香港迪士尼樂園

迪士尼樂園
香港迪士尼樂園
地點	香港大嶼山竹篙灣
開幕日	2005年9月12號
度假村	香港迪士尼樂園度假區
主題	神奇王國、奇妙世界
佢嘅網站	香港迪士尼樂園網站
營運	香港國際主題公園有限公司

香港迪士尼樂園（英文：Hong Kong Disneyland）係响香港大嶼山竹篙灣嘅香港迪士尼樂園度假區（下面叫「度假區」）內嘅一個主題樂園，佔地約16公頃，由香港政府（下面叫「港府」）同埋華特迪士尼公司（下面叫「迪士尼」）聯營嘅香港國際主題公園有限公司建設同埋營運。 香港迪士尼樂園（下面叫「樂園」）係迪士尼第五座迪士尼樂園。樂園嘅官方溝通語言係廣東話、英文同埋普通話。

開幕獻辭

「

歡迎各位蒞臨呢個快樂嘅地方。 五十年前，華特迪士尼响呢個世界帶嚟咗一個充滿夢幻同歷險、懷舊同前瞻嘅奇妙之地—迪士尼樂園。 依家，呢種想像力同埋探索精神將會活現喺香港。 香港迪士尼樂園是係獻畀所有年輕同嬭童心未泯嘅賓客—希望呢個樂園能夠成為歡樂同靈感嘅泉源，以及一個代表香港同美國人民彼此合作、友好融合嘅恆久象徵。

」

曾蔭權及邁克·艾斯納，2005年9月12日

籌建過程

内文：香港迪士尼樂園度假區

從上空拍攝嘅樂園建築工地（2004年11月）

受到亞洲金融危機嘅影響，香港經濟响1998年呈現負增長。港府希望借助發展旅遊業帶動相關行業例如零售業、餐飲業同埋酒店業等等興旺增長，同時可以製造大量嘅就業機會，達成經濟復甦。同時，迪士尼亦都籌備進軍中國市場，計劃响亞洲物色地點興建新嘅主題公園。坊間傳言，迪士尼曾經同過新加坡、上海、首爾等政府接觸。

港府嘅總投資額係224.5億港元，其中包括32.5億港元的注資，相等於股權嘅57%。同時港府將會額外獲得40億港元嘅附屬股權，代替樂園嘅地價。雖然港府冇向迪士尼提供免費嘅土地或者現金補貼，用地嘅地契年期係50年，繼有50年嘅續約權。香港國際主題公園有限公司可以選擇响啟用後嘅20年之內，以28億港元（1999年地價市值）買入預留嘅第二期發展用地，換言之迪士尼擁有嗰塊地嘅優先發展權。

發展沿革

• 1999年
  • 2月-迪士尼同港府進行談判興建香港迪士尼樂園
  • 10月31號-談判結束，雙方達成協議，迪士尼同港府一齊成立香港國際主題公園有限公司
  • 11月2號-前香港行政長官董建華同迪士尼高層响香港禮賓府正式宣布有關嘅協議。樂園嘅興建費用响1999年估計係141億港元，由莫瑞斯(Tom Morris)帶領華特迪士尼幻想工程師設計
• 2000年6月-竹篙灣填海工程動工，造地126公頃
• 2002年11月-竹篙灣填海工程完工
• 2003年1月12號-迪士尼同港府攜手主持動土儀式
• 2004年
  • 9月23號-樂園入面地標建築睡公主城堡舉行平頂典禮
  • 10月21號-樂園委任杜苡樂做樂園首任親善大使
  • 11月22號-迪士尼採用風水師嘅意見，同港府宣佈樂園响2005年9月12號正式開幕
• 2005年
  • 5月5號-樂園參與迪士尼歷史盛事－「全世界最快樂慶典」，為期18個月嘅迪士尼樂園50周年慶祝活動。
  • 6月12號-樂園總彩排開始，開放招待演藝人員同埋佢哋嘅家屬試玩，之後安排慈善團體入場試玩嚟測試營運
  • 9月12號-中國副總書記曾慶紅、香港行政長官曾蔭權同埋迪士尼高層主持開幕儀式，樂園响下午一時正式對外開放。
• 2006年7月13號-「馳車天地」、「幸會史迪仔」同埋「UFO地帶」開幕
• 2007年7月14號-「動畫藝術教室」開幕
• 2008年
  • 2月5號-娛樂節目「布公仔流動實驗室」登場
  • 3月18號-娛樂節目「歌舞青春熱跳速遞」登場
  • 4月28號-「小小世界」隆重開幕
  • 8月8號 - 娛樂節目「米奇見證夢想一刻」登場
  • 8月25號-「動畫藝術廊」開幕，取代迪士尼樂園的故事
• 2011年
  • 1月21號-開幕5周年慶祝活動「飛躍奇妙」正式開始
• 2020年
  • 12月27號-香港迪士尼樂園度假區行政總裁改由莫偉庭(Michael Moriarty)出任。

主題園區

想知多啲：香港迪士尼樂園遊樂設施、香港迪士尼樂園娛樂節目、香港迪士尼樂園商店、香港迪士尼樂園餐飲設施同香港迪士尼樂園服務設施

香港迪士尼樂園分為7個主題園區，包括：美國小鎮大街、探險世界、幻想世界、明日世界、反斗奇兵大本營、灰熊山谷同埋迷離莊園。

美國小鎮大街

内文：美國小鎮大街

美國小鎮大街（Main Street, U.S.A.）係進出樂園嘅地方，顯示出20世紀初嘅美國風情。大街主要係由木材去建造，用安妮女皇式建築作為主要風格，响香港係好罕見。園區加入新設施同埋娛樂節目嘅數目都係成個樂園最多嘅，後來重加入咗「動畫藝術廊」，同埋迪士尼擴建預覽。

探險世界

内文：探險世界

探險世界（Adventureland）係綜合其他迪士尼樂園嘅探險世界而成，到處都有原始森林同埋印第安嘅風光，亦係全球迪士尼樂園入面面積最大嘅探險世界。園區後面留咗好大嘅空位，畀日後興建新嘅主題園區同埋有關嘅設施。園區入面最受歡迎嘅遊樂設施係「獅子王慶典」同埋「森林河流之旅」。

幻想世界

内文：幻想世界

幻想世界（Fantasyland）係一個充滿想象、希冀同埋夢想嘅地方，以各迪士尼曾經演繹嘅童話為主題。園區嘅遊樂設施比其他主題園區多，2008年加入咗全園最大嘅室內遊樂設施「小小世界」。園區內受歡迎嘅遊樂設施包括「小熊維尼歷險之旅」、「小小世界」、「米奇幻想曲」及「米奇金獎音樂劇」。

明日世界

内文：明日世界

明日世界

明日世界（Tomorrowland）以一個外太空港口為主題，設施都同未來有關。園區嘅首次擴建工程响2006年進行。

反斗奇兵大本營（Toy Story Land）

故事主角Andy因為唔記得帶走佢啲玩具，喺草地上散落嘅玩具好似有生命咁活動，並邀請縮細到玩具咁嘅大細嘅賓客一齊玩……

沖天遙控車 "RC Racer"

坐上遙控車並喺27米高嘅U形滑道上來回滑動，設施以Hot Wheels玩具作藍本。

轉轉彈弓狗 "Slinky Dog Spin"

坐喺彈弓狗上跳動以及旋轉，感受窮追狗尾瘋狂旋轉嘅快感。

玩具兵團跳降傘 "Toy Soldier Parachute Drop"

賓客會坐喺跳傘上，升到高點之後突然墜下。

灰熊山谷（Grizzly Gulch）

灰熊山極速礦車 "Big Grizzly Mountain Runaway Mine Cars"

以荒廢礦場做主題嘅區域，賓客可以登上礦車參觀，而途中因為列車被山洞內嘅灰熊將分岔器啟動而將列車引導到禁區，因而令列車駛過斷軌（隨後倒後行），失控衝到湖上令列車上賓客濺濕，最後衝到火藥庫誤點爆炸而將列車噴射出來。

呢部過山車同Animal Kingdom嘅Expedition Everest斷軌行駛方式相同。

迷離莊園（Mystic Point）

全球獨有嘅主題區。座落喺茂密但人煙縹緲嘅熱帶雨林地帶，呢座模擬1908年嘅維多利亞式大屋-迷離大宅，收藏咗大量稀有珍品，而園內周圍都充斥著神秘嘅力量，隨時會發生不可思議嘅超自然事件。

喺迷離大宅中，冇軌行駛令觀光列車自己行同埋做出旋轉等動作，由於冇軌道，賓客唔會預知列車嘅去向。背景音樂由Danny Elfman設計。

Pirate Coast（已否決）

原先設計畀香港迪士尼樂園嘅主題區之一，以加勒比海盜作主題，同其他地方迪士尼樂園同類型設施不同之處，除了係用真火之外亦加插電影第3集嘅角色，亦係首個同名設施使用激流方式呈現，賓客喺不知不覺間升到高點，最後喺世界嘅盡頭衝落嚟……

區域設有人工湖（夜晚亦設有好似Fantasmic性質嘅晚間表演）以及鬼屋Haunted Mansion

由於成本過高及大股東嘅關係，呢個主題區已否決。而主題區中嘅Haunted Mansion其後改成迷離莊園。而主題區將來會變成上海迪士尼樂園嘅海盜世界。

Glacier Bay（已否決）

大股東以主題同海洋公園嘅冰極天地類似而被取消嘅主題區，以極地基地作為主題，賓客將乘坐過山車喺冰山上飛馳，主題區喺室外區域亦設有真雪效果。

節慶活動

2012年嘅節慶	活動名稱	舉行日期
農曆新年	迎龍接福	1月21號至2月13號
迪士尼星級款待	迪士尼星級款待 2012	3月11號至5月22號
徽章交換	徽章交換同樂日 2012	4月15號至4月17號
世界地球日	地球日 2012	4月16號至4月25號
暑假	迪士尼老友大召集2012	6月10號至8月31號
萬聖節	迪士尼黑色世界2012	9月至10月31號
聖誕節	迪士尼雪亮聖誕2012	11月至2012年1月

其他資料

Fastpass（迪士尼快速通行卡）

樂園入面受歡迎嘅遊樂設施都設有快速通行卡機，呢部機通常放喺嗰啲歡迎嘅遊樂設施入口附近，有效控制人流，亦都令賓客排隊時間縮短。而每部快速通行卡機嘅外形設計並不一樣，會隨着周圍環境而設計成不同外形。

善用Fastpass就可以最短時間玩最多遊樂設施。例如喺樂園入面，朝早10:00入場後先攞「飛越太空山」嘅Fastpass，假設Fastpass上列印時間係朝早10:00至到朝早11:00。呢個時候就可以先排隊玩其他遊樂設施，喺朝早11:00之前，就去返玩「飛越太空山」，喺朝早11:00之後又可以攞另一張Fastpass，如此類推。不過凈係得好少設施可以用 Fastpass，而且經常會變。

同迪士尼朋友見面

迪士尼樂園入面唔同地方都有迪士尼人物同賓客影相，畀遊人留下歡樂時刻。賓客可以自備賓客叫園內嘅演藝人員幫你影相，或者由園內嘅攝影師影相，响園內嘅小鎮沖印店交錢同埋收相。人物包括：

美國小鎮大街

• 米奇老鼠（Mickey Mouse）
• 米妮老鼠（Minnie Mouse）
• 唐老鴨（Donald Duck）
• 黛絲（Daisy Duck）
• 高飛（Goofy）
• 布魯托（Pluto）
• 鋼牙奇奇（Chip）
• 大鼻蒂蒂 (Dale)
• 迪士尼小熊Duffy (Duffy the Disney Bear)
• 迪士尼小熊ShellieMay (ShellieMay the Disney Bear)
• 貓畫家小東尼 (Gelatoni)
• StellaLou (StellaLou)
• cookie ann (cookieann)
• 白雪公主（Snow White）
• 奧蘿拉（Aurora）
• 仙蒂（Cinderella）
• 貝兒（Belle）
• 愛莎 (Elsa)
• 安娜 (Anna)
• 蘇菲亞 (Sofia)
• 醫神 (Baymax)
• 濱田廣 (Hiro Hamada)
• 瑪麗包萍絲 (Mary Poppins)
• 伯特 (Bert)

探險世界

• 丁滿（Timon）
• 拉飛奇 (Rafiki)
• 巴魯 (Baloo)
• 路易王 (King Louie)
• 史迪仔 (Stitch)
• 莉露 (Lilo)
• 茉莉 (Jasmine)
• 精靈 (Genie)
• 卡叔 (Carl)
• 羅小飛 (Russell)
• 慕安娜 (Moana)
• 黑豹 (Black Panther)

幻想世界

• 小熊維尼（Winnie the Pooh）
• 跳跳虎（Tigger）
• 咿唷（Eeyore）
• 愛麗絲 (Alice)
• 白兔 (White Rabbit)

明日世界

• 鐵甲奇俠 (Iron Man)
• 蜘蛛俠 (Spider Man)
• 樹人 (Groot)

反斗奇兵大本營

• 胡迪（Woody）
• 翠絲（Jessie）
• 巴斯光年 (Buzz Lightyear)

樂園門票 同埋 奇妙處處通

3歲以下嘅小朋友可以免費遊覽香港迪士尼樂園，所有門票價格都以港元計算。

賓客可以喺以下地方買樂園門票同埋奇妙處處通：

• 香港迪士尼樂園正門入口

賓客可以喺遊覽樂園嗰日，响樂園正門入口售票處或賓客服務中心購買門票。服務時間為每日朝早9點至到樂園關閉。

• 酒店住客優先預訂樂園門票

如果係香港迪士尼樂園度假區兩間酒店嘅住客，可向酒店嘅訂房中心查詢多啲詳情。服務時間係每日朝早9點至夜晚8點。

• 團體訂票

團體賓客如果訂購100張或以上嘅門票（如作商務會議或家庭聚會等用途），可打去852 35503369聯絡香港迪士尼樂園團體銷售部。

• 港鐵香港站香港迪士尼樂園售票處

位於港鐵香港站東涌綫大堂。服務時間為係星期一至五朝早9點至夜晚7點；星期六、日及公眾假期朝早9點至夜晚5點。

• 指定OK便利店

由2008年5月26號起，賓客可以响127間指定OK便利店購買香港迪士尼樂園平日或指定日子門票。

• 透過旅行社預訂門票

旅行社提供嘅香港迪士尼樂園旅遊套餐中，已經包括樂園門票。

樂園門票

門票類別	普通日子
標準門票 （12至到64歲）	港幣$619
小童門票 （3至到11歲）	港幣$458
長者門票（65歲或者以上）	港幣$100

奇妙處處通

香港迪士尼樂園設有三種不同類別嘅奇妙處處通可以全年入去玩，包括：銀卡、金卡同埋白金卡。

（*3歲以下嘅小朋友可以免費遊覽香港迪士尼樂園）

會員卡類別	銀卡	金卡	白金卡
成人（12至到64歲）	港幣$1238	港幣$1999	港幣$3491
學生（12至25歲全日制學生）	港幣$880	港幣$1409	港幣$2485
小童（3至11歲）	港幣$880	港幣$1409	港幣$2485
長者(65歲或以上)	港幣$316	港幣$525	港幣$890

• 根據購買嘅「奇妙處處通」類別可享用嗰個會員卡類別嘅優惠同優待。

奇妙處處通樂園遊玩優惠：

1. 銀、金卡會員可以喺生日嗰日免費入園。
2. 購物、餐飲享有9折（銀卡）、9折（金卡）、9折（白金卡）（*大街餐廳、餐廳紀念品、樽裝飲品同戶外流動餐飲車售賣的食品或者飲品除外）。
3. 酒店訂房、餐飲、購物優惠。
4. 可以搶先玩樂園嘅新遊樂設施。
5. 有季節性嘅優惠。
6. 白金卡會員可以喺每場表演《獅子王慶典》優先入去劇場。
7. 白金卡會員可以喺每場表演兩日之前到演出前一個鐘預先喺會員專頁為自己同最多3位賓客優先預留座位欣賞《迪士尼魔法書房》。
8. 金卡同白金卡會員可享有額外嘅Fastpass（快速通行卡），1張（金卡）、2張（白金卡）。

樂園大使

高級榮譽大使

• 2004年至到2006年係張學友
• 2006年至到2009年係飛輪海

親善大使

正如世界各地嘅迪士尼樂園，香港迪士尼樂園定期由員工選拔親善大使，第一位親善大使係杜苡樂。

• 2005年至到2006年係杜苡樂
• 2007年至到2008年係羅慧沁
• 2009年至到2010年係羅智豪
• 2011年至到2012年係黎秋霞
• 2013年至到2014年係劉旭鵬
• 2015年至到2016年係許小樺

交通接駁

特別設計嘅港鐵迪士尼綫列車車廂

主要交通幹道

• 8號幹線
• 竹篙灣公路

公共交通

鐵路

• 港鐵迪士尼綫：迪士尼站 ↔ 欣澳站

賓客可以响欣澳站轉乘東涌綫來往東涌同埋香港沿途各站

巴士

• 城巴同埋龍運巴士聯營：
  • R8：迪士尼公共運輸交匯處 ↔ 青嶼幹線收費廣場（經迪欣湖）

每日0600至2405提供服務，0900前同埋1900後開出嘅班次唔經迪欣湖

• 城巴：
  • B5  : 港珠澳大橋香港口岸 ↔ 欣澳站
  • R11：迪士尼公共運輸交匯處 → 北角碼頭
  • R22：迪士尼公共運輸交匯處 → 油塘

B5 喺香港迪士尼樂園朝早入場繁忙時段以及夜晚煙花表演後嘅一段時間駛經迪士尼樂園

R11/R22 每日夜晚煙花匯演後由香港迪士尼樂園度假區開出

• 龍運巴士：
  • R33：迪士尼公共運輸交匯處 ↔ 屯門鐵路站
  • R42：迪士尼公共運輸交匯處 ↔ 大圍鐵路站

每日朝早開去香港迪士尼樂園度假區，夜晚煙花表演後由香港迪士尼樂園度假區開出

• 度假區專線
  • 度假區穿梭巴士：迪士尼公共運輸交匯處 ↔ 香港迪士尼樂園酒店 ↔ 迪士尼好萊塢酒店
  • 皇崗專線：深圳皇崗口岸 ↔ 迪士尼公共運輸交匯處

停車場

• • 私家車車位：1100個
  • 旅遊車車位：290個
  • 電單車車位：50個

參考

• 香港迪士尼樂園度假區
• 迪士尼度假區及主題公園
• 和路迪士尼公司

相關新聞

迪士尼頻被投訴嬰兒車失竊 -- 2010年07月06日(二)

出面網頁

官方網站

• 香港迪士尼樂園（繁體中文）（英文）（簡體中文）
• 香港迪士尼樂園探索樂園地圖（繁體中文）（英文）（簡體中文）
• 全年通行證（繁體中文）（英文）（簡體中文）

其他網站

• 香港迪士尼樂園位置－利用中原地圖
• 香港迪士尼樂園位置－利用Google地圖