天狼星·布萊克
天狼星·布萊克（英文：Sirius Black，1959年11月3號—1996年6月18號），大陸版譯「小天狼星」，係英國作家J. K. 路靈嘅奇幻小說《哈利波特》系列入面嘅人物。佢係詹姆波特嘅摯友，哈利波特嘅教父，布萊克家族入面嘅最後一個人。
喺電影入面，天狼星呢個角色係由加利奧文做嘅。
人物概述[編輯]
天狼星喺小說入面第一次被提及係喺第一集《神祕的魔法石》，佛地魔殺咗詹姆波特同莉莉波特兩公婆之後，魯霸海格借咗天狼星架飛天電單車載住仲係孲𤘅子嘅哈利波特去鄧不利多到。
天狼星係第三集《阿茲卡班的逃犯》嘅主角，故事嘅開頭描述佢係一個逃犯，當年兇殘咁殺咗十二個麻瓜，但同時又係哈利嘅教父。隨住故事嘅發展，讀者會發現當年嘅事唔係咁簡單，而天狼星嘅角色形象亦都由開頭嘅冷血兇殘，變成照顧住哈利嘅大哥哥形象。
家族[編輯]
天狼星係神聖二十八家族之一，布萊克家族嘅成員，亦都係家族史上唯一一個被分入葛萊分多嘅成員，其他成員都被分入史萊哲林。
天狼星同佢嘅家族關係唔好，布萊克家族重視血統，崇尚黑魔法，事實上，好多家族成員都係食死人，或者至少係企喺佛地魔嗰邊嘅。天狼星唔認同呢啲諗法，亦都唔鍾意黑魔法，導致佢同佢屋企人嘅矛盾、衝突。喺十六歲嘅時候，佢離家出走，去投靠詹姆，詹姆嘅老頭老母老波特夫婦好鍾意天狼星，畀佢喺屋企住，直情當佢係仔噉照顧。離家出走之後，天狼星個老母將佢個名由布萊克族譜掛毯到註銷咗，喺電影版入面，可以見到喺古里某街十二號嘅布萊克祖屋入面，布萊克族譜掛毯上面代表天狼星嗰個位變咗黑色一撻。
天狼星同好多其他角色都有或近或遠嘅親戚關係，事實上，爲咗保持血統純淨，神聖二十八家族之間經常通婚，甚至近親通婚。所以喺近代嘅純種巫師之間大部分都有親戚關係。
| 姓名 | 佢係天狼星嘅…… | 備註 |
|---|---|---|
| 獅子阿爾發·布萊克 | 細佬 | 曾經係食死人，後嚟背叛並嘗試摧毀佛地魔嘅分靈體。喺假分靈體金匣入面嗰封信，署名「R.A.B.」就係佢 |
| 貝拉·雷斯壯 | 堂姐 | 嫁咗畀道夫·雷斯壯，忠誠嘅食死人 |
| 美黛·東施 | 堂姐 | 嫁咗畀混血巫師泰德·東施，生咗小仙女·東施。係鳳凰會嘅同盟 |
| 水仙·馬份 | 堂姐 | 嫁咗畀魯休斯·馬份，生咗跩哥·馬份，食死人，好縱佢個仔 |
霍格華茲[編輯]
喺霍格華茲，天狼星識到一生最好嘅朋友：詹姆·波特。佢哋兩個同樣喺魔法方面有好強嘅天賦，亦都有俊俏嘅外表，所以好多同學同老師都好鍾意佢哋。但係凡事都有例外，詹姆成日都恰賽佛勒斯·石內卜，而天狼星係詹姆嘅絕對支持者，所以石內卜喺憎詹姆嘅同時，亦都憎埋天狼星一份。後嚟佢哋又認識埋彼得·佩迪魯同雷木思·路平，仲成爲好朋友，發現咗路平係狼人之後，其他三位都透過自學，成爲化獸師。天狼星嘅化獸師形態係一隻大黑狗，所以改咗個花名做「獸足」。每次滿月路平變做狼嗰陣，佢哋四個就會喺霍格華茲同活米村兩度周圍走，所以發現咗學校唔少祕密。後尾佢哋四個整咗劫盜地圖，地圖記錄咗霍格華茲所有嘅祕道，同埋可以偵察霍格華茲入面嘅人，並將佢哋個名顯示喺地圖上面。
鳳凰會[編輯]
天狼星畢業嗰陣正值第一次巫師大戰，以佛地魔爲首嘅黑暗勢力強盛嘅時候。天狼星企喺佛地魔嘅對立面，好快就喺鄧不利多嘅號召之下加入鳳凰會。喺詹姆同莉莉結婚嗰陣，天狼星做佢哋嘅伴郎，而且被佢哋指定成爲哈利嘅教父。
後嚟，鳳凰會嘅人知道咗西碧·崔老妮嘅半個預言之後，鄧不利多叫波特兩公婆匿埋避開佛地魔。波特夫婦本來諗住指定天狼星做佢哋躲藏地點嘅守密人，但係天狼星驚佛地魔好易估到，所以拒絕咗，並提議彼得做守密人。呢個錯誤嘅決定直接導致波特夫婦嘅死亡，亦都令天狼星後悔一生。
冤獄[編輯]
天狼星發現彼得係二五仔，泄露咗波特夫婦嘅位置畀佛地魔，導致佢哋嘅死亡。又內疚又憤怒嘅佢決定去追殺彼得，但係彼得好醒，喺鬧市之中大嗌「天狼星背叛咗波特夫婦！」然後用魔杖製造一場爆炸，當場炸死十二個麻瓜，同時整斷自己一隻手指，再轉成化獸師形態逃走。呢個佈局導致大量麻瓜「目擊」天狼星炸死十二個麻瓜同埋彼得，呢件事嘅結果就係巴堤·柯羅奇對佢未審先判，捉咗入阿茲卡班監獄。
逃出[編輯]
喺獄中，天狼星有一次睇《預言家日報》嗰陣，咁啱睇到衛斯理一家嘅合照，一眼就認得出榮恩嘅「新寵物」斑斑根本唔係普通嘅老鼠，而係彼得嘅化獸師形態。佢擔心彼得潛伏喺霍格華茲會對哈利不利，所以化身做大黑狗，憑住多年營養不良以日益消瘦嘅身材穿過咗監獄嘅欄柵，成爲史上第一個成功喺阿茲卡班逃出嘅犯人。
死[編輯]
佛地魔利用佢同哈利之間嘅神祕聯繫，喺哈利嘅腦海入面製造幻覺，令哈利相信天狼星被俘虜咗喺魔法部神祕部門入面並被人虐待緊。哈利同一班同學一齊去救佢，點知被佛地魔同食死人埋伏。鳳凰會嘅人（包括天狼星）調返轉嚟救佢哋，喺混戰之中天狼星被自己嘅堂姐貝拉殺咗，跌咗去一道拱門嘅簾幕後面。哈利好長一段時間都接受唔到天狼星嘅死，成日都諗佢會唔會其實未死，又想知有冇可能天狼星可以以鬼魂嘅方式返返嚟佢身邊，過咗好耐先接受到天狼星真係死咗。
天狼星係布萊克家族最後一個男丁，佢死後，布萊克呢個純種巫師姓氏正式消失，不過呢個家族嘅血脈透過女性成員融入咗去其他嘅純血家族入面。
姓名[編輯]
同哈利波特系列入面好多其他角色一樣，天狼星·布萊克個名揭示咗角色嘅一部分。布萊克家族大部分人都係以星星嚟命名，例如天狼星細佬Regulus Arcturus Black，Regulus就係軒轅十四，Arcturus就係大角星。而佢自己，Sirius就係天狼星，係大犬座嘅一粒星，而且係天空入面最光嘅星。加埋佢嘅姓Black，全名就係暗指「黑狗」，正正就係佢嘅化獸師形態。
翻譯[編輯]
| 語言 | 翻譯 |
|---|---|
| 荷蘭文 | Sirius Zwarts |
| 芬蘭文 | Sirius Musta |
| 挪威文 | Sirius Svart |
| 波蘭文 | Syriusz Czarny |
| 葡萄牙文 | Ciro o Preto |
| 西班牙文 | sirius negro |