		✓
挖掘咒Gouging Spell	洞洞鑿Defodio							✓	✓
硬化咒Hardening Charm	硬硬堅Duro								✓
障礙惡咒Impediment Jinx	噴噴障Impedimenta				✓	✓	✓
蠻橫咒Imperius Curse	噩噩令Imperio				✓				✓
水火不侵咒Impervius Charm	止止不透Impervius		✓				✓
惡咒Jinx	噤噤言Langlock							✓
	倒倒吊Levicorpus					✓	✓	✓
索命咒Killing Curse	啊哇呾喀呾啦Avada Kedavra		✓		✓	✓	✓	✓	✓
破心術Legilimency	破破心Legilimens					✓
鎖腿咒Leg-Locker Curse	榫頭失準Locomotor Mortis		✓
飄浮咒Levitation Spell	疾疾動箱Locomotor Trunk					✓
	呼呼移Mobiliarbus			✓
	浮浮僵屍行Mobilicorpus					✓
	溫咖癲啦唯啊薩Wingardium Leviosa	✓	✓			✓		✓
升降咒Lifting Spell	升升降Ascendio			✓
	低低降Descendo							✓	✓
	咻咻降Dissendium		✓
	退退降Liberacorpus					✓	✓
記憶咒Memory Charm	空空遺忘Obliviate		✓		✓			✓	✓
嗡嗡鳴咒Muffliato Charm	嗡嗡鳴Muffliato						✓
護法咒Patronum	疾疾護法現身Expecto Patronum			✓	✓	✓			✓
港口鑰Portkey	港口現Portus				✓
符咒倒轉Priori Incantatem	呼呼前咒現Prior Incantato			✓
悄聲咒Quietening Charm	噓噓靜Quietus				✓
修復咒Repairing Charm	復復修Reparo	✓	✓		✓	✓	✓	✓
現形咒Revealing Charm	阿八拉象Aparecium（隱形文字）		✓
復甦咒Reviving Spell	萎萎起Enervate			✓
	力力復Rennervate			✓			✓
抽離咒Revulsion Jinx	嘶嘶退Relashio				✓		✓	✓
屏障咒Shield Charm	破心護Protego				✓	✓	✓	✓
	破心護，強強厲威Protego Horribilis								✓
	全全破心護Protego Totalum								✓
收縮咒Shrinking Charm	啾啾縮Reducio				✓			✓
靜默咒Silencing Charm	默默靜Silencio						✓		✓
蜘蛛退散咒Spider Dispelling Spell	阿洛尼艾斯美Arania Exumai		✓
測盜咒Stealth-sensoring Charm	唔知			✓
昏擊咒Stunning Spell	咄咄失Stupefy				✓	✓	✓	✓	✓
召喚咒Summoning Charm	速速前Accio				✓	✓	✓		✓
超級感應咒Supersensory Charm	唔知								✓
無限伸展咒Undetectable Extension Charm	無形伸展Capacious Extremis						✓
開鎖咒Unlocking Charm	阿咯哈姆拉Alohomora	✓		✓		✓	✓	✓
	路路通Anapneo						✓
消失咒Vanishing Spell	消消藏Evanesco					✓
魔杖熄滅咒Wand-Extinguishing Charm	吶剋斯Nox			✓					✓
魔杖照明咒Wand-Lighting Charm	路摸思Lumos		✓	✓	✓	✓	✓		✓
	終極路摸思Lumos Maxima			✓			✓
造水咒Water-Making Spell	水水噴Aguamenti						✓		✓
緊束咒唔知英文係咩	咕咕圈Ferula		✓
劫盜地圖嘅咒語	我在此鄭重發誓 我絕對不懷好意I solemnly swear that I am up to no good			✓
	惡作劇完成Mischief managed			✓
唔清楚分類	飛飛禽Avis			✓
	密密膠Colloportus				✓
	涏涏牙Densaugeo			✓
	窟窿現Deprimo							✓	✓
	食蛞蝓Eat Slugs		✓
	辣辣燃Flagrate				✓
	熔熔沸Furnunculus			✓
	光光滑Glisseo								✓
	人人現Homenum Revelio							✓	✓
	全部定身Immobulus		✓
	繩繩禁Incarcerous							✓	✓
	衝衝攻Oppugno					✓
	噗噗蘭Orchideous				✓
	打包Pack							✓
	啪銳喀錀Periculum				✓
	整整石化Petrificus Totalus	✓				✓	✓	✓
	雕像行行起Piertotum Locomotor								✓
	嚗嚗消Reducto				✓	✓	✓
	護護敵不近Repello Inimicum							✓
	去去麻瓜走Repello Muggletum				✓			✓	✓
	哩吐三卜拉Rictusempra		✓
	叱叱荒唐Riddikulus		✓	✓	✓
	安安除惡咒Salvio Hexia							✓	✓
	撕淌三步殺Sectum Sempra						✓	✓
	蛇蛇攻Serpensortia		✓
	原形立現Specialis Revelio						✓
	塔朗泰拉跳Tarantallegra	✓			✓
	哆哆潔Tergeo						✓
	速速癒合Vulnera Sanentur						✓
	哇嘀哇唏Waddiwasi			✓
	高高起唔知							✓
	遮遮蒙眼唔知						✓

外部連結

• The Harry Potter Lexicon: Encyclopedia of Spells（页面存档备份，存于）（英文）
• List of spells喺Harry Potter Wiki上嘅文