葛萊分多

葛來分多學院徽章
葛來分多
學院創立者	高錐客·葛來分多
學院代表物	金獅
學院顏色	葛來分多所屬顏色與圖案。 紅色、金色
學院院長	米奈娃·麥
選擇學生方式	勇氣、氣魄同騎士精神

葛來分多（英文：Gryffindor)，係J·K·羅琳嘅奇幻小說系列《哈利波特》入面，霍格華茲嘅四大學院之一。呢個學院由高錐客·葛萊分多創立，代表顏色係紅色同金色（領呔同頸巾係栗色同金色），代表物係獅子，以勇氣仗義嚟做招生條件。葛萊分多嘅學院導師係變形術教授兼副校長米奈娃·麥，後尾佢做埋霍格華茲嘅校長，而學院幽靈係花名「差啲無頭嘅尼克」嘅尼古拉斯·德·明西-波平頓爵士。根據羅琳嘅講法，葛萊分多學院大致係對應四大元素入面嘅火。

葛萊分多學院培養咗許多出名嘅巫師，例如校長阿不思·鄧不利多同埋副校長米奈娃·麥，仲有小說裡面嘅主角哈利·波特、妙麗·格蘭傑，同埋榮恩·衛斯理。《哈利波特》系列小說同電影嘅主軸環繞住葛萊分多嘅角色展開，裡面嘅好多學生都加入咗鄧不利多的軍隊同埋鳳凰會嚟抵抗佛地魔同食死人，包括主角哈利·波特同埋佢嘅父母。

特質

葛來分多學院嘅價值觀著重勇氣嘅特質，仲有「膽識、氣魄同騎士精神」。嗰個學院嘅巫師同女巫雖然有時莽撞，或者脾氣暴躁，但大部分都勇敢仗義仲有成就。

按照非尼呀·耐吉·布萊克所講，其他學院（特別係史萊哲林學院）嘅人都認為葛萊分多學生有時會搞「毫無意義嘅英雄主義」。賽佛勒斯·石內卜亦都曾經話葛萊分多嘅人自以為是同傲慢，而且無視紀律。事實上葛萊分多同史萊哲林兩個學院自成立嘅初期就對抗得好激烈，而兩個學院嘅創辦人高錐客·葛萊分多同埋薩拉札·史萊哲林甚至因為後者嘅純種優越主義而反面。

喺史萊哲林學院嘅角度嚟睇，哈利同其他葛萊分多嘅學生有時喺魁地奇比賽入面贏得並唔公平。例如麥教授為咗畀１年級嘅哈利加入葛萊分多魁地奇球隊，畀佢擁有自己嘅飛天掃把，但係１年級新生係唔准擁有自己嘅掃把；喺1991-1992學年，鄧不利多校長喺學期尾結業晚宴嘅最後一刻幫葛萊分多加咗１０分，但係無扣除嗰晚違反校規嘅分數，等佢哋嘅分數可以超過史萊哲林學院而贏到學院盃。

其他學院嘅學生有時都會認為學校偏心葛萊分多學院嘅學生，例如哈利喺三巫鬥法大賽入面成為咗第４名鬥士嗰陣，大部分嘅學生都覺得哈利犯咗規仲搶咗赫夫帕夫學院嘅學生──西追·迪哥里嘅風頭。但係雷文克勞同赫夫帕夫嘅學生整體嚟講都係會企喺支持葛萊分多學院嗰邊，將史萊哲林睇成係對手；葛萊分多學院喺1991-1992學年贏咗學院盃嗰陣，雷文克勞同埋成為咗最低分嘅赫夫帕夫學生同葛萊分多一齊好高興咁將自己頂帽拋向空中，淨係得沉默嘅史萊哲林學生格格不入。另外，喺第２次巫師大戰嗰陣，鄧不利多的軍隊嘅成員都係嚟自葛萊分多、赫夫帕夫同埋雷文克勞學院，史萊哲林學院嘅學生一個都無。

位置

葛萊分多嘅交誼廳喺霍格華茲城堡入面其中一座最高嘅塔樓（葛萊分多塔）入面，而入口喺東城堡嘅７樓，由一幅個身著住粉紅色絲綢長裙嘅肥女士油畫守衛住，佢淨係會畀通關密碼啱（成日變）嘅人入去，例如奈威·隆巴頓喺《神秘的魔法石》入面成日唔記得密碼，就一定要喺油畫附近等，直到其他葛萊分多嘅師生返嚟幫佢開門；喺《阿茲卡班的逃犯》，當天狼星·布萊克試吓夾硬入去塔樓嗰時，因為畀唔到啱嘅密碼而畀肥女士阻止佢入去。

肥女士油畫背後通去葛萊分多交誼廳。葛萊分多交誼廳係個好舒服嘅圓形房，牆上面掛咗肖像，仲有個壁爐，學院嘅成員可以喺呢度讀書、聚會或者休息。交誼廳裡面有兩個階梯台階，分別通向男女生嘅睡房，通去女生睡房嘅台階上面有防止男生入去嘅符咒，不過創辦人相信女生更加可靠，因為咁通去男生睡房嘅階梯就冇防止女生入去嘅符咒，女生可以隨意入去。

相關物品

葛萊分多嘅傳承物係葛萊分多寶劍。呢把寶劍由妖精製造，係高錐客·葛萊分多嘅遺物。葛萊分多寶劍淨係會喺真正傳人嘅面前出現，但傳人並唔係淨係指佢嘅後裔，亦都包括咗佢學院裡面嘅學生，當展現到足夠嘅勇氣嗰陣，呢把寶劍就會喺嗰個學生面前出現，例如哈利·波特同埋奈威·隆巴頓。

• 鳳凰佛客使喺《消失的密室》裡面將分類帽帶到去哈利身邊，等佢可以喺分類帽裡面掹出葛萊分多寶劍嚟打低蛇妖；
• 鄧不利多同埋哈利·波特喺《混血王子的背叛》同《死神的聖物》入面都係用呢把劍嚟摧毀佛地魔嘅分靈體。
• 奈威·隆巴頓喺《死神的聖物》裡面就係用呢把劍嚟將佛地魔嘅蛇妖—娜吉妮斬頭。

代表人物

• 高錐客·葛萊分多
• 阿不思·鄧不利多
• 米奈娃·麥
• 瘋眼穆敵
• 天狼星·布萊克
• 雷木思·路平
• 詹姆·波特
• 莉莉·波特（娘家姓伊凡）
• 亞瑟·衛斯理
• 茉莉·衛斯理
• 比爾·衛斯理
• 查理·衛斯理
• 派西·衛斯理
• 弗雷同埋喬治·衛斯理
• 榮恩·衛斯理
• 妙麗·格蘭傑
• 金妮·衛斯理
• 哈利·波特
• 奈威·隆巴頓