撐起雨傘

《撐起雨傘》係一首由香港音樂界為喺2014年9月底開始嘅「和平佔中」同埋「雨傘革命」所創作嘅歌曲，由羅曉彬（Pan）作曲、林夕同埋Pan填詞，何韻詩、黃耀明、葉德嫻、謝安琪、周國賢、盧凱彤、方皓玟、RubberBand同其他香港歌手主唱。呢首歌係繼1989年為八九民運而舉行「民主歌聲獻中華」同埋創作《為自由》之後，25年以來首次由香港群星創作同埋主唱政治抗爭歌曲。

呢首歌喺2015年元旦舉行嘅「2014年度叱咤樂壇流行榜頒獎典禮」以2887票奪得「叱咤樂壇我最喜愛的歌曲大獎」，得票拋離其餘4首歌曲過千票，係該頒獎典禮設立以來，首次由群星演唱嘅社會運動歌曲奪得該典禮嘅最高榮譽。