赫夫帕夫

赫夫帕夫學院徽章
赫夫帕夫
學院創立者	海加‧赫夫帕夫
學院代表物	黑獾
學院顏色	黄色、黑色 赫夫帕夫所屬顏色與圖案。
學院院長	帕莫娜‧芽菜
選擇學生方式	勤奮、耐心、正直、忠誠

赫夫帕夫（英文：Hufflepuff）係J‧K‧羅琳嘅奇幻小說系列《哈利波特》入面，霍格華茲嘅四大學院之一。呢個學院由海加‧赫夫帕夫創立，佢代表嘅動物係黑獾，仲以忠厚誠實，善良友愛，唔怕艱辛做收生條件。赫夫帕夫嘅學院導師係草藥學教授帕莫娜‧芽菜，而果個學院嘅幽靈係肥修士。根據羅琳嘅講法，赫夫帕夫學院大致對應四大元素入面嘅土，而佢嘅代表顏色係淡黃色同黑色（怪獸系列電影入面係金絲雀黃色同石墨色）。

赫夫帕夫學院培養咗好多出名嘅巫師同女巫，包括怪獸系列電影嘅主角紐特‧斯卡曼德、鳳凰會嘅成員小仙女‧東施，同埋三巫鬥法大賽入面代表霍格華茲嘅鬥士—西追‧迪哥里。

特質

赫夫帕夫學院著重勤奮、耐心、正直同忠誠，因為咁而被睇成霍格華茲裡面最寬容嘅學院，亦都係最少出現黑巫師嘅學院，該學院嘅學生仲喺1998年嘅霍格華茲大戰期間決定留低保衛學校，佢嘅人數同哈利‧波特所屬嘅葛萊分多學院相當。不過由於果個學院嘅價值觀，令赫夫帕夫並無好似其他三個學院咁著重於競爭，佢嘅學生對待成就嘅態度相對溫和，亦都因為咁最容易被忽視。事實上，赫夫帕夫學院入面都有好多成功仲對巫師世界產生咗很大影響嘅巫師，例如係寫霍格華茲新生必備教科書《怪獸與牠們的產地》嘅魔法生物學家紐特‧斯卡曼德、鳳凰會裡面精通變形術嘅正氣師小仙女‧東施，以及曾經代表霍格華茲參與三巫鬥法大賽嘅西追‧迪哥里。

喺怪獸系列電影入面飾演紐特‧斯卡曼德嘅演員艾迪‧烈柏尼唔滿意外界對於赫夫帕夫學院嘅刻板印象，仲認為赫夫帕夫一直以來被「污名化」，他喺2016年拍咗短片為赫夫帕夫「平反」，他話：

「	你哋知道我喺赫夫帕夫嘅人身上睇到啲咩呀？我睇到忠誠、真挈嘅友誼。我們認真又有熱情，所以總係會去做啱嘅嘢，唔係為咗榮耀先至去做，而只是為咗更遠大嘅善良而做。	」
———— 艾迪·烈柏尼

果個系列小說嘅作者J‧K‧羅琳都曾經講過赫夫帕夫係佢最鍾意嘅學院，佢話果個學院代表咗真正嘅善良無私。

學院相關

赫夫帕夫嘅宿舍同交誼廳嘅入口隱藏喺廚房，佢收埋喺廚房右手邊走廊壁龕裡面嘅一堆擺喺陰暗石槽上面嘅大木桶裡面。如果要入去嘅話，入去嘅人一定要用「海加‧赫夫帕夫嘅節奏the rhythm of Helga Hufflepuff」輕敲第二排中間底部嘅第二個木桶，果個木桶嘅桶蓋就會旋轉打開，入去嘅人就可以喺呢度入到去赫夫帕夫嘅交誼廳。同其他學院唔同嘅係，赫夫帕夫嘅交誼廳係唯一帶有驅逐裝置嚟防止非法闖入者嘅學院交誼廳，如果入去嘅人無按照啱嘅旋律嚟敲，又或係敲嘅節奏或次數唔啱，咁另外一個桶嘅桶蓋就會爆裂，向闖入者嘅身上潑滿醋，因為咁果個學院嘅宿舍同交誼廳從來無外人能夠入到去。

當通過佢嘅入口通道之後，入去嘅者就會發現赫夫帕夫嘅交誼廳裡面係一個相當舒適同溫馨嘅地方。果個交誼廳係一間樸實嘅圓形大房，果度總係陽光明媚，啲學生可以透過圓形嘅窗睇到窗外面嘅蒲公英同搖動嘅青草。果度嘅天花板好低，裡面掛滿咗黃色嘅帷幔，房間嘅裝飾強調樸實嘅感覺，帶有黃黑圖案同磨光銅邊嘅長毛絨梳化同好舒服嘅凳，迎接住果個學院嘅學生去呢度休息，或者傾吓果啲由院長—芽菜教授帶嚟嘅得意標本。周圍可以見到懸掛住或擺放住嘅植物，佢哋有時仲會唱歌跳舞。赫夫帕夫嘅學生透過一扇好似桶蓋嘅完美圓形拱門嚟入去自己嘅睡房，而入到通去宿舍嘅隧道好窄。

相關物品

赫夫帕夫嘅傳承物品係赫夫帕夫嘅金盃，金盃上面有兩個把手同獾形態嘅紋章。果個金盃後來傳到去海加‧赫夫帕夫嘅遠親後裔—花奇葩‧史密Hepzibah Smith，後來果個金盃俾佛地魔用嚟做咗分靈體。

代表人物

喺原著小說入面，海加‧赫夫帕夫已知嘅後裔係史密家族，好似係花奇葩‧史密，不過赫夫帕夫學院嘅學生—災來耶‧史密，係咪都係果個史密家族嘅成員就不得而知。

• 海加‧赫夫帕夫
• 帕莫娜‧芽菜
• 紐特‧斯卡曼德
• 西追‧迪哥里
• 小仙女‧東施