人類處理器模型

人類處理器模型（human processor model）係認知心理學上嘅一個理論模型，主要攞嚟估計一位用家做某一樣認知作業（例如係撳某一個掣）要用幾耐嘅時間；根據呢個模型，人喺做認知作業嗰陣會經過一柞基本步驟，包括咗

• 喺注意力嘅影響下，用感官感知外界資訊並且理解自己周圍發生緊啲乜嘢事（perceptual subsystem）、
• 用工作記憶同長期記憶等嘅記憶功能整合手上嘅資訊（cognitive subsystem）同埋
• 用資訊整合得出嘅結果控制身體做出適當嘅郁動（motor subsystem）；

即係好似下圖噉：

人類處理器模型喺人機互動（human-computer interaction；思考人同電腦之間嘅互動嘅領域）分析（例如係對易用性嘅分析）上相當有用。例：一班設計者家陣想設計網購網站，佢哋用心理實驗嘅方法知道咗，用家對眼望勻嗮成個網頁平均要用 230 毫秒，理解得到嗮望到嘅係啲乜就平均要用 300 毫秒，做決策（「買唔買」同埋「要買邊樣嘢」）就平均要用咁多咁多毫秒，而腦部傳訊號落手嘅肌肉令手做出「撳掣」嘅動作就平均要用咁多咁多毫秒... 等等；將呢啲數值加埋之後，班設計者就可以估計到用家平均會喺個網頁上逗留大約幾耐嘅時間。