填詞

填詞（粵拼：tin4 ci4），又或者叫作詞（粵拼：zok3 ci4），係指啲人跟住音樂或格律，填寫能夠依聲誦唱嘅詞（歌詞）。做填詞工作或職業嘅叫做填詞人或作詞人。由於「詞」喺以前同依家有唔同嘅意思，所以「填詞」亦可以根據所填嘅「詞」係以前抑或依家去分類。但唔理係邊種詞，填詞都係依聲填寫字句嘅文學創作。

音樂概念

睇埋：音樂理論同作曲

要學填詞，有必要理解一啲基本嘅音樂概念，包括：

• 音高：一種基本嘅音樂元素，係每個音符都會具有嘅一個特性；一個音符嘅音高簡單講，就係指個音符聽落有幾「高」，精確啲講嘅話，音高喺物理上查實反映咗一段聲嘅頻率有幾高，頻率愈高嗰吓聲聽落就愈高音，用五線譜畫出嚟嘅話，音高會以音符嘅高度表達（好合符直覺），位置愈高就表示個音符愈高音，例如以下係基本 C 大調嗰啲音高用五線譜畫出嚟嘅樣：

呢段聲係用鋼琴將 C 大調嘅音符由低至高彈出嚟，彈到最高再由高至低彈多次；圖中嗰兩個 C 之間相距一個八度。

一段節拍；呢段音樂係 4/4，即係話段節拍入面有 4 吓拍子，每吓拍子都係一個四分音符咁長。

呢段聲入面嘅鼓跟 3/4 嘅華爾茲節奏；每段節拍第一吓拍子重音。

以 96 bpm 打緊拍子嘅拍子機嘅聲；每吓聲算係一吓拍子。

• 節奏：指指一段音樂嗰啲聲「喺時間當中點擺法」，會令到一段音樂有週期「時強時弱」嘅變化；節奏嘅基本部份係拍子，拍子係計時單位，一吓拍子（以秒計）長度唔定但喺同一段音樂當中恆定，而一段音樂每分鐘有幾多吓拍子（bpm）就反映咗嗰段音樂速度幾快－ bpm 高就係速度快，bpm 低就係速度慢。唔同語言被指喺節奏特性上有差異（可以睇睇語言學上講嘅等時性概念），而呢點令到唔同語言喺啲歌嘅歌詞特性上有差異。
• 旋律：一段旋律係一列聲，呢拃聲由一段特定嘅音高關係同節奏組合埋一齊，形成一個整體；當一個人聽到一段旋律嗰陣，會將段旋律視為一段能夠單獨存在嘅物體，唔會覺得段聲係「由某段音樂嗰度斬咗出嚟、唔完整」嘅。

詳情可以睇睇樂理方面嘅概念。

語言概念

睇埋：語音學、音系學、語言韻律同修辭手法

填詞講求語言嘅字句要配合一首樂曲，所以亦會掂到一啲語言學概念。

• 音節：音節係一個有啲複雜嘅語言學概念；簡化講，一段音節可以當係「一個元音，前面可以有若干個輔音，後面亦可以有若干個輔音」，而廿一世紀初嘅粵語書寫喺絕大多數情況下都係一隻漢字對應一段音節嘅，例如
  • 粵語嘅填詞（粵拼：tin4 ci4）一詞有兩橛gyut6音節；
  • 粵語嘅叉燒包（粵拼：caa1 siu1 baau1）一詞有三橛音節；
  • 英文嘅 television（電視）一詞就有四橛音節；tel-e-vi-sion；
  • 喺廿一世紀初，多數主流語言填起詞上嚟嗰陣，一個音符都會對應嗰隻語言入面嘅一段音節，唔同語言「一隻字詞平均有幾多段音節」有差異，而噉就表示攞同一段旋律，字詞平均少音節嘅語言可以有更多字詞，表達到更加多嘅意思。
• 聲調：聲調係指一隻語言會靠一段音節嘅音高變化規律，辨別唔同嘅字詞或者（用語言學嘅術語講）形態素；例如粵語就係一隻聲調語言，同冇聲調但係有語調嘅英文對比：

  粵語聲調：詩（粵拼：si1）、試（粵拼：si3）同埋是（粵拼：si6）噉—呢幾款音節喺元音同輔音上相同，但音高嘅變化規律有異，就變咗做意思唔同嘅字詞；

  英文語調：喺英文入便，啲句子如果最尾嗰段音高上升，就係變咗做問句，例如 He wrote the lyrics 就噉係「佢寫咗啲歌詞」嘅意思，但係如果句嘢最尾嗰橛音高上升，就會變成係問緊「啲歌詞佢寫嘅？」噉嘅意思。

  • 由上述嘅例子睇得出，英文並唔會因為音高變咗，令到讀出嚟嘅音變咗第隻字詞，音高變化表達嘅嘢，完全獨立於字詞本身嘅意思；好似粵語、客家話、閩南話、越南話同泰國話等嘅聲調語言，會將唔同嘅聲調當成唔同嘅音素，聲調唔同會令到一段語音變咗唔同字詞。
  • 聲調同音高之間嘅互動，對於叶音（下面講）嚟講好重要。

粵語詩史試時市事 6 個聲調嘅輪廓；粵語啲聲調輪廓相對簡單，一個聲調（大致上）一係平、一係升、一係跌，相比之下例如普通話嘅第三聲調就有「喺隻字途中，音高開頭嗰陣跌，跟住升」嘅情況。

• 押韻：無論中西，文學都成日會講求押韻；押韻係指喺一篇最少有兩句嘅文學作品（包括歌）入面，每句最尾嗰隻字詞（或者音節）嘅音節後半，全部或者大部份都一樣或者差唔多，令到件作品讀起上嚟有返咁上下抑揚頓挫。粵語一般係要求元音、結尾輔音同聲調要夾，先至算係押韻，例子：

  信你一成sing4，雙目失明ming4。

  • 相反，英文詞嘅押韻，按押韻嘅音節有幾似同點似法，將押韻分成五大類，句句都押得太好，喺英文未必係好事，押韻嘅音節亦未必係最尾嗰個。
• 平仄：漢語文學上嘅一個概念，簡單講係話一首詩歌要好聽，一定要跟從某啲聲調上嘅平仄變化規律先至得。

詳情可以睇吓專門研究語音嘅語音學，以及係研究唔同語言分別點樣「組織」語音嘅音系學。

叶音

内文：叶音

叶hip3音係有啲聲調語言塡詞時嘅技巧，塡詞人要令歌詞嘅聲調走向同旋律嘅音高起伏一致。如果一種語言，聲調變化有較多，例如粵語，噉唔叶音（即係拗音，亦稱倒字）嘅歌詞容易令聽嘅人冇辦法正確辨識詞義。

粵語廣州話擁有九聲六調（六種聲調輪廓），不過有啲聲調嘅高低有相似嘅地方，喺叶音的角度嚟講，六調可以構成嘅音級，有「高、亢、下、沉」（最高、中、低、最低）呢四種，係一個完整嘅四級音階。表列如下：

音階（五度標記法）	聲調 /五度標記法（例字/粵拼）
高（5）	陰平聲 55（詩 si1）	陰入聲 5（昔 sik1）	陰上聲 35（史 si2）
亢（3）	陰去聲 33（試 si3）	中入聲 3（洩 sit3）	陽上聲 23（市 si5）
下（2）	陽去聲 22（事 si6）	陽入聲 2（食 sik6）
沉（1）	陽平聲 21（時 si4）

標示類似音階有幾種方法，如果由低至高排列（即係上表嘅「沉下亢高」次序），包括有：「零（〇）、二、四、三」、「零、六、五、一」 、「藍、綠、翠、(紫)青」等。當中以「〇、二、四、三」最普遍，寫起嚟亦都比較簡單易寫。

歷史

睇埋：宋詞、粵曲同粵語流行曲

填詞之風始於唐朝末，盛於宋朝。詞人揀詞牌（配曲調嘅名）之後，就要嚴格噉跟詞牌規定嘅字數、平仄同押韻等嘅格律要求，選字用韻，將字填入去詞調裡便。宋詞嘅平仄、用韻係所謂嘅《廣韻》系統。填寫元曲嘅方法，同填寫宋詞好似，先選曲令，然後依曲填字。元曲嘅用韻變化大得好交關，可以依照《中原音韻》嚟填都得。

創作古代詞體嘅作家，一般會稱之為詞人。

現代填詞就始於流行曲嘅傳播同發展，成為流行音樂產業當中嘅一個重要角色，流行曲嘅曲調可以分好多種，形式上自由多元，一般都唔會再用詞牌嚟限制創作。通常一曲搭配一詞，一曲多詞嘅情況通常係喺流行音樂全世化之後先會發生嘅，以唔同語言翻唱同一首曲做宗旨，例如迪士尼嗰啲動畫電影嘅主題曲就係噉。

睇埋

• 最佳作詞人獎
• 詩歌
• 故仔

外拎

• （粵文） （香港繁體） 大常見問題 | 老是常出現 | 填詞FAQ📝 | 填詞班🧑🏻‍🎓 | 填詞教學 | 填詞睇咩書📖 | 點識作曲人 | 點入行做填詞人 [你以為填詞是咁的EP12]
• （英文） 歌詞嘅力量：寫歌點樣可以用嚟講有力嘅故事，呢篇英文文章淺談點樣用歌詞嚟表達故仔。