早餐

西式早餐

早餐係響朝頭早食嗰餐，通常係指瞓醒後，做嘢之前食嘅第一餐。因文化唔同，世界各地嘅早餐都好唔同。

個詞響唔同語言裏頭

中文「早餐」、日文「朝食」、德文「Frühstück」同丹麥文話「morgenmad」嘅意思都係「朝早嗰餐」，但係英文「breakfast」、法文嘅「petit déjeuner」同西班牙文嘅「desayuno」意思都係「破咗禁食」。

世界各地嘅早餐

亞洲國家同地區

經典嘅中式早餐：油炸鬼配豆漿

中國大陸

各地早餐都有唔同，粥，有時配以油炸鬼、粢飯等；或食麵，有時會上茶樓食點心，飲品通常係熱或凍豆漿或茶。一啲地區亦有羊肉湯、牛肉湯、燒餅、烙饃作為早餐，各地早餐幾乎全部係中式早餐並充滿當地特色。為提高國民體質，推行學生奶計劃。受西方影響，亦有以西餅、麵包、牛奶、牛奶麥皮、粟米片、咖啡等做早餐。

台灣

早餐通常分為西式早餐同中式早餐，但都經過改造充滿台灣特色。西式主要有各類三文治、漢堡包，而中式就以豆漿嘅商品為主，但界線並唔明顯。常見西式早餐店賣埋豆漿或蘿蔔糕等。另外，連鎖型早餐店喺台灣亦好盛行。

香港

早餐通常係西式早餐同港式早餐，上班族通常會選擇喺快餐店或茶餐廳買早餐食。西式早餐通常有經過改良嘅英式早餐，港式茶餐廳通常賣本地化嘅餐點，好似煎雙蛋、通粉、餐包，亦有即食麵或者三文治，附送冷熱咖啡或茶。最經典早餐A餐單：牛油餐包、西煎雙蛋或炒蛋、火腿通粉/沙爹牛肉麵、送咖啡或茶。近年多咗便利店同麵包舖賣早餐麵包，對趕時間上班族好方便。

日本早餐

日本

飯、麵豉湯、納豆、生蛋、燒魚、綠茶、粥

韓國

朝早食嘅一餐同一日嘅其他餐無分別。

新加坡

早餐通常會係肉骨茶或豆漿。

馬來西亞

椰漿飯、印度煎餅（roti canai）、馬來糕點、麵等等，亦有西式早餐好似麵包。

越南

老百姓一般食各種帶有地方特色嘅小食，好似：牛肉河粉，順華牛肉豬腳米粉等。越南三文治係好受大學生享用因為佢方便攜帶，嘢飲一般係咖啡，豆漿。喺咖啡廳通常都有賣各種早餐套餐。

歐洲國家同美國

亞洲麵食早餐

麥當勞嘅經典大早餐（Big Breakfast）

呢啲國家嘅人通常會食麵包或糕餅做早餐，嘢飲通常係果汁、茶、鮮奶或咖啡。

德國

麵包配以果醬、煙肉，奶或咖啡。

法國同南歐

食一啲脆嘅糕點，並飲白咖啡或意式濃縮咖啡（Espresso）。喺古典嘅定義中，香煙亦係法式早餐嘅一部分。法國傳統對早餐並唔重視，呢個可以喺法文早餐一詞——「petit déjeuner」（小午餐），睇得出來。

瑞典

脆皮麵包同魚。

英國

有果醬嘅多士（即吐司）、香腸、蛋類食品同埋醃肉等。傳統飲紅茶。

美國

帶牛油嘅多士或克戟，同一啲蛋類食品。

中東

阿拉伯地區

Pita包、Labneh。

埃及

蠶豆配橄欖油、檸檬汁同大蒜。

土耳其

紅茶、白芝士、黑橄欖、麵包、蛋等。

南美國家

巴西

生果

營養

營養學家認為早餐係非常重要嘅一餐，對人嘅健康非常重要，因為佢提供咗展開一日所需嘅能量。

唔少研究長生術嘅人認為早餐應該食得最多、最豐富。

唔食早餐嘅危害

• 唔食早餐會降低大腦功能，影響大腦發育。肚餓時血糖降低，會令大腦出現障礙，出現頭暈、注意力唔集中、記憶力減退、易攰，甚至影響大腦功能，導致智力下降。
• 唔食早餐容易患消化道疾病。人經過瞓咗一晚，早晨腸內食物已經消化晒，急需補充。如果早餐食唔好，午飯一定會飯量大增，造成胃腸道負擔過重，導致胃潰瘍、胃炎、消化不良等疾病。
• 長期唔食早餐重容易患膽結石。人喺空肚時體內膽汁中膽固醇嘅濃度特別高。喺正常食早餐嘅情況下，膽囊收縮，膽固醇隨住膽汁排出。如果唔食早餐，膽囊唔收縮，長期落去就容易生膽結石。
• 唔食早餐體內膽固醇高。唔食早餐嘅人比食早餐者膽固醇高33%，而所有膽固醇高嘅細路，血管中都有脂肪紋，佢係動脈粥樣硬化嘅早期跡象。

出面網頁

• 不吃早餐危害身體健康