跳去內容

妙麗·格蘭傑

出自維基百科，自由嘅百科全書
(由妙麗 (小說角色)跳轉過嚟)
妙麗·珍·格蘭傑
Hermione Jean Granger
愛瑪·屈臣飾演嘅妙麗·格蘭傑。
首次出場《哈利波特：神秘的魔法石》
尾次出場《哈利波特：死神的聖物2》
作者J·K·羅琳
扮演愛瑪·屈臣（電影）
諾瑪‧杜馬薇（舞台劇）
配音香港林寶怡（粤語配音）
詳細信息
性別女性
家庭
配偶榮恩·衛斯理
仔女露絲·格蘭傑─衛斯理Rose Granger-Weasley
曉高·格蘭傑─衛斯理Hugo Granger-Weasley
國籍英國
簽名

妙麗·格蘭傑（英文：Hermione Jean Granger）係英國作家J·K·羅琳嘅奇幻小說《哈利波特》系列入面嘅主要角色，第一次出現係喺《哈利波特：神秘的魔法石》入面，當時係一個搭緊火車去霍格華茲嘅新生；後來當哈利·波特同榮恩·衛斯理喺女生洗手間救咗佢出嚟之後，佢哋三個就做咗同學兼老友，仲成日用佢嘅機智、轉數快嘅回憶同百科全書式嘅知識喺危急情況下幫到手。羅琳表示過，妙麗就好似一個無安全感同埋對失敗恐懼嘅後生女咁樣[1]。

自從2001年嘅第一集《神秘的魔法石》開始，一直到2011年《死神的聖物2》嘅８輯哈利波特系列電影，妙麗嘅角色都係由愛瑪·屈臣飾演，呢個角色係嗰個系列入面嘅女主角同埋三個核心人物之一，仲擁有巨大嘅人氣。《荷里活報道（中文：荷里活報道）》喺2016年由荷李活專業人士裡面進行嘅一項民意調查入面，佢獲選做有史以來最佳嘅女性角色[2]，佢仲喺《哈利波特：被詛咒的孩子》入面成為咗１９年後嘅魔法部部長。

角色簡介

[編輯]

妙麗·格蘭傑嘅全名係妙麗·珍·格蘭傑Hermione Jean Granger，係麻瓜出身嘅女巫，父母都係麻瓜牙醫。作者羅琳話佢喺1979年9月19號出世[1][3][4]，佢喺差少少就12歲嘅時候第一次去到霍格華茲[5]。妙麗喺學業上面表現得好叻，係成績優異嘅學生，羅琳形容佢「非常合乎邏輯、正直同善良」[6]。羅琳補充話，妙麗嘅父母係兩個麻瓜牙醫，而妙麗係佢哋嘅獨生女[6]，佢哋對於自己個女咁古怪而覺得有啲困惑，但係「仍然為佢覺得驕傲」[6]。不過羅琳喺2004年嘅一次訪問入面透露，佢原本打算俾妙麗有個細妹，不過因為佢覺得而家先至介紹呢個角色「可能太遲喇」，所以當時計劃中嘅兄弟姐妹喺後嚟並無真係出現[7]。羅琳將露娜·羅古德嘅性格形容做「反妙麗」，因為佢哋兩個就係咁唔同[8]。

羅琳喺受訪問嗰陣講過，妙麗呢個角色其實係用佢自己嚟做藍本[9]，佢指妙麗呢個角色帶有幾個傳記式嘅影響：「我並無打算等妙麗好似我咁，但係佢某部分嘅性格同我係有啲相似[10]。佢誇大咗我後生嗰陣個樣[6]。」呢個都係「我自己１１歲嗰陣嘅縮影[11]」。佢諗返起自己組個嗰陣俾人叫做「無所不知嘅細路little know-it-all[1]」。另外，佢又話妙麗同佢唔同嘅係，妙麗嘅勤力係喺「有好多嘅不安全感同埋對失敗嘅極大恐懼」呢啲複雜嘅原因之下。最後，根據羅琳嘅講法，除咗阿不思·鄧不利多之外，妙麗係完美嘅說明性角色；由於佢有百科全書式嘅知識，佢總係可以用嚟解釋哈利波特世界（中文：魔法世界 (跨媒體製作)）裡面嘅情節[12]。羅琳仲話，佢嘅女權主義良心俾妙麗拯救咗出嚟，「佢係佢個年紀入面最聰明嘅女巫」，都係一個「好堅強嘅女性角色」[13][14]。同時她又好很受師長嘅信任，就連鄧不利多都同哈利講「我驚嘅係依靠格蘭傑小姐會令你慢落嚟」。

妙麗Hermione呢個名嘅來源係取自莎士比亞嘅作品《冬天的故事（中文：冬天的故事）》入面嘅一個角色，嗰個係貞潔又靚女嘅西西里王后[15]，不過羅琳話呢兩個角色喺其他方面幾乎無共通點[16]。羅琳話佢希望妙麗呢個角色嘅名與眾不同，因為如果少啲女仔分享佢個名，就會再少啲女仔因為咁而俾人取笑，而「對於一對專業嘅牙醫，佢哋會鍾意證明自己有幾咁聰明[16]」。妙麗原本嘅姓氏係「帕高Puckle」，不過羅琳覺得呢個姓氏「根本唔啱佢」，所以「格蘭傑Granger」呢個無咁無聊嘅姓氏就因為咁出現喺小說同電影入面[1][註 1]。

妙麗呢個名字嘅另一個原始起源係古希臘神話十二主神裡面嘅「赫密士Hermes」，佢擁有穿越神界同凡間嘅能力，暗示住麻瓜出身嘅妙麗可以喺巫師世界同麻瓜世界來去自如。如果依照英語國際音標（中文：英語國際音標）「/hərˈmaɪ.əni ˈdʒiːn ˈɡreɪndʒər/」嘅讀法，佢嘅國語音譯應該係赫敏·珍·格蘭傑 。繁體中文之所以譯成「妙麗」，呢個係因為翻譯者為咗配合成個系列嘅翻譯風格——大部分角色嘅名只係翻譯成兩個字（例如：哈利、榮恩、跩哥、奈威、金妮、露娜、西莫、文妲等......）令到讀者簡單易明，所以就淨係揀咗「Hermione」入面嘅「mione」翻譯成「妙mio麗ne」，亦都係因為佢嘅英文發音「my-oh-nee」同「my only」嘅讀音好似，又有浪漫感。

不過呢個名嘅英語發音一直都係讀者最常見嘅問題，羅琳喺《火盃的考驗》嘅小說入面，安排妙麗教佢嘅舞伴維克多·喀浪Viktor Krum點樣讀得啱佢個名嘅發音（但又唔係完全成功），羅琳本人講嘅簡易讀法係「her-my-oh-nee」[17]。有粉絲理論認為羅琳安排妙麗用呢個讀法，係刻意要俾喀浪讀成「Her-My-Own」，意思係「佢係屬於我嘅」，呢個最終都得到羅琳嘅證實[18]。

角色性格同特徵

[編輯]

外觀上

[編輯]

在小說入面，妙麗被形容有一對啡色嘅眼[19]同埋有一頭「濃密蓬鬆嘅啡色頭髮」[20][21][22]。佢前面有一對已經好大隻嘅兔仔大門牙[20][22]，仲有一把盛氣凌人嘅囂張跋扈嘅聲。妙麗喺《哈利波特：火盃的考驗》裡面因為哈利而同跩哥·馬份起衝突，意外俾馬份施展嘅咒語影響下唔受控制咁生長[23]，後來龐芮夫人喺學校裡面嘅醫院側翼嗰度照顧佢，佢仲應妙麗嘅要求將佢啲牙縮細到襯返佢個嘴嘅正常大細[24]。喺電影入面，妙麗嘅頭髮無咁濃密，而且佢啲牙總係好整齊嘅。

關於喺小說入面對妙麗嘅膚色點樣明確確定存在住爭議，有啲人引用《哈利波特：阿茲卡班的逃犯》 入面嘅一句說話嚟作為證據：「妙麗白色嘅面喺樹後面伸出嚟[25]」。佢哋認為嗰樣係對妙麗膚色嘅直接描述。其他人將嗰句解釋做相對於妙麗平時嘅膚色，咁樣係由於妙麗睇住哈利試吓將鷹馬巴嘴喺處決入面拯救出嚟嗰陣因為惶恐同焦慮而嚟嘅蒼白。羅琳本人話妙麗嘅膚色變白咗係因為佢「喺震驚之後令佢花容失色[26]。相反，另一種形容都可以引用早期嘅《阿茲卡班的逃犯》內容：「佢哋倆個都喺嗰度，坐喺伏林‧伏德秋雪糕店出面，榮恩成面雀斑，妙麗成個人都好啡色，兩人都瘋狂咁向住佢揮手[27]。」有啲人聲稱嗰個係對佢膚色嘅直接描述，而另一啲人就話嗰個係對暑假期間曬黑咗結果嘅相對描述。

妙麗啱啱喺小說出場嗰時並唔算特別靚（不過喺第４輯電影度就令眾人為佢嘅美貌而O晒嘴）。

性格上

[編輯]

妙麗最突出嘅特徵包括佢嘅聰明伶俐同埋驚人嘅才智。佢頭腦冷靜、書呆daai1子咁，而且總係好合乎邏輯性。妙麗係一個鍾意鑽研學術同無所不知嘅女仔，認為世上所有野嘅解釋同答案全部都喺書本同埋圖書館裡面搵到，佢喺成個系列裡面用圖書管理員同埋啲教授嘅技能嚟收集打低「黑魔王」—佛地魔嘅必要信息。每當有疑問嗰陣，佢總係轉去學校圖書館求助[28]，羅琳曾經話佢比哈利同榮恩仲有聰明[29]，因為咁佢有時做嘢會顯得獨斷獨行。佢成日專橫但永遠都會盡職盡責，仲會忠於佢嘅朋友—一個永遠值得信賴嘅人。羅琳話妙麗係個「永遠唔會偏離正軌嘅人；佢總係會將注意力集中喺一定要搞掂嘅工作上面」[30]。就算妙麗聰明伶俐而態度專橫都好，羅琳指妙麗喺「性格上有好多脆弱性[31]」，而且有一種「內心嘅不安全感」嘅感覺，「完全唔夠......作為補償，佢努力喺學校嘅每件事上面都做到最好，表現出一種會激嬲人嘅自信[32]」。佢喺課堂上面勇於表現自己，有時因為咁喺某啲特定時期俾其他人孤立。喺《阿茲卡班的逃犯》尾聲嘅黑魔法防禦術考試入面，妙麗透露佢最大嘅恐懼係將幻形怪變做麥教授之後嘅失敗，嗰個麥教授仲話佢知佢全部嘅考試都唔合格。

妙麗係一個極富有同情心同樂於助人嘅女仔，佢好快咁幫人，尤其係自衛唔到嗰啲，例如係奈威·隆巴頓、年紀最細嘅一年級學生、家庭小精靈、麻瓜出身（中文：哈利波特世界觀與設定#麻瓜出身）嘅朋友、好似魯霸·海格咁嘅混血巨人，同埋好似雷木思·路平教授咁嘅狼人（中文：狼人 (哈利波特)）。羅琳透露喺最後一輯小說出版咗之後，妙麗喺魔法部嘅職位係幫受到壓迫同被剝奪權利嘅人（例如麻瓜出身者同埋家庭小精靈）爭取權利。妙麗對佢嘅朋友好重視，亦都非常保護佢哋，以至於羅琳提出，如果妙麗喺意若思鏡前面，佢會睇見佛地魔被打敗咗，而佢自己同哈利仲有榮恩都生存緊[33]。妙麗大個之後學識咗忽略好似跩哥·馬份咁嘅欺凌者對佢所講嘅嘢，又成日阻止哈利同榮恩去報復，仲諗方法去鬥贏佢。妙麗接受咗自己作為麻瓜出身女巫嘅呢個身份，仲喺《死神的聖物》入面指佢係「麻種仲引以為榮」[34]。

魔法天賦

[編輯]

喺成個故事系列入面，妙麗喺霍格華茲讀書嗰陣係屬於葛萊分多學院，雖然係麻瓜出身（中文：哈利波特世界觀與設定#麻瓜出身）但天賦異稟又勤奮好學，甚至喺佢入讀霍格華茲接受魔法教育之前，她就已經試過幾個簡單嘅咒語，而且都起到作用；佢係霍格華茲嘅一眾教授眼中同其他同齡學生入面係好有才能而且係最出色嘅女巫，係「魔法學校嘅高材生」，曾經喺三年級教過妙麗黑魔法防禦術嘅教授雷木思·路平曾經講過妙麗係佢見過最聰明嘅小女巫（而事實上，路平曾經喺霍格華茲嘅學生時代有過同妙麗一樣咁出色嘅同學—莉莉·伊凡）；奇獸飼育學嘅教授魯霸·海格亦曾經講過：「...而且佢哋都仲未發明到一個我哋妙麗學唔識嘅咒語」。妙麗被形容為一個才華橫溢嘅年輕女巫，羅琳評價還妙麗係「天才分界線[35]」上面嘅人，佢亦係霍格華茲同年級嘅人之中最有才華嘅女巫。

「
你係我見過最聰明嘅女巫，妙麗。——雷木思·路平喺妙麗揭露佢係個狼人（中文：狼人 (哈利波特)）之後講嘅。
 」
「
妙麗，你係我見過最聰明嘅女巫。——天狼星·布萊克喺離開霍格華茲嗰陣講嘅。
 」
「
...而且佢哋都仲未發明到一個我哋妙麗學唔識嘅咒語。——魯霸·海格喺《阿兹卡班的逃犯》曾經講過。
 」

妙麗嘅魔法能力可以輕而易舉咁超過晒同級嘅絕大部分學生，只有少數能夠對佢形成挑戰。妙麗喺普等巫測O.W.Ls嘅１０科裡面有９科攞到傑出成績，有１科更加係「超出預期」。妙麗係哈利同屆入面最優秀嘅學生，仲係喺課堂上好多次係第一個掌握知識嘅學生，甚至係更高年級所引入嘅任何咒語同魔咒；當佢可以喺鄧不利多的軍隊嘅假加隆硬幣上面變出一個多身咒Protean Charm嗰陣—嗰個係一個超勞巫測N.E.W.Ts嘅技巧，咁就證明咗呢一點[36]。妙麗亦都係同齡嘅學生入面第一個可以施展到非語言咒語嘅人[37]。除此之外，妙麗亦都係個有能力嘅決鬥者—羅琳曾經講過，雖然喺頭３輯小說入面，妙麗本嚟就可以喺任何魔法決鬥入面打敗哈利，但去到第４輯小說嗰陣，哈利喺黑魔法防禦術方面變得相當咁出色，令到佢能夠贏到妙麗[38]。

妙麗對於嗰啲唔係透過書本或者正規培訓學習嘅科目上面往往都表現唔好，就好似一年級嗰陣咁，掃把飛行對佢嚟講並唔係好似哈利咁自然[39]，而且佢對於占卜學無表現出任何嘅興趣，佢喺３年級嗰時就退修咗呢科[40]。妙麗喺玩巫師棋亦都唔叻，呢樣係佢唯一輸俾榮恩嘅嘢[41]。

妙麗嘅護法係水獺，呢樣係作者羅琳最鍾意嘅動物。喺《哈利波特：死神的聖物》小說入面中，當哈利佢哋３個喬裝入到去魔法部嗰陣，妙麗冒充嘅人係瑪法達·霍普克。佢支魔杖嘅杖芯係由藤木同龍嘅心弦製成；藤木喺凱爾特日曆（英文：Celtic calendar）上面代表住妙麗嘅出生月份（九月）所屬嘅木材[42]。

寫照

[編輯]

電影系列

[編輯]

愛瑪·屈臣喺成個系列嘅八套哈利波特系列電影入面都飾演做妙麗[43][44]。屈臣嘅牛津戲劇導師對佢喺學校嘅戲劇表演留低咗深刻嘅印象，於是將佢個名俾咗《神秘的魔法石》嘅選角經理人[45]。雖然屈臣認真咁對待佢嘅試鏡，但係佢對得到呢個角色「從來未真正覺得自己有任何機會」[46]。製片人對屈臣嘅自信印象深刻，佢嘅表現超越咗其他幾千個申請呢個角色嘅女仔[47]。

羅琳本人喺第一次屏幕測試之後就幫助吓屈臣[45]。當羅琳被問到佢認為演員係咪啱嗰個角色嗰陣，佢話：「係嘅，我做到喇。尤其係愛瑪·屈臣，當我第一次同佢傾計嗰時，佢同妙麗非常非常咁相似，我由喺打第一個電話開始就知道佢係完美嘅[7]。」

屈臣喺第一套電影入面就得到好評；《IGN（中文：IGN）》甚至評論話：「從妙麗·格蘭傑對佢最後一幕嘅完美介紹，屈臣比我想像嘅仲要好。她搶盡晒風頭[48]。」《IGN》還寫話，佢「對妙麗來講嘅描繪就經已成為咗粉絲嘅最愛[49]。」

哈利波特系列電影嘅編劇史提夫·克羅夫斯（中文：史提夫·克羅夫斯）喺2003年嘅一次採訪入面透露，妙麗係佢最鍾意嘅角色[50]，「佢敏銳嘅才智加上完全唔了解佢有時會點樣影響人哋，我只係覺得寫作好有魅力，令人無辦法抗拒[12]。」

喺《哈利波特：混血王子的背叛》嘅製作之前，屈臣曾經考慮唔返去劇組[51]，但佢最終決定「利大過弊」，因為佢唔忍心見到其他人扮妙麗[52]。

屈臣曾經指妙麗係個俾「大腦唔係美貌酷」嘅角色，儘管她「喺社交方面有啲笨拙」，但佢「並唔為自己而覺得羞恥[53]」。在拍攝《消失的密室》嗰時，屈臣「堅持」指佢自己唔似妙麗，但她反映「隨住自己年齡嘅增長，我意識到佢係一個女仔所能夠擁有最偉大嘅榜樣[54]」。

2007年，在《哈利波特：鳳凰會的密令》上映之前，屈臣話：「媒體上面蠢女仔實在太多喇。妙麗並唔驚變得叻。我認為有陣時真正叻嘅女孩會搞到自己糊塗啲，呢樣係一件好差嘅事。當我9歲定10歲嗰陣，啲人試過令我睇起上嚟薯頭薯腦嗰陣令我好沮喪，但係我而家就非常鍾意。我覺得變靚嘅壓力太大喇，妙麗唔會在乎佢生得點樣。佢係個十足似男孩咁樣嘅頑皮女仔[52]。」

舞台系列

[編輯]

喺舞台劇《哈利波特：被詛咒的孩子》入面，妙麗呢個角色由生於斯威士蘭嘅女演員諾瑪·杜梅茲韋尼（英文：Noma Dumezweni）去做，佢喺《日光下的葡萄乾（中文：日光下的葡萄乾）》裡面做蓮達Linda呢個角色，同埋曾經演出《那天晚上有個人類死了（英文：A Human Being Died That Night）》[55]。杜梅茲韋尼將呢個角色形容係一種「特權同責任」，仲話「我哋都好恨做妙麗[56]」。對於揀一個黑人女演員嚟飾演呢個部分引發咗社交媒體嘅批評，羅琳形容係「一群種族主義者」，仲補充指呢啲小說從來未明確提及過妙麗嘅種族或者膚色（雖然佢確實曾經喺《阿茲卡班的逃犯》裡面寫，「妙麗嗰塊白色嘅面喺樹後面伸出嚟[57]。」），而且佢喺粉絲創作入面被形容做黑人[26]。杜梅茲維尼本人話呢種強烈反對「咁無想像力」，仲話「好多年輕嘅演員話我知，佢哋好高興我做妙麗，因為佢哋可以喺舞台上睇到自己嘅一個版本[58]。」

杜梅茲韋尼嘅演出得到咗讚賞，《英國獨立報（中文：獨立報 (英國)）》評論指佢「作為一個嚴格嘅女巫，佢表現得極好[59]。」杜梅茲韋尼喺《勞倫斯·奧利弗頒獎禮2017（英文：2017 Laurence Olivier Awards）》上面，佢憑住飾演妙麗呢個角色而得到最佳女配角（英文：Laurence Olivier Award for Best Actress in a Supporting Role）[58]。

相關情節

[編輯]

神秘的魔法石

[編輯]
内文：哈利波特：神秘的魔法石同哈利波特：神秘的魔法石 (電影)

妙麗同哈利·波特仲有榮恩·衛斯理以霍格華茲魔法學校新生嘅身份第一次喺霍格華茲特快列車上面相遇，當時妙麗用高傲同無所不知嘅姿態出現，仲取笑榮恩施展唔到令佢隻老鼠變成黃色嘅咒語，搞到榮恩同哈利對佢嘅第一印象都唔多好，榮恩仲話唔想同妙麗派去同一個學院，但結果妙麗同佢哋兩個一齊被派咗去葛萊分多學院。開學之後，妙麗成日同周圍啲人講自己背晒所有教科書嘅內容嚟證明自己識幾多嘢，佢仲成日用佢嘅知識激嬲佢啲同學，所以搞到大部分同學都唔鍾意佢。哈利同榮恩初頭覺得妙麗份人好傲慢，尤其係佢批評榮恩施展嘅懸浮咒之後[60]。榮恩同哈利佢哋兩個喺心裡面都唔鍾意佢，直到佢哋兩個知道妙麗喺學校２樓女洗手間有俾山怪襲擊嘅風險，佢哋盡晒力咁將妙麗喺山怪手上救返出嚟，妙麗好感激佢哋咁做，以至於喺麥教授面前講大話嚟幫佢哋兩個辯護，保護佢哋唔洗受罰，佢哋三個因為咁而做咗朋友[61]，不過妙麗同榮恩嘅性格搞到佢哋成日鬧交。

哈利同榮恩後嚟慢慢意識到妙麗嘅感受，了解到妙麗作為嚟自麻瓜家庭嘅學生所承受嘅壓力，漸漸就對妙麗改觀。妙麗後嚟用咒語打走緊縮嘅植物—魔鬼網Devil's Snare，仲運用佢嘅邏輯能力幫三人組解決到一個對於攞到魔法石最重要嘅難題[62][註 2]。喺學期尾嘅搵魔法石行動入面，妙麗成為咗入去隱藏魔法石地點嘅主腦，佢回應咗哈利對賽佛勒斯·石內卜嘅警惕，仲對佢抱住懷疑嘅態度。佢同哈利仲有榮恩透露，佢自己喺圖書館做咗好多研究，呢樣幫到佢打低魔鬼網同埋搞清楚魔藥嘅邏輯，佢又利用自己嘅智慧去幫哈利通過所有嘅謎題。最後佢哋仲阻止到佛地魔想攞到魔法石嘅陰謀。

作者羅琳喺佢自己嘅網站上面講，佢推咗編輯要求刪除山怪場景嘅要求，指出「妙麗喺《神秘的魔法石》嘅早期非常之傲慢同乞人憎，以至於我真係覺得需要一啲（字面上）大事件先至能夠俾佢同哈利仲有榮恩走埋一齊[1]。」

消失的密室

[編輯]
内文：哈利波特：消失的密室同哈利波特：消失的密室 (電影)

妙麗同佢嘅一班同學都已經升到二年級，因為吉德羅·洛哈所寫嘅小說仲有電影入面所有黑魔法防禦術所需要嘅書，搞到妙麗同榮恩阿媽茉莉·衛斯理仲有霍格華茲嘅一啲女學生都對呢位新任嘅黑魔法防禦術教授產生咗好感[63]。喺葛萊分多同史萊哲林之間嘅魁地奇晨早對戰入面，當妙麗幫葛萊分多隊辯護嗰陣，跩哥·馬份叫妙麗做「麻種Mudblood」[註 3]—呢個係對麻瓜出身巫師同女巫嘅侮辱性花名。，一場嘈交後尾幾乎跟住而嚟。妙麗喺知道呢個侮辱性花名嘅意思之後，佢覺得魔法世界裡面嘅歧視真係好嚴重，呢個時候又流傳咗密室又再被打開嘅事件，令到麻瓜學生同教職員被石化，輾轉之下令到妙麗決心全力去搵出打開密室嘅人，用嚟制止針對麻瓜嘅攻擊行為。妙麗起初懷疑馬份就係打開呢個消失的密室嘅嗰個人，於是佢就全副心機幫三人組調製佢哋需要用嘅「變身水」嚟扮成馬份嘅室友，仲諗住混入去史萊哲林交誼聽嚟打探有關重新打開消失的密室嘅史萊哲林傳人嘅真相。不過，因為妙麗喺史萊哲林嘅女同學米莉森·伯斯德Millicent Bulstrode嘅校服長袍上面攞走佢啲頭髮之後，佢唔小心撈咗啲長袍上貓毛入去而搞到自己變身做咗貓，令佢參與唔到哈利同榮恩嘅調查行動，而佢仲要被送去學校嘅醫院側翼嚟做治療（變身水嘅效果需要幾個禮拜先至可以完全消失）。霍格華茲師生被石化嘅事件，妙麗喺圖書館裡面成功研究而發現同識別到攻擊者嘅真面目—蛇妖嘅方法之後就被石化咗。雖然被石化咗嘅妙麗喺學校醫院側翼嘅病房裡面無能為力，但係哈利同榮恩憑住佢手上揸住嘅資料，有份幫哈利同榮恩搵到消失的密室，仲有湯姆·瑞斗嘅日記，佢哋三個都成功咁解開咗消失的密室之謎。

妙麗喺哈利成功消滅咗蛇妖之後好返晒，不過當佢知道學年尾嘅所有考試都取消晒嚟作為學校嘅補償嗰陣就搞到佢覺得極度失望[64]。

阿茲卡班的逃犯

[編輯]
内文：哈利波特：阿茲卡班的逃犯同哈利波特：阿茲卡班的逃犯 (電影)

三年級係妙麗最受嚴重考驗嘅一年，由於佢選修科太多，佢對崔老妮教授嘅占卜學科覺得非常之反感，所以佢最後放棄咗去讀呢科；麥教授偷偷哋將一個時光器借俾妙麗去用，等佢可以趕得切返番去以前同埋趕得上去處理佢各個學科繁重嘅功課（呢個都係直到最後兩個章節先至透露）。妙麗同佢兩個最好嘅朋友之間嘅關係變得好緊張：佢懷疑哈利喺聖誕節收到嘅禮物—飛天掃把「火閃電」係天狼星·布萊克嘅陰謀，仲將呢樣嘢話俾麥教授知，結果搞到哈利嗰支掃把被沒收嚟檢查係咪有黑魔法嘅痕跡；妙麗用嚟做佢自己生日禮物而買嘅貓—歪腿成日企圖去攻擊榮恩嘅隻寵物老鼠斑斑，搞到榮恩覺得歪腿應該要為斑斑嘅失蹤而負上責任，而妙麗就堅決認為歪腿係無辜嘅，亦都因為證據唔夠而據理力爭，搞到佢哋兩個嘅關係陷入咗冷戰。

喺賽佛勒斯·石內卜幫雷木思·路平代課嗰陣，妙麗試吓喺無其他學生答到老師提問嘅情況下積極咁答問題，結果搞到石內卜話妙麗係「令人難頂嘅萬事通」，仲用妙麗講嘢唔順眼嘅理由嚟懲罰葛萊分多學院。喺做完石內卜嘅課堂作業之後，妙麗正確咁推斷得出路平係狼人（中文：狼人 (哈利波特)）嘅真相，仲決心幫佢保守秘密。

歪腿喺揭露斑斑嘅真正身份就係彼得·佩迪魯嘅過程入面發揮咗好重要嘅作用——佢揭露咗路平同佩迪魯係哈利嘅父母詹姆·波特同莉莉·波特舊時嘅老友，佩迪魯喺波特兩公婆被謀殺嘅當晚向佛地魔透露咗佢哋嘅下落，仲將罪名嫁禍俾天狼星·布萊克（哈利嘅契爺）身上，搞到佢變成阿茲卡班監獄嘅囚犯[65][66]。妙麗同哈利佢哋３個最後先至知道咗布萊克並唔係壞人，佢哋喺鄧不利多校長嘅建議下，妙麗同哈利用咗麥教授借出嚟嘅嗰個時光器返番去早啲嗰陣，佢哋兩個救走咗魯霸·海格被判死刑嘅寵物—鷹馬巴嘴，仲騎住巴嘴成功喺催狂魔搵到天狼星行刑之前就將佢帶走，令到一人一動物成功喺霍格華茲走甩[65][66]，完成咗鄧不利多校長交託嘅俾佢哋嘅事。

火盃的考驗

[編輯]
内文：哈利波特：火盃的考驗同哈利波特：火盃的考驗 (電影)

嗰年係英國第一次主辦魁地奇世界盃。魁地奇世界盃開鑼，妙麗同哈利受到榮恩一家人嘅邀請去睇比賽，而佢同榮恩都係保加利亞魁地奇天才球員維克多·喀浪Viktor Krum嘅粉絲。期間營地喺傍晚發生混亂，佛地魔嘅食死人將黑魔標記喺混亂期間出現喺半空，哈利俾人誤會係佛地魔嘅同黨，後來先至得到澄清。

霍格華茲喺嗰年被揀咗做「三巫鬥法大賽Triwizard Tournament」嘅主辦學校，全校嘅學生都覺得好興奮。聯校喺聖誕前夕舉辦咗一個聖誕舞會，榮恩喺揀聖誕舞會嘅舞伴嗰陣取笑妙麗唔會有人揀而喺最後關頭先至約佢，搞到佢大受傷害，不過當嚟自另一間魔法學校嘅喀浪邀請妙麗做舞伴嗰陣，佢好高興咁應承咗[67]。當妙麗教喀浪讀自己個名嗰陣，佢個名嘅正確發音係：「Her-my-oh-nee」嘅情景加插去到情節裡面；不過喀浪能夠做到最好嘅嘢就只係將佢讀成「Herm-own-ninny」，但妙麗對呢個認為無任何問題[1]。

喺三巫鬥法大賽裡面，由於四年級嘅哈利以最年輕嘅資格嚟參賽，記者麗塔·史譏不斷咁生安白造一啲關於哈利同妙麗嘅不實謠言，搞到妙麗不勝其煩。妙麗喺聖誕舞會上面一改佢平日嘅形象仲盛裝出席，令到人人都眼前一亮，榮恩更係呷醋。後來喺榮恩話佢「私通外敵」之後，佢哋兩個嘈得仲勁，當晚佢哋兩個不歡而散。喺小說入面，當佢話榮恩唔可以「對佢就好似女仔咁」但喀浪就得嗰陣，呢個暗示住妙麗對榮恩嘅感情。

妙麗喺三巫鬥法大賽入面支持住哈利，仲幫佢為每項任務去做準備。喺三巫鬥法大賽嘅第二項任務入面，妙麗同榮恩被揀出嚟安排被困喺湖底嚟做對參賽者嘅考驗。喺第二個任務完咗之後，喀浪問到妙麗喺暑假嗰陣係咪可以去保加利亞同佢見面，但妙麗好婉轉咁拒絕咗佢。喺學期就嚟完嗰時，佢阻止咗欺詐性小報記者兼未經註冊嘅化獸師麗塔·史譏喺三巫鬥法大賽期間，透過佢作為喺罐入面甲蟲嘅化獸師形態，嚟發表關於妙麗同哈利仲有海格嘅誹謗性材料[68]。

四年級嘅妙麗注意到家庭小精靈所遭受到嘅唔公平對待，於是佢決定成立組織「家庭小精靈福利促進協會Society for the Promotion of Elfish Welfare」，嗰個協會嘅目的係希望俾家庭小精靈有自由，不過嗰個協會嘅簡稱「S.P.E.W.」唔好彩咁同英語嘅「吐」字有相同嘅意思，呢一點偶爾會俾榮恩拎嚟取笑。

鳳凰會的密令

[編輯]
内文：哈利波特：鳳凰會的密令同哈利波特：鳳凰會的密令 (電影)

五年級嘅妙麗同榮恩分別做咗葛萊分多學院嘅男女級長，佢哋兩個同露娜·羅古德做咗朋友，但喺妙麗鬧露娜老竇本雜誌《謬論家》係「個個都知《謬論家》嘅垃圾之後」之後，佢哋之間嘅友誼開始得並唔係咁順利。妙麗成立嘅「家庭小精靈福利促進協會」無乜成效，由於佢猛咁整啲衣物想俾一班家庭小精靈得到自由，不過最後搞到一班家庭小精靈唔肯幫葛萊分多塔打掃，結果淨係得家庭小精靈多比繼續服務葛萊分多塔。呢個時候巫師社會傳嚟對鄧不利多校長同哈利對佛地魔經已重生仲回歸咗嘅聲明表示唔信任，一直支持住哈利嘅妙麗仲鬧爆佢嘅室友文妲·布朗相信《預言家日報》關於哈利捏造佛地魔捲土重來嘅指控。魔法部同時阻止任何巫師散播有關佛地魔返生嘅消息，仲安排咗魔法部官員桃樂絲·恩不里居做駐校教授，去教黑魔法防禦術。

妙麗同榮恩大部分時間都喺度鬧交，呢個可能係因為佢哋對彼此越來越浪漫嘅情感，不過佢哋兩個持續不斷咁對哈利表現出忠誠。嗰個系列嘅一個轉折點就係，妙麗構思住無視魔法部淨係教學生黑魔法防禦術嘅基本理論但又唔俾學生實踐嘅格言，佢根本唔會教點樣用魔法嚟戰鬥。喺妙麗嘅提議下，哈利喺課餘時間秘密向一細班同學去教防禦術魔法，妙麗仲提議成立黑魔法嘅防禦術聯盟，結果得到連佢自己都諗唔到嘅好大迴響，呢班學生組成咗一個叫做鄧不利多的軍隊嘅秘密地下組織。面對住恩不里居嘅倒行逆施，同埋唔合理咁訂立規則之後，佢仲隨意將啲教授炒魷，仲隨意喺學生身上去用暴力，佢嘅權力凌駕喺鄧不利多校長之上...等等嘅問題，作為女級長嘅妙麗處事盡忠職守，繼續一貫嘅好學生作風，不過佢都承認需要一啲「叛逆嘅感覺」。

面對住「鄧不利多的軍隊」，恩不里居喺知道咗呢件事就即刻下令嚴禁學生自己組織社團，佢仲利用一啲手段嚟對抗，包括招募咗一班學生嚟做檢察隊。鄧不利多的軍隊佢哋一班人面對住以寡敵眾嘅境況唯有係沉著嚟應對。妙麗後嚟同鄧不利多的軍隊嘅成員包括咗金妮·衛斯理、奈威·隆巴頓同露娜·羅古德都參與咗魔法部嘅神秘部門戰鬥，妙麗仲俾食死人安東寧·杜魯哈嘅咒語搞到重傷，但後來完全好返晒[69][70]。事件結果有唔少死傷，當中包括咗天狼星·布萊克。魔法部部長康尼留斯·夫子喺事後先至趕到，面對住佛地魔出現喺眼前嘅景況，佢都無得唔承認佛地魔已經返咗嚟嘅事實。

恩不里居喺５年級嘅學期尾被徹職查辦，鄧不利多亦都恢復返佢校長嘅權力，佢將校內所有嘅考試取消，霍格華茲亦都回復返原來咁樣[71]。

混血王子的背叛

[編輯]
内文：哈利波特：混血王子的背叛同哈利波特：混血王子的背叛 (電影)

六年級嘅妙麗因為成績好而得到新任魔藥學教授赫瑞司·史拉轟嘅賞識，仲得到佢嘅邀請加入佢嘅「史拉轟俱樂部Slug Club」[72]。妙麗對榮恩嘅感情不斷咁加深，佢內心其實係鍾意榮恩但奈何又唔敢表白，不過佢喺好多行為上又好幫榮恩，例如係佢對寇馬·奧布萊恩Cormac McLaggen施展迷糊咒嚟幫榮恩保住佢喺魁地奇球隊入面嘅位置，搞到奧布萊恩喺看守手嘅選拔賽裡面錯過咗最後一次撲救嘅機會而落選；佢又決定喺史拉轟嘅聖誕派對嗰陣邀請榮恩孖住一齊去，但榮恩又因為報復妙麗喺幾年前錫咗維克多·喀浪Viktor Krum而同文妲·布朗拍拖。呷醋嘅妙麗因為咁而成日串榮恩嘅魔法技巧好渣，仲試吓透過喺聖誕派對上面同奧布萊恩約會嚟報復，不過佢嘅計劃出現咗差池，搞到佢自己喺派對中途掉deu6低咗奧布萊恩[73]。妙麗同榮恩係咁唔停咁嘈交（尤其係佢見到榮恩同文妲錫錫，因為嫉妒而發癲咁施展飛鳥咒嚟攻擊榮恩），直到榮恩因為飲咗有毒嘅蜂蜜酒而差啲死咗，搞到佢驚到即刻同榮恩好返。榮恩喺學校裡面嘅醫院側翼留醫嗰陣時，當佢聽到榮恩發開口夢係咁叫住自己個名，令佢又怕醜又喺度偷笑。

小說入面有一個支節講到妙麗同哈利喺魔藥學課堂入面形成咗競爭，因為妙麗慣咗喺佢自己讀嘅科目入面攞第一名，而哈利憑跟住魔藥學教科書書頁上面嘅空白位由上一手嘅擁有者（混血王子即係石內卜）所寫嘅提示同埋說明而超越咗妙麗嘅表現，妙麗因為覺得哈利勝之不武而覺得嬲。妙麗對於「混血王子」所發明嘅咒語覺得好不安，於是佢同哈利落手調查混血王子嘅真正身份。妙麗後嚟喺哈利三人組入面成為唯一成功通過現形術測試嗰個（榮恩衰咗，而哈利因為年紀太細而通過唔到）。鄧不利多過身之後，榮恩同妙麗發誓唔理發生咩事都會留喺哈利身邊[74]。

死神的聖物

[編輯]
内文：哈利波特：死神的聖物、哈利波特：死神的聖物1同哈利波特：死神的聖物2
妙麗抬住多比嘅遺體。

喺最後一輯小說同第七集電影《死神的聖物》入面，妙麗同榮恩陪住哈利去搵仲摧毀佛地魔剩低嘅分靈體。喺出發前，妙麗喺佢父母身上施展咗記憶咒，修改咗佢父母嘅記憶，等佢哋倆個都唔記得咗自己有佢呢個女仲幫佢哋改名換姓，令佢哋相信自己就係溫德爾同莫妮卡·威爾金斯Wendell and Monica Wilkins，佢哋一生嘅志向就係移民去澳洲，希望咁樣可以保佑雙親平安。

妙麗喺鄧不利多嘅遺物度得到佢用古代原始文字版本編寫嘅《吟遊詩人皮陀故事集》，希望呢樣嘢令妙麗可以破解到死神聖物裡面嘅秘密。因為鄧不利多認為根據妙麗嘅性格，佢唔會相信呢啲神話咁樣嘅故仔，所以就借呢樣嘢嚟阻止（牽制）哈利，等哈利唔好因為埋頭埋腦喺死神聖物嗰度而令佢迷失。喺洞穴屋嗰陣，妙麗為三人嘅出發同埋佢哋嘅旅程做好準備，喺透過一個有珍珠嘅銀包仔上面施展一個檢測唔到嘅無限伸展咒，咁樣妙麗就可以將佢哋所有必須嘅嘢填滿呢個無限深嘅銀包仔。妙麗喺旅程期間好多次用佢嘅智慧同驚人嘅魔法技巧嚟解救咗佢自己、哈利同榮恩嘅需要，亦都解決佢哋嘅難題；妙麗亦成日提醒哈利唔好陷入得到死神聖物嘅迷思，一切以去搵分靈體嘅大局為重。妙麗喺高錐客洞利用咒語喺佛地魔同佢條蛇妖娜吉妮手上救返哈利同自己條命，不過過程中就累到哈利支魔杖整斷咗。

當妙麗、榮恩同哈利３個俾一班根據魔法部命令去捉麻瓜出身者嘅死拿錢Snatchers捉到嗰陣，妙麗用蜇人咒Stinging Jinx搞到哈利塊面暫時毀容，令佢可以扮成其他人。妙麗仲試吓冒充佢哋嘅混血女同學潘妮·清水Penelope Clearwater嚟避過迫害，不過佢哋俾人認出嚟之後就被帶咗去馬份莊園。

妙麗俾食死人貝拉·雷斯壯用酷刑咒嚟不斷咁折磨嚟知道哈利三人組係點樣攞到葛萊分多寶劍嘅信息（嗰把劍理應好安全咁存放喺雷斯壯嘅古靈閣保險庫入面）。雷斯壯即刻命令妖精拉環去檢查嗰把劍同埋判斷佢係真定假。哈利為咗去救妙麗，佢說服拉環同貝拉·雷斯壯講嗰把劍係假嘅。當被捉嘅其他人喺牢房走甩嗰陣，貝拉·雷斯壯威脅話要割斷妙麗嘅喉嚨。哈利三人組仲有其他被韞wan3住喺馬份莊園嘅其他人最終俾多比救咗出嚟，不過多比喺走甩嗰陣時就唔好彩俾貝拉·雷斯壯飛出嚟嘅刀飛拮中死咗。

後來當哈利三人組試吓喺古靈閣偷走赫夫帕夫金盃嗰陣，妙麗用變身水嚟冒充貝拉·雷斯壯去進行佢哋嘅計劃。哈利三人組藉住鄧不利多的軍隊嘅關係喺霍格華茲大戰嗰段時間返番去霍格華茲，妙麗喺消失的密室裡面用返幾年前蛇妖嘅毒牙嚟摧毀用嚟做分靈體嘅赫夫帕夫金盃，仲消滅埋另外一個分靈體。妙麗同榮恩喺呢場戰鬥之後仲分享咗佢哋嘅初吻[75]。霍格華茲大戰喺交誼廳嘅最後一戰入面，妙麗喺金妮同露娜嘅幫手之下一齊同貝拉·雷斯壯展開決鬥，不過佢哋三個都打低唔到貝拉·雷斯壯，最後當茉莉·衛斯理嗌佢哋脫離接觸嗰時，佢哋三個就停低咗同貝拉·雷斯壯嘅戰鬥[76]。

後記

[編輯]

故事嘅尾聲，雖然小說結尾並無明確咁講到明妙麗跟榮恩結咗婚[77]，但係現實嘅新聞文章同其他傳媒都當咗呢個就係事實[78]。羅琳喺訪問入面提到妙麗喺霍格華茲大戰之後返到去霍格華茲讀７年級（不過哈利同榮恩就無），畢業之後佢喺魔法部嘅魔法法律執法司嗰度做副主管。

喺佛地魔俾哈利打敗同死咗19年之後，妙麗同榮恩生咗一女一仔，佢哋分別係露絲·格蘭傑─衛斯理（中文：哈利波特角色列表#十九年後的孩子）Rose Granger-Weasley同埋曉高·格蘭傑─衛斯理（中文：哈利波特角色列表#十九年後的孩子）Hugo Granger-Weasley[77][79][80][81]，妙麗同榮恩仲帶住佢哋去到9¾月台搭霍格華茲特快列車，嗰陣仲見到哈利、金妮同埋佢哋嗰３個仔女[82][83][84]。

妙麗喺舞台劇《哈利波特：被詛咒的孩子》入面接替金利·俠鉤帽升職做咗魔法部部長，成為咗第一位麻瓜出身嘅魔法部部長。

2014年2月，愛瑪·屈臣幫英國雜誌《Wonderland》同羅琳做咗個專訪，羅琳喺嗰個訪問入面承認，妙麗比較啱同哈利結婚，基於榮恩同妙麗結婚係一個錯誤嘅設定，佢哋兩個嘅婚姻恐怕最後都係會行到去「婚姻諮詢」呢條路，佢話：「妙麗同榮恩結為夫妻背後嘅理由，同文學創作嘅關係唔大，而係同我堅持忠於最初構想有好大嘅關係」，而設定榮恩同妙麗結婚係「出於非常私人嘅理由，而唔係可信嘅理由」；愛瑪·屈臣就同意羅琳嘅講法，佢話：「我覺得好多擁躉都有同感，亦都懷疑榮恩係咪真係俾到妙麗幸福[85]。」

迴響及評價

[編輯]

好多人都視妙麗·格蘭傑做女權主義嘅偶像[86]。喺《象牙塔與哈利波特The Ivory Tower and Harry Potter》—《哈利波特》系列由Lana A. Whited編輯同編譯嘅第一本書籍長度分析入面，其中一章由伊麗莎·T·德雷桑（英文：Eliza T. Dresang）題為《妙麗·格蘭傑與性別遺產Hermione Granger and the Heritage of Gender》入面，討論咗妙麗喺該系列入面嘅角色，仲有佢同與女權主義辯論嘅關係[87]。嗰個章節首先分析咗妙麗嘅名，同埋歷代嘅同名人物喺神話同小說入面嘅作用，仲有妙麗因為佢個名而呢啲人物身上繼承落嚟嘅遺產。德雷桑仲強調咗妙麗同羅琳本人嘅相似性，同埋由於妙麗係有羅琳本人嘅一啲屬性，佢必須係個堅強嘅角色。呢個章節仲指出嘅事實係，就算係生於麻瓜父母，妙麗嘅魔法能力係與生俱來嘅。佢嘅「強制學習」對角色嘅發展有幫助，呢個令佢成為「信息帶嚟力量嘅典型例子」同埋嗰個系列嘅情節，因為佢對魔法世界嘅了解成日被用嚟「拯救呢一日」。德雷桑話「哈利同榮恩對妙麗嘅依賴多過佢對佢哋兩個嘅依賴。」不過，佢都評論話妙麗嘅「歇斯底里同喊發生得太頻密喇，以至於唔能夠被認為係妙麗性格發展嘅可信部分，並且完全唔符合佢喺小說入面嘅核心角色[87]。」

《UGO網絡（英文：UGO Networks）》將妙麗列做佢哋嘅「有史以來最好嘅英雄」之一，仲話：「我哋大多數人可能都記得我哋喺文法學校嗰陣有一個好似妙麗咁嘅同學」—嗰個「起初可能令人有啲反感，但係當你了解佢之後，佢就唔會係你身邊嘅壞𡃁妹[88]」。《IGN（中文：IGN）》將妙麗列為佢哋嘅「哈利波特人物頭25名」入面嘅第二位[89]，仲讚佢嘅個性發展[90]。2016年，《荷里活報道（中文：荷里活報道）》對包括演員、作家同導演在內嘅荷李活專業人士進行咗一項民意調查，調查佢哋一直以來最鍾意嘅女性角色，妙麗喺嗰個民意調查入面名列前茅[2]。在《帝國雜誌（中文：帝國雜誌）》揀咗出嚟嘅「最偉大嘅25個《哈利波特》人物」入面，妙麗·格蘭傑名列第４位，只係低過石內卜教授、榮恩同哈利[91]。

堪薩斯州立大學（中文：堪薩斯州立大學）嘅菲臘·尼爾（英文：Philip Nel）指出，「曾經喺國際特赦組織做嘢嘅羅琳，透過妙麗對受壓迫精靈嘅熱情，同埋佢嘅『家庭小精靈權益促進會』嘅成立，喚起咗佢嘅社會運動主義[92]。」不過，羅蘭·曼夫羅普Rowland Manthrope喺對於《死神的聖物》嘅分析入面話，「喺７輯小說入面，我哋仍然淨係知道妙麗係個聰明伶俐、通情達理嘅女仔—呢個係一個誇張嘅模仿描述，而唔係一個角色[93]。」

流行文化

[編輯]

妙麗在許多草圖和動畫系列中曾經被戲仿。

註

[編輯]
  1. ↑ 根據牛津英文字典，puckle係指妖怪，而granger係指農夫。
  2. ↑ 電影入面無出現妙麗喺魔法石入口嗰度解開謎題嘅場景。
  3. ↑ 呢個詞嘅意思係侮辱非純種嘅魔法家族後代。

參考

[編輯]
  1. ↑ 1.0 1.1 1.2 1.3 1.4 1.5 Rowling, J.K. "Section:Extra Stuff — Hermione Granger". J.K. Rowling Official Site. 原著喺2008-09-16歸檔. 喺2008-09-19搵到.
  2. ↑ 2.0 2.1 {THR Staff (2016-12-09). "Hollywood's 50 Favorite Female Characters". The Hollywood Reporter. 原先內容歸檔喺2017-12-01. 喺2017-11-30搵到.
  3. ↑ World Potterian Association。《《哈利波特．魔法教室》》。台灣東販股份有限公司。頁 28。ISBN 9789574733637。
  4. ↑ "Section: Extra Stuff Hermione Granger". J.K.Rowling Official Site. 2008-09-16. 原著喺2008-09-16歸檔. 喺2018-07-20搵到.
  5. ↑ Rowling, J.K. "F.A.Q.: When Hermione arrived at Hogwarts, was she nearly eleven or nearly twelve?". J. K. Rowling Official Site. 原著喺2012-02-08歸檔. 喺2011-02-09搵到.
  6. ↑ 6.0 6.1 6.2 6.3 "J.K. Rowling at the Edinburgh Book Festival". J. K. Rowling Official Site. 2004-08-15. 原著喺2005-01-07歸檔. 喺2022-05-10搵到.
  7. ↑ 7.0 7.1 "Things you may not have noticed about Hermione". Wizardingworld.com. 2016-09-18. 原先內容歸檔喺2022-05-10. 喺2022-05-10搵到.
  8. ↑ "Things you may not have noticed about Luna Lovegood". Wizardingworld.com. 2018-02-12. 喺2022-05-10搵到.
  9. ↑ 大衛·巴格特、蕭恩·克萊因 (2006年9月)。《哈利波特的哲學世界》。臺北：麥田出版。ISBN 978-986-173-124-7。
  10. ↑ "J K Rowling at the Edinburgh Book Festival, Sunday, August 15, 2004". 原著喺2007-10-25歸檔. 喺2018-06-10搵到.
  11. ↑ "J.K. Rowling interview transcript, The Connection (WBUR Radio), 12 October, 1999". 原著喺2011-09-07歸檔. 喺2018-06-10搵到.
  12. ↑ 12.0 12.1 Chamber of Secrets DVD: Interview with Steve Kloves and J.K. Rowling (DVD). February 2003.
  13. ↑ "J.K. Rowling's Books That Made a Difference". O, The Oprah Magazine. January 2001. My feminist conscience is saved by Hermione, who's the brightest character. I love Hermione as a character.
  14. ↑ "J.K. Rowling's Books That Made a Difference. O, The Oprah Magazine January 2001". 原著喺2018-05-27歸檔. 喺2018-06-10搵到.
  15. ↑ Lord, Emma (2015-12-11). "What Hermione Was Almost Named In 'Harry Potter'". Bustle (英文). 原著喺2018-09-21歸檔. 喺2018-09-21搵到.
  16. ↑ 16.0 16.1 "Hermione Jean Granger's name is more a reflection of her parents than her own personality". Insider. 2018-11-15. 喺2022-05-11搵到.
  17. ↑ "J.K. Rowling tells fan she had Hermione sound out her name on purpose". Daily Mail. 2018-09-20. 原著喺2022-06-01歸檔. 喺2018-09-21搵到.
  18. ↑ 許瑞麟 (2018-09-20)。〈妙麗的「發音祕密」藏18年 J.K.羅琳證實粉絲理論〉。《ETtoday星光雲》 (臺灣中文)。原著喺2018-09-21歸檔。喺2018-09-21搵到。
  19. ↑ 《哈利波特：消失的密室》 第170頁。
  20. ↑ 20.0 20.1 《哈利波特：神秘的魔法石》 第79頁。
  21. ↑ 《哈利波特：消失的密室》 第46頁。
  22. ↑ 22.0 22.1 《哈利波特：阿茲卡班的逃犯》 第51頁。
  23. ↑ 《哈利波特：阿茲卡班的逃犯》 第262頁。
  24. ↑ 《哈利波特：阿茲卡班的逃犯》 第352-353頁。
  25. ↑ 《哈利波特：阿茲卡班的逃犯》 第293頁。
  26. ↑ 26.0 26.1 麗貝卡·拉特克利夫（Rebecca Ratcliffe） (2016-06-05)。"JK Rowling tells of anger at attacks on casting of black Hermione"。The Guardian。喺2016年11月16日搵到。｢作者話喺西區劇院嘅戲劇《哈利波特：被詛咒的孩子》係諾瑪·杜梅茲維尼Noma Dumezweni『最嘅嘅工作』...... J·K·羅琳透露咗佢對『一群種族主義者』喺網上對妙麗喺萬眾期待嘅新劇目《被詛咒的孩子》入面嘅角色將會由一位黑人女演員扮演嘅消息而作出嘅反應覺得挫敗。......羅琳指出，妙麗無理由必定係白人。呢啲小說入面並無明確咁提到佢嘅種族或膚色，而且佢經常喺愛好者藝術（中文：愛好者藝術）入面成日被形容做黑人。｣
  27. ↑ 《哈利波特：阿茲卡班的逃犯》 第46頁。
  28. ↑ Freier, Mary P. (2014-01-01). "The Librarian in Rowling's Harry Potter Series". CLCWeb: Comparative Literature and Culture. 16 (3). doi:10.7771/1481-4374.2197. ISSN 1481-4374. 原先內容歸檔喺2016-11-16. 喺2016-11-16搵到.
  29. ↑ "Treneman, Ann. "J.K. Rowling, the interview," The Times (UK), 30 June 2000". 原著喺2017-01-26歸檔. 喺2018-06-10搵到.
  30. ↑ "New Interview with J.K. Rowling for Release of Dutch Edition of "Deathly Hallows"". The Volkskrant, translated on The Leaky Cauldron. 2007-11-19. 原先內容歸檔喺2007-11-20. 喺2010-12-05搵到.
  31. ↑ "A Good Scare". Time. 2000-10-30. 原著喺2010-02-28歸檔. 喺2010-12-05搵到.
  32. ↑ "Harry Potter and Me". BBC Christmas Specials. 2001-12-28. BBC.
  33. ↑ Tyler, Adrienne (2021-07-07). "Harry Potter: What Each Character Saw In The Mirror Of Erised (& Why)". Screen Rant. 原先內容歸檔喺2022-05-11. 喺2022-05-11搵到.
  34. ↑ 《哈利波特：死神的聖物》。
  35. ↑ "J. K. Rowling Interview". The Connection. 1999-10-12. WBUR Radio.
  36. ↑ 《哈利波特：混血王子的背叛》第353-398頁。
  37. ↑ 《哈利波特：混血王子的背叛》。
  38. ↑ "World Exclusive Interview with J. K. Rowling" (採訪). South West News Service. 2000-07-08.
  39. ↑ 《哈利波特：神秘的魔法石》 第108頁。
  40. ↑ 《哈利波特：阿茲卡班的逃犯》 第298-299頁。
  41. ↑ 《哈利波特：神秘的魔法石》 第159頁。
  42. ↑ "Section: Extra Stuff WANDS". J. K. Rowling Official Site. 原著喺2011-08-06歸檔. 喺2007-07-02搵到.
  43. ↑ "Hermione Granger (Character)". IMDB. 原著喺2017-02-11歸檔. 喺2018-06-10搵到.
  44. ↑ 〈资料：《哈利-波特6》人物介绍--赫敏格兰杰〉。新浪网。2009-07-01。原著喺2018-06-12歸檔。喺2018-06-10搵到。
  45. ↑ 45.0 45.1 Watson, Emma. "Emma". Emma Watson's Official Website. 原著喺2007-08-02歸檔. 喺2007-08-03搵到.
  46. ↑ "When Danny met Harry". The Times. UK. 2001-11-03.
  47. ↑ Kulkani, Dhananjay (2004-06-23). "Emma Watson, New Teenage Sensation!!". Buzzle. 原著喺2012-06-29歸檔. 喺2007-08-03搵到.
  48. ↑ Linder, Brian (2001-11-16). "Brian Linder's Review of Harry Potter and the Sorcerer's Stone". IGN. 原著喺2007-12-29歸檔. 喺2010-10-16搵到.
  49. ↑ Steve Head; Brian Linder (2001-11-16). "Harry Potter and the Sorcerer's Stone Video Interviews". 喺2010-10-16搵到.
  50. ↑ "Mzimba, Lizo, moderator. Chamber of Secrets DVD interview with Steve Kloves and J.K. Rowling, February 2003". 原著喺2011-04-23歸檔. 喺2018-06-10搵到.
  51. ↑ "Hermione Gets Cold Feet". IGN. 2006-09-26. 原著喺2007-12-15歸檔. 喺2007-10-20搵到.
  52. ↑ 52.0 52.1 Listfield, Emily (2007-07-08). "We're all so grown up!". Parade. 原先內容歸檔喺2011-06-13. 喺2007-08-03搵到.
  53. ↑ "Emma Watson's speech at Oxford Union, Oxford University". 2006-11-12. 原先內容歸檔喺2008-05-31. 喺2011-01-01搵到.
  54. ↑ "Chamber of Secrets". Emma Watson Official Site. 原著喺2010-11-05歸檔. 喺2010-10-31搵到.
  55. ↑ Tan, Monica (2015-12-21). "Noma Dumezweni cast as Hermione in new Harry Potter stage play". TheGuardian.Com. 原先內容歸檔喺2015-12-22. 喺2016-12-11搵到.
  56. ↑ Trueman, Matt (2016-02-26). "Noma Dumezweni on playing Hermione in Harry Potter: 'we all aspire to be her'". The Guardian. 原先內容歸檔喺2017-05-06. 喺2017-05-15搵到.
  57. ↑ 《哈利波特：阿茲卡班的逃犯》第293頁
  58. ↑ 58.0 58.1 Furness, Hannah (2017-04-09). "Harry Potter and the Cursed Child casts its spell over the Oliviers with a record-breaking nine awards". The Telegraph. 原先內容歸檔喺2022-01-11. 喺2017-05-15搵到.
  59. ↑ Shepherd, Jack (2016-07-25). "Harry Potter and the Cursed Child, review: A magical experience tailor made for the stage". The Independent. 原先內容歸檔喺2016-07-29. 喺2017-05-15搵到.
  60. ↑ 《哈利波特：神秘的魔法石》 第127-171頁。
  61. ↑ 《哈利波特：神秘的魔法石》 第132-180頁。
  62. ↑ 《哈利波特：神秘的魔法石》 第202-278頁。
  63. ↑ 《哈利波特：消失的密室》 第48-59頁。
  64. ↑ 《哈利波特：消失的密室》 第249-340頁。
  65. ↑ 65.0 65.1 《哈利波特：阿茲卡班的逃犯》 第231-317頁。
  66. ↑ 66.0 66.1 《哈利波特：阿茲卡班的逃犯》 第314-435頁。
  67. ↑ 《哈利波特：火盃的考驗》 第360-414頁。
  68. ↑ 《哈利波特：火盃的考驗》 第631-727頁。
  69. ↑ 《哈利波特：鳳凰會的密令》 第698-792頁。
  70. ↑ 《哈利波特：鳳凰會的密令》 第754-856頁。
  71. ↑ J·K·罗琳 (2003年10月)。《哈利波特——鳳凰會的密令 （下）》。臺北：皇冠文化。ISBN 957-33-1986-1。
  72. ↑ 《哈利波特：混血王子的背叛》 第220-233頁。
  73. ↑ 《哈利波特：混血王子的背叛》 第317-318頁。
  74. ↑ 《哈利波特：混血王子的背叛》 第607-651頁。
  75. ↑ 《哈利波特：死神的聖物》 第502-625頁。
  76. ↑ 《哈利波特：死神的聖物》 第589-736頁。
  77. ↑ 77.0 77.1 《哈利波特：死神的聖物》 第604-755頁。
  78. ↑ 〈哈利波特20週年／妙麗為何嫁榮恩？JK羅琳一句話傻眼了〉。2021-05-23。
  79. ↑ Brown, Jen (2007-07-26). "Finished 'Potter'? Rowling tells what happens next". Today. 原先內容歸檔喺2014-12-31. 喺2015-01-08搵到.
  80. ↑ Toler, Lindsay (2007-08-05). "'Harry Potter' author ties up loose ends". The Arizona Republic. London. Associated Press. 原著喺2015-01-12歸檔. 喺2015-01-08搵到.
  81. ↑ "Hermione Jean Granger". The Harry Potter Lexicon. 原先內容歸檔喺2008-05-31. 喺2015-01-08搵到.
  82. ↑ Brown, Jen (26 July 2007). "Finished 'Potter'? Rowling tells what happens next". Today. 原先內容歸檔喺31 December 2014. 喺8 January 2015搵到.
  83. ↑ Toler, Lindsay (5 August 2007). "'Harry Potter' author ties up loose ends". The Arizona Republic. London. Associated Press. 原著喺12 January 2015歸檔. 喺8 January 2015搵到.
  84. ↑ "Hermione Jean Granger". The Harry Potter Lexicon. 原先內容歸檔喺31 May 2008. 喺8 January 2015搵到.
  85. ↑ 綜合外電報導 (2014-02-02)。〈JK羅琳：妙麗跟哈利較速配〉 (臺灣中文)。中央通訊社。原著喺2014-02-19歸檔。喺2014-02-02搵到。
  86. ↑ "Danaerys Targaryen: Feminism for the Iron Throne". Hbowatch.com. 2013-05-29. 喺2014-05-29搵到.
  87. ↑ 87.0 87.1 Dresang, Eliza T. (2004). "Hermione Granger and the Heritage of Gender". The Ivory Tower and Harry Potter. University of Missouri Press. ISBN 978-0-8262-1549-9.
  88. ↑ UGO Team (2010-01-21). "Best Heroes of All Time". UGO Networks. 原著喺2012-08-25歸檔. 喺2011-04-03搵到.
  89. ↑ "Top 25 Harry Potter Characters". IGN (美國英文). 2017-06-26. 原著喺2018-07-20歸檔. 喺2018-07-20搵到.
  90. ↑ Brian Linder; Phil Pirrello; Eric Goldman; Matt Fowler (2009-07-14). "Top 25 Harry Potter Characters". IGN. 原著喺2009-07-19歸檔. 喺2011-04-03搵到.
  91. ↑ "The 25 Greatest Harry Potter Characters" (英文). Empire. 2011-07-26. 原著喺2018-08-01歸檔. 喺2018-07-20搵到.
  92. ↑ Donahue, Deidre (2001-11-16). "'Potter' inspires academic analysis". USA Today. 原先內容歸檔喺2006-12-08. 喺2011-01-01搵到.
  93. ↑ Manthrope, Rowland (2007-07-29). "A farewell to charms". The Observer. 原先內容歸檔喺2013-08-31. 喺2011-02-10搵到.
  94. ↑ "Saturday Night Live Transcripts". 原先內容歸檔喺2012-08-06. 喺2007-07-27搵到.
  95. ↑ "BBC One press release" (PDF). 2001. 原先內容歸檔 (PDF)喺2012-08-06. 喺2007-05-20搵到.
  96. ↑ "Harry Potter and the Secret Chamberpot of Azerbaijan". tv.com. 原先內容歸檔喺2012-08-06. 喺2007-07-08搵到.
  97. ↑ "French and Saunders: Harry Potter and the Secret Chamberpot of Azerbaijan". .frenchandsaunders.com. 2003-02-19. 原先內容歸檔喺2016-11-19. 喺2007-07-08搵到.
  98. ↑ "Australian television: The Wedge episode guide". 原先內容歸檔喺2010-06-12. 喺2007-05-25搵到.
  99. ↑ HighBeam
  100. ↑ "'Harry Podder' to open on stage". 2005-06-05. 原著喺2016-05-05歸檔 –透過HighBeam Research.
  101. ↑ "Harry Cover". Bédéthèque. 原先內容歸檔喺2006-11-25. 喺2007-06-08搵到.
由「https://zh-yue.wikipedia.org/w/index.php?title=妙麗·格蘭傑&oldid=2207002」收