透母

透母（粵拼：tau3 mou5；中古漢語拼音：thuh）係中古漢語聲母，屬舌音嘅端組，係次清聲母。呢個聲母接一、四等韻母，同二、三等徹母互補。下面係佢嘅例字。

一等	二等	三等	四等
吞thon、討thaux、退thuaih、託thak			廳theng、體thex、眺theuh、餮thet

擬音

因爲大多數嘅漢語、域外方音、對音中，透母大多發/tʰ/，所以學界一致同意將佢擬音爲/tʰ/。

透母各學者擬音
高本漢	李方桂	陸志韋	董同龢	李榮	王力	邵榮芬	蒲立本	周法高	鄭張尚芳	潘悟雲
tʻ	th	tʻ	tʻ	tʻ	tʻ	tʻ	th	tʻ	th	th

大部分學者都認爲透母字來自上古音嘅/tʰ/音，呢個音喺上古音到中古音嘅演變好穩定。

透母喺現代粵語繼續係古音狀態，對應嘅粵拼係t。對聲調嘅影響係，透母字派入陰聲調。

下面係一啲例字嘅古今音對比，第一欄例字，第二欄中古音（切韻），第三欄現代粵音：

調返轉頭，現代粵語中嘅t聲母來源自中古音嘅透、定二母。

透母喺吳語同粵語一樣，維持喺古音狀態，對應嘅吳拼係th。

透母喺普通話同粵語一樣，維持住古音狀態，對應嘅普拼係t。

喺日文，無論漢音定吳音，透母都係た行（[t]／[t͡ʃ]／[t͡s]）。

喺韓文，一等韻嘅透母大多保留古音，讀ㅌ（[tʰ]），如塔讀탑；少部分送氣，讀ㄷ（[t]），如禿讀독。四等韻嘅透母由於介音，令聲母塞擦化，變成ㅊ （[t͡ʃʰ]），如天讀천。