睡公主 (芭蕾舞劇)

出自維基百科,自由嘅百科全書
(由紫丁香仙子跳轉過嚟)
2017 年一場《睡公主》表演其中一幕;王子咀沉睡緊嘅公主,解開詛咒。
2011 年演嘅《睡公主》第一幕;公主受到咀咒而進入沉睡。

睡公主》(粵拼seoi6 gung1 zyu2)係一齣古典芭蕾舞劇,有一場序幕加三幕。呢齣芭蕾舞劇由著名俄羅斯作曲家柴可夫斯基負責作曲[1],組曲喺 1889 年完成,史上首場公演係喺 1890 年由馬林斯基芭蕾舞團聖彼得堡度演嘅[2]

《睡公主》個故仔建基於同名嘅童話故事:序幕講述公主奧羅拉喺佢出世受洗嘅典禮當中,受眾仙子祝福;喺呢個時候,邪惡又法力強大嘅仙子卡拉波斯嚟到,卡拉波斯向奧羅拉落咗個詛咒,咒佢將會喺 16 歲生日嗰時死亡;在場嘅眾仙子嘗試合力打消個咒,但卡拉波斯法力勁得滯,佢哋打唔消,只係減弱到個咒,令個咒變成「奧羅拉會喺 16 歲嗰時進入一段長久嘅沉睡,及後會有個王子嚟到幫佢解咒」。喺跟住嗰幾幕當中,場表演就係用芭蕾舞技巧表達[3]

  • 奧羅拉喺 16 歲生日進入沉睡(第一幕)、
  • 王子迪斯尼嚟到解咒(第二幕)、
  • 王子同公主結婚,大團圓結局(第三幕)

等嘅情節[4]

時至今日,《睡公主》俾人同《天鵝湖》以及《合桃鉗》並列做柴可夫斯基嘅三大芭蕾舞曲巨作,亦係其中一齣最常俾人攞嚟返炒嘅芭蕾舞劇。

嗌法[編輯]

《睡公主》喺各語言入邊嘅名:

角色[編輯]

宮廷

  • 奧羅拉公主(Princess Aurora),女主角,受詛咒而陷入長久嘅沉睡[註 1]
  • 國王佛羅斯坦廿四世(King Florestan XXIV),奧羅拉個阿爸
  • 皇后(The Queen),奧羅拉個阿媽
  • 卡塔拉表(Catalabutte),主管典禮嘅大臣
  • 皇室人員嗰啲侍臣、男女僕人

... 等等。

仙子

  • 紫丁香仙子(The Lilac Fairy),亦係奧羅拉個神仙教母
  • 水晶噴泉仙子(Crystal Fountain Fairy)
  • 魔法花園仙子(Enchanted Garden Fairy)
  • 林地空野(Woodland Glade Fairy)
  • 歌鳥仙子(Fairy of Songbirds)
  • 金藤仙子(Fairy of Golden Vine)
  • 金仙子(The Gold Fairy)
  • 銀仙子(The Silver Fairy)
  • 藍寶石仙子(The Sapphire Fairy)
  • 鑽石仙子(The Diamond Fairy)

奸角

  • 邪惡仙子卡拉波斯(Carabosse the Evil Fairy)同埋佢班手下

有意娶奧羅拉嘅四位王子

  • 雪利王子(Prince Chéri)
  • 查曼迪王子(Prince Charmant)
  • 霍全利王子(Prince Fortuné)
  • 青荳花王子(Prince Fleur de Pois)

迪斯尼王子同佢嘅同伴

  • 迪斯尼王子(Prince Désiré),男主角,打低卡拉波斯並且幫奧羅拉解開個詛咒
  • 加利法郎(Gallifron),迪斯尼王子個老師
  • 迪斯尼王子啲朋友以及同佢一齊去打獵嘅一眾貴族

童話故事角色

... 等等。

故仔大綱[編輯]

内文:睡公主

序幕:洗禮[編輯]

故仔一開場,國王佛羅斯坦廿四世同佢嘅皇后喜迎佢哋嘅第一個細路-小公主奧羅拉。奧羅拉出咗世冇幾耐,皇宮上下正準備要行典禮同佢做受洗

國王同皇后請咗六位仙子嚟出席典禮,呢六位仙子先後噉出場祝福小公主。頭五位仙子各自對小公主落咗個祝福-佢哋祝公主會生得、勇敢、性格可人、有音樂天份又識惡作劇,而正當法力最高嗰位仙子-紫丁香仙子-正要施法祝福公主之際,邪惡仙子卡拉波斯到場。卡拉波斯好嬲,問國王同皇后點解唯獨係佢冇收到邀請嚟出席典禮,跟住佢仲即刻郁手撕爛卡塔拉表(負責組織典禮嘅大臣)個假髮同埋用手扙毆佢。不過毆完之後卡拉波斯條氣仲未順,於是佢就向小公主落咗一個惡咒:佢咒奧羅拉第時會成為一個又靚、又健康、性格又好嘅女仔,但會喺 16 歲生日嗰日手指俾紡織用嘅針拮到並且當場死亡。國王同皇后嚇到冇咗半條命,ai1卡拉波斯手下留情,但卡拉波斯唔睬佢哋。

喺呢個時候,紫丁香仙子出手:佢法力唔夠卡拉波斯咁勁,打唔消卡拉波斯個惡咒,但佢做到將個咒變弱咗-個咒變咗做

奧羅拉會喺 16 歲生日嗰日手指俾紡織針拮親,但淨係會因此進入 100 年嘅長眠;100 年之後,佢會俾一個靚仔又勇敢嘅王子咀一啖,跟住醒返。

國王同皇后知道個女保得住條命之後,即場鬆返啖氣[3]

2013 年一場《睡公主》表演序幕一段;卡拉波斯(中間)喺度單獨跳舞(變奏舞),佢嚴厲嘅表情加埋強勢嘅動作,表達咗佢作為大奸角幾咁高傲同凶悍。

第一幕:咒語[編輯]

奧羅拉大個咗,終於等到佢 16 歲生日嘅日子。成個皇宮上下都喺度搞舞會同公主慶祝生日。喺呢個時候,國王成個人都囉囉攣噉-因為佢記得卡拉波斯個惡咒。主管典禮嘅大臣走嚟同國王報告,話留意到有平民婦女喺附近做紡織嘢(帶住針),國王一氣之下想重罰嗰班平民婦女,不過皇后出面勸咗吓佢,國王先至冷靜落嚟。

舞會開始,奧羅拉公主出場,一班舞者開始表演跳華爾滋。呢個時候,國王同皇后已經準備好-原來佢哋請咗四位王子嚟出席,想俾奧羅拉揀返個做老公,奧羅拉先後噉同四位王子跳咗陣舞,不過仲未即刻做到決定。舞會進行到咁上下,有一個著住斗篷嘅神秘阿婆到場,佢攞咗紡錘俾奧羅拉睇,奧羅拉對紡織相關嘅物件都覺得好好奇-國王同皇后唔想個詛咒應驗,所以奧羅拉由細到大都唔俾掂紡織嘢。

國王同皇后留意到,即刻想阻止奧羅拉掂個紡錘,但係已經太遲:奧羅拉隻手指已經俾個紡錘拮親;下一刻,奧羅拉就開始頭暈,跟住佢就躂低咗仲冇嗮反應。個神秘阿婆一路大笑一路除咗佢件斗篷-佢就係卡拉波斯。卡拉波斯好得戚,諗住公主已經死咗。不過喺呢個時候,紫丁香仙子出場,佢話奧羅拉冇死,只不過係睏著咗。跟住紫丁香仙子就叫啲僕人幫手將公主捧上去床上面,而佢就向成個王國施咗個咒,令所有人都同奧羅拉一齊睏著,同時一大團有刺嘅植物生咗出嚟,圍住成座皇宮,令王國同外界隔絕。

2017 年一場《睡公主》表演,第一幕一段;奧羅拉受到詛咒影響而進入沉睡。

第二幕:預視[編輯]

過咗 100 年咁耐嘅時間之後,有一班人嚟到沉睡王國附近:迪斯尼王子喺森林度同一班貴族一齊嚟打獵;佢班朋友同其他在場嘅貴族玩得好開心,但迪斯尼想自己一個人靜吓。

迪斯尼一支公走咗入森林深處,撞到紫丁香仙子-紫丁香仙子暗地裏揀咗迪斯尼做幫奧羅拉解咒嘅人。紫丁香仙子施法,令迪斯尼睇到睏緊嘅奧羅拉嘅影像,迪斯尼即刻對奧羅拉產生好感,然後紫丁香仙子就向迪斯尼解釋嗮成件事嘅來龍去脈;迪斯尼聽到,就要求紫丁香仙子帶佢去見公主。

紫丁香仙子應迪斯尼嘅要求,帶佢去收埋咗喺有刺植物入面嘅皇宮。卡拉波斯呢個時候出場,想阻止佢哋幫公主解咒。迪斯尼同紫丁香仙子結合佢哋嘅力量,打低卡拉波斯。最後迪斯尼同紫丁香仙子嚟到睏緊嘅奧羅拉面前,迪斯尼上前喺紫丁香仙子嘅見證下,咀咗奧羅拉一啖。迪斯尼此舉一嘢打破咗卡拉波斯嘅惡咒,下一刻奧羅拉同成個王國嘅人就開始醒返,奧羅拉都覺得對迪斯尼有好感,迪斯尼仲即場求婚,而奧羅拉就喺父母見證之下開心噉接受迪斯尼嘅求婚。

2017 年一場《睡公主》表演,第二幕一段;段舞展現緊迪斯尼同卡拉波斯之間嘅戰鬥。

第三幕:婚禮[編輯]

王國上下都喺度幫迪斯尼同奧羅拉搞婚禮。喺婚禮當中,有好多賓客-包括眾多童話故事人物同紫丁香仙子-到場,而呢啲賓客先後分別為對新人跳舞。

到咗婚禮高潮嗰陣,迪斯尼同奧羅拉一齊跳一場雙人舞(Grand pas de deux;亦都有版本會加入由對新人加埋紫丁香仙子一齊跳嘅大三人舞),所有人跟住再跟住佢哋起舞。

最後迪斯尼同奧羅拉成婚,紫丁香仙子施法祝福對新人。

2017 年一場《睡公主》表演,第三幕一段;迪斯尼同奧羅拉一齊喺度跳大雙人舞。

睇埋[編輯]

註釋[編輯]

  1. 佢個英文名 aurora極光噉解。

參考[編輯]

  • Balanchine, George. 1975. 101 Stories of the Great Ballets. New York, USA: Anchor Books. ISBN 0-385-03398-2
  • Hurley, Thérèse. "Opening the door to a fairy tale world: Tchaikovsky's ballet music" in The Cambridge Companion to Ballet. 2007. Cambridge, UK: Cambridge University Press. ISBN 978-0-521-53986-9.
  • Kirstein, Lincoln. 1970. Four Centuries of Ballet: Fifty Masterworks. New York, USA: Dover. ISBN 0-486-24631-0.
  • Warrack, John. 1973. Tchaikovsky. New York, USA: Charles Scribner's Sons.
  • Warrack, John. 1979. Tchaikovsky Ballet Music. Seattle, USA: University of Washington Press. ISBN 0-295-95697-6.
  • Warrack, John. 1985. Tchaikovsky's Ballets. Oxford, UK: Oxford University Press. ISBN 0-19-315314-9.

引述[編輯]

  1. Chaĭkovskiĭ, Modest Ilʹich; Newmarch, Jeaffreson; Rosa Harriet (1906). The life & letters of Peter Ilich Tchaikovsky. J Lane. p. 735.
  2. Roger Fiske (1973): Eulenberg Edition, Foreword to the complete score of the ballet: "On 2 Feb 1939 Sadler's Wells presented the ballet in London with Margot Fonteyn in the title role... This was the first successful production outside Russia, and it led to The Sleeping Beauty becoming extremely popular in all countries where classical ballet is cultivated. . . The way in which he developed his themes and the lavish originality with which he scored the music raised his ballets far above those his predecessors had composed."
  3. 3.0 3.1 Adam Maskell (2016). Carabosse casts a curse - Matthew Bourne's Sleeping Beauty. PBS.
  4. Balanchine, George. 1975. 101 Stories of the Great Ballets. New York, USA: Anchor Books.

[編輯]