圖像用家介面

圖像用家介面

圖像用家介面（英文：graphical user interface，簡稱 GUI）係指用圖像顯示嘅電腦操作用家介面，相對於廿世紀中齋用文字嘅命令行介面。

基礎

内文：用家介面

俾用家透過圖像化嘅圖標或者聲訊號嚟同一件電子架生互動－即係用圖像化嘅方式（而唔係純文字同數字）向用家俾輸出，用到視窗同進度條等嘅控件（widget），而用家可以用踎士等嘅架生點擊畫面入面嘅物體同掣，並且靠噉嚟向部電腦俾輸入。圖像用家介面係喺廿世紀後半橛嗰陣興起嘅，俾人指係令到電腦大眾化嘅主因之一－因為圖像用家介面對一般人嚟講易用過打前嘅命令行介面好多。

廿一世紀最常見嗰種圖像用家介面（WIMP 風格）一般會有以下嘅子系統：

• 輸入系統：由踎士等嘅輸入架生接收訊號，知道「用家嘅指標（cursor）喺邊個位」等嘅資訊；
• 視窗管理員（window manager）：控制啲視窗嘅位置同埋外形（例：知道用家個指標喺某個視窗上面，而且用家撳緊踎士左掣，表示個視窗嘅坐標可能要跟住改變）；
• 視窗系統（windowing system）：負責按接收到嘅命令－包括咗「部電腦處於乜嘢狀態」嘅資訊（例：「指標喺邊個坐標」、「每個視窗應該喺邊個坐標」、「邊個視窗喺面邊個喺底」... 呀噉）－計出個熒幕上每一點要出乜嘢色，再將呢啲訊號傳俾熒幕，等個熒幕顯示出要顯示嘅畫面（可以睇埋電腦圖像）；

...等等。呢啲系統加埋一齊，就會顯示出一個有視窗（Window；用嚟顯示檔案目錄同埋行緊嘅應用程式）、圖標（Icon；顯示檔案目錄入面有邊啲檔案）、選單（Menu；顯示可能嘅命令同選項）同埋指標（Pointer；位置由踎士控制、可以攞嚟點擊啲嘢）嘅圖像用家介面。

喺初期，圖像用家介面嘅基礎其實唔係爾啲，而係比喻，即係將電腦入面嘅抽象物件比喻做現實中可能遇到嘅實物，再用圖標代表嗰種實物，令圖示喺感知上有明顯嘅承擔特質，所以易用。而選單就代表喺實物做嘅各種操作，所有唔可以用手勢代表嘅操作都喺選單，同樣令動作都有明顯嘅承擔特質。後來嘅介面出現咗用實物比喻唔到嘅圖標、操作唔喺選單、要做同現實無關嘅手勢等等冇明顯承擔特質嘅情況，圖像化介面淪為為咗圖像化而圖像化，令圖像化介面唔一定易明易用。

睇埋

• 事件驅動編程